1. Marthi chuan a nuṭa chungah eng thil nge thleng tûra a rin tlat? (A thupui chunga milem en rawh.)

ISUA ṭhian hnai tak leh a zirtîr Marthi chuan a nuṭa Lazara thi chu a sûn hle a. Amah thlamuan theitu an awm em? Aw, awm e. Isua chuan: “I nuṭa a tho leh ang,” tiin a tiam a. Chu thu chuan a lungngaihna zawng zawng chu a tikiam thei lo ngei mai. Mahse, Marthi chuan Isua thutiam chu a ring a, heti hian a sawi a ni: “Ni kin nia thawhlehnaah chuan a tho leh ang tih ka hria e,” tiin. (Johana 11:20-24) Nakin huna lo awm tûr thawhlehna chu a hre chiang a. Mahse, Isua’n chumi ṭum chuan thilmak a ti a. Chu mi nî ngei chuan Lazara chu a kaitho a ni.

2. Marthi neih ang rin tlatna chu engvângin nge neih ve i duh?

² Isua leh a Pa chuan kan hmangaih thi tawhte chu tûnah an kaitho nghâl ang tih beisei chhan tûr kan nei lo va. Mahse, Marthi angin i hmangaih thi tawhte chu nakinah an tho leh ang tih i ring tlat em? I pasal, i nupui, i nu leh pa, i pi leh pu, a nih loh leh i fa duh takte i chân pawh a ni mai thei.  Chûng i duh takte nêna inkuah a, inbiak a, nuih dun theih hun chu i nghâkhlel ngei ang. Marthi ang bawkin: ‘Thawhlehnaah chuan ka hmangaihte an tho leh ang tih ka hria,’ tia sawi chhan tûr ṭha tak i nei ve a. Kristian tinte’n chutianga kan rin tlat chhan chu kan ngaihtuah a ṭha a ni.

3, 4. Isua’n tûn hnai mai khân eng nge a tih a, chu chuan Marthi rinna chu engtin nge a tihngeh?

³ Marthi chu Jerusalem bul hnaia awm a nih avângin Galili ram, Nain khaw bula Isua’n hmeithainu fapa a kaihthawh lai chu a hmuh a rinawm lo. Mahse, chu chanchin chu a hre mai thei a ni. Isua’n Jaira fanu a kaitho tih pawh a hriat a rinawm. Chumi ina awm zawng zawngte chuan naupang chu ‘a thi tawh tih an hria a.’ Mahse, Isua chuan a kut a vuan a: “Chêmtê, tho rawh!” a ti a. Tichuan, naupang chu a tho ta nghâl a ni. (Luka 7:11-17; 8:41, 42, 49-55) Marthi leh a laizâwnnu Mari chuan Isua’n dam lo te a tidam thei tih an hria a. Chuvângin, an hnênah Isua chu awm ta se, Lazara a thi lo vang tih an ring a ni. Mahse, tûnah ani chu a thi tawh si a, Marthi’n eng nge a beisei tâk? Lazara chu nakin hun, ‘ni kin niah’ a tho leh ang tia a sawi kha chhinchhiah ang che. Engvângin nge chu chu a rin tlat? I hmangaihte tân pawh tiamin, nakin huna lo awm tûr thawhlehna chu engvângin nge i rin tlat theih?

⁴ Thawhlehna ring tlat tûrin chhan ṭha tam tak a awm a. Chûng zînga ṭhenkhat chu kan sawiho vang. Dik tak chuan, Pathian Thua i lo ngaihtuah ngai loh; mahse, i hmangaihte hmu leh tûra i rinna tinghet thei thute i hmu chhuak mai thei a ni.

5. Engvângin nge Marthi’n Lazara chu a tho leh ang tih a ring tlat?

⁵ Marthi chuan: ‘Ka nuṭa a tho leh ang tih ka beisei,’ tia a sawi lo chu chhinchhiah ang che. Chu aiin: “A tho leh ang tih ka hria,” tiin a sawi zâwk a ni. Engvângin nge chutianga a rin tlat? Tûn hmâa mitthi tho lehte chanchin a hriat vâng a ni. Chûng thute chu a naupan laiin inah emaw, inkhâwmna inah emaw a hria a ni thei. Bible-a târ lan mitthi tho leh pathumte chungchâng i lo bih chiang ang u.

