1. Mi tam takin hnathawh chu engtin nge an thlîr?

I AWMNA hmuna mi tam zâwk chuan hnathawh chu engtin nge an thlîr? Ram tam taka mite chu tûn hma zawng aiin an thawk rimin an thawk rei lehzual a. A lutuka hnathawk mite chuan chawlh hahdam nân te, chhûngte nêna hun hmanho nân te, leh an thlarau lam mamawh phuhhrûk nânte hun an nei ṭhîn lo. (Thur. 2:23) Kawng leh lamah, mi ṭhenkhat chuan hna an thawk peih lo hulhual a, an thawh loh chhante chu chhuanlam an siam ṭhîn a ni.—Thuf. 26:13, 14.

2-3. Jehova leh Isua’n hnathawh chungchângah entawn tûr eng nge an siam?

² Khawvêl mite thlîr dân inbûk tâwk lo tak nêna inkalhin, Jehova leh Isua’n hna an thlîr dân chu han ngaihtuah teh. Jehova chu hnathawk mi a ni tih rinhlelh rual a ni lo. Isua chuan: “Ka Pain tûn thleng pawhin hna a thawk reng a ni, kei pawhin ka thawk ve a ni,” tiin chiang takin a sawi a. (Joh. 5:17) Thlarau thil siam chhiar sên lohte leh vân boruak zau tak a siam laia Pathian hnathawh zawng zawng chu han ngaihtuah teh. Kan chênna leilung mawi takah hian Pathian kut chhuakte chu kan hmu bawk a. Fakna hla phuahtu chuan: “Aw LALPA, i thiltihte chu a va tam êm! Finnain i siam vek a ni: leilung hi i hausaknain a khat a nih hi,” tiin a sawi a ni.—Sâm 104:24.

³ Isua chuan a Pa a entawn a. Finna anga târ lan Fapa chu Pathianin “vân a tihngheh laiin” a tel ve a ni. Ani chu Jehova bulah “mi themthiam angin” a awm a. (Thuf. 8:27-31) A hnu kum tam takah, leia a awm laiin, Isua’n hnathawh langsâr tak a thawk a ni. Chu hna chu an tân chaw ang a nih bâkah, chu  chuan Pathian tirh a nihzia a finfiah bawk.—Joh. 4:34; 5:36; 14:10.

4. Jehova leh Isua hnên aṭangin chawlh hahdamna chungchângah eng nge kan zir theih?

⁴ Taihmâkna chungchânga Jehova leh Isua entawn tûr siam chuan kan tân chawlh hahdam a ngai lo tih a târ lang em? Târ lang lo ve. Jehova chu a hah theih loh avângin, ani chuan chawlh hahdam a mamawh lo. Mahse, Bible chuan Jehova’n lei leh vân a siam hnu chuan “a châwl a; tin, a intihahdam ta a,” tiin a sawi. (Ex. 31:17) Jehova chu a châwl a, chu chu a thil siamah lungawina a nei tihna a ni a. Isua pawh leia a awm laiin thawk rim hle mah se, chawlh hahdam nân leh a ṭhiante nêna chaw hlui kîlho nân hunte a insiam a ni.—Mt. 14:13; Lk. 7:34.

5. Mi tam takin eng harsatna nge an hmachhawn?

⁵ Bible chuan Pathian mite chu taima tûrin min fuih a. A chhiahhlawhte chu thatchhe lo leh mi taima an ni tûr a ni. (Thuf. 15:19) I chhûngkaw châwm nân hna i thawk pawh a ni thei. Mahse, Krista zirtîr zawng zawngte chuan chanchin ṭha hrilhnaa tel tûrin mawhphurhna an nei ṭheuh va. Chutih rualin, chawlh hahdamna âwm tâwk kan neih chu a la ngai tho a ni. Eizawn nân te, rawngbâwl nân te, leh chawlh hahdam nântea inbûk tâwk taka hun hman chu harsa tih châng i nei em? Kan hnathawh zât tûr leh kan chawlh zât tûr chu engtin nge kan hriat theih ang?

6. Marka 6:30-34-na chuan hnathawh leh chawlh hahdamna chungchângah Isua’n thlîr dân inbûk tâwk tak a nei tih engtin nge a târ lan?

