DIANA-i chu kum 80 chuang a ni a, kum kal ta engemaw chhûng khân harsatna nasa tak a tuar a. Alzheimer natna avânga tar enkawlnaa awm a pasal chuan a boralsan a. A fapa pahnih pawh an boral tawh a, amah ngei pawhin hnute cancer a vei bawk. Mahse, Diana-i chu inkhâwmahte leh rawngbâwlnaah a hlim reng tih unaute’n an hmu a ni.

John-a chuan kum 43 aia rei bial kantu hna a thawk a. A chanvo chu a ngainat êm avângin thil dang tih reng a ngaihtuah ngai lo. Mahse, a chhûngte dam lo a enkawl a ngaih avângin bial kantu hna chu a chawlhsan a ngai ta a. Amah hretu unaute’n inkhâwmpuiahte an hmuh chuan amahah danglamna engmah a awm lo tih an hmu a. A la hlim reng a ni.

Engtin nge Diana-i leh John-a chu an hlim reng theih? Hrehawm tuar tuemaw chu engtin nge a hlim theih? Miin a ngainat tak a chanvo a chân hunah engtin nge a hlim reng theih? Bible chuan chhânna a pe a ni. “Mi felte chu LALPA-ah an lâwm ang,” tiin. (Sâm 64:10) Hlimna tluantling min neihtîr theitu leh neihtîr thei lotu kan hriat chuan he thu dikzia hi kan hre chiang lehzual ang.

Thil ṭhenkhat chuan hlimna a thlen fo niin a lang. Entîr nân, nupa inhmangaih tak hi han ngaihtuah teh. A nih loh leh, nu leh pa rawn ni ta emaw, Jehova rawngbâwlnaa chanvo thar dawng tuemaw chu han ngaihtuah teh. Jehova hnên aṭanga lo kal chûng thilpêkte chuan hlimna min neihtîr a ni. Ani chuan inneihna leh fate neih theihna min pêk bâkah, a inawpna pâwla hna thawh theihna pawh min pe bawk.—Genesis 2:18, 22; Sâm 127:3; 1 Timothea 3:1.

Mahse, hlimna thlentu thil ṭhenkhatte chu rei lote chhûng awh chauh a ni thei a. Kawppui tuemaw zâwk chu a rinawm lo thei a, a boral theih avângin, chu chu thil lungchhiatthlâk tak a ni. (Ezekiela 24:18; Hosea 3:1) Fate chuan nu leh pa emaw, Pathian thu emaw chu an âwih lo thei a, hnawhchhuah hial pawh an ni thei a ni. Entîr nân, Samuela fate chuan Jehova pawm zâwngin a rawng an bâwl lova, Davida chuan Bath-sebi  nêna, a thil sual tih avângin chhûngkuaah buaina tam tak a neih phah a. (1 Samuela 8:1-3; 2 Samuela 12:11) Chutiang thil a thlen chuan hlimna ni lovin, lungngaihna leh rilru natna tam tak a thleng a ni.

Chutiang bawkin, dam lohna te, chhûngkaw enkawl ngaih vâng te, a nih loh leh inawpna pâwla inthlâk danglamna a awm avângtein Jehova rawngbâwlnaa kan chanvote chu chelh reng theih loh châng a awm thei a. An chanvo chelh tawh lo mi tam tak chuan chûng an chanvote avânga an neih hlimnate chu an ngaih thu an sawi a ni.

Chûng hlimna tûr chhante chuan rei a awh ngai lo tih awlsam takin kan hre thei a. Chuvângin, nun a harsat hun pawha hlimna neih reng theih dân a awm em? A awm ngei tûr a ni, Samuela te, Davida te, leh mi dangte chuan harsatna an tawh lai pawha hlimna an hloh loh avângin.

Isua chuan hlimna dik tak chu a hria a. Leia a lo kal hmain, ani chuan “a [Jehova] bulah ka hlim êm êm bawk ṭhîn,” tia a sawi thu Bible-in min hrilh a. (Thufingte 8:30) Mahse, he leia a lo kal khân, harsatna nasa takte hmachhawn châng a nei a ni. Chuti chung pawhin, Isua chuan a Pa duh zâwng tihnaah hlimna a nei a. (Johana 4:34) Hrehawm a tawrh hnuhnûng ber khân engtin nge a awm? “A hmaa hlimna awm avâng chuan mualphona chu ngainêpin kraws chu a tuar a,” tiin kan chhiar a. (Hebrai 12:1-2) Chuvângin, hlimna chungchânga Isua sawi thil pahnih aṭangin thil tam tak kan zir thei a ni.

Ṭum khat chu, zirtîr 70-te chu thu an hrilh zawh hnuah Isua hnênah an lo kîr leh a. An thiltihte leh ramhuaite an hnawhchhuah avângin an hlim hle a. Mahse, Isua’n: “Ramhuaite in thu thuin an awm avâng hian lâwm suh u; vâna in hming ziak a nih avângin lâwm zâwk rawh u,” tiin a hrilh a ni. (Luka 10:1-9, 17, 20) Ni e, Jehova lawm hlawh nih chu a pawimawh zâwk a, eng chanvo hlu ai pawhin hlimna min thlen zâwk a ni.

