I NUNA ni hlimawm ber chu han ngaihtuah teh. Chu chu in inneih nî nge ni a, fatîr i neih nî zâwk? A nih loh leh, baptisma i chan nî a ni em? Chu mi nî chu i nuna ni hlimawm ber leh pawimawh ber a nih ngei a rinawm. Chu mi nîa i unaute’n Pathian chu i thinlung zawng zawng, i thlarau zawng zawng, i rilru zawng zawng, leh i chakna zawng zawngin i hmangaih tih an hmuh chuan an va lâwm tak êm!—Marka 12:30.

Baptisma i chan aṭangin Jehova rawngbâwlnaah hlimna nasa tak i neih ngei a rinawm a. Mahse, thuchhuahtu tam takte chuan hlimna an neih ṭhin ṭhenkhat chu an hloh va. Engvângin nge? Hlim taka Jehova rawng bâwl zêl chhan tûr eng nge kan neih?

Lalram thuchah chuan hlimna nasa tak min pe a. Engvângin nge? Jehova chuan a Lalramin he khawvêl suaksual tak hi titâwpin, khawvêl thar a rawn thlentîr thuai ang tih min tiam avângin. Zephania 1:14 chuan heti hian min hrilh a: “LALPA ni ropui tak chu a hnai e, a hnaiin a thleng thuai dâwn a ni,” tiin. Mahse, kan beisei aia rei nghah ngai nia kan hriat chuan kan hlimna kan neih ṭhin chu kan hloh thei a. Chu chuan Pathian rawng kan bâwlna chu a tiṭhuanawp thei a ni.—Thufingte 13:12.

Kan unaute nêna kan inkawm hian, hlim taka Jehova rawng bâwl reng tûra tihchakin kan awm a. Jehova mite mize ṭha chuan biakna dikah min hîpin, hlim taka Pathian rawng bâwl ṭan tûrin min ṭanpui a ni. (1 Petera 2:12) Mahse, kan unaute zînga tuemaw ber chu Pathian thupêkte a zawm loh avângin thunun ni ta se, eng thil nge thleng thei? Hei hian kohhrana mi ṭhenkhat chu tilunghnualin, an hlimna a hlohtîr thei a ni.

Hausak âtchilhna chuan hlimna min hlohtîr thei bawk a. Engtin nge? Setana khawvêl chuan kan mamawh lêm loh thilte leitîr min tum a. Chuvângin, Isua thusawi: “Tuman hotu pahnih rawng an bâwl kawp thei lo; pakhat huain pakhat an duh ang, a nih loh leh, pakhat ṭanin pakhat an hmusit ang. Pathian leh sum rawng in bâwl kawp thei lo ve,” tih hi i hre reng ang u. (Matthaia 6:24) He khawvêl aṭanga kan neih theih zawng zawng neih tum chung chuan hlim takin Jehova rawng kan bâwl thei lo vang.

Jehova rawngbâwl chu amah hmangaihtute tân chuan phurrit a ni lo va. (1 Johana 5:3) Isua thusawi hi hre reng ang che: “Nangni thawk rim leh phurrit phur zawng zawngte u, ka hnênah lo kal ula, keiman ka chawlhtîr ang che u. Ka nghâwngkawl bât ula, ka hnênah zir rawh u; thuhnuairawlh leh rilrua inngaitlâwm tak ka nih hi: tichuan, . . . chawlhna in hmu ang. Ka nghâwngkawl chu a nuam a, ka phur pawh a zâng a ni,” tih hi. (Matthaia 11:28-30) Kristian dik nih chu a hahdamthlâkin, hlimna min pe a ni. Jehova  rawngbâwlnaah hlim chhan tûr ṭha tak kan nei a. Tûnah chuan chûng zînga pathum chu i lo ngaihtuah ang u.—Habakuka 3:18.

Nunna min Petu, Pathian hlim rawng kan bâwl. (Tirhkohte 17:28; 1 Timothea 1:11, NW) Min Siamtu chungah nun kan bâ tih kan hria a. Chuvângin, baptisma kan channa chu engtia rei pawh ni se, hlim takin a rawng i bâwl zawm zêl ang u.

Kum 40 chhûng bial kantu nia Jehova rawngbâwltu Héctor-a chungchâng hi han ngaihtuah teh. A “tar hnuah pawh” Jehova rawngbâwlnaah a la hlim reng a. (Sâm 92:12-14) A nupui a dam loh avângin Jehova rawngbâwlnaah duh angin inhmang thei tawh lo mah se, a hlimna chu a hloh lo a ni. Ani chuan: “Ka nupui hrisêlnain zâwi zâwia chhiat lam a pan tih hmuh chu a hrehawmin, amah enkawl pawh harsa hle mah se, Pathian dik rawngbâwlnaa ka neih hlimna min lâk bosak chu ka phal lo. Thiltum neia mihringte siamtu Jehova chungah ka nun ka bâ tih hriatna chu amah hmangaih tak zet a, thinlung zawng zawnga a rawng bâwl chhan tûr a tling a ni. Thu hrilh rawngbâwlnaah tel ka tum tlat a, hlimna ka hloh lohna tûrin ka rilruah Lalram beiseina dah hmasak ber chu ka tum tlat a ni,” tiin a sawi.