⁶ Hnathawh chungchângah thlîr dân inbûk tâwk tak neih chu thil pawimawh tak a ni a. Lal Solomona chu: “Engkim tân hian hun ruat a awm,” tih ziak tûra thlarauva thâwk khum a ni. Ani chuan phun hun te, in sak hun te, ṭah hun te, nuih hun te, lâm hun te, leh thil dang tih hunte pawh a sawi a. (Thur. 3:1-8) Chuvângin, kan nuna thil pawimawh tak pahnih awm chu hnathawh leh chawlh hahdam hi a ni. Isua chuan hnathawh leh chawlh hahdamna chungchângah thlîr dân inbûk tâwk tak a nei a. Ṭum khat chu, tirhkohte chu an thu hrilhna aṭangin an lo haw a, chumi nî chuan ‘chaw takngial pawh ei hman lo’ khawpin an buai hle a ni. Isua chuan: “Nangmahniho ngawtin thlalêr hmunah a hrangin lo kal ula, châwl rih rawh u,” tiin a hrilh a. (Marka 6:30-34 chhiar rawh.) A zirtîrte nên an duh angin châwl hahdam thei ṭhîn lo mah se, chawlh hahdam chu an mamawh ṭheuh tih a hria a ni.

7. Chawlhni dân zirna chuan engtin nge min ṭanpui ang?

⁷ A châng chuan, chawlh hahdam, a nih loh leh inthlâk danglamna ṭhenkhat siam chu kan mamawh tak zet a. Chu chu Pathianin hmân laia a mite tâna chawlhkâr tin Chawlhni serh tûra ruahmanna a siam aṭangin kan hmu thei a ni. Mosia Dân hnuaiah kan awm tawh lo ngei mai; mahse, Chawlhni chungchâng zirna chu kan hlâwkpui thei a. Kan thil zirte chuan hnathawh leh chawlh hahdamna chungchânga kan thlîr dân endik tûrin min ṭanpui thei a ni.

8. Exodus 31:12-15-a târ lan angin, Chawlhni chu eng nî atâna pêk nge a nih?

⁸ Pathian Thu chuan “ni” ruk hnuah Pathianin leia a thil siam chu a chawlhsan tih a târ lang a. (Gen. 2:2) Mahse, Jehova chuan hnathawh chu nuam a tih êm avângin kawng dangin “a thawk reng a ni.” (Joh. 5:17) Chawlhkâr tina Chawlhni serh ruahmanna chu Genesis bu-a târ lan Jehova chawlhna nî zulzuia siam a ni a. Pathian chuan Chawlhni chu amah leh Israel mite inkâra chhinchhiahna angin a sawi. Chu nî chu “chawlh dêrna chawlhni, LALPA tâna ni thianghlim a ni.” (Exodus 31:12-15 chhiar rawh.) Chumi nîah  chuan naupang te, sal te, leh rante pawh tiamin, tu mah hnathawh phal an ni lo. (Ex. 20:10) Chu chuan mite chu thlarau lam thilte ngaihven lehzual theihna hun remchâng a pe a ni.

9. Isua hun laiin Chawlhni chungchângah eng ngaih dân dik lo tak nge awm?

⁹ Chawlhni chu Pathian mite tân chuan ni duhawm tak a ni a; mahse, Isua hun laia sakhaw hruaitu tam tak chuan a hman dân tûr chungchângah dân khirh tak takte an zam a. Anni chuan Chawlhnia buh vui thliah leh dam lote tihdam chu thiang lo niin an sawi a. (Mk. 2:23-27; 3:2-5) Chutiang ngaih dânte chu Pathian ngaih dân nên a inmil lo tih Isua’n a thu ngaithlatute hnênah chiang takin a hrilh a ni.

