1. Jehova’n nu leh pate chu eng nge a enkawltîr?

JEHOVA chuan nupa tuak hmasa ber chu fa neih châkna neiin a siam a. Bible chuan: “Fanaute hi LALPA laka kan rochan an ni,” tiin chiang takin a sawi a ni. (Sâm 127:3) Chumi awmzia chu eng nge ni? I ṭhian ṭha tak chuan a sum tam tak enkawl tûrin ṭanpuina a dîl che angah han mitthla teh. Engtin nge i ngaih ang? A rin ngam che avângin i inchhuang ru ngei ang. Mahse, him taka i enkawl dân tûr chungchângah i lungkham deuh mai thei. Kan ṭhian ṭha ber Jehova chuan nu leh pate chu sum aia nasa taka hlu zâwk thil engemaw enkawl tûrin a pe a. An fate ṭhatna tûr leh hlimna tûrin anni chu a enkawltîr a ni.

2. Eng zawhnate nge kan sawiho vang?

² Nupate’n fa an neih dâwn leh dâwn loh emaw, an neih hun tûr emaw chungchângah tuin nge thu tlûkna siam ang? Nu leh pate chuan an fate’n nun hlimawm an neih theih nân anni chu engtin nge an ṭanpui theih? Thu tlûkna fing siam tûra Kristian nupate ṭanpui theitu Pathian Thu-a thu bul ṭhenkhat chu i lo ngaihtuahho vang u.

3. (a) Nupate’n fa an neih dâwn leh dâwn loh chungchângah tuin nge thu tlûkna siam ang? (b) An ṭhiante leh chhûngte chuan eng Bible thu bul nge an hriat reng ang?

³ Hnam dân ṭhenkhatah chuan, nupa tuak thar chu fa nei vat tûra beisei an ni a. Anni chuan chu hnam dân zui tûra an chhûngte leh mi dangte nawr luih niin an inhre mai thei. Asia rama unau Jethro-a chuan, “Kohhrana fa nei nu leh pa ṭhenkhat chuan fa nei lo nupate chu nei tawh tûrin an hrilh ṭhîn,”  tiin a sawi. Asia rama unau Jeffrey-a pawhin, “Unau ṭhenkhatin fa nei lo nupate chu an upat hunah anmahni enkawltu tûr an nei dâwn lo tia an sawi chu ka hre ṭhîn,” tih a sawi bawk. Mahse, nupate chuan fate an neih dâwn leh dâwn loh chungchângah thu tlûkna an siam tûr a ni. Thu tlûkna siamtu tûr chu anmahni an ni a, chu chu an mawhphurhna a ni. (Gal. 6:5) An ṭhiante leh chhûngte’n nupa tuak tharte hlim tûra an duh chu hriatthiamawm tak a ni a. Mahse, fate an neih dâwn leh dâwn loh erawh nupate thu tlûkna siam tûr a ni tih kan hre ṭheuh tûr a ni.—1 Thes. 4:11.

4-5. Nupate chuan eng thu pahnih nge an sawi dun a ngaih a, eng huna an sawi dun nge ṭha ber ang? Hrilhfiah rawh.

⁴ Fa neih tum nupate chuan he zawhna pawimawh tak pahnih hi an ngaihtuah tûr a ni: Pakhatna, eng hunah nge fa neih an duh? Pahnihna, eng zât nge neih an duh? Chûngte chu eng huna an sawi dun nge ṭha ber ang? Engvângin nge chûngte chu sawiho atâna thil pawimawh tak a nih?

