1-3. (a) Pathian ṭhian kan ni thei tih engvângin nge kan hriat chian? (b) He thuziakah hian tute chungchâng nge kan ngaihtuah ang?

BIBLE chuan Abrahama chu vawi thum lai Pathian ṭhian tiin a ko va. (2 Chronicles 20:7; Isaia 41:8; Jakoba 2:23) Amah chauh hi Bible-in Pathian ṭhian tia a koh awmchhun a ni. Abrahama chauh chu Pathian ṭhian a ni a tihna a ni em? Ni lo ve. Bible chuan, chu chanvo chu kan nei vek thei tih a târ lang a ni.

² Pathian Thu chu Jehova ṭih a, ring a, a ṭhian ṭhate lo ni ta mi rinawm a hmei a pate chanchinin a khat a. (Sâm 25:14, C.L. Re-edited chhiar rawh.) Anni chu Paula sawi ‘chhûmpui nasa tak ang thlîrtute,’ a nih loh leh thuhretute zîngah an tel a ni. Hêng mi hrang hrangte hi Pathian ṭhiante vek an ni.—Hebrai 12:1, 2.

³ Bible-a târ lan Jehova ṭhian mi pathum: (1) Moab mi pasal sûn mi rinawm la ṭha lai tak Ruthi te, (2) Juda lal rinawm Hezekia te, leh (3) Isua nu mi inngaitlâwm tak Mari te  chungchâng hi i lo bih chiang ang u. Pathian ṭhian an lo nih ṭheuh dân aṭangin eng nge kan zir theih?

4, 5. Ruthi chuan eng thu tlûkna khirh tak nge a siam ngai a, engvângin nge chu chu a harsat êm êm? (A thupui chunga milem en rawh.)

⁴ Naomi chu a monu Ruthi leh Orpi nên chuan Moab ram aṭanga hla tak, Israel ram lam panin an kal a. Kawng lakah, Orpi chuan Moab rama kîr leh a tum a. Mahse, Naomi chuan a ram Israel lam pan zêl chu a tum tlat a ni. Ruthi chuan eng thu tlûkna nge a siam tâk ang? Thu tlûkna khirh tak a siam a ngai ta. Moab rama a chhûngte hnênah a kîr leh dâwn nge ni a, a pasala nu Naomi hnênah awm tûrin Bethlehem-ah a kal zâwk dâwn? tih chu.—Ruthi 1:1-8, 14.

⁵ Ruthi chhûngte chu Moab ramah an awm a. Chutah chuan a kîr leh theiin, ngaih pawh an lo ngaihsak ngei ang. Moab rama mite, an ṭawngte, leh an hnam dânte chu a hriatsa a ni a. Bethlehema hêng thilte chungchângah Naomi chuan Ruthi chu engmah a tiam thei lo. Ruthi tân pasal emaw, a chênna tûr in emaw a hmuhsak theih loh a hlau a ni. Chuvângin, Naomi chuan Moab rama kîr leh tûrin a hrilh a. A lema kan hmuh angin, Orpi chu “a chite hnên leh a pathian hnên lamah chuan a kîr leh ta a.” (Ruthi 1:9-15) Mahse, Ruthi chuan a chite leh an pathian dik lote hnên lama kîr leh chu a tum lo.

6. (a) Eng duh thlanna fing tak nge Ruthi chuan a siam? (b) Engvângin nge Boaza chuan Ruthi chu Jehova thlahnuaia inhumhimna zawng anga a sawi?

⁶ Ruthi chuan a pasal emaw, Naomi emaw hnên aṭangin Jehova chanchin a hria a ni thei ang. Jehova chu Moab pathiante ang a ni lo tih a hria a. Jehova chu a hmangaih a, hmangaih leh chibai bûk a phû tih a hre bawk a ni. Chuvângin, Ruthi chuan duh thlanna fing tak a siam ta. Naomi hnênah chuan: “I chite chu ka chite an ni ang a, i Pathian chu ka Pathian a ni ang,” tiin a hrilh a ni. (Ruthi 1:16) Ruthi’n Naomi a hmangaih dân hian kan thinlung a khawih hle. Mahse, kan thinlung khawih lehzualtu chu Jehova a hmangaihna hi a ni. Hei hian Boaza rilru pawh a khawih a, a hnuah ‘Jehova thlahnuaia inhumhimna a zawn’ avângin Ruthi chu a fak a ni. (Ruthi 2:12 chhiar rawh.) Boaza ṭawngkamte chuan sava notêin a pui thlahnuaia inhumhimna a zawn dân chu min hriatnawntîr thei a. (Sâm 36:7; 91:1-4) Chutiang bawkin, Jehova chuan Ruthi chu hmangaih taka vênghimin, a rinna chu mal a sâwm a ni. Ruthi chuan a thu tlûkna siamah inchhîr chhan tûr engmah a nei lo.