6. Marthi hriat ngei tûr thilmak chu eng nge ni?

⁶ Mitthi tho leh hmasa ber chu Pathianin zâwlnei Elija hnêna thilmak tihtheihna a pêk hun laia thleng a ni a. Israel chhim lama awm, Zarephath tia koh Kanaan mite khuaah zâwlnei lo mikhualtu hmeithai rethei pakhat a awm a. Chu hmeithai leh a fapa chu an nun zawm zêl theih nân an chhangphut bêl ruak lo tûr leh an hriak ûm kang lo tûrin Jehova’n thilmak a tihsak a ni. (1 Lalte 17:8-16) A hnuah, a fapa chu dam lovin a thi ta a. Tichuan Elija’n a tihdamsak a. Elija chuan naupang chu dekin Jehova hnênah: “Aw LALPA ka Pathian, khawngaih takin he naupang nunna hi amahah hian han awmtîr leh ang che,” tiin a ṭawngṭai a. Tichuan a lo nung leh ta a ni! Pathianin Elija ṭawngṭaina chu chhângin naupang chu a tinung leh a. Hei hi Bible-a kan hmuh mitthi tho leh hmasa ber a ni. (1 Lalte 17:17-24 chhiar rawh.) Marthi chuan he thilthleng mak tak hi a hriat ngei a rinawm.

7, 8. (a) Elisa’n lusûn nu pakhat chu engtin nge a thlamuan? (b)Elisa thilmak tih chuan Jehova chungchâng eng nge a târ lan?

 ⁷ Bible-a târ lan mitthi tho leh pahnihna chu zâwlnei Elisa hmanga kaihthawh a ni a. Sunem khawpuiah chuan fa nei lo Israel hmeichhe pakhat a awm a. Ani chuan Elisa chunga khualchhâwnthiamna a lantîr avângin Jehova’n he hmeichhia leh a pasal upa tak chu fapa pein mal a sâwm a ni. Mahse, kum rei lo têah naupang chu a thi leh ta mai a. A nu rilru nat dân tûr chu han mitthla teh. A lungchhiat êm avângin Karmel tlângah Elisa va hmu tûrin kilometer 30 (mêl 19) a kal a. Elisa chuan a chhiahhlawh Gehazia chu naupang kaitho tûrin Sunem khuah a kaltîr hmasa a. Mahse, Gehazia’n naupang chu a kaitho thei lo. A hnuah, lungngai tak naupang nu leh Elisa chu an rawn thleng ve ta a.—2 Lalte 4:8-31

⁸ Elisa chu naupang ruang awmna pindanah chuan a va lût a, a ṭawngṭai a. Jehova chuan Elisa ṭawngṭaina chu chhângin naupang chu mak takin a tinung leh a ni. A nuin a fapa lo nung leh a hmuh chuan a va hlim tak em! (2 Lalte 4:32-37 chhiar rawh.) Hanni ṭawngṭainate chu a hre chhuak leh pawh a ni mai thei. Hanni chuan Jehova’n fapa Samuela a pêk hmâ chu fa a nei thei lo va. Jehova chuan “thlânah a chhuktîr ṭhîn a, a hruai chhuak bawk ṭhîn,” tih a hriat avângin Pathian hnênah a ṭawngṭai ta a. (1 Samuela 2:6) Pathianin Sunem khuaa naupang chu kaithovin mitthite a tinung leh thei tih a târ lang a ni.

9. Bible-a mitthi tho leh a pathumna chu sawi rawh.

⁹ Thilmak dang leh chu Elisa thih hnua thilthleng a ni a. Kum 50 chuang zâwlnei hna a thawh hnu chuan Elisa chu ‘thihpuina tûr natnain a lo na a,’ a thi ta a ni. Hunte a liam zêl chuan, Elisa ruhte chauh a bang tawh a ni. Ni khat chu, Israel mite’n mi pakhat phûm tûra an kal lai mêk chuan hmêlmate lo kal chu an hmu ta thut mai a. A rang thei ang bera an tlân chhiatnaah mitthi chu Elisa thlânah an paih lût ta a. “A ruang chuan Elisa ruhte chu a zuk deh veleh a lo nung leh a, a ding ta mai a,” tiin Bible chuan a sawi. (2 Lalte 13:14, 20, 21) Hêng thute hian Marthi chu Pathianin thihna chungah thu a nei tih a rin nghehtîr a ni. Hei hian Pathian thiltihtheihnain tâwpintai a nei lo tih rin tlatna a neihtîr ang che.

10. Engtin nge Petera chuan thi tawh Kristian unaunu chu a ṭanpui?

¹⁰ Kristian Grik Pathian Lehkha Thu-ah pawh Pathian chhiahhlawh rinawmte kaihthawh mitthi tho lehte chungchâng a chuang a. Nain khaw bulah leh Jaira ina Isua mitthi kaihthawh chungchâng kan sawi tawh a. Hun engemaw chen a liam hnuah, tirhkoh Petera chuan Tabitha tia koh Dorki chu a kaitho va. Ruang awmna pindanah chuan Petera chu a va lût a, a ṭawngṭai a, tichuan: “Tabith, tho rawh!” a ti a. Chu hmeichhia chu a tho ta nghâl a, chuta awm Kristiante hnênah “damin a kawhhmuh a.” Chu thilthleng chuan mite  rilru a khawih êm avângin chumi khuaa mi tam tak chuan “Lalpa chu an ring ta a.” Chûng zirtîr tharte chuan mite hnênah Isua chungchânga chanchin ṭha an hrilh bâkah Jehova’n mitthite a kaitho thei tih pawh an hrilh bawk a ni.—Tirhkohte 9:36-42.

