“Pathian Lamah Ka Beisei”
“Adama hnuhnûng zâwk chu nunna petu thlarau a lo ni a.”—1 KORINTH 15:45.
HLA: 111, 12
1-3. (a) Kan thurin bulpui zîngah eng nge kan telh ang? (b) Engvângin nge thawhlehna chu a pawimawh êm êm? (A thupui chunga milem en rawh.)
TUEMAWIN i rinna bul berte zîngah engte nge tel tiin zâwt ta che sela, engtin nge i chhân ang? Jehova chu Siamtu leh nunna min petu a ni tih i rinzia i sawi ang a. Tlanna atâna thi Isua Krista i rinzia pawh i sawi ngei bawk ang. Pathian mite chatuana an nunna tûr hmun, lei Paradise lo awm tûr chungchâng pawh i sawi ang. A nih leh, thawhlehna chu i thurin ngainat tak zînga mi a nih thu i târ lang ang em?
2 Hrehawm nasa taka dam khawchhuah leh leia chatuana nun kan beisei a nih pawhin, kan thurin bulpui berte zîngah thawhlehna kan telhna tûr chhan ṭha tak kan nei a ni. Tirhkoh Paula chuan thawhlehna pawimawhzia a sawi a. “Mitthi thawhlehna rêng rêng a awm si loh chuan Krista pawh kha kaihthawhin a awm lo vang,” tiin a sawi a ni. Isua kaihthawh a nih loh chuan vânah Lal niin ro a rêl thei lo ang a, kan thu hrilh hian awmzia a nei lo bawk ang. (1 Korinth 15:12-19 chhiar rawh.) Mahse, Isua chu a tho leh a ni tih kan hria a. A thawhlehna kan rin avângin mitthite an nung leh ang tih pawm duh lotu Saddukaite ang kan ni lo. Mite’n min nuihsawh a nih pawhin, Pathianin mitthite a kaitho thei tih kan ring nghet tlat a ni.—Marka 12:18; Tirhkohte 4:2, 3; 17:32; 23:6-8.
3 Paula chuan “mitthi thawhlehna” zirtîrna chu “Krista thu bul” zînga pakhat a ni tih a sawi a. (Hebrai 6:1, 2) Chu chu thawhlehna a rinzia a sawi uarna a ni a. (Tirhkohte 24:10, 15, 24, 25) Pathian Thu aṭanga kan thil zirte zînga thurin bulpui pakhat a ni chung pawhin, thawhlehna chungchâng hi ngun taka kan zir a la ngai a ni. (Hebrai 5:12) Engvângin nge?
4. Thawhlehna chungchângah eng zawhnate nge kan zawh mai theih?
4 Mite’n Bible an zir ṭan hian, Lazara thawhlehna ang chi tûn hmâa thawhlehna chanchinte chu an chhiar ṭhîn a. Anni chuan Abrahama te, Joba te, leh Danielate’n nakin hunah mitthite an tho leh ang tih an rinzia an hre bawk. Kum za tam tak kal taa thawhlehna thutiam kan rin theih chhan Bible aṭanga finfiah tûrin tuemawin zâwt ta che sela, engtin nge i chhân ang? Nakina thawhlehna lo thlen hun tûr chu Bible-in a sawi em? Hêng zawhnate chhânna hian kan rinna a tichak ngei ang.
KUM ZA TAM TAK KALTAA HRILH LAWK THAWHLEHNA
5. A hmasain, eng nge kan sawiho vang?
5 Mi chu a thih hnu rei vak lovah, tho leh tûr anga ngaihruat chu a awlsam thei a. (Johana 11:11; Tirhkohte 20:9, 10) Mahse, kum za tam tak hnuah a tho leh ang tih thutiam chu kan ring thei ang em? Tûn hma kum tam tak kal taa thi tawhte emaw, tûn hnai maia thite emaw chungchâng a sawi pawh ni se, chu chu kan ring thei ang em? Dik tak chuan, thawhlehna thutiam a nih hnu kum za tam taka thleng famkim thawhlehna chu i ring tawh a. Chu chu eng thawhlehna nge ni? Chu chuan i beisei nakin huna lo awm tûr thawhlehna nên eng inkungkaihna nge a neih?