7. Jehova hnêna inpumpêk hrehtute chu engin nge ṭanpui thei ang?

⁷ Mi tam tak chuan Jehova chungchâng an zir a; mahse, a lakah inhumhimna an zawng lo. A hnêna an nun inpumpêk a, baptisma chan chu an hreh a ni. Chutiang mi i nih chuan, i hreh chhan chu ngaihtuah rawh. Mi tinte hian pathian tuemaw ber rawng chu an bâwl ṭheuh va. (Josua 24:15) Duh thlanna fing chu Pathian dik rawngbâwl hi a ni ngei ang. Jehova hnêna i inpumpêk hian, i tân inhumhimna a ni ang tih i rinzia i târ lang a ni. Ani chuan harsatna engpawh i tâwk chung pawhin a rawngbâwl reng tûrin a ṭanpui ang che. Chu chu Ruthi tâna Pathian thiltihsak chu a ni.

8. Hezekia ṭobul chu târ lang rawh.

⁸ Hezekia leh Ruthi te ṭobul chu a inang lo hle a. Hezekia chu Pathian hnêna inpumpêk hnam zînga mi a ni a. Mahse, Israel mi zawng zawngte chu an rinawm reng lo. Hezekia pa, Lal Ahaza chu lal sual tak a ni a. Pathian biak in a zah lo va, mite chu pathian dangte be tûrin a hmin a ni. Ahaza chuan Hezekia unau ṭhenkhat chu pathian dik lo tâna inthawi nân a nung chungin a hâl a ni. Hezekia naupan lai hun chu a râpthlâk hle!—2 Lalte 16:2-4, 10-17; 2 Chronicles 28:1-3.

9, 10. (a) Engvângin nge Hezekia chuan Jehova chunga rilru nat chhan tûr a neih mai theih? (b) Engvângin nge Pathian chungah rilru kan tihnat loh vang? (c) Engvângin nge kan ṭobul chuan eng ang mi nge kan nih dâwn tih thunun tlat angin kan ngaih loh vang?

⁹ Ahaza entawn tûr ṭha lo tak chuan a fapa Hezekia chu Jehova chunga rilru nâin emaw, thinurin emaw a awmtîr thei a. Tûn laiah, Hezekia aia tuar nasa lo zâwk mi ṭhenkhat chuan ‘lalpa chunga vui’ chhan tûr leh a inawpna pâwl chunga rilru nat chhan tûr nei niin an inhria a ni. (Thufingte 19:3) Mi dangte chuan an chhûngkaw ṭobul chuan nun ṭha lo tak a neihtîrin, an nu leh pate thil sual tih ang a tihnawntîr niin an hre bawk. (Ezekiela 18:2, 3) Mahse, chutiang ngaih dân chu a dik em?

¹⁰ A dik lo tih Hezekia nun chuan a târ lang chiang hle! Jehova chunga thinurna tûr chhan ṭha a awm ngai lo. Jehova chuan mite chungah thil ṭha lo a thlentîr si lo va. (Joba 34:10) Nu leh pate chuan an fate chu thil ṭha emaw, thil sual emaw an zirtîr thei tih chu a dik a. (Thufingte 22:6; Kolossa 3:21) Mahse, kan chhûngkaw ṭobul chuan eng ang mi nge kan nih dâwn tih chungchâng chu a thunun tlat tihna a ni lo. Engvângin nge? Jehova chuan zalên taka duh thlan theihna min pêk vâng a ni a, a awmzia chu thil ṭha emaw, thil sual emaw tih kan thlang thei tihna a ni. (Deuteronomy 30:19) Engtin nge Hezekia chuan, chu thilpêk hlu tak chu a hman?