11. Doctor Luka chuan Eutuka chungchâng eng nge a sawi a, chu thilthleng chuan engtin nge mi dangte a nghawng?

¹¹ Mitthi tho leh dang hmutute pawh an awm a. Ni khat chu, Troas khuaa inkhâwmna in pakhatah tirhkoh Paula pawh a awm ve a, chu hmun chu tûnah chuan Turkey chhimchhak lama awm a ni. Paula chuan zan lai thlengin thu a sawi a. Tlangvâl pakhat Eutuka chuan tukverhah ṭhuin a ngaithla a. A mutthlûk avângin in chhâwng thum aṭang chuan a tla thla ta a. Eutuka va en hmasa bertu chu Luka a ni mai thei. Doctor a nih angin Eutuka chu inhliam satliah mai leh thidang mai a ni lo tih a hria a. A thi ngei a ni! Paula pawh chu a rawn chhuk ve a. Eutuka chu a pawm a: “A hnuk a lo la chat lo ve,” tia a’n sawi chuan mite’n mak an ti hle a. He thilmak hian a hmutu zawng zawngte chungah nasa takin nghawng a nei a ni. Tlangvâl chu a thi a, a tho leh tih an hriat chuan “thlamuan namênin an thlamuang ta lo va.”—Tirhkohte 20:7-12.

12, 13. Kan sawiho tâk mitthi thawhlehnate ṭanchhanin eng zawhnate nge kan zawh mai theih?

¹² Kan sawi tâk mitthi thawhlehnate chuan Marthi neih ang rin tlatna min neihtîr ve tûr a ni. Nunna petu kan Pathian chuan mitthite chu a kaitho thei tih kan ring nghet tlat thei a. Pathian chhiahhlawh rinawm Elija te, Isua te, leh Peterate chu mitthi tho leh hmutute an ni chu ngaihvenawm tak a ni. Chûngte chu Jehova thilmak tih hun laia thilthleng a ni a. A nih leh, chutianga thilmak a thlen tawh loh huna thite chungchâng hi eng nge ni ve? Mi rinawm a hmei a pate chuan Pathianin  mitthite chu nakin hunah a kaitho vang tih an beisei thei ang em? Marthi’n a nuṭa chungchângah: “Ni kin nia thawhlehnaah chuan a tho leh ang tih ka hria e,” tia a sawi laia a neih ang rinna chu an nei ve thei ang em? Marthi chuan thawhlehna a awm ang tih engvângin nge a rin theih a, nang pawhin engvângin nge i rin theih?

¹³ Bible-a chhinchhiah thu tam tak chuan Pathian chhiahhlawh rinawmte’n nakin huna lo awm tûr thawhlehna an rinzia a târ lang a. Chûng zînga ṭhenkhat chu i lo en ang u.

14. Abrahama chungchâng thuziak chuan thawhlehna chungchâng eng nge min zirtîr?

¹⁴ Jehova’n Abrahama hnênah hun rei tak chhûng a lo nghah a fapa Isaaka chunga ti tûra a ngen kha han ngaihtuah teh. Jehova chuan: “I fapa, i fapa neih chhun, i hmangaih tak, Isaaka ngei kha hruai la, Moria ramah chuan kal la, chutah chuan ka hrilh tûr che tlâng pakhatah chuan hâlral thilhlanah hlân rawh,” a ti a. (Genesis 22:2) He thupêk a hriat huna Abrahama rilru chu engtin nge a awm i rin? Jehova chuan Abrahama thlahte aṭangin mi zawng zawng malsâwm an ni ang tiin a tiam a. (Genesis 13:14-16; 18:18; Rom 4:17, 18) Chu malsâwmna chu “Isaakaah hian” a lo awm ang tiin a sawi bawk. (Genesis 21:12) Mahse, Abrahama’n a fapa a hlan chuan chu chu engtin nge a thlen theih ang? Pathianin Isaaka a kaitho thei tih Abrahama’n a rinzia hrilhfiah tûrin Paula chu thlarauva thâwkkhum a ni. (Hebraia 11:17-19 chhiar rawh.) Abrahama’n Isaaka chu dârkâr rei lo têah, ni khat hnuah, a nih loh leh chawlhkâr khat chhûnga tho leh nghâl tûra a beisei thu Bible-in a sawi lo. Abrahama’n a fapa thawhleh hun tûr chu a hre lo va. Mahse, Jehova’n a tinung leh thei tih erawh a ring tlat a ni.