6. Engtin nge Sâm 118-na thlen famkimnaah Isua a tel?
6 Davida ziah ni âwm tak Sâm 118-na hmanga kum tam tak kal taa hrilh lâwk thawhlehna chu i lo sawiho vang u. Chu Sâm buah chuan: “Aw LALPA, khawngaih takin chhandam la!” tih leh “LALPA hminga lo kal chu a eng a thâwl e,” tih hi a tel a. Mite chuan he Messia chungchâng hrilh lâwkna hi Isua thih hma ni rei lotê, Nisan 9-a Jerusalema a luh ṭuma thilthleng sawina niin an ngai a. (Sâm 118:25, 26; Matthaia 21:7-9) A nih leh, Sâm 118-na chuan kum tam tak a liam hnua lo awm tûr thawhlehna chungchâng chu engtin nge a sawi? He fakna hlaa: “In satute lung duh loh kha a kila lung ṭangkai ber a lo ni ta,” tih pawh hi chhinchhiah ang che.—Sâm 118:22.
‘In satute duh loh’ Messia (Paragraph 7-na en rawh)
7. Engtin nge Judate chuan Isua an hnâwl?
7 Messia hnâwltu “in satute” chu Juda hruaitute an ni a. Isua chu an ngaihthah mai emaw, Krista niin an pawm duh lo mai emaw a ni lo. Juda mi tam tak chuan Pilata hnênah tihlum tûra ngênin Isua chu an Luka 23:18-23) Chuvângin, Isua thihnaah mawh an phûr a ni.
hnâwl a. (Pathianin Isua chu “a kila lung ṭangkai ber” ni tûrin a kai tho leh (Paragraph 8, 9-na en rawh)
8. Isua chu engtin nge “a kila lung ṭangkai ber” a nih theih?
8 Isua chu hnâwl leh tihhlum a nih si chuan, engtin nge “a kila lung ṭangkai ber” a nih theih? A thawhleh chauhvin chu chu a ni thei ang. Lo enkawltute hnêna a bâwihte tîrtu huan neitupa tehkhin thu Isua’n a sawi khân a tifiah lehzual a. Lo enkawltute chuan chûng bâwihte chu an lo cheibâwl ṭha lo va. A tâwpah, lo neitupa chuan lo enkawltute ngaihthlâk beiseiin a fapa ngei chu a tîr ta a. Mahse, a fapa chu an lo that a ni. Chu tehkhin thu a sawi hnuah, Isua chuan Sâm 118:22-naa hrilh lâwkna thute chu a sawi chhâwng a. (Luka 20:9-17) He Bible châng vêk hi tirhkoh Petera’n Juda ‘hotute, upate, lehkhaziaktute, Jerusalem khuaa awm khâwmte’ hnênah a sawi a ni. Ani chuan: “Nazareth Isua Krista, . . . in khenbeh, Pathianin mitthi zîng ata a kaihthawh,” tiin a sawi a. “Nangni in satute u, in lung paih, a kila lung ṭangkai ber lo ni ta kha amah hi a ni e,” tiin a sawi bawk.—Tirhkohte 3:15; 4:5-11; 1 Petera 2:5-7.
9. Sâm 118:22-ah chuan eng thilthleng chhinchhiah tlâk tak nge hrilh lâwk a nih?
9 Sâm 118:22-a hrilh lâwkna chuan kum za tam tak hnua lo awm tûr thawhlehna chu a sawi lâwk tih a chiang hle. Messia chu hnâwl leh tihhlum a ni ang a. Mahse, kaihthawh leh niin, a kila lung ṭangkai ber a lo ni ang. A thawhleh hnu chuan Isua chu “mihring sak zîngan, min chhandam tûr hming” nei awmchhun a ni.—Tirhkohte 4:12; Ephesi 1:20.