11. Engin nge Hezekia chu Juda lal ṭha berte zînga mi nihtîr?

¹¹ A pa chu Juda lal sual berte zînga mi ni mah se, Hezekia chu lal ṭha berte zînga mi a ni a. (2 Lalte 18:5, 6 chhiar rawh.) A pa entawn tûr ṭha lo tak zui loh chu a thlang a ni. Chu ai chuan, Isaia, Mika, leh Hosea ang  Jehova zâwlneite thusawi chu ngun takin a ngaithla zâwk a. An zilhna leh thununnate chu a ngaihsak tlat a ni. Chu chuan a pa thlentîr buaina tam tak siam ṭha tûrin a chêttîr a. Biak in a thianfai a, Pathian hnênah mite sual ngaidam tûrin a ngên a, ram chhûnga milem biaknate chu a tichhe vek a ni. (2 Chronicles 29:1-11, 18-24; 31:1) A hnua Assuria lal Senakeriba’n Jerusalem a beih khân, Hezekia chuan huaisenna leh rinna nasa tak a târ lang a. Jehova vênhimna chu rinchhanin, a mite chu a tichak a ni. (2 Chronicles 32:7, 8) Ṭum khat chu Hezekia a lo chapo ta a; mahse, Jehova’n a zilh hnu chuan a inngaitlâwm ta a ni. (2 Chronicles 32:24-26) Hezekia chu kan tân entawn tûr ṭha tak a ni tih a chiang hle. A chhûngkaw ṭobulin a nun a tihchhiat chu a phal lo. Jehova ṭhian a nihzia a târ lang zâwk mah a ni.

12. Hezekia angin, tûn laia mi tam takte chuan Jehova ṭhian an ni tih engtin nge an târ lan?

¹² Tûn lai nunrâwnna leh hmangaihna awm lohna khawvêlah hian, naupang tam tak chu hmangaihna nei nu leh pate ngaihsakna tel lovin an seilian a. (2 Timothea 3:1-5) Tûn laia Kristian tam takte chu chhûngkaw boruak ṭha lo tak kâra seilian an ni chung pawhin, Jehova ṭhian nih an thlang a. Hezekia ang bawkin, anni chuan nakin hunah eng ang mi nge an nih dâwn tih chungchângah an chhûngkaw ṭobulin a thunun a ngai lo tih an târ lang a ni. Pathian chuan zalên taka duh thlan theihna min pe a, Hezekia anga a rawngbâwl a, amah chawimawi chu kan thlang thei a ni.

13, 14. Engvângin nge Mari chanvo dawn chu hlen harsa tak anga a lan mai theih, mahse engtin nge Mari chuan Gabriela thusawi chu a chhân lêt?

¹³ Hezekia hun a liam hnu kum tam takah, nula inngaitlâwm tak Mari chuan Jehova nêna inṭhianna ṭha tak neiin chanvo danglam tak a dawng a. A rai ang a, Pathian Fapa hringin, a enkawl dâwn a ni! Chutiang chawimawina ropui tak pe tûr chuan Jehova’n Mari chu a hmangaihin, a ring hle a ni ngei ang. Mahse, chu chanvo chungchâng a hriat ṭan tirh chuan engtin nge a chhân lêt?

¹⁴ Mari chu chawimawina ropui tak pêk a nih thu kan sawi fo va. Mahse, eng hlauhna nge a neih mai theih? Entîr nân, vântirhkoh Gabriela chuan mipa nêna awm dunna tel lovin a rai dâwn tih a hrilh a. Mahse, Gabriela chuan a rai dân tûr chungchângah a chhûngte leh a ṭhenawmte hrilhfiahsak a tiam lo. Engtin nge an ngaih ang? Mari chuan Josefa hnênah a rinawm loh vâng a ni lo tih engtin nge a hrilhfiah ang? Chu bâkah, Pathian Fapa enkawl tûrin mawhphurhna lian tak a nei bawk! Mari ngaihtuahna  zawng zawng chu kan hre vek lo va; mahse, Gabriela’n thu a hrilh hnua a thiltih chu kan hria: “Ngai teh, Lalpa bawinu ka ni, i thu ang zêlin ka chungah thleng rawh se,” tiin a sawi tih chu.—Luka 1:26-38.

