1-2. Angelito-a thiltawnin a târ lan angin, mi tin hian eng nge kan tih ang?

JEHOVA Thuhretu nu leh pate enkawl seilen i ni em? I nih chuan, an hnên aṭangin Jehova nêna mi mal inlaichîna i rochun thei lo tih hre reng ang che. Kan nu leh pate chuan Pathian rawng an bâwl emaw, bâwl lo emaw pawh ni se, mi tin hian Jehova nêna inṭhian ṭhatna kan siam a ngai a ni.

² Unau Angelito-a thiltawn hi han ngaihtuah teh. Ani chu Thuhretu chhûngkuaa seilian a ni a. Mahse, a tleirâwl lai chuan Pathian hnaih niin a inhre lo. Ani chuan, “Ka chhûngte tih ang tih ve ka duh avâng chauhva Jehova rawngbâwl ka ni,” tiin a sawi. Mahse, Angelito-a chuan Pathian Thu chhiar nân leh chhût ngun nân hun pêk a tum ta a, Jehova hnênah a ṭawngṭai ngun lehzual bawk a ni. Eng nge a rah chhuah? Ani chuan, “Kan Pa duh tak Jehova hnaih theih dân kawng awmchhun chu mahni ngeia amah hriat hi a ni,” tiin a sawi. Angelito-a thiltawn aṭanga zawhna pawimawh ṭhenkhat lo chhuak chu: Jehova hria tih leh hre chiang tih danglamna chu eng nge ni? Engtin nge Jehova chu kan hriat chian theih? tihte hi a ni.

3. Jehova hria tih leh hre chiang tih danglamna chu eng nge ni?

³ Miin Pathian hming a hriat a, a thusawi leh thiltih ṭhenkhat a hre ṭhîn tawh a nih chuan Jehova chanchin a hria kan ti thei ang. Mahse, Jehova hre chiang tûr chuan chu aia tam  kan tih a ngai a ni. Jehova leh a mize duhawm takte zir nân hun kan hman a ngai a. Chutianga kan tih chauhvin, a thusawi leh a thiltih chhante chu kan hre thiam ṭan thei ang. Chu chuan kan ngaih dân te, thu tlûkna siam te, leh thiltihte a pawm leh pawm loh hre thiam tûrin min ṭanpui ang. Jehova duh zâwng kan hriat tawh chuan, chumi mila hma kan lâk a ngai a ni.

4. Bible-a entîrnate ngaihtuahna chuan engtin nge min ṭanpui ang?

⁴ Mi ṭhenkhat chuan Jehova rawngbâwl kan duh avângin min sawisêl thei a, a mite nêna kan in kawm ṭan chuan chu aia nasain min dodâl pawh a ni thei. Mahse, Jehova kan rinchhan tlat chuan, ani chuan min kalsan ngai lo vang a. Amah nêna chatuan daih inlaichînna nghet tak nei tûrin lungphûm kan siam a ni bawk ang. Jehova chu chutiang tak chuan kan hre chiang thei ang em? Hre chiang thei e! Mosia leh Lal Davida te ang, ṭha famkim lote entawn tûr siam chuan chu chu thil theih a ni tih a târ lang. An thiltihte kan ngaihtuah laiin, zawhna pahnih kan chhâng bawk ang: Engtin nge Jehova chu an hriat? An entawn tûr siamte aṭanga kan zir theihte chu eng nge ni? tihte hi.

5. Mosia’n eng tih nge a thlan?

⁵ Mosia chuan a thu hriat milin thil a ti a. Kum 40 vêl a nih khân, Mosia chuan ‘Pharaoa fanua fapa’ nia hriat hlawh aiin, Pathian hnam thlan Hebrai mite zînga awm chu a thlang zâwk a ni. (Heb. 11:24) Ani chuan dinhmun sâng tak chu a kalsan a. Pathian pakhat anga ngaih, rorêltu thiltithei tak Pharaoa thinurna hmachhawn huamin, Aiguptaa bâwiha awm Hebrai mite zîngah a awm a ni. Rinna thiltih langsâr tak a va ni êm! Mosia chuan Jehova a rinchhan tlat a. Chutiang rinchhanna chu chatuan daih inlaichînna atâna lungphûm ang a ni.—Thuf. 3:5.

6. Mosia thiltawn aṭangin eng nge kan zir theih?

⁶ Kan tâna zir tûr chu eng nge ni? Mosia angin, kan za hian thu tlûkna siam tûr kan nei ṭheuh va: Pathian rawngbâwl leh a mite nêna inkawm chu kan thlang ang em? tih hi. Pathian rawngbâwl tûr chuan thil ṭhenkhat kan chân a ngai mai thei a, Jehova hre lotute dodâlna pawh kan tâwk thei bawk. Mahse, kan Pa vâna mi kan rinchhan tlat chuan, min ṭanpui ngei ang tih kan ring thei a ni.