10. (a) Sâm 16:10-na chuan eng nge a hrilh lâwk? (b) Sâm 16:10-na hian Davida chungchâng a sawi lo tih engvângin nge kan chian theih?
10 Thawhlehna chungchâng sawina Bible châng dang i lo ngaihtuah ang u. Chu chu kum sâng khat hnu daiha thleng famkim tûr a ni a. Chu chuan thawhlehna chu sawi lâwk emaw, tiam emaw a nih aṭanga hun rei tak a liam hnuah pawh a thleng famkim thei tih min rin nghehtîr ang. Sâm 16-naah, Davida thusawi: “Ka thlarau Seol hnênah i hnutchhiah dâwn si lo va. I mi thianghlim hi ṭawihna hmuh i phal dâwn hek lo,” tih kan chhiar a. (Sâm 16:10) Ani chuan a thi thei lo vang a, thlanah pawh a kal hek lo vang a tihna a ni lo. Pathian Thu chuan Davida chu a lo upa a “a puteho hnênah a muhîl ve ta a, Davida khawpuiah an phûm” tih chiang takin a sawi a ni. (1 Lalte 2:1, 10) A nih leh, he Bible châng hian tu chungchâng nge a sawi?
11. Petera’n Sâm 16:10-na chu engtik hunah nge a hrilhfiah?
11 Davida’n hêng thu a ziah aṭanga kum sâng khat hnu daihah, Petera chuan Sâm 16:10-nain tu chungchâng nge a sawi tih a hrilhfiah a. Isua a thi a, a thawhleh hnu chawlhkâr rei vak lovah, Petera chuan Juda mi sâng tam takte leh saphunte chu a hrilh a ni. (Tirhkohte 2:29-32 chhiar rawh.) Ani chuan Davida chu a thi a, an phum tih a hriatnawntîr a. Davida’n ‘a lo hriat lâwk reng avângin Missia thawh leh tûr thu a sawi a ni’ tia Petera’n a sawi belh pawh khân an pawm loh thu Bible-in engmah a sawi lo.
12. Engtin nge Sâm 16:10-na chu a thlen famkim a, chu chuan thawhlehna thutiam chu engtin nge a nemngheh?
12 Petera’n a thusawi thlâwptu atân Sâm 110:1-naa Davida thusawi chu a la chhâwng a. (Tirhkohte 2:33-36 chhiar rawh.) Bible ṭanchhana Petera thusawi chuan Isua chu “Lal leh Krista” a ni tih mipuite a rin nghettîr a ni. Mite chuan Isua a thi a, a thawhleh khân Sâm 16:10-na chu a thleng famkim a ni tih an hre thiam a. A hnuah, tirhkoh Paula’n Pisidia rama Antiokei khuaa Judate hnêna a sawi khân chumi thu vêk chu a sawi a ni. Chu thu chuan an rilru a khawih êm avângin hriat belh zêl an duh a. (Tirhkohte 13:32-37, 42 chhiar rawh.) Nakin huna lo awm tûr thawhlehna chungchâng sawina hêng Bible hrilh lâwknate hi kum za tam tak hnua thleng famkim pawh ni se, a rin tlâk tih kan ring tûr a ni.
ENGTIKAH NGE THAWHLEHNA CHU A THLEN ANG?
13. Thawhlehna chungchângah eng zawhnate nge kan zawh mai theih?
13 Thawhlehna chu sawi lâwk a nih hnu kum za tam takah a thleng thei tih hriat chu a phûrawm hle a. Mahse, mi ṭhenkhat chuan: ‘Ka hmangaihte hmu tûr chuan hun rei tak ka nghah a ngai tihna a ni em? tiin an zâwt mai thei. Engtik hunah nge thawhlehna chu a thlen ang?’ Isua chuan a tirhkohte chu an hriat loh leh an hriat theih loh thilte a awm tih a hrilh a. “Pain a hun leh a nî, ama thu thua awma a ruat” thil tam tak a awm a ni. (Tirhkohte 1:6, 7; Johana 16:12) Mahse, thawhlehna thlen hun tûr chungchânga thu ṭhenkhat erawh kan hria a ni.