15. Mi rinawm Joba chuan eng beiseina nge a neih?

¹⁵ Mi rinawm Joba pawhin nakin hunah thawhlehna a awm ang tih a hria a. Thing  chu râwt a nih pawhin a chawrno leh ang a, thingkung a ni leh ang tih a hria a ni. Mahse, mihring chu chutiang a ni thei lo. (Joba 14:7-12; 19:25-27) Mi a thih chuan amahin a intinung leh thei lo va. (2 Samuela 12:23; Sâm 89:48) Chu chu Pathianin mitthi a kaitho thei lo a tihna a ni lo. Dik takin, Joba chuan Jehova’n amah a hriat reng a ring a. (Joba 14:13-15 chhiar rawh.) Joba chuan kaihthawh a nih hun tûr chu a hre thei lo va. Mahse, mihring nunna Siamtu chuan a hre rengin a kaitho vang tih erawh a ring tlat a ni.

16. Vântirhkohvin Daniela chu engtin nge a tihchak?

¹⁶ Mi rinawm Daniela pawh hi han ngaihtuah teh. A dam chhûngin Jehova chhiahhlawh rinawm tak a nih avângin Jehova’n a ṭanpui a. Ṭum khat chu vântirhkoh pakhatin Daniela chu “mi duhawm tak” tiin a ko va, ‘thlamuang takin awm la, chak takin awm rawh’ tiin a hrilh bawk.—Daniela 9:22, 23; 10:11, 18, 19.

17, 18. Jehova’n Daniela chu eng nge a tiam?

¹⁷ Daniela chuan kum 100 a tlin dâwnin a chunga thil lo thleng tûrte chu a ngaihtuah mai thei a. Ani chuan nun leh chu a beisei em? Beisei teh meuh mai! Daniela lehkhabu tâwp lamah Pathianin: “Nang chu tâwpna thleng chuan kal rawh; nîte tâwpnaah chuan i châwl ang,” tia a tiam chu kan chhiar a. (Daniela 12:13) Daniela chuan mitthite chu an châwl a ni tih leh nakin lawka a thlenna tûr ‘thlânah chuan thiltih tûr emaw, remruat tûr emaw, hriatna emaw, finna emaw a awm lo,’ tih a hria a ni. (Thuhriltu 9:10) Chu chu Daniela tân tâwpna a ni lo. Jehova chuan a nakin hun tûr thutiam ropui tak a pe a ni.

¹⁸ Jehova vântirhkohvin a hnênah: “Nîte tâwpnaah chuan i châwl ang a, i chan tâwkah chuan i awm ang,” tiin a hrilh a ni. Daniela’n chu thil thlen hun tûr chiah chu a hre lo va. A thi ang a, a châwl ang tih erawh a hria a ni. Mahse, “I chan tâwkah chuan i awm ang,” tih thutiam a hriat chuan nakinah a tho leh ang tih a hre thiam a. Chu chu ‘nîte tâwpna,’ a thih aṭanga hun rei tak hnua thleng tûr a ni. Jerusalem Bible chuan: “Tâwpna hunah i chanpual atân i tho leh ang,” tiin a sawi.

19, 20. (a) Kan sawiho tâk thilthlengte chuan Isua hnêna Marthi thusawi nên eng inzawmna nge a neih? (b) A dawtta thuziakah eng nge kan sawiho vang?

¹⁹ Marthi chuan mi rinawm a nuṭa Lazara chu “ni kin nia thawhlehnaah chuan a tho leh ang,” tia ring tûrin chhan ṭha tak a nei tih a chiang hle. Daniela hnêna Jehova thutiam leh nakin huna lo awm tûr thawhlehna chungchânga Marthi rinna nghet tak chuan tûn laiah rinna nghet tak min neihtîr tûr a ni. Thawhlehna chu a awm ngei dâwn si a.

²⁰ Tûn hmaa mitthi thawhlehna chungchânga thilthleng dik takte kan hre tawh a. Chûngte chuan mitthite an nung leh thei tih a târ lang a ni. Pathian chhiahhlawh rinawm a hmei a pate’n nakin huna lo awm tûr thawhlehna chu an beisei tih pawh kan hria a. A nih leh, thawhlehna a awm ang tih tiam a nih aṭanga hun rei tak hnuah, a thleng tak tak thei tih finfiahna a awm em? A thleng thei a nih chuan, chu chuan nakina lo awm tûr thawhlehna beisei chhan tûr ṭha lehzual min pe a ni. Chu chu eng hunah nge a thlen ang? Chûng thute chu a dawta thu ziakah kan sawiho vang.