1, 2. Engtin nge Davida chuan Pathian chungah a rinawmna a târ lan? (A thupui chunga milem en rawh.)

SAULA leh a sipai 3,000-te chuan Davida chu thah tumin Judai thlalêrah an zawng a. Mahse, zan khat chu Davida leh a mite chuan Saula leh a sipaite riah hmun chu an va hmu a. An vai chuan an lo muhîl a, chuvângin Davida leh Abisaia chu vêngtu sipaite kârah fîmkhur taka kalin Saula muhîl lai chu an va hmu ta a. Abisaia chuan Davida hnênah: “Fei hian vawi khatah leiah hian ka han chhun bet tlat mai teh ang aw? Ka chhun nawn leh tawh lo vang,” tiin a hrilhru a. Mahse, Davida’n Saula tihhlum a phal lo. Abisaia hnênah: “Tiboral suh, LALPA hriak thih chunga kut thlâka thiam chang thei tunge awm thei ngai?” tiin a hrilh a. “LALPA hriak thiha chungah chuan kut ka thlâk loh tûrzia mai chu,” tiin a sawi zawm a ni.—1 Samuela 26:8-12.

 ² Davida chuan Jehova chunga rinawm tûra a tih ngaite chu a hria a. Saula chu a zah tûr a ni tih a hria a, amah khawih chu ngaih pawh a ngaihtuah lo. Engvângin nge? Israel lal ni tûra Pathian thlan a nih vâng a ni. Tûn hmâ ang bawkin tûn laiah pawh, Jehova chuan a chhiahhlawh zawng zawngte chu a laka rinawm tûr leh an chunga thunei tûra a ruatte chu zah tûrin a duh a ni.—Mika 6:8 chhiar rawh.

3. Engtin nge Abisaia chu Davida chungah a rinawm?

³ Abisaia chuan Davida chu lal ni tûra Pathian thlan a ni tih a hriat avângin a zah a. Mahse, a lal hnuah sual pawi takte a ti a ni. Ani chuan Uria nupui chu a uirê a, indonaah Uria chu thihtîr ngei tûrin Joaba chu a hrilh a ni. (2 Samuela 11:2-4, 14, 15; 1 Chronicles 2:16) Joaba chu Abisaia unaupa a nih avângin, Davida thiltih chu a hriat ngei a rinawm a; mahse, Davida chu a la zah reng tho a ni. Chu bâkah, Abisai chu sipaihotu a ni a, a thu neihna hi lala insiam nân a hmang thei a ni; mahse, chutiang chuan a ti ngai lo. Chu ai chuan, Davida rawng chu bâwlin, a hmêlmate lakah a vênghim zâwk a ni.—2 Samuela 10:10; 20:6; 21:15-17.

4. (a) Engtin nge Davida chu Pathian chunga rinawmna kawngah entawn tûr ṭha a nih? (b) Mi dang tute entîrna nge kan sawiho vang?

⁴ Davida chu a dam chhûng zawngin Jehova chungah a rinawm a. A tleirâwl laiin, Pathian Jehova leh Israel mite diriamtu mi hrâwl Goliatha chu a that a ni. (1 Samuela 17:23, 26, 48-51) Davida a lal lai chuan a thil sual tihte avângin Jehova zâwlnei Nathana chuan a zilh a. A thil sual tih chu pawm nghâlin, a inchhîr a. (2 Samuela 12:1-5, 13) A hnua a lo upat chuan Jehova biak in sak nân thil hlu tam tak a thawh a ni. (1 Chronicles 29:1-5) Davida chuan a nunah thil sual pawi takte a ti chung pawhin, Pathian chunga a rinawmna chu a bânsan ngai lo tih a chiang hle. (Sâm 51:4, 10; 86:2) He thuziakah hian, Davida leh a hun laia mi dangte entawn tûr siam chu kan sawiho ang a, tu dang zawng aia Jehova chunga kan rinawm theih dân chu kan hria ang. Chutianga ti tûra min ṭanpuitu mize dangte pawh kan sawiho bawk ang.

5. Abisaia thil tihsual aṭangin eng nge kan zir theih?

⁵ Abisaia’n Saula tihhlum a duh khân, Davida chunga rinawm a tum vâng a ni a. Mahse, Davida chuan “LALPA hriak thih” chunga kut thlâk chu a dik lo tih a hriat avângin, Abisaia’n lal a tihhlum chu a phal lo a ni. (1 Samuela 26:8-11) Hei hian thil pawimawh tak pakhat min zirtîr a ni: Tu chungah nge kan rinawm hmasak ang tih chungchânga thu tlûkna siam a ngaih hunah, kan dinhmuna min ṭanpui thei Bible thu bulte kan ngaihtuah a ngai, tih chu.