7-8. Mosia’n eng nge a zir zawm zêl?

⁷ Mosia chuan Jehova miziate leh a duh zâwngte chu a zir zawm zêl a. Entîr nân, Jehova’n Mosia chu Aigupta bâwih ata Israel mite hruai chhuak tûra a tirh khân, ani chuan mahni inrintâwkna a tlachhamin, tling lo a intih thu a sawi nawn fo va. Pathian chuan khawngaihna nei taka chhâng lêtin, Mosia chu a ṭanpui a ni. (Ex. 4:10-16) Chuvângin, Mosia chuan Pharaoa hnênah rorêlna thuchah thiltithei tak chu a sawi thei ta a. Chu bâkah, Jehova’n a thiltihtheihna hmanga Israel mite chhanchhuak a, Pharaoa leh a sipaite Tuipui Sena a tihboral lai chu a hmu a ni.—Ex. 14:26-31; Sâm 136:15.

⁸ Mosia’n Israel mite Aigupta ram ata a hruai chhuah hnu chuan, anni chu an phunnawi reng a. Chuti chung pawhin, Mosia chuan Jehova’n sal tânna aṭanga a chhuah zalêntîr mite a dâwrnaa dawhtheihna nasa tak a lantîr chu a hmu a. (Sâm 78:40-43) Chu bâkah, Mosia ngen anga Jehova’n a rilru a thlâk khân, inngaihtlâwmna chhinchhiahtlâk tak A lantîr chu a hmu bawk a ni.—Ex. 32:9-14.

9. Hebrai 11:27-a sawi angin, Mosia leh Jehova inlaichînna chu eng ang khawpa ṭha nge a nih?

 ⁹ Aigupta ram aṭanga a chhuah hnuah, Mosia leh Jehova inlaichînna chu a ṭhat êm avângin, ani chuan vâna a Pa chu mita hmu ang mai a ni. (Hebrai 11:27 chhiar rawh.) Chu an inlaichînna hnai tak chu târ langin, Bible chuan: “Miin a ṭhian a bia ang mai hian LALPAN Mosia chu inhmatawnin a be ṭhîn a,” tiin a sawi a ni.—Ex. 33:11.

10. Jehova hre chiang tûr chuan eng nge kan tih ngai?

¹⁰ Kan tâna zir tûr chu eng nge ni? Jehova hre chiang tûr chuan a miziate kan zir mai ni lovin, a duh zâwng kan tih a ngai bawk. Tûn laia Jehova duh zâwng chu ‘mi zawng zawng chhandama an awm leh thutak an hriat’ hi a ni a. (1 Tim. 2:3, 4) Pathian duh zâwng kan tih theih dân kawng khat chu mite hnêna Jehova chanchin zirtîr hi a ni.

11. Mite hnêna Jehova chanchin kan zirtîr hian, engtin nge ani chu kan hriat chian lehzual?

¹¹ Mite hnêna Jehova chanchin kan zirtîr hian, keimahni ngei pawhin Jehova chu kan hre chiang lehzual ṭhîn a. Entîr nân, thinlung dik tak putute hmu tûra min ṭanpui hian, Jehova khawngaihna chu chiang takin kan hmu nghâl a ni. (Joh. 6:44; Tirh. 13:48) Kan Bible zirpuite’n an thil chîn ṭha lote bânsan a, mihring thara an inthuam ṭan kan hmuh hian Pathian Thu thiltihtheihna chu kan hmu a. (Kol. 3:9, 10) Pathianin kan rawngbâwlna biala mi tam takte hnêna a chanchin zir theihna leh chhandam nih theihna hun remchâng tam tak a pêkna aṭangin Pathian dawhtheihna kan hmu bawk a ni.—Rom 10:13-15.

12. Exodus 33:13-a târ lan angin, Mosia’n eng nge a dîl a, engvângin nge?

¹² Mosia chuan Jehova nêna an inlaichînna chu a ngaihlu hle a. Pathian hminga thil ropui tak takte a tih hnuah pawh, Mosia chuan Jehova hnênah amah ṭanpui tûrin a la dîl chhunzawm zêl a ni. (Exodus 33:13 chhiar rawh.) Chutianga a ngen lai chuan, Mosia chu kum 90 dâwn lai a ni tawh a; mahse, ani chuan a hmangaih tak a Pa vâna mi chanchin zir tûr tam tak a la nei tih a hria a ni.