⁵ Dinhmun tam takah chuan, an inneih hmain, nupate chuan fa neih chungchâng an sawi dun a ṭha ang. Engvângin nge chumi huna sawi chu a ṭhat? Chhan ṭha tak pakhat chu hemi chungchânga ngaih dân inang an neih chu thil pawimawh tak a nih vâng a ni. Chu bâkah, chumi atân mawhphurhna an lâk theih dâwn leh dâwn loh pawh an ngaihtuah a ngai ang. Nupa ṭhenkhat chuan fate an neih chuan hun leh tha tam tak an pêk a ngaih dâwn avângin, an inneih aṭanga kum khat emaw, kum hnih emaw hnu chauhva fa neih chu an tum a. Chutianga tihna chuan nupa anga insiamremna hun leh inhnaih lehzualna hun a neihtîr an rin vâng a ni.—Eph. 5:33.

6. Engtin nge kan chênna hun hian nupa ṭhenkhat chu a nghawng?

⁶ Mi dangte chuan Nova fapa pathumte leh an nupuite entawn tûr siam zui chu an thlang a. Chûng nupa tuak thumte chuan fate an nei nghâl lo. (Gen. 6:18; 9:18, 19; 10:1; 2 Pet. 2:5) Isua chuan kan hun chu “Nova dam lai” nên a khaikhin a, chu bâkah, ‘hun khirh takah’ kan awm tih pawh rinhleh rual a ni lo. (Mt. 24:37; 2 Tim. 3:1) Chu thu dik chu rilruah vawngin, nupa ṭhenkhat chuan Kristian rawngbâwlnaa hun tam zâwk an hman theih nân fate neih rih loh chu an thlang a ni.

7. Luka 14:28-30 leh Thufingte 21:5-a kan hmuh thu bulte chuan engtin nge nupate chu a ṭanpui theih?

⁷ Nupa fingte chuan fate an neih dâwn leh dâwn loh chungchângah leh an nei dâwn a nih chuan, an neih zât tûr chungchânga thu tlûkna  an siam hunah an dinhmunte chu an chhût hmasa ṭhîn. (Luka 14:28-30 chhiar rawh.) Thiltawn nei nu leh pate chuan fate enkawl seilen chu a hautak mai ni lovin, hun leh thate an pêk a ngai tih an hre bawk. Chuvângin, nupate tân hêng zawhnate hi ngaihtuah a pawimawh a ni: ‘Chhûngkaw mamawh zualpuite phuhhrûk nân nupaa hnathawh a ngai ang em? Kan “mamawh zualpuite” chungchângah kan inlungrual em? Nupaa hna kan thawh chuan, tuin nge kan fate enkawl ang? Kan fate ngaihtuahna leh thiltihte chu tuin nge thunun ang?’ tihte hi. Chûng zawhnate ngun taka ngaihtuahtu nupate chuan Thufingte 21:5-a thute hi an nunpui a ni.—Chhiar rawh.

8. Kristian nupate chuan eng harsatnate nge an hmachhawn theih a, hmangaihna nei tak pasal chuan eng nge a tih ang?

⁸ Naupang chuan nu leh pate hnên aṭanga hun leh tha engemaw chen a dawn a ngaiin, chu chu a phu rêng a ni. Chuvângin, nupate chuan chhang zing taka fate an nei a nih chuan, an mamawh ang ṭheuhva ngaihsakna pêk chu a harsa mai thei a. Fa tam tak nei nupa ṭhenkhat chuan fate enkawl chu thil buaithlâk tak a ni tih an sawi. Nu ber chu tisa lamah leh rilru lamah a chau hle thei a. Chu chuan a inzirna te, ṭawngṭaina te, leh rawngbâwla a tel ziahnate chu a nghawng thei ang em? Chutiang bawkin, Kristian inkhâwma rilru pêk leh chumi aṭanga hlâwkna hmuh chu a harsa thei a ni. Ni e, hmangaihna nei tak pasal chuan inkhâwmnaah leh ina an fate ngaihsak a ṭûl hunah, a tih theih apiang tiin a nupui chu a ṭanpui ang. Entîr nân, a nupui chu in chhûng chêt vêlnaah a ṭanpui thei a. Chhûngkuaa Pathian Biakna neih ziahna chu hlâwkpui ṭheuh tûrin theih tâwp a chhuah ang. Chu bâkah, ani chuan a chhûngte chu rawngbâwlnaah a thawhpui ziah bawk ang.

