1, 2. (a) Engtin nge mihringte chu Pathian ṭhian an ni thei tih kan hriat? (b) He thuziakah hian eng nge kan ngaihtuah ang?

KAN pian phat aṭanga kan thih thlengin, hmangaihna kan mamawh a. Mihringte hian nula tlangvâl inhmangaihna mai ni lo, inṭhian ṭhatna duhawm tak kan mamawh a. Mahse, eng dang zawng aiin, Jehova hmangaihna kan mamawh a ni. Mi tam tak chuan Pathian chu kan hmuh theih loh vâng leh engkimtithei a nih avângin mihringte ṭhian ṭha a nih theih an ring lo va. Mahse, thu dik chu kan hria!

² Mihringte chu Pathian ṭhian an lo ni tawh ṭhîn tih Bible aṭangin kan hria a. An hnên aṭangin kan inzir tûr a ni. Engvângin nge? Pathian nêna inṭhianna neih tum chu nuna kan neih theih thiltum pawimawh ber a nih vâng a ni. Chuvângin, Abrahama entawn tûr siam chu i lo ngaihtuah ang u. (Jakoba 2:23 chhiar rawh.) Engtin nge ani chu Pathian ṭhian a lo nih?  Pathian nêna Abrahama inṭhian ṭhatna chu rinnaa innghat a ni a, ani chu “ringtu zawng zawng pa” tia hriat a ni. (Rom 4:11) A entawn tûr siam kan ngaihtuah laiin, heti hian inzâwt rawh, ‘Engtin nge Abrahama rinna chu ka entawn theih ang a, Jehova nêna kan inṭhianna chu ka tihngheh theih ang?’ tiin.

3, 4. (a) Abrahama tân rinna fiahna nasa ber ni ngei tûr chu sawi rawh. (b) Engvângin nge Abrahama chuan Isaaka hlan chu a inhuam?

³ Kum 125 mi Abrahama chu zâwi zâwia tlânga a lâwn chho lai han mitthla teh. ^[1] (Endnote en rawh.) Kum 25 mi a fapa Isaaka chuan a hnungah a zui a. Isaaka chuan tuah thing a phur a, Abrahama chuan chemtê leh mei chhêm nâna mamawh thil chu a keng a ni. Abrahama tân, chu zin kawng chu a nuna harsa ber a ni ngei ang. Chu chu a kum upat vâng a ni lo. A la chak ṭha hle si a. Chu zin kawng tiharsatu chu Jehova’n a fapa hlân tûra a ngen vâng zâwk a ni!—Genesis 22:1-8.

⁴ Chu chu Abrahama rinna fiahna nasa ber a ni ngei ang. Mi ṭhenkhat chuan Abrahama hnêna a fapa hlân tûra a ngen avângin, Pathian chu a nunrâwng an ti a. Mi dangte chuan, Abrahama’n hetiang a tih duh chhan chu a fapa a hmangaih loh vâng niin an sawi bawk. Chutianga an sawi chhan chu rinna an neih loh vâng leh rinna dik tak leh chu mi hnathawh dân an hriat loh vâng a ni. (1 Korinth 2:14-16) Mahse, Abrahama chuan Pathian thu chu ngaihtuah mang lovin, a pâwngpaw âwih ngawt lo. Rinna dik tak a neih vânga a thuâwih a ni. Jehova chuan chatuana chhiatna thlen theitu thil ti tûrin a ngên ngai lo vang tih a hria a. Thu a âwih chuan Jehova’n amah leh a fapa duh tak chu mal a sâwm ngei ang tih a hre bawk a ni. Abrahama’n chutiang rinna nghet tak nei tûrin eng nge a mamawh? Hriatna leh thiltawn a mamawh a ni.

5. Engtin nge Abrahama chuan Jehova chungchâng a hriat a, chu hriatna chuan engtin nge ani chu a ṭanpui?

⁵ Hriatna. Abrahama chu Ur khawpuia  seilian a ni a. Chuta mite chuan pathian dik lo an bia a, a pa ngei pawhin a bia a ni. (Josua 24:2) Chuti chu, engtin nge Abrahama’n Jehova chanchin a hriat? Bible chuan Nova fapa Sema chu Abrahama nêna inchhûngkhat an ni tih a târ lang a. Abrahama kum 150 vêl a nih thlengin Sema chu a dam a ni. Sema chuan rinna chak tak a nei a, a chhûngte hnênah chuan Jehova chanchin a hrilh ngei a rinawm. Hre chiang thei lo mah ila, hei hi Abrahama’n Jehova chungchâng a hriat dân a ni thei ang. Abrahama thil hriat chuan Jehova hmangaihna a neihtîr a, chu hriatna chuan rinna nei tûrin a ṭanpui a ni.