13. Pathian nêna kan inṭhian ṭhatna kan ngaihhlutzia târ lan theih dân kawng ṭha ber zînga pakhat chu eng nge ni?

¹³ Kan tâna zir tûr chu eng nge ni? Eng anga rei pawhin Jehova rawng lo bâwl tawh mah ila, amah nêna kan inlaichînna chu kan ngaihlu reng tûr a ni. Pathian nêna kan inṭhian ṭhatna kan ngaihhlutzia târ lan theih dân kawng ṭha ber zînga pakhat chu ṭawngṭaia amah pan hi a ni.

14. Engvângin nge ṭawngṭaina chu Pathian chungchâng hre tûra min ṭanpuitu pawimawh tak a nih?

¹⁴ Inbiak pawhna ṭha chu inlaichînna nghet tak neih theih nâna thil pawimawh ber a ni a. Chuvângin, Pathian chu ṭawngṭaiin hnaih fo la, i rilru chhûngrila i ngaihtuahnate chu hrilh hreh ngai suh. (Eph. 6:18) Turkey rama unaunu Krista-i chuan: “Jehova ka hmangaihna leh amah ka rinchhanna chu ṭawngṭaia a hnêna ka ngaihtuahnate ka hrilh hunah leh min ṭanpui dân ka hmuh apiangin a ṭhang chho va. Jehova’n ka ṭawngṭainate a chhâng tih ka hmuh hian, chu chuan ani chu ka Pa leh Ṭhian anga thlîr tûrin min ṭanpui a ni,” tiin a sawi.

15. Engtin nge Jehova’n Lal Davida chungchâng chu a sawi?

¹⁵ Lal Davida chu Pathian Jehova hnêna inpumpêk hnama piang a ni a. Mahse, Davida chuan a chhûngte sakhaw thiltih dân zui mai aia tam a ti a ni. Pathian nêna mi mal inlaichînna ṭha a siam avângin, Jehova chuan ani chu a ngaina hle a. Ani chuan Davida chu “ka thinlung ang pu mi,” tiin a sawi  a ni. (Tirh. 13:22) Engtin nge Davida’n Jehova chu chuti taka a hnaih theih?

16. Davida’n thil siamte a enna aṭangin Jehova chungchâng eng nge a hriat?

¹⁶ Davida chuan thil siam aṭangin Jehova chungchâng a zir a. Ani chuan a tleirâwl laiin a pa berâmte vêngin pâwn lamah a hun tam tak a hmang a. Chutih hun lai aṭang tawhin, Jehova thil siamte chu a chhût ngun a nih a rinawm. Entîr nân, Davida’n zân thiang taka vân a han thlîr chuan arsi pe unte chu a hmu mai ni lovin, chûng arsite Siamtu miziate pawh a ngaihtuah ngei bawk ang. Davida chu he thu hi ziak tûra chhêttîrin a awm a ni: “Vânte khian Pathian ropuizia chu a hriattîr a; boruak zau tak khian a kut chhuak chu a lantîr ṭhîn a,” tih hi. (Sâm 19:1, 2) Davida’n mihringte siam kan nih dân a ngaihtuah chuan, thil siamte aṭangin Jehova finna mak tak chu a hmu a. (Sâm 139:14) Jehova kut chhuakte hriatthiam a tumna aṭangin engmah tham a nih lohzia a inhria a ni.—Sâm 139:6.

17. Thil siamte kan chhût ngunna aṭangin eng nge kan zir theih?

¹⁷ Kan tâna zir tûr chu eng nge ni? Thil siamte chu ngaihven ṭhîn rawh. Jehova siam he leilung mawi takah hian awm satliah ringawt lovin, chûng thil siamte chhût ngun nân hun hmang ṭhîn rawh! I nî tin nunah, i chhehvêla awm thilsiamte—thingkûng te, ramsa te, leh mihringte—chungchâng chhût ngunna chuan Jehova chanchin a zirtîr ang che. Chutiang chuan, nî tin i hmangaih tak i Pa chanchin zir tûr i nei reng thei ang a. (Rom 1:20) Tichuan, nî tin hian amah i hmangaihna chu a ṭang chho deuh deuh tih i hmu bawk ang.