9-10. Fate ṭanpui duhtu nu leh pate tân eng nge pawimawh?

⁹ Nu leh pate’n Jehova hmangaih tûra an fate an zirtîr theih dân ṭhenkhat chu eng nge ni? An fate chu nungchang bawlhhlawhna lakah engtin nge an vênhim theih? Nu leh pate tih theih ṭhenkhat chu i lo ngaihtuah ang u.

¹⁰ Jehova ṭanpuina dîlin ṭawngṭai rawh. Samsona nu leh pa, Manoa leh a nupui entawn tûr siam hi chhinchhiah ang che. Manoa’n fapa an nei dâwn tih a hriat chuan, an fa enkawl seilen dân tûr chungchângah Jehova kaihhruaina a dîl a ni.

11. Rorêltute 13:8 sawi angin, engtin nge nu leh pate chuan Manoa entawn tûr siam chu an zui?

¹¹ Bosnia leh Herzegovina rama Nihad-a leh Alma-i te chuan Manoa entawn tûr siam aṭangin an inzir a. Anni chuan: “Manoa angin, nu  leh pa ṭha tak ni tûrin Jehova hnênah a kaihhruaina kan dîl a. Jehova chuan A Thu te, Bible ṭanchhan thu leh hla chhuah te, kohhran inkhâwm te, leh inkhâwmpuite hmangin, kawng hrang hrangin kan ṭawngṭaina a chhâng a ni,” tiin an sawi.—Rorêltute 13:8 chhiar rawh.

12. Josefa leh Mari chuan an fate tân entawn tûr eng nge an siam?

¹² Entawn tûr siamin zirtîr rawh. I thusawite chu a pawimawh hle a; mahse, i thitihte chuan i fate chungah nghawng a nei thui zâwk ngei ang. Josefa leh Mari te chuan Isua pawh tiamin, an fate tân entawn tûr ṭha an siam tih kan chiang thei a ni. Josefa chu a chhûngkaw châwm nân a thawk rim hle a. Chu bâkah, anni chu thlarau lam thilte hlut tûrin a fuih bawk. (Deut. 4:9, 10) Dânin Josefa chu a chhûngte nên “kum tinin” Jerusalema Kalhlên Kût hmang tûrin phût lo mah se, ani chuan a hmanpui ṭhîn a ni. (Lk. 2:41, 42) A hun laia pa ber ṭhenkhat chuan chutianga chhûngkuaa zin chu thil buaithlâk tak leh hun leh sum khawhralna angin an ngai mai thei. Mahse, Josefa chuan thlarau lam thilte chu a ngaihlu a, a fate pawh chutianga ngaihlu ve tûrin a zirtîr a ni. Mari pawhin Pathian Thu chu a hre hle a. A thusawi leh thiltihte aṭangin, a fate chu Pathian Thu ngaina tûrin a zirtîr tih rinhlelh rual a ni lo.

13. Nupa tuak khat chuan Josefa leh Mari te entawn tûr siam chu engtin nge an zui?

¹³ A chunga kan târ lan tâk Nihad-a leh Alma-i chuan, Josefa leh Mari te entawn tûr siam chu zui an duh a. Chu chuan an fapa chu Jehova hmangaih tûr leh a rawngbâwl tûra enkawl seilian tûrin engtin nge a ṭanpui? Anni chuan, “Kan nun dân hmangin, Jehova thu bulte mila nun a ṭhatzia lantîr kan tum a ni,” tiin an sawi a. Nihad-a chuan, “I fa tân ni tûra i duh ang mi chu ni rawh,” tiin a sawi belh a ni.