6, 7. Engtin nge Abrahama thiltawnte chuan a rinna a tihngheh?

⁶ Thiltawn. Engtin nge Abrahama chuan Jehova a rinna tinghettu thiltawn a neih? Mi ṭhenkhat chuan ngaihtuahnain rilru veizâwng a siam a, rilru veizâwng chuan thil min tihtîr a ni tiin an sawi ṭhîn a. Pathian chungchânga a thil hriatte chuan Abrahama thinlung chu a chêttîr a, chu chuan “lei leh vân neitu, LALPA, Pathian Chungnungbera” chu zahna thûk tak a neihtîr a ni. (Genesis 14:22, 23) Bible chuan chutiang zahna thûk tak chu ‘Pathian ṭihna’ tiin a sawi. (Hebrai 5:7) Pathian nêna inṭhianna ṭha nei tûr chuan Pathian kan ṭih a ngai a. (Sâm 25:14) Chu mizia chu a ni, Jehova thu âwih tûra Abrahama chêttîrtu chu.

⁷ Pathianin Abrahama leh Sari chu Ur khua chhuahsan a, ram danga insawn tûrin a hrilh a. Anni chu ṭhalai an ni tawh lo va, an dam chhûnga puan ina an awm a ngai dâwn a ni. Abrahama chuan thil hlauhawm tam tak a awm dâwn tih a hre chung pawhin, Jehova thuâwih chu a tum tlat a. Thu a âwih avângin Pathianin mal a sâwmin, a vênghim a ni. Entîr nân, a nupui hmêl ṭha tak Sari chu lâksak a nih a, Abrahama chu tihhlum theihna dinhmum hlauhawm taka a awm khân, Jehova chuan mak tak maiin an pahnih chuan ṭum khat aia tam a vênghim a ni. (Genesis 12:10-20; 20:2-7, 10-12, 17, 18) Chûng thiltawnte chuan Abrahama rinna chu a tinghet lehzual a ni.

8. Engtin nge Jehova nêna kan inṭhianna tinghet zualtu hriatna leh thiltawn kan neih theih?

⁸ Jehova nên kan inṭhian ṭha thei em? Thei tehrêng mai! Abrahama ang bawkin, Jehova chungchâng kan hriat a ngai a. Kan mamawh hriatna leh thiltawn kan nei thei a ni. Tûn laiah hian Abrahama neih aia tam kan nei ta. (Daniela 12:4; Rom 11:33) Bible chu “lei leh vân neitu”  chungchâng hriatnain a khat a. Kan thil zirte chuan Jehova min hmangaihtîrin, amah zahna thûk tak min neihtîr bawk a ni. Chu Pathian kan hmangaihna leh zahna chuan a thu âwih tûrin min chêttîr a. Chutianga kan tih hunah chuan min vênhim dân leh mal min sâwm dânte kan hmu ang a, chu chuan kan rinna tinghettu thiltawn min neihtîr ang. Tih tak zeta Jehova rawng kan bâwl chuan lungâwina te, remna te, leh hlimna te kan nei ang. (Sâm 34:8; Thufingte 10:22) Hriatna leh thiltawn kan neih tam poh leh amah nêna kan inṭhianna chu a nghet zual sauh vang.

9, 10. (a) Inṭhianna nghet lehzual tûrin eng nge ngai? (b) Abrahama chuan Jehova nêna an inṭhianna chu a ngaihluin, a tinghet tih engin nge târ lang?

⁹ Inṭhian ṭhatna hi ro hlu tak ang a ni a. (Thufingte 17:17 chhiar rawh.) Chu chu thil cheimawi nân chauhva hman pangpâr khawina no man to tak ang a ni lo. Pârvul reng tûra tui leh ngaihsakna pêk ngai pangpâr mawi tak ang hi a ni zâwk. Abrahama chuan Jehova nêna an inṭhianna chu a ngaihluin, a vawng reng a. Chu chu engtin nge a tih?

