Ni lo ve, Bible-ah emaw, thilthleng chanchinah emaw chutiang târ lanna a awm lo.

Bible lehlin dânte avângin, mi ṭhenkhat chuan Paula hun laiin mitthi puala tuia baptisma channa a awm niin an ngai a. Ngaih sual chhan entîrna pakhat chu hei hi a ni: “A nih leh, thawhlehna hi awm lo ni se, engah nge mitthi puala baptisma an chan ang?”—C.L. Re-edited.

Mahse, Bible lama mi thiam pahnihte sawi hi lo chhinchhiah ang che. Dr. Gregory Lockwood-a chuan mitthi puala baptisma channa a awm thu Bible-ah emaw, thilthleng chanchinah emaw finfiahna a awm lo tih a sawi a. Chutiang bawkin, Professor Gordon D. Fee-a chuan: “Thilthleng chanchinah emaw, Bible-ah emaw chutiang ang baptisma channa entîrna hmuh tûr a awm lo. Thuthlung Tharah hian Kristian hmasate’n emaw, tirhkohte thih hnu lawka din church-te’n emaw chutiang chuan an ti ṭhîn tih finfiahna a awm lo,” tiin a ziak a ni.

Bible chuan Isua hnungzuitute chu ‘hnam tina mi zirtîrahte siam a, baptis’ tûr leh a thupêk ‘zawng zawng pawm tûra zirtîr’ tûra tih an nih thu a sawi a. (Mt. 28:19, 20) Mi chuan baptisma chang tawh zirtîr a nih hmain, Jehova leh a Fapa chungchâng a zir a, a rin a, a zawm a ngai a ni. Thlâna awm mitthi chuan chutiang chu a ti thei lo va, nung dama awm Kristian pawhin mitthi tân a tihsak thei hek lo.—Thur. 9:5, 10; Joh. 4:1; 1 Kor. 1:14-16.

A nih chuan, Paula sawi tum chu eng nge ni?

Korinth khuaa mi ṭhenkhat chuan mitthite an tho leh ang tih an ring lo va. (1 Kor. 15:12) Paula chuan an rinna chu a dik lo tih târ langin, “Ni tin ka thi ṭhîn” tiin a sawi a. Dik tak chuan, a la dam reng a ni. Mahse, hlauhawmte a hmachhawn chung pawhin, a thih hnuah Isua angin, thlarau thiltithei tak nia vân nunna changa kaihthawh a ni dâwn tih a ring nghet tlat a ni.—1 Kor. 15:30-32, 42-44.

Korinth khuaa mite chuan hriak thih Kristian an nih tawh chuan nî tin fiahnate an tâwkin, vân nunna changa kaihthawh ni tûr chuan rinawm taka an thih hmasak a ngai tih an hriatthiam a ngai a. ‘Krista Isuaa baptisma channaah’ chuan ‘a thihnaa baptisma chan’ pawh a tel a ni. (Rom 6:3) Chu chu Isua anga kaihthawha an awm theih nân fiahnate an tawha an thih a ngai tihna a ni.

Isua’n tuia baptisma a chan hnu kum hnih aia tamah chuan a tirhkoh pahnihte hnênah: “Ka baptisma chan tûr pawh chu in chang ve ang,” tiin a hrilh a. (Mk. 10:38, 39) Isua sawi chu tuia baptisma channa chungchâng a ni lo. Rinawmna kawng a zawhnain a tâwpah thihna a thlen dâwn a tihna zâwk a ni. Paula chuan hriak thihte’n ‘Isua hnêna chawimawia an awm ve theihna tûrin amah an tuarpui’ ang tih a ziak a. (Rom 8:16, 17; 2 Kor. 4:17) Chuvângin, anni pawh vân nunna changa kaihthawha an awm theih nân an thih a ngai a ni.

Chuvângin, Paula sawi chu hetianga dik taka lehlin theih a ni: “Chutiang a nih loh chuan, engvângin nge thihna tûra baptisma an chan ang? Mitthi thawhlehna a awm si loh chuan, engvângin nge chutiang atâna baptisma an chan ang?” tiin.