Vênnainsâng 2019 ṭanchhanin hêng zawhnate hi i chhâng thei em?

Pathian thutiam: “Nangmah beihna tûra hriam chher rêng rêng a sâwt lo vang,” tih awmzia chu eng nge ni? (Is. 54:17)

Pathian chuan “mi hlauhawmte thaw” ang chi, min tichhe thei beihna lakah min vênghim ang tih kan ring nghet tlat thei a ni. (Is. 25:4, 5) Min tichhe hlen tûrin kan hmêlmate chu an hlawhtling ngai lo vang.—w19.01, p. 6-7.

Pathianin Kanaan mite leh Israel tlâktlai lote a dâwr dânin engtin nge a rorêlna fel a târ lan?

Pathian chuan nungchang bawlhhlawhnaa inhnamhnawihte, a nih loh leh hmeichhia leh naupangte dik lo taka cheibâwltute chungah ro a rêl a. Ani chuan a thu âwihtute leh mi dangte dik taka cheibâwltute chu mal a sâwm a ni.—w19.02, p. 22.

Ring lotuin ṭawngṭaina a neih huna kan awm ve a nih chuan eng nge kan tih ang?

Ngawi reng leh zahthiam takin kan ṭhu thei a; mahse, “amen” emaw, chuta awmte nêna kut invawn tawnna emaw chu kan ti lo vang. Mahniin ri lovin kan ṭawngṭai thei a ni.—w19.03, p. 31.

Naupang khawih chhiat hi eng ang khawpa pawi nge a nih?

Naupang khawih chhiat hi a tuartu, kohhran, sawrkâr thuneitute, leh Pathian chunga thil sual tihna a ni. Sawrkâr dânin naupang khawih chhia nia puhna chu sawrkâr rorêltute hnêna hriattîr tûra a phût chuan, kohhran upate’n chu chu an zâwm a ni.—w19.05, p. 10-11.

Engtin nge i rilru put hmang chu i thlâk danglam a, i tihhmasâwn theih?

Tih theih dân pawimawhte chu: Ṭawngṭaiin Jehova hnênah hrilh ang che. Mahni inendik tumna neiin chhût ngun rawh. Fing takin ṭhian thlang rawh.—w19.06, p. 12.

Tihduhdahna atâna inbuatsaih tûrin tûn aṭangin eng nge kan tih theih?

Jehova nêna kan inlaichînna kan tihngheh a ngai a. Ani chuan min hmangaihin, min kalsan ngai lo vang tih ring ang che. Nî tinin Bible chhiar la, ṭawngṭai ziah rawh. Lalram malsâwmnate chu a lo thleng ngei dâwn tih ring nghet tlat ang che. I Bible châng duh berte leh Lalram hlate chu by-heart ang che.—w19.07, p. 2-4.

Kan chhûngte chhandam an nih theih nân eng nge kan tih theih?

Lainatna kan lantîr chu a pawimawh a, entawn tûr ṭha siam la, dawhthei tak leh remhre tak ni ang che.—w19.08, p. 15-17.

Matthaia 11:28-a Isua thutiam angin, engtin nge tihhahdam kan nih?

Hmangaihna nei tak upa te, ṭhian ṭha ber te, leh hna ṭha berte kan nei a ni.—w19.09, p. 23.

Engtin nge Pathianin thiltih châkna leh thiltihtheihna min pêk theih? (Phil. 2:13, NW)

Pathian Thu kan chhiar a, kan chhût ngun hian, Pathianin a duh zâwng ti tûra thawh châkna leh thiltihtheihna min pein, min tichak thei a. A thlarau thianghlim chuan kan theihnate chu a tipung thei a ni.—w19.10, p. 21.

Thu tlûkna khûnkhân tak kan siam hmaa kan tih tûr thil pawimawh takte chu eng nge ni?

Tih tûr pangate chu: Zir bingna ṭha tak nei rawh. Finna dîlin ṭawngṭai rawh. Chêttîrtu che chu endik rawh. Thiltum bîk nei rawh. A âwm tâwk beisei rawh.—w19.11, p. 27-29.

Thlarau thi thei lo thurin hi Setana’n Evi hnêna a thusawi aṭanga inṭan a ni em?

Ni lo. Setana chuan Evi chu thi ang chauhvin a awm ang a ti lo va, a thi lo vang tiin a hrilh a ni. Sakhaw dik lo ngaih dân zawng zawng chu Tuilêtah khân a bo vek a. Mihringte hian thlarau thi thei lo kan nei tih thurin chu Pathianin Babel insâng satute a tidarh hmaa lo chhuak a nih a rinawm.—w19.12, p. 15.