¹⁰ Abrahama chuan a Pathian ṭihna leh a thuâwihna chu a thuam nghet zêl a. Entîr nân, a chhûngte leh a chhiahhlawhte nêna Kanaan rama an zin khân, thu tlûkna lian leh tê a siamnaah Jehova a inkaihhruaitîr zêl a ni. Isaaka pian hma kum khat, kum 99 mi a nih lai khân, Jehova chuan Abrahama chu a ina mipa zawng zawngte serh tansak tûrin a hrilh a. Abrahama chuan Jehova chu a ringhlelin, a thil ngente ti lo tûrin chhuanlam tûr a zawng em? Zawng lo, Pathian Jehova chu rinchhanin, “chu mi nî ngei chuan” a thu a âwih a ni.—Genesis 17:10-14, 23.

11. Engvângin nge Abrahama chuan Sodom leh Gomorra chu a ngaihtuah a, engtin nge Jehova’n ani chu a ṭanpui?

¹¹ Abrahama chuan thil tê thamah pawh Jehova thu a âwih ṭhin avângin an inṭhianna chu a nghet lehzual a. Jehova chu engkim a sawipui thei a, zawhna khirh tak a hmachhawn hunah pawh ṭanpuina a dîl hial a ni. Entîr nân, Jehova’n Sodom leh Gomorra khawpui chu tihboral a ni dâwn tih a hrilh khân, a ngaihtuah hle a. Engvângin nge? Mi sualte ruala mi ṭhate an thih tel ve a hlauh vâng a ni. Sodom khuaa awm a tupa Lota leh a chhûngte chu a ngaihtuah hle a ni ngei ang. Abrahama chuan “lei zawng zawnga rorêltu” Jehova chu a rinchhan a, chuvângin, a rilru tibuaitu a ngaihtuahna chu Jehova hnênah inngaitlâwm takin a hrilh a ni. Jehova chuan a ṭhian chungah chuan a dawhthei a, mi khawngaih thei tak a nihzia a lantîr a. Jehova chuan ro a rêl hunah pawh mi ṭhate chu zawng chhuakin, a chhanhim ṭhîn tih a hrilhfiah a ni.—Genesis 18:22-33.

12, 13. (a) Abrahama neih hriatna leh thiltawn chuan a hnuah engtin nge a ṭanpui? (b) Engin nge Abrahama’n Jehova a ring tlat tih a târ lan?

 ¹² Abrahama neih hriatna leh thiltawn zawng zawngte chuan Jehova nêna an inṭhianna nghet taka vawng reng tûrin a ṭanpui tih a chiang hle. Chuvângin, a hnua Jehova’n a fapa hlân tûra a ngen khân, ani chuan Jehova chu dawhthei tak, khawngaihna nei tak, rin tlâk tak, leh vênghimtu a ni reng tih a hre sa reng tawh a ni. Jehova’n vawilehkhatah râwng tak leh khirh takin thil a ti lo vang tih Abrahama chuan a hre chiang hle! Engvângin nge chutianga kan sawi theih?

¹³ A chhiahhlawhte a kalsan hmain an hnênah, Abrahama chuan: “Hetah sabengtung nên hian lo awm rawh u, kei leh naupang hi sawtah sâwn kan va kal ang a; tin, Pathian kan va bia ang a, in hnênah kan lo kîr leh ang,” tiin a hrilh a. (Genesis 22:5) Abrahama sawi tum chu eng nge ni? Isaaka chu a hlân dâwn tih a hriat avângin, amah nêna lo kîr leh tûra a sawi hian dâwt a sawi tihna a ni em? Ni lo. Jehova chuan Isaaka chu thihna ata a kaitho thei tih Abrahama’n a hriat thu Bible chuan a sawi. (Hebrai 11:19 chhiar rawh.) Abrahama chuan Sari nên an upa hle tawh chung pawhin fapa neih theihna Jehova’n a pe tih a hria a ni. (Hebrai 11:11, 12, 18) Chuvângin, Jehova tân thiltihtheih loh a awm lo tih a hria a. Mahse, chu mi nîa thilthleng tûr erawh a hre lo. Pathian thutiam zawng zawngte a thlen famkim theih nân, a ṭûl chuan Jehova’n a fapa chu a kaitho ang tih rinna a nei a. Chuvângin, Abrahama chu “ringtu zawng zawng pa” tia koh a ni.