14. Engvângin nge nu leh pate chuan an fate ṭhian kawmte chu an hriat a ngaih?

¹⁴ I fate chu ṭhian ṭhate thlang tûrin ṭanpui rawh. Nu leh pate chuan an fate ṭhian kawmte leh an thiltihte chu an hriat a ngai a. Chutah chuan social media leh an mobile phone aṭanga an mi biakte hriat pawh a tel. Chûng an ṭhiante chuan an fate ngaihtuah dân leh thiltih dânah nghawng a nei thei a ni.—1 Kor. 15:33.

15. Jessie-a entawn tûr siam aṭangin nu leh pate’n eng nge an zir theih?

¹⁵ Nu leh pate chuan computer te, phone te, leh tablet te an khawih thiam lo a nih chuan eng nge an tih theih? Philippines rama pa pakhat, Jessie-a chuan heti hian a sawi a ni: “Phone leh tablet hman dân chu kan thiam meuh lo va. Mahse, chu chuan kan fate hnênah chûng hmanruate hman sual a hlauhawmna chu hrilh lovin min awmtîr chuang lo,” tiin a sawi. Jessie-a chuan chûng thilte chu a hman thiam loh avâng maiin a fate chu hmang lo tûrin a khap bur lo. Ani chuan: “Ka fate chu electronic hmanruate aṭanga ṭawng thar zir tûr te, inkhâwm atâna inbuatsaih tûr te, leh nî tina Bible chhiar tûrtein ka fuih ṭhîn,” tiin a sawi. Nu leh pa in nih chuan, jw.org^® website-a “Teenagers” tih hnuaia hmuh theih message inthawn leh online-a thlalâk pho chhuah chungchânga thlîr dân inbûk tâwk neih dânte chu in chhiarin, in fate chu in sawipui tawh em? Tu Nge Lal Zâwk—Nangmah Nge, I Phone leh I Tablet? tih leh Social-Network Hmanna Kawngah Fîmkhur Thiam Rawh * tih video-te chu in enpui tawh em? Chûngte chu in fate hnêna phone leh tablet-te fing taka hman dân in zirtîr hunah thil ṭangkai takte a ni thei a ni.—Thuf. 13:20.

16. Nu leh pa tam tak chuan eng nge an tih a, chu chuan eng nge a rah chhuah?

 ¹⁶ Nu leh pa tam tak chuan an fate chu Pathian rawngbâwlnaa entawn tûr ṭha siamtute nêna inkawmho theihna hun remchâng an neih theih nân theih tâwp an chhuah a. Entîr nân, Côte d’Ivoire rama nupa tuak khat N’Déni-a leh Bomine-i te chuan, bial kantute chu an ina thleng tûrin an sâwm ṭhîn a. N’Déni-a chuan: “Chu chuan kan fapa chungah nghawng ṭha tak a nei a. Pioneer a thawk ṭan a, tûnah chuan bial kantu awm loh chânga a aiawhtu angin rawng a bâwl a ni,” tiin a sawi. I fate tân chutianga inkawmhona chu i ruahmansak ve thei ang em?

17-18. Nu leh pate chuan an fate chu eng hun aṭangin nge an zirtîr ang?

¹⁷ I fate chu a hma thei ang berin zirtîr rawh. Nu leh pate’n an fate an zirtîr hma poh leh a ṭha lehzual a. (Thuf. 22:6) A hnua tirhkoh Paula nêna khual zin ṭhîn Timothea hi han ngaihtuah teh. A nu Euniki leh a pi Loisii te chuan Timothea chu a “naupan têt” aṭangin an zirtîr a ni.—2 Tim. 1:5; 3:14, 15.

¹⁸ Côte d’Ivoire rama nupa tuak dang Jean-Claude-a leh Peace-i te chuan an fa parukte chu Jehova hmangaih a, a rawngbâwl tûrin an ṭanpui thei a ni. Hlawhtling tûrin anni chu engin nge ṭanpui? Euniki leh Loisii te entawn tûr siam chu an zui a. Anni chuan, “Kan fate chu an naupan têt lai, an pian aṭanga rei vak lohvah ṭhahnemngai takin Pathian Thu kan zirtîr,” tiin an sawi a ni.—Deut. 6:6, 7.