Ṭum dang lehah, Isua’n mipui hnênah thu a sawi laiin Juda hmeichhe pakhat chuan a zirtîrna  chu ṭha a tih êm avângin Isua hringtu nu chu, chutiang fapa a neih avângin a hlim hle ang tiin a sawi a. Mahse, Isua chuan: “Pathian thu hriaa zâwmte hi mi hamṭha an ni zâwk e,” tiin a chhâng a ni. (Luka 11:27, 28) Fa chhuanawm takte chuan min tihlim thei a. Mahse, hlimna tluantling min neihtîrtu chu Jehova thuâwihna leh amah nêna inlaichînna ṭha neihna hi a ni.

Jehova lawm hlawh nia inhriatna chuan hlimna nasa tak min pe a. Harsatna tawh chu thil nuam ni lo mah se, chu chuan kan hlimna a la bo lo. Dik tak chuan, chûng harsatnate kâra kan rinawm tlat chuan kan hlimna chu a pung lehzual ang. (Rom 5:3-5) Chu bâkah, Jehova chuan amah rinchhantute chu a thlarau thianghlim a pe a, hlimna chu thlarau rah pêng pakhat a ni a. (Galatia 5:22) Chu chuan Sâm 64:10-a: “Mi felte chu LALPA-ah an lâwm ang,” tih hi hre thiam tûrin min ṭanpui a ni.

Chu chuan Diana-i leh John-a te’n harsatna an hmachhawn chung pawha hlimna an neih reng chhan chu min hriatthiamtîr a. Diana-i chuan: “Fain a nu leh pa a rinchhan angin Jehova chu ka rinchan a. Hlim hmêl pua thu hril zawm zêl thei tûrin mal min sâwm ni hian ka inhria,” tiin a sawi a ni. John-a chu a chanvo a chelh tawh loh hnuah pawh hlimna nei reng tûr leh rawngbâwlnaa inhmang reng tûrin engin nge ṭanpui? Ani chuan: “Kum 1998-a Ministerial Training School zirtîrna chanvo ka neih aṭangin tûn hma zawng aiin mi mal inzirna ka nei nasa zâwk a ni,” tiin a sawi. An nupa chuan Jehova’n eng chanvo pawh pe se, thawh an inhuam reng avângin insiamremna an neih tûrte chu a awlsam lehzual a. Chûng kan thiltihte avâng chuan inchhîrna kan nei lo,” tiin a hrilhfiah a ni.

Mi tam tak pawhin Sâm 64:10-a thu hi a dikzia an hmu a. Entîr nân, United States Bethel-a kum 30 chuang rawngbâwl tawh nupa tuak khat hi han ngaihtuah teh. A hnuah, special pioneer an thawk a. Anni chuan: “I thil ngainat tak i chân hunah lunghnualna neih chu thil pangngai tak a ni a; mahse, i lunghnual reng a ngai lo,” tiin an sawi a ni. Chanvo thar an dawn veleh kohhran rualin thu hrilh rawngbâwlnaah an tel nghâl a. “Thil engemaw bîk takte atân kan ṭawngṭai a. Tichuan, kan ṭawngṭaina chhânna kan hmuh hian kan chakin, kan hlim phah sâwt a ni. Kohhran thara kan thlen hnu rei vak lovah unaute chuan pioneer an thawk nghâl a, Bible zirpui hmasâwn tak pahnih neiin malsâwmna kan dawng a ni,” tiin an sawi bawk.

Ni e, hlim reng chu thil awlsam a ni lo. Kan lunghnual chângte pawh a awm ngei ang. Mahse, Jehova chuan Sâm 64:10-a thute hmangin rinnghehna min neihtîr a. Kan lunghnual hunah pawh, harsatna kâra kan rinawm tlat chuan ‘LALPA-ah kan lâwm ang’ tih kan chiang thei. Jehova thutiam “vân tharte leh lei thar” thlen famkim hun tûr chu kan beisei thei a ni. Chutih hunah chuan, Jehova thiltih tûr zawng zawng avângin mi tin chu an ṭha famkim tawh ang a, ‘kumkhuain lâwmin an hlim’ tawh ang.—Isaia 65:17, 18.

Chu mi awmzia chu han ngaihtuah teh. Tûk tin damna leh hrisêlna ṭha neiin kan tho tawh ang a. Tûn hmaa min tilungchhetu thilte chu engpawh ni se, chûngte chuan rilru hrehawmin min siam tawh lo vang. Jehova chuan “tûn hma thilte chu hriat rengin a awm tawh lo vang a, rilruah pawh a lût tawh hek lo vang,” tiin min tiam a ni. Kan hmangaih thi tawhte chu kan hmu leh ang a, Isua’n a kaihthawh kum 12 mi hmeichhe naupang nu leh pate angin: ‘Mak tih namênin mak kan ti lo vang.’ (Marka 5:42) A tâwpah chuan leia mi tinte chu mi fel dik tak an ni tawh ang a, kumkhuain “LALPA-ah an lâwm ang.”