Nun hlimawm tak kan neih theih nân, Jehova chuan tlanna inthawina a pe. “Pathianin khawvêl a hmangaih êm êm a, chutichuan a Fapa mal neih chhun a pe a, amah chu tupawh a ring apiang an boral loh va, chatuana nunna an neih zâwk nân.” (Johana 3:16) Ni e, Pathian thilpêk duhawm tak, tlanna kan rinzia kan lantîr chuan kan sualte ngaidamsak kan ni theiin, chatuan nunna kan nei thei a ni. Hei hi kan lâwm chhan tûr dik tak a va ni êm! Tichuan, tlanna avânga kan lâwmna chuan hlim taka Jehova rawng bâwl tûrin min chêttîr ang.

Mexico rama awm unau Jesús-a chuan: “Ka hnathawhna bâwihah ka tâng a ni, a châng chuan thawh ngei ngei ngai a ni lo chung pawhin a zâwnin ni nga over time ka thawk a. Chu chu sum duh vâng mai a ni. Tichuan, Jehova chungchâng leh mihringte tâna a Fapa duh tak a pêk dânte ka hre ta a. A rawngbâwl châkna nasa tak ka nei ta a ni. Chuvângin, Jehova hnênah ka inpumpêk a, company tâna kum 28 chhûng ka thawh hnuah ka hna bânsan a, hunbi kima rawngbâwl chu ka tum ta a ni,” tiin a sawi. Hei hi Jesús-a’n hlim taka Jehova rawng a bâwl ṭan dân a ni.

Nungchang thianghlim takin kan nung a, chu chuan hlimna min pe. Jehova i hriat hmaa i nun dân chu i la hria em? Tirhkoh Paula chuan Rom khuaa Kristiante chu, tûn hmain “sual bâwihte” ni mah se, tûnah chuan “felna bâwihte” an ni tawh tih a hriatnawntîr a. Thianghlim taka an nun avângin, chatuana nun an beisei thei a ni. (Rom 6:17-22) Keini pawhin Jehova  tehnate chu kan zui a, chuvângin nungchang bawlhhlawhna leh tharum thawhna nun avânga lo awm lungngaihna lakah kan fihlîm a ni. Hlim chhan tûr a va ni tak êm!

Pathian awm ring lo va, chanchhâwnna ringtu leh boxer ni bawk Jaime-a hi han ngaihtuah teh. Ani chu Kristian inkhâwmnaahte a tel ṭan a, chuta a hmuh hmangaihna chuan a rilru a khawih hle a. A tûn hma nun dân kalsan tûr chuan, Jaime-a tân Jehova hnênah Amah ring tûra ṭanpuina dîl a ngai a ni. Ani chuan, “Hmangaihna leh zahngai thei tak Pa leh Pathian a awm tih chu zâwi zâwiin ka hmu chhuak ta a. Jehova tehna felte vawn tlat chu ka tân chuan inhumhimna a ni. Inthlâkthleng ta lo ila chuan, ka boxing khelhpui tûn hmaa ka ṭhian ṭhenkhatte angin ka boral tawh pawh a ni mai thei. Ka nuna ka hlim lai ber chu Jehova rawngbâwlnaa ka inhman hunte hi a ni,” tiin a sawi.

He khawvêl suaksual tâwpna kan nghah lai hian engtin nge kan awm ang? Pathian duhzâwng kan tiin, chatuana nun kan nghâk tih hre reng ang che. “Tichuan thil ṭha tih i ning suh ang u; kan inthlahdah loh zawngin a hun takah chuan kan seng dâwn si a.” (Galatia 6:8, 9) Jehova ṭanpuina nên chhel taka awmin, ‘hrehawm nasa taka’ dam khawchhuah nâna kan mamawh miziate nei tûra thawk rimin, Jehova rawng chu hlim takin i bâwl zawm zêl ang u.—Thu Puan 7:9, 13, 14; Jakoba 1:2-4.

Jehova chuan kan hnathawh leh a tân leh a hming tâna hmangaihna kan lantîr chu a hriat avângin, kan chhelna chu mal a sâwm ang tih kan ring nghet tlat thei a ni. Hlim taka a rawng kan bâwl zêl chuan, “Ka hmaah hian LALPA a awm fo va: ka ding lamah a awm ṭhîn a, ka nghîng lo vang. Chuvâng tak chuan thinlung lâwmin ka hlim ta êm êm a, ka taksa pawh thlamuang takin a awm hle hle tawh ang,” tia sawitu fakna hla phuahtu Davida ang kan ni ve ang.—Sâm 16:8, 9, C.L. Re-edited. (ws16.02-E)