19. I fate hnêna Pathian Thu ṭhahnemngai taka zirtîrnaah eng nge tel?

¹⁹ In fate chu Jehova Thu ‘ṭhahnemngai taka zirtîr’ tih awmzia chu eng nge ni? ‘Ṭhahnemngai taka zirtîr,’ tih awmzia chu “hrilh nawn fona hmanga zirtîr leh rilrua tuh,” tihna a ni. Chutianga ti tûr chuan, nu leh pate’n an fate chu hun an hmanpui ziah a ngai a. Fate hnêna kaihhruaina hrilh nawn fo chu a ninawm hle thei a. Mahse, nu leh pate chuan chu tih dân chu an fate’n Pathian Thu an hriatthiam leh an nunpui theih nâna ṭanpui theih dân kawng anga thlîr thiam an tum tûr a ni.

20. Sâm 127:4-na chu fate zirtînaa a hman theih dân hrilhfiah rawh?

²⁰ Hriatthiamna nei rawh. Sâm 127-na chuan fate chu thal nên a khaikhin a. (Sâm 127:4 chhiar rawh.) Thalte chu thil chi hrang hrang aṭanga siam theih leh a sei lam leh a tâwi lam a  inang lo thei angin, naupangte chu an mizia a inang vek thei lo a ni. Chuvângin, nu leh pate chuan an fate mamawh ang ṭheuhva zirtîr dân tûr an hriat a ngai a. Jehova rawngbâwl tûra hlawhtling taka fa pahnih enkawl seiliantu tûn lai Israel rama nupa tuak khat chuan tih dân ṭha nia an hriat chu heti hian an sawi a ni, “Kan fate chu a hrangin Bible kan zirpui a ni,” tiin. Ni e, chutianga zirtîr chu thil ṭûl a nih leh nih loh emaw, thil theih a nih leh nih loh emaw chu chhûngkhaw lû berte thu tlûkna siam tûr a ni.

21. Nu leh pate chuan Jehova hnên aṭangin eng nge an beisei theih?

²¹ Nu leh pate chuan an hmachhawn harsatnate avângin rilru hah châng nei thei mah se, fate chu Jehova hnên aṭanga an dawn thilpêk a ni. Ani chu ṭanpui tûrin a inpeih reng a ni. Nu leh pate ṭawngṭaina chu ngun takin a ngaihthlâksak a. Chûng ṭawngṭainate chu Bible te, kan thu leh hla chhuahte, leh kohhrana entawn tlâk nu leh pa dangte thurâwn pêk leh thiltawnte hmangin a chhâng a ni.

22. Nu leh pate pêk theih thil ṭha berte zîngah chuan engte nge tel?

²² Fate enkawl seilen chu kum 20 chhûng thawh ngai hna anga sawi a ni ṭhîn a; mahse, nu leh pa an nihna chu a tâwp ngai lo vang. An fate hnêna an pêk theih thil ṭha berte zîngah chuan hmangaihna te, hun te, leh Bible ṭanchhan zirtîrnate a tel a ni. Fate’n zirtîrna an chhân lêt dân chu a inang lo ṭheuh vang. Mahse, Jehova hmangaihtu nu leh pate enkawl seilen naupang tam tak chuan Asia rama unaunu Joanna Mae-i ngaih dân ang hi an nei a ni: “Ka nu leh pate min zirtîrna ka’n thlîr lêt hian, min thununnate leh Jehova hmangaih tûra min zirtîrnate avângin ka lâwm tak zet a ni. Nunna min pe mai ni lovin, nun awmze nei tak min pe a ni,” tih hi. (Thuf. 23:24, 25) Kristian maktaduai tam takte chuan chutiang ngaih dân chu an nei a ni.