14. Engtin nge Isua thawhlehna chu a thawhleh hmaa tho lehte laka a danglam?
14 Bible-a târ lan thawhlehna pawimawh ber chu Isua thawhlehna a ni a. Thihna ata kaihthawh a nih loh chuan, tumahin kan hmangaih thi tawhte hmuh leh beiseina kan nei lo vang. Elija leh Elisate’n an kaihthawhte ang chi, Isua hun hmâa tho lehte chu kumkhuain an nung lo va. An thi leh a, vaivutah an chang a ni. Isua erawh chu “mitthi zîng ata kaihthawhin a awm a.” Ani chu ‘a thi leh dâwn tawh lo va, thihna chuan ama chungah thu a nei tawh lo.’ Vânah ‘kumkhuain’ a nung a ni.—Rom 6:9; Thu Puan 1:5, 18; Kolossa 1:18; 1 Petera 3:18.
15. Engvângin nge Isua chu “thawh hmahruaitu” tia koh a nih?
Tirhkohte 26:23) Mahse, ani chu vân lam nun neia tho leh awmchhun a ni lo. A tirhkoh rinawmte chu vânah amah nên ro an rêl ang tih a tiam a. (Luka 22:28-30) Mahse, an thih hnuah chauh chu lâwmman chu an dawng ang. Isua ang bawkin, thlarau taksain an tho leh ang. Paula chuan: “Krista chu mitthi zîng ata kaihthawhin a awm tak zet a ni, muhîlte thawh hmahruaitu a lo ni ta,” tiin a ziak a. Chu chu vâna kal tûr tho leh dangte an awm ang a tihna a ni. Ani chuan: “Mahni hun ṭheuh zêlah; Krista chu thawh hmahruaitu a ni a; chu mi hnuah a lo awm leh chhûngin, Krista tate chu,” tiin a sawi a ni—1 Korinth 15:20, 23 New World Translation.
15 Thlarau mi nia vân lam nunna nei tûra Isua thawhlehna chu thawhlehna hmasa ber leh pawimawh ber a ni a. (16. Vân lam thawhlehna thlen hun tûr chungchâng hre thiam tûrin engin nge min ṭanpui?
16 Paula thusawi hian vân lam thawhlehna a thlen hun tûr hre thiam tûrin min ṭanpui a. Chu chu Krista lo awm leh chhûngin a thleng ang. Kum tam tak aṭang tawhin, Jehova Thuhretute chuan kum 1914-ah Krista “lo awm lehna’ chu a inṭan tawh tih Bible hmangin an hrilhfiah a. Tûnah hian a “lo awm lehna” hun chhûngah kan awm mêk a, he khâwvêl suaksual tâwpna hi a hnai tawh hle a ni.
17, 18. Krista lo awm leh chhûngin hriak thih ṭhenkhatte chu engtin nge an awm ang?
17 Bible chuan vân lam thawhlehna chungchângah: “Muhîlte chanchin in hriat loh kan duh lo ve. Isua a thi a, a tho leh ta tih kan rin si chuan . . . muhîl tawhte chu Pathianin ama rualin a rawn hruai ve bawk ang. Keini Lalpa lo awm thlenga nunga lo la awm rengate hian muhîl tawhte chu kan lehkhalh tawp lo vang, tih hi. Lalpa ngei chu . . . vân aṭangin a lo chhuk dâwn si a; tin, Kristaa thi tawhte chu an tho hmasa ang a; chu mi hnuah chuan keini nunga lo la awm rengate hi boruakah Lalpa hmuak tûrin anmahni rualin chhûm zîngahte khian lâk chhohvin kan awm ang; chutichuan kumkhuain Lalpa hnênah kan awm tawh ang” tiin a sawi belh a ni.—1 Thessalonika 4:13-17.