15. Engvângin nge Mari rinna chu ropui tak a nih?

¹⁵ Mari rinna chu a va ropui tak êm! Bâwihnu ang maiin, engkim ti tûrin a inpeih reng a. Jehova’n a ngaihsakin, a vênghim ang tih a ring tlat a ni. Engtin nge Mari’n chutiang rinna nghet tak chu a neih theih? Rinna kan pianpui lo va. Mahse, rinna nei thei tûra hma kan lâk a, Pathian malsâwmna kan dîl chuan rinna chu kan nei thei a ni. (Galatia 5:22; Ephesi 2:8) Mari chuan a rinna tinghet tûrin a thawkrim hle. Chu chu engtin nge kan hriat? A thu ngaihthlâk dân leh a thusawi chhuahte chu i lo ngaihtuah ang u.

16. Engin nge Mari chu ṭha taka thu ngaithlatu a ni tih târ lang?

¹⁶ Mari thu ngaihthlâk dân. Bible chuan ‘ngaihthlâk kan chuhin, thusawi kan chuh tûr a ni lo,’ tih a sawi a. (Jakoba 1:19) Mari chu ṭha taka thu ngaithlatu a ni. A thu hriatte, a bîk takin Jehova chungchânga a thu hriatte chu ngun takin a ngaithla tih Bible chuan a târ lang. Chutiang thil pawimawh takte ngun taka ngaihtuah nân hun a hmang a. Entîrna pakhat chu Isua pian laia berâmpute’n vântirhkoh hnên aṭanga an thu dawn chungchâng a hnêna an hrilh khân a ni. A hnuah, Isua kum 12 mi a nih khân, Mari mak tih tûr thu engemaw tak a sawi a. He mi ṭum hnihah hian, Mari chuan a ngaithla a, a hre reng a, a thu hriatte chu ngun takin a ngaihtuah ve ve a ni.—Luka 2:16-19, 51 chhiar rawh.

17. Mari thusawi dân aṭangin eng nge kan hriat theih?

¹⁷ Mari thusawi chhuahte. Bible chuan Mari thusawi tam tak min hrilh lo va. A thusawi sei ber chu, Luka 1:46-55-ah kan hmu thei a ni. Chûng thute chuan Mari’n Hebrai Pathian Lehkha Thu a hre chiang hle tih a târ lang. Engtin nge? Mari thusawite chu Samuela nu, Hani ṭawngṭainaa thuchhamte nên a inang hle a. (1 Samuela 2:1-10) Mari chuan a thusawiah vawi 20 lai Pathian Lehkha Thute a la chhuak niin a lang. A Ṭhian ropui ber, Jehova hnên aṭanga a zir thutak thute sawi chhuah chu a duh tih a chiang hle.

18. Eng kawngtein nge Mari rinna chu kan entawn theih?

¹⁸ Mari ang bawkin, kan tâna harsa lutuk tûra kan ngaih Jehova hnên aṭanga chanvo dawn châng kan nei mai thei a. A entawn tûr siam chu zuiin, chanvo kan dawnte chu inngaitlâwm takin pawm ila, Jehova’n min ṭanpui ang tih i ring tlat bawk ang u. Jehova thu ngun taka ngaithla a, a chungchâng leh a thiltum kan zirte ngun taka ngaihtuahin Mari rinna chu kan entawn thei bawk. Chutianga kan tih hnu chuan, kan thu zirte chu mi dangte hnênah hlim takin kan hrilh thei tawh ang.—Sâm 77:11, 12; Luka 8:18; Rom 10:5.

19. Bible-a rinna kawnga mi langsâr takte kan entawn hian, eng nge kan chian theih?

¹⁹ Abrahama ang bawkin, Ruthi te, Hezekia te, leh Mari te chu Jehova ṭhian an ni tih a chiang hle a. Anni chu Pathian ṭhian nih theihna chanvo nei ‘chhûmpui nasa tak ang thlîrtute,’ a nih loh leh thuhretute zînga mi an ni. Chutiang rinna kawnga mi langsâr takte chu i entawn chhunzawm zêl ang u. (Hebrai 6:11, 12) Chutianga kan tih chuan, chatuana Jehova ṭhian nih theihna lâwmman chu kan dawng thei ang! (ws16.02-E)