10. Matthaia 12:9-12-naa Isua’n Chawlhni a thlîr dân aṭangin eng nge kan zir theih?

¹⁰ Isua leh a hnungzuitu Judate chu Mosia Dân * hnuaia an awm avângin anni chuan Chawlhni chu an serh a. Mahse, Isua chuan Chawlhni chu dik taka serh tûr leh chumi nî chuan mi dangte ṭanpui theih a ni tih a thusawi leh thiltihin a târ lang a ni. Ani chuan: “Chawlhniah tihṭhat a thiang e,” tiin tlang takin a sawi. (Matthaia 12:9-12 chhiar rawh.) Chu bâkah, Chawlhnia thil ṭha tih leh mi dangte ṭanpui chu dân bawhchhiatna angin a thlîr lo. Isua thiltihte chuan Chawlhniin a tum ber chu a târ lang a ni. Pathian mite chuan chumi nî chuan an nî tin hnathawhte chawlhsanin, thlarau lam thilte an ngaihsak thei a. Isua chu thlarau lam hlâwkpui nâna Chawlhni serh ṭhîn chhûngkuaa seilian a ni a. Chu chu a  seilenna Nazaret khuaa a awm laia a chungchâng sawina: “Chawlhnia [Isua’n] a tih dân pângngaiin inkhâwmna inah a lût a, chhiar tûrin a ding a,” tih aṭang hian a hriat theih a ni.—Lk. 4:15-19.

11. Hnathawh chungchângah Isua’n eng entawn tûr ṭha nge a siam?

¹¹ Josefa chuan Isua chu a fapa anga thingrem siamtu ni tûra a zirtîr laiin, hna chungchânga Pathian thlîr dân chu a hrilh ngei ang. (Mt. 13:55, 56) Isua chuan Josefa’n a chhûngkaw hung tak châwm nâna nî tina a thawhrimzia chu a hmu ngei bawk ang. Ngaihvenawm takin, a hnuah, Isua chuan a zirtîrte hnênah: “Hnathawktu chu hlawh hmu tlâk a ni,” tiin a hrilh a. (Lk. 10:7) Ni e, ani chuan taima taka hnathawh dân chu a hre chiang hle a ni.

12. Thawhrimna chungchânga Paula rilru put hmang chu eng Bible chângin nge târ lang?

¹² Tirhkoh Paula pawh mi taima tak a ni a. A hna pawimawh ber chu Isua hming leh a thu zirtîrte mi dang hnêna hrilh hi a ni. Chuti chung pawhin, mahni inchâwm nân tisa lam hna a thawk a. Thessalonika khuaa mite chuan tu mah ‘a tihhautak loh’ nâna ‘a chhûn a zâna hah tak leh rim taka a thawhzia te’ chu an hria a ni. (2 Thes. 3:8; Tirh. 20:34, 35) Paula’n a hnathawh chungchâng a sawi hian puan in siam hna a sawina a nih a rinawm. Korinth khuaa a awm laiin, Akuilia leh Priskilli te hnênah awmin, “an hnênah a thawk ve ṭhîn a; an hnathawh chu puan in siam a ni.” Paula’n ‘a chhûn a zânin hna a thawk’ tih hian chawlh hahdamna hun nei lo khawpin hna a thawk tih a kâwk lo. Chawlhniah chuan a puan in siam hnate chu a chawlhsan ṭhîn a. Chumi nî chu Chawlhni serh ve tho Juda mite hnêna thu hrilhna hun remchângah a hmang a ni.—Tirh. 13:14-16, 42-44; 16:13; 18:1-4.

13. Paula entawn tûr siam aṭangin eng nge kan zir theih?

¹³ Tirhkoh Paula chuan entawn tûr ṭha a siam a. Eizawnna hna a thawh a ngai chung pawhin, ‘Pathian chanchin ṭha rawngbâwlna thianghlimah’ taima takin a inhmang reng a ni. (Rom 15:15, 16; 2 Kor. 11:23) Mi dangte pawh chutianga ti ve tûrin a fuih a. Chuvângin, Akuilia leh Priskillite chu ‘Krista Isuaa a hnathawhpuite’ an lo ni. (Rom 12:11; 16:3, 4) Paula chuan Korinth khuaa mite chu ‘Lalpa hna ṭhahnemngai taka thawk fo’ tûrin a fuih a. (1 Kor. 15:58; 2 Kor. 9:8) Jehova’n tirhkoh Paula chu: “Tupawhin hna a thawh duh loh chuan ei pawh ei suh se,” tih thu hi ziak tûrin thlarauvin a thâwk khum bawk a ni.—2 Thes. 3:10.