18 Thawhlehna hmasa chu Krista lo awm leh hnu engtik hun emawah a inṭan ang. Hrehawm nasa tak chhûnga nung dama la awm hriak thihte chu “chhûm zîngahte khian lâk chhohvin,” an awm ang. (Matthaia 24:31) Chumi awmzia chu eng nge ni? ‘Lâk chhohva’ awmte ‘an muhîl kher lo vang’ tih awmzia chu, thihnaah rei tak an awm a ngai lo tihna a ni. Chu aiin, an thih hunah, ‘tawtawrâwt hnuhnûng ber rîk hunah chuan rei lo têah, mit khap kâr lovah tihdanglamin an awm vek tawh ang.’—1 Korinth 15:51, 52.
19. “Thawhlehna ṭha lehzual” chu eng nge ni?
19 Tûn laia Kristian rinawm a tam zâwkte chu hriak thih an ni lo va, vânah Krista nêna rorêl tûra thlan an ni lo. Anni chuan he khawvêl suaksual tâwp hun “Lalpa nî” chu an beisei zâwk a ni. Tâwpna lo thlen hun tûr chiah chu tûman an hre lo; mahse, thilthlengte chuan a hnai tawh tih a târ lang. (1 Thessalonika 5:1-3) Pathian khawvêl thar a lo then hun chuan, thawhlehna chi dang a awm ang. Chutih hunah chuan, mite chu leia nung tûrin an tho leh ang a, ṭhat famkimna leh chatuana nun beiseina an nei ang. Chu chu tûn hmaa mitthi tho leh, a hnu engtik hun emawa thi lehte thawhlehna aia “thawhlehna ṭha lehzual” a ni ang.—Hebrai 11:35.
20. Thawhlehna chu fel taka ruahman a ni ang tih engvângin nge kan rin theih?
20 Bible chuan vâna tho lehte chu “mahni hun ṭheuh zêlah” an tho leh tih a sawi a. (1 Korinth 15:23) Chuvângin, leia thawhlehna pawh fel taka ruahman a ni ang tih kan ring thei a ni. Chumi avâng chuan hetiang zawhnate: Tûn hnai maia thite chu Krista Kum Sâng Rorêl ṭan tîrh lamah tho lehin, anmahni hretu an hmangaihte’n an hmuak ang em? Tûn hmaa kaihruaitu thiam, mi rinawmte chu khawvêl thara Pathian mite kaihhruai tûrin an tho hmasa ang em? Jehova rawngbâwl ve ngai lote chu an tho ve ang em? Eng hunah leh eng hmunah nge an thawh ang? tihte hi a lo awm thei a ni. Zawh duh tam tak kan nei ngei ang. Mahse, tûnah, chûng thilte chungchânga kan lo buai a ngai lo. A thlen hun tûr nghah mai chu a ṭha zâwk. Chûng thilte Jehova tih famkim dân hmuh chu a phûrawm hle ang tih kan chiang thei a ni.
21. I beisei chu eng nge ni?
21 Chumi hun a thlen hma chuan, Jehova chunga kan rinna kan tinghet tlat tûr a ni. Ani chuan Isua hmangin mitthite chu A hriatrengnaah an awm tih leh an nung leh ang tih min tiam a. (Johana 5:28, 29; 11:23) Jehova’n mitthite a kai tho ang tih finfiahna dang leh chu Abrahama te, Isaaka te, Jakobate chu “ani ngaih chuan . . . an nung vek,” tia Isua thusawiah a lang a ni. (Luka 20:37, 38) Tirhkoh Paula’n: “Thawhlehna a awm ang tih Pathian lamah ka beisei,” tia a sawi angin, keini pawh chutianga sawina tûr chhan ṭha tam tak kan nei a ni.—Tirhkohte 24:15.
Hmahruaitu: Thlai thar azawnga rah hmasa ber, a nih loh leh thil rêng rênga chhuak hmasa ber a ni. Isua chu thlarau mi nia vâna chatuana nung tûra tho leh hmasa ber a nih avângin “hmahruaitu” a ni