18. Sâm 18-naa târ lan angin, Davida’n eng nge a hriat?

¹⁸ Davida chuan Jehova’n a ṭanpui tih a hria a. Entîr nân, Davida’n sakeibaknei leh savawm laka a pa berâmte a chhanhim khân, chûng sakawlh chak takte hneh thei tûrin Jehova’n a ṭanpui tih a hria a. Indo thiam tak leh mi hrawl tak Goliatha a hneh khân, Davida’n amah kaihruaitu chu Jehova a ni tih chiang takin a hria a ni. (1 Sam. 17:37) Chu bâkah, amah thîktu Lal Saula laka a tlân chhiat khân, amah chhanhimtu chu Jehova a ni tih a hre bawk. (Sâm 18, a chunga thuziak) Mi chapo chuan chûng hlawhtlinnate avângin mahni inchawimawi a duh ngei ang. Mahse, Davida chu mi inngaitlâwm tak a nih avângin, a nuna Jehova ṭanpuinate chu a hre thei a ni.—Sâm 138:6.

19. Davida thiltawn aṭangin eng nge kan zir theih?

¹⁹ Kan tâna zir tûr chu eng nge ni? Jehova ṭanpuina kan dîl mai aia tam kan tih a ngai a. Ṭanpuina min pêk hun leh min pêk dânte chu hriat kan tum bawk tûr a ni. Tih theih chin tâwk kan nei tih inngaitlâwm taka kan pawm chuan, kan tih theih lohte ti thei tûrin Jehova’n min ṭanpui tih chiang takin kan hmu ang. Jehova min ṭanpuina kan hmuh apiangin, amah nêna kan inlaichînna a nghet lehzual ang. Kum tam tak chhûng Jehova rawng lo bâwl tawh Fiji rama unau Isaac-a chuan chumi dikzia chu a hmu a. Ani chuan: “Ka nun ka han thlîr lêt hian Bible ka zir ṭan aṭanga tûn thlengin, Jehova min ṭanpuinate chu ka hmu thei a ni. Chûngte avâng chuan, ani chu ka tân mi tak tak a ni,” tiin a sawi.

20. Davida leh Pathian inlaichînna aṭangin eng nge kan zir theih?

²⁰ Davida chuan Jehova miziate a entawn a. Jehova chuan a miziate entawn thei tûrin min siam a. (Gen. 1:26) Jehova miziate kan zir tam poh leh a miziate kan hre tam lehzualin, amah kan entawn thei lehzual ang. Davida chuan a Pa vâna mi chu a hriat chian êm  avângin, mi dangte a dâwrnaah ani chu a entawn thei a ni. Entîrna pakhat hi han ngaihtuah teh. Davida chuan Bath-sebi laka a uire a, a pasal a tihhlum khân Jehova chungah thil sual a ti a. (2 Sam. 11:1-4, 15) Mahse, Jehova chuan mi dangte chunga zahngaihna lantîr ṭhîntu Davida chungah zahngaihna lantîr a duh a ni. Davida chuan Jehova nêna inlaichînna ṭha tak a neih avângin, Israel mite lal duh ber zînga pakhat a nih bâkah, Jehova’n ani chu Israel lal dangte entawn tûr atân a hmang a ni.—1 Lal. 15:11; 2 Lal. 14:1-3.

21. Ephesi 4:24 leh 5:1-na nêna inmilin, “Pathian awm dân latute” nihna chuan eng nge a rah chhuah?

²¹ Kan tâna zir tûr chu eng nge ni? “Pathian awm dân latute” kan nih a ngai a. Chutianga tihna chuan hlâwkna min thlen mai bâkah, amah hriat chianna min neihtîr bawk. A miziate kan entawn hian a fate kan ni tih kan târ lang a ni.—Ephesi 4:24; 5:1 chhiar rawh.

22-23. Jehova chungchâng kan zirte kan nunpui chuan eng thil nge thleng ang?

²² Kan hriat tâk angin, Jehova chuan a thil siamte leh a Thu, Bible aṭangin a chanchin a târ lang a. Chu lehkhabu danglam tak chu Mosia leh Davida te ang, kan entawn theih Pathian chhiahhlawh rinawmte entawn tûr siamin a khat a ni. Jehova chuan ama lama a tih tûr chu a ti a. Keini pawhin a chanchin a tam thei ang bera zirin, kan tih tûrte kan tih ve a ngai a ni.

²³ Jehova chanchin chu zir zawh tih a awm thei ngai lo vang. (Thur. 3:11) A chanchin kan hriat tam lam ni lovin, kan thu hriatte mila kan nun chu thil pawimawh tak a ni. Kan thil zirte kan nunpui a, kan hmangaih tak kan Pa entawn kan tum chuan, ani chuan min hnaih chhunzawm zêl ang. (Jak. 4:8) A Thu hmangin, amah zawngtute chu a thlahthlam ngai lo vang tih min tiam a ni.