6. Kan chhûngte leh ṭhiante chunga rinawm chu thil pângngai tak a ni chung pawhin, engvângin nge kan fîmkhur ang?

⁶ Ṭhiante leh chhûngkaw zînga mite ang kan hmangaih takte chunga rinawm chu thil pângngai tak a ni a. Mahse, mi ṭha famkim lo kan nih avângin, kan ngaihtuahnate chuan min hruai sual thei a ni. (Jeremia 17:9) Chuvângin, kan hmangaih tak tuemawin thil sual engemaw ti a, thutak a chhuahsan chuan tu dang zawng aia Jehova chunga rinawm chu a  pawimawh zâwk tih kan hre reng tûr a ni.—Matthaia 22:37 chhiar rawh.

7. Engtin nge unaunu pakhat chu dinhmun harsa tak hnuaiah Pathian chunga a rinawm tlat?

⁷ In chhûngkaw zînga tuemaw chu kohhran aṭanga hnawhchhuah a nih chuan, Jehova chungah i rinawmna i lantîr thei a. Entîr nân, ni khat chu Anne-i chuan phone a dawng a, a nu kohhran aṭanga hnawhchhuah chuan tlawh a duh thu a hrilh a. ^[1] (Endnote en rawh.) A nu chuan a chhûngte’n an biak duh loh avânga nuam a tih lohzia a hrilh a ni. Chu chuan Anne-i a tilungngai a, lehkha thawna chhâng tûrin a tiam ta a. Mahse, lehkha thawn a ziah hmain, Bible thu bul ṭhenkhat chu ngun takin a ngaihtuah a. (1 Korinth 5:11; 2 Johana 9-11) Tichuan, a lehkha thawnah chuan a nu chu thil sual a tih a, a inchhîr duh loh khân, an chhûngkaw inzawmna a tichat a ni tih ngilnei takin a hrilh a. A hlim leh theih dân tûr kawng awmchhun chu Jehova hnêna kîr leh hi a ni tih a hrilh bawk a ni.—Jakoba 4:8.

8. Eng miziate’n nge Pathian chunga rinawm tûrin min ṭanpui ang?

⁸ Davida hun laia Pathian chhiahhlawh rinawmte chu an inngaitlâwm a, ngil an neiin, an huaisen hle bawk. Chûng miziate chuan Jehova chunga rinawm tûra min ṭanpui theih dân i lo en ang u.

9. Engvângin nge Abnera chuan Davida chu thah a tum?

⁹ Saula fapa Jonathana leh Israel sipaite hotu ber Abnera chuan Davida’n Lal Saula hnêna Goliatha lû a rawn ken lai chu an hmu ve ve a. Jonathana chu Davida ṭhian a lo ni a, a chungah a rinawm tlat a ni. (1 Samuela 17:57–18:3) Mahse, Abnera chu chutiang a ni lo. A hnuah, Davida thah duhtu Saula chu a ṭanpui zâwk hial a ni. (1 Samuela 26:1-5; Sâm 54:3) Jonathana leh Abnera chuan Pathianin Davida chu Israel lal ni tûrin a duh tih an hria a. Mahse, Saula thih hnuah Abnera chuan Davida chu a thlâwp lo. Saula fapa Isbosetha chu laltîr a tum zâwk mah a. A hnuah, Abnera chuan lal nih a duh ta a, chu chu Lal Saula nupui pakhat a mutpui chhan a ni ngei ang. (2 Samuela 2:8-10; 3:6-11) Engvângin nge Jonathana leh Abnera chuan Davida chungchângah ngaih dân inang lo tak an  neih? Jonathana chu Jehova chungah a rinawmin a inngaitlâwm a, Abnera erawh chu chutiang mi a nih ve loh vâng a ni.

10. Engvângin nge Absaloma chu Pathian chunga a rinawm loh?

¹⁰ Lal Davida fapa Absaloma chu a inngaihtlâwm loh avângin Pathian chungah a rinawm lo va. Lal nih a duh avângin, ‘tawlailîr leh sakawrte leh mi sawmnga a hmaa tlân tûr’ a nei a ni. (2 Samuela 15:1) Israel mi tam tak chu a chunga rinawm tûrin a hmin bawk. Jehova chuan a pa Davida chu Israel lalah a siam tih hre reng chungin, thah a tum a ni.—2 Samuela 15:13, 14; 17:1-4.