14. Johana 14:12-a chhinchhiah Isua thusawi awmzia chu eng nge ni?

¹⁴ He hun hnuhnûng chhûnga kan thawh theih hna pawimawh ber chu thu hrilh leh zirtîr siam hna hi a ni a. Dik takin, Isua chuan a zirtîrte’n a thiltih aia ropui zâwk an la ti ang tih a sawi lâwk a! (Johana 14:12 chhiar rawh.) Amah angin thil makte an ti ang, a tihna erawh a ni lo. Chu aiin, a hnugzuitute chuan thu hrilh leh zirtîr hna chu a tih aia nasain hmun zau zâwk leh hun rei zâwk an thawk ang a, mi tam zâwkte hnênah an hrilh ang a tihna a ni.

15. Eng zawhnate nge kan inzawh ang a, engvângin nge?

¹⁵ Eizawnna hna thawk i nih chuan, hêng zawhnate hi inzâwt ang che: ‘Ka hnathawhna hmunah mi taima tak nia hriat ka ni em? Ka hna chu a hun takah zovin, a ṭha thei ang berin ka thawk em?’ tihte hi. Aw tia i chhâng thei a nih chuan, i hnathawhna pu rin i hlawh ngei ang. Chu bâkah, nangmah hre chiangtute hnêna Lalram thuchah i hrilh hunah an ngaihven lehzual ngei a rinawm. Thu hrilh leh zirtîr hna chungchângah heti hian inzâwt ang che: ‘Rawngbâwlnaah mi taima tak nia hriat ka  ni em? Tlawh hmasak berna atân ṭha takin ka inbuatsaih em? A hma thei ang berin tuina neite chu ka tlawhkîr ṭhîn em? Rawngbâwlna pêng hrang hrangah ka tel ziah em?’ tihte hi. Aw tia i chhâng thei a nih chuan, i hnathawhah hlimna i hmu ngei ang.

16. Chawlh hahdamna chungchânga Isua leh a tirhkohte leh tûn laia mi tam takte rilru put hmang inan lohna chu eng nge ni?

¹⁶ Isua chuan a tirhkohte nên chawlh hahdamna an neih a ngaih châng a awm tih a hria a. Mahse, chutih hun lai leh tûn laia mi tam tak chu a tehkhin thu sawia mi hausa pa ang an ni. Chu pa chuan: “Châwl la, eiin bâr la, hlim takin awm rawh,” a inti a. (Lk. 12:19; 2 Tim. 3:4) Ani chuan chawlh hahdam leh nawmchen chu a nunah a dah pawimawh ber a ni. Chumi nêna inkalh takin, Isua leh a tirhkohte chuan mi mal nawmchenna chu an nunah an dah pawimawh ber lo.

17. Hnathawhna aṭanga chawlh hun kan neihte chu engtin nge kan hman ṭhin?

¹⁷ Tûn laiah, hnathawhna aṭanga chawlh hun kan neihte chu chawlh hahdam nân mai ni lovin, thu hrilh leh Kristian inkhâwmnaa tel nâna hmangin Isua entawn kan tum a ni. Dik tak chuan, zirtîr siamna leh inkhâwmte chu kan tân a pawimawh êm avângin, chûng rawngbâwlna thianghlimahte chuan theih tâwpa tel ziah kan tum a. (Heb. 10:24, 25) Chawlh kan lâk hunah pawh, kan awmna hmun apiangah inkhâwma tel ziahna leh kan hmuh apiangte hnêna thu hrilh theihna hun remchâng zawngin kan thlarau lam hun duan chu kan vawng reng a ni.—2 Tim. 4:2.

18. Kan Lal, Krista Isua chuan eng ti tûrin nge min duh?

¹⁸ Kan Lal, Krista Isua chu a âwm tâwka thil beisei mi a nih avâng leh ani chuan hnathawh leh chawlh hahdamna chungchânga thlîr dân inbûk tâwk nei tûra min ṭanpui avângin kan va lâwm tak êm! (Heb. 4:15) Kan mamawh ang chawlh hahdamna nei tûrin min duh a. Chu bâkah, kan tisa lam mamawhte phuhru tûr leh zirtîr siam hna phûrawm taka theih tâwp chhuaha tel tûr pawhin min duh a ni. A dawta thuziakah chuan sal tânna râwng tak ata min chhuah zalêntîrnaa Isua chanvo chu kan sawiho vang.