Deuteronomy 22:25-27-ah hian mipa chu thiam loh changa ngaih a nih tawh avângin, he Bible châng hi a thilsual tih finfiah tumna a ni lo. Chu aiin, hmeichhiain thil a tisual lo tih a finfiah zâwk a ni. A chhehvêl chângin a sawite hi chhinchhiah ang che.

A châng hmasa lamte chuan chu pain mi nupui hual chu “khuaah” a mutpui tih a sawi a. Chu nula chu pasal nei tawh anga ngaih a nih avângin, chu pa chu uirê a ni. Hmeichhe chungchâng chu eng nge ni ve? ‘Hmeichhia chu khuaa awm siin, a au lo va.’ Au ta se chuan, mi dangin a au ri chu an hria ang a, an chhanhim ngei ang. Mahse, a au si lo. Chuvângin, ani pawh uirê a ni a, an pahnih chuan thiam loh chantîr an ni.—Deut. 22:23, 24.

Dân chuan dinhmun dang a târ lang leh a: “Amaherawhchu miin ramhnuaiah nula, mi hual a hmuh a, a tihluiha a mutpui chuan a mutpuitu mipa chauh chu tihhlum tûr a ni a, a nula chu engmah in tih tûr a ni lo, nula chungah chuan thihna khawp sual a awm lo; hetiang hi chu, mi a ṭhenawm beia that ang a ni a; ramah a va tawng fuh a, mi hual nula chu a au va, chhantu an awm si lo va,” tiin.—Deut. 22:25-27.

Chu dinhmunah chuan, hmeichhia chu thiam chang tûra ngaih a ni. Eng kawngin nge? Ani chu “a au va, chhantu an awm si lo va.” Chuvângin, ani chu uirê a ni lo. Mahse, mipa chu mi nupui hual “a tihluiha a mutpui” avângin, pâwngsualtu leh uirê nia thiam loh chantîr a ni.

He Bible thu-ah hian hmeichhia chuan thil sual a ti lo tih târ lang mah se, mipa erawh chu pâwngsualtu leh uirê a ni tih chiang takin a sawi a. Chuvângin, rorêltute chuan ‘ṭhahnemngai takin an zâwt’ ang a, Pathianin fiah taka a sawi nawn fo a tehna milin thu tlûkna an siam ang tih kan ring nghet tlat thei a ni.—Deut. 13:14; 17:4; Ex. 20:14.