14. Jehova rawngbâwlnaah eng harsatnate nge i tawh a, engtin nge Abrahama entawn tûr siam chuan a ṭanpui theih che?

¹⁴ Tûn laiah, Jehova chuan kan fate hlân tûrin min phût lo va; mahse, a thupêkte zâwm tûrin min phût a ni. A châng chuan hêng thupêkte min pêk chhan hi kan hre thiam lo mai thei a, zawm harsa kan ti mai thei bawk. Chutiang chuan i awm ve ngai em? Ṭhenkhat tân chuan thu hrilhnaa tel chu a harsa a. An zah theih vâng leh an hriat ngai lohte biak harsa an tih vâng a ni mai thei. Mi dangte chuan hnathawhnaah leh school-ah te mite awm dân anga awm loh chu an ngam lo va. (Exodus 23:2; 1 Thessalonika 2:2) Thil harsa tak engemaw ti tûra tih i nih hunah, rinna leh huaisenna kawnga Abrahama siam entawn tûr ṭha tak chu ngaihtuah ang che. Mi rinawm a hmei a pate entawn tûr siam kan ngaihtuah hian, chu chuan anmahni entawn tûr leh kan Ṭhian Jehova hnaih tûrin min chêttîr thei a ni.—Hebrai 12:1, 2.

15. Abrahama chu Jehova thupêk rinawm taka a zawm avângin a inchhîr ngai lo tih engvângin nge kan sawi theih?

¹⁵ Jehova thupêk a zawm avângin  Abrahama chu a inchhîr ngai em? Bible chuan Abrahama chu “putar tak, tar kûna damin a thi,” tih a sawi a. (Genesis 25:8) Kum 175 mi a nih khân, Abrahama chuan a dam chhûng nîte thlîr lêtin lungâwina a nei ngei ang. Engvângin nge? Jehova nêna an inṭhianna chu a tâna thil pawimawh ber a nih reng avângin. Mahse, Abrahama chu ‘tar kûnin a dam’ kan tih hian, nakin huna nun châkna a nei tawh lo tihna a ni lo.

16. Abrahama chuan Paradis-ah eng hlimnate nge a tawn ang?

¹⁶ Abrahama chuan “khua lungphûmte nei mi, Pathian rêlbâwl leh siam chu a nghâk reng,” tih Bible chuan a sawi a. (Hebrai 11:10) Ani chuan engtik nîah emaw chuan, chu khua, Pathian Ramin leia ro a rêl hun chu a hmu ang tih a ring tlat a. Hmuh pawh a hmu ngei ang! Lei paradis-a nung a, Pathian nêna an inṭhianna a tihngheh zêl theih huna Abrahama hlim dân tûr chu han mitthla teh. Rinna kawnga a entawn tûr siam chuan Pathian chhiahhlawhte chu kum sâng têl a ṭanpui a ni tih a hriat chuan a hlim hle ngei ang! Paradis-ah chuan Moria Tlânga inthawina a hlanin thil ropui tak a entîr tih chu a hria ang. (Hebrai 11:19) A fapa Isaaka hlân tûra a buatsaih laia a tawrh dân chuan Jehova’n tlanna atâna a Fapa Isua Krista a pêk laia a tawrh dân hre thiam tûrin mi rinawm maktaduai tam takte chu a ṭanpui a ni. (Johana 3:16) Abrahama entawn tûr siam chuan hmangaihna thiltih ropui ber, tlanna avânga lâwmna nei lehzual tûrin min ṭanpui ṭheuh va ni.

17. Eng nge tih i tum tlat a, a dawta thuziakah eng nge kan ngaihtuah ang?

¹⁷ Kan vaiin, Abrahama rinna chu entawn i tum ṭheuh vang u. Amah ang bawkin, hriatna leh thiltawn kan mamawh a. Jehova chungchâng kan zir zawm zêl a, a thu kan âwih zawm zêl chuan, mal min sâwm dân leh min vênhim dân kan hmu ang. (Hebrai 6:10-12 chhiar rawh.) Jehova chu chatuanin kan Ṭhian ni reng rawh se! A dawta thuziakah chuan, Pathian ṭhian mi rinawm dang pathumte entawn tûr siam chu kan ngaihtuah ang. (ws16.02-E)