11. Bible-a chuang Abnera te, Absaloma te, leh Baruka te chanchin chu engtin nge kan hlâwkpui theih?

¹¹ Mi chu a inngaihtlâwm lohva, thu neihna sâng zâwk a duh hian, Pathian chunga rinawm chu a tân chuan thil harsa tak a ni. Jehova kan hmangaih avângin, mahni hma sial leh sual tak, Abnera leh Absaloma ang nih chu kan duh lo a ni. Mahse, sum tam tak neih châkna emaw, mi pawimawh tak anga inngaihna min neihtîrtu hna neih châkna emaw nei lo tûrin kan fîmkhur tûr a ni. Chu chuan Jehova nêna kan inlaichînna a tichhe thei si a. Jeremia lehkha ziaktu Baruka chuan engemawti chhûng chu a thil neih lohte neih a châk a, Pathian rawng a bâwlnaah a hlim tawh lo va. Jehova’n a hnênah: “Ngai rawh, ka sak tawh chu ka ṭhiat leh ang a, ka phun tawh chu ka pawt chhuak leh ang, ram pum pui mai chu: tin, mahni tân thil ropui i zawng em ni? Zawng lo mai rawh,” tiin a hrilh a ni. (Jeremia 45:4, 5) Baruka chuan Jehova chu a ngaithla a. Keini pawhin nakin lawkah he khawvêl suaksual hi a tihboral dâwn avângin Jehova thu chu kan ngaithla tûr a ni.

12. Mahni hmasialna nei chunga Pathian chunga kan rinawm theih loh chhan sawi rawh.

¹² Mexico rama unau Daniel-a chuan tu hnênah nge a rinawm ang tih chungchângah thu tlûkna a siam a ngai a. Jehova be lotu hmeichhe pakhat nupuia neih a duh a ni. Daniel-a chuan: “Pioneer ka thawh hnuah pawh ani chu lehkha ka la thawn zêl a,” tiin a sawi. Mahse, a duhzâwng chu hmasial takin a ti a ni tih a inhre ta a. Jehova chungah a rinawm lo va, a inngaihtlâwm a ngai a ni. Chutah a bialnu chungchâng chu thiltawn nei upa hnênah a hrilh ta a. Daniel-a chuan: “Pathian  chunga rinawm tûr chuan a hnêna lehkha ka thawn ṭhin chu ka titâwp tûr a ni tih hre tûrin upa chuan min ṭanpui a. Mittui tla chunga vawi tam tak ka ṭawngṭai hnu chuan, chu chu ka ti thei ta. Rei lo têah, rawngbâwlnaa ka hlimna chu a rawn pung chho ta a ni,” tiin a sawi. Tûnah Daniel-a chuan Jehova hmangaihtu nupui a nei a, bial kantu niin rawng a bâwl mêk a ni.

13. Davida’n thil sual a tih khân, engtin nge Nathana chu Pathian chungah leh Davida chungah a rinawm ve ve?

¹³ Jehova chunga kan rinawm hian, mi dangte chungah kan rinawm theiin, anni chu a ṭha thei ang berin kan ṭanpui thei bawk. Zâwlnei Nathana chu Jehova chungah leh Davida chungah a rinawm ve ve a ni. Davida’n mi nupui a lâksak a, a pasal a thah hnuah, Jehova chuan Davida zilh tûrin Nathana chu a tîr a. Ani chu mi huaisen leh Jehova thuâwih tak a ni a. Fing taka thiltiin, Davida chu ngilnei takin a be bawk a. Tin, a thil sual tih a pawizia hre thiam tûra ṭanpui chu a duh bawk a ni. Chuvângin, Davida hnênah mi rethei berâm neih chhun chhuhsaktu mi hausa chanchin a hrilh a. Davida’n chu thu a han hriat chuan mi hausapa thiltih avâng chuan a thinur ta hle a. Chutah, Nathana chuan: “Nangmah hi i ni alâwm,” tiin a hrilh ta a. Davida chuan Jehova chungah thil sual a ti a ni tih a inhre ta a ni.—2 Samuela 12:1-7, 13.

14. Engtin nge Jehova leh i ṭhiante emaw, i chhûngte emaw chunga i rinawm ve ve theih?

¹⁴ Nang pawhin Jehova chunga i rinawmna chu i dah pawimawh ber thei a, ngilneihna lantîrna hmangin mi dangte chungah pawh i rinawm thei bawk a ni. Entîr nan, unau tuemawin thil sual pawi tak a tih chu i lo hre mai thei a. A chunga rinawm chu i duh mai thei a, a bîk takin i ṭhian ṭha emaw, i chhûngkaw zînga mi emaw a nih chuan i duh lehzual thei a ni. Mahse, Jehova chunga rinawm chu a pawimawh zâwk tih i hre bawk. Chuvângin, Nathana ang bawkin Jehova thu chu âwih la, i unaupa chungah ngilnei ang che. Upate hnênah ṭanpuina dîl tûr leh anmahni be pawh nghâl tûrin hrilh ang che. A hrilh loh chuan, nangmah ngeiin upate chu i hrilh tûr a ni. Chutianga i tih chuan Jehova chungah i rinawm tlat tihna a ni ang. Chutih rual chuan, upate’n ani chu Jehova nêna inlaichînna ṭha nei leh tûra an ṭanpui theih avângin i unaupa chungah ngil i nei tihna a ni bawk. Upate chuan zaidam tak leh nunnêm takin an zilh dâwn si a.—Leviticus 5:1; Galatia 6:1 chhiar rawh.

15, 16. Engvângin nge Husaia tân Pathian chunga rinawm tûrin huaisenna neih a ngaih?

¹⁵ Husaia chu Lal Davida ṭhian rinawm takte zînga mi a ni a. Mite’n Absaloma laltîr an duh khân, Husaia tân Davida leh Pathian chunga rinawm tlat tûrin huaisenna neih a ngai a. Absaloma chu a sipaite nên Jerusalem lam panin an lo kal a, Davida erawh chu  a tlân chhia tih a hria a ni. (2 Samuela 15:13; 16:15) Husaia chuan eng nge a tih? Davida chu phatsanin, Absaloma chu a thlâwp em? Thlâwp lo. Davida chu a upat tawh bâkah mi tam takin tihhlum an duh chung pawhin, lal ni tûra Jehova ruat a nih avângin Husaia chu a chungah a rinawm tlat a. Chuvângin, Husaia chu Davida hmu tûrin Olive Tlângah a kal a ni.—2 Samuela 15:30, 32.

¹⁶ Davida chuan Husaia chu Absaloma’n Ahithophela thu aia Husaia thu a ngaihthlâk theih nân Jerusalema kîr leha Absaloma ṭhian lema chang tûrin a ngên a. Husaia chu mi huaisen tak a ni a, Davida thu âwih tûr leh Jehova chunga rinawm tlat tûrin a nun a thâp a ni. Davida chuan Husaia tân Jehova ṭanpuina a dîl a, Jehova chuan a ṭanpui ta rêng a. Absaloma chuan Ahithophela thu aiin Husaia thu chu a ngaithla ta a ni.—2 Samuela 15:31; 17:14.

17. Engvângin nge rinawm tûr chuan huaisenna neih a ngaih?

¹⁷ Kan chhûngkaw zînga mi te, kan hnathawhpui te, leh sawrkâr thu neitute chuan an duhzâwng thilte ti tûrin min duh ṭhîn a. Mahse, Jehova chunga rinawm tûr leh a thu âwih tûr chuan huaisenna kan neih a ngai a ni. Entîr nân, Japan rama Taro-a chuan a naupan lai aṭang tawhin, a nu leh pate hlim nân a tih theih apiang a ti a. An thu a âwihin, an chungah a rinawm a, chu chu tih ngei a ngaih vâng ni lovin, a hmangaih vânga ti a ni. Mahse, Jehova Thuhretute nêna Bible an han zir chuan, a nu leh a pate chuan titâwp tûrin an duh a. Chu chuan a tilungngai hle a, inkhâwm tûra a thu tlûkna siam chu an hnêna hrilh harsa a ti hle a ni. Taro-a chuan: “An thin a ur hle a, kum tam tak chhûng chu ina va tlawh min khap a ni. Ka thu tlûkna siam anga ti tûra huaisenna dîlin ka ṭawngṭai a. Tûnah chuan an rilru put hmang chu a nêm tawh zâwk a, ka va tlawh ziah thei tawh a ni,” tiin a sawi.—Thufingte 29:25 chhiar rawh.

18. Engtin nge he thuziak hi i hlâwkpui?

¹⁸ Davida te, Jonathana te, Nathana te, leh Husaia te angin Jehova chunga rinawmna aṭanga neih theih lungâwina chu i nei ve ang u. Mi rinawm lo Abnera leh Absaloma ang nih chu kan duh ngai lo vang. Mi ṭha famkim lo kan ni a, thil kan tisual ṭhîn tih chu a dik ngei mai. Mahse, Jehova hnênah chuan a chunga rinawm chu kan nuna thil pawimawh ber a ni tih i lantîr ang u. (ws16.02-E)