1, 2. Unaupa chuan a chungchâng eng nge a hriat chhuah a, eng nge a tih?

ROBERT-A chu a tleirâwl laiin baptisma a chang a; mahse, thutak chu a nuna thil pawimawh ber a ni lo. Ani chuan: “Thil sual chu ka ti ngai miah lo va, mahse a lem ka chang ṭhîn. Thlarau lama chak angin ka lang a, inkhâwm zawng zawngah ka tel ṭhîn a, kum khat chhûngin auxiliary pioneer thawh châng pawh ka nei ṭhîn. Mahse, thil engemaw chu a kim lo a ni,” tiin a sawi.

² Robert-a chuan nupui a neih hma zawng chu eng nge kim lo tih a hre lo va. An nupain Bible zawhnate inzâwtin an infiam ṭhîn a. A nupui chuan Bible a hre bel hlein, zawhnate chu awlsam takin a chhâng thei a ni. Mahse, Robert-a chuan a chhânnate a hriat loh fo avângin a zak ṭhîn a. Ani chuan: “Engmah hre lo ang mai ka ni. Heti hian ka inngaihtuah a, ‘Thlarau lamah ka nupui kaihruai tûr chuan thil engemaw ka tih a ngai a ni,’” tiin a ngaihtuah a. Tichuan, a ngaihtuah ang chuan a ti ta a. “Nasa lehzualin Bible ka zir a, tichuan thil inkûngkaih dânte chu ka man ṭan a. Ka hre thiam ve ta zêl a, a pawimawh ber chu Jehova nêna inlaichînna ṭha neih hi a ni,” tiin a sawi a ni.

3. (a) Robert-a thiltawn aṭangin engnge kan zir theih? (b) Tûnah, eng thil pawimawhte nge kan sawiho vang?

 ³ Robert-a thiltawn aṭangin thil pawimawh tak kan zir thei a. Bible hriatna engemaw chen kan neiin, inkhâwmnaah leh rawngbâwlnaahte kan tel ziah pawh a ni thei; mahse, chu chuan thlarau lam thil ngaihsaktu kan ni tih a kâwk kher lo. A nih loh leh, thlarau lam thil ngaihsaktu ni lehzual tûrin ṭan kan lo la tawh pawh a ni thei a; mahse, kan inen dik chuan hmasâwn theih dân kawngte kan hmu ang. (Philippi 3:16) He thuziakah hian, zawhna pawimawh tak pathum kan chhâng ang: (1) Thlarau lam thil ngaihsaktu kan ni tih hre tûrin engin nge min ṭanpui ang? (2) Engtin nge thlarau lama kan chak lehzual theih? (3) Thlarau lama chaknain kan nî tin nunah engtin nge min ṭanpui theih? tihte hi.

4. Ephesi 4:23, 24-a thurâwn hi tute tâna pêk nge a nih?

⁴ Pathian rawng kan bâwl ṭan hian kan nun kawng hrang hrang nghawngtu inthlâk danglamnate kan siam a. Chutianga inthlâk danglamna kan neih chu baptisma kan chan hunah a tâwp mai lo. Bible chuan: “In rilru thlarauvah chuan atharin lo awm [zêl] ula,” tiin min hrilh a. (Ephesi 4:23, 24) Kan ṭhat famkim loh avângin inthlâk danglamna kan siam zawm zêl a ngai a. Kum tam tak chhûng Jehova rawng lo bâwl tawh pawh ni ila, amah nêna kan inlaichînna chu kan tihchak reng a ngai a ni.—Philippi 3:12, 13.

5. Eng zawhnatein nge thlarau lam thil ngaihsaktu kan ni tih hre tûra min ṭanpui thei?

⁵ Naupang kan ni emaw, puitling kan ni emaw pawh ni se, dik taka kan inen chiang a ngai a. Heti hian kan inzâwt thei a: ‘Thlarau lam thil ngaihsaktu ka ni chho zêl tih ka inhria em? Krista ang ka ni chho zêl em? Ka rilru put hmang leh inkhâwma ka awm dânin eng nge a târ lan? Ka tîtîte hian nuna ka thil duh takte chungchâng eng nge a târ lan? Ka inzir thin dân te, ka inchei dân leh inthuam dân te, zilhna ka chhân lêt dânte hian ka chungchâng eng nge a târ lan? Thil sual ti tûra thlêm ka nih hunah engtin nge ka chhân lêt? Kristian mi puitling ka ni tawh em?’ titein. (Ephesi 4:13) Chûng zawhnate chuan thlarau lamah engtiang khawpin nge kan ṭhan chhoh tih hre tûrin min ṭanpui thei a ni.

6. Eng thil dangin nge thlarau lam thil ngaihsaktu kan ni tih hre tûra min ṭanpui thei?

⁶ Thlarau lam thil ngaihsaktu kan ni tih inhre tûrin mi dang ṭanpuina kan mamawh châng a awm a. Tirhkoh Paula’n khawvêl mi, a nih loh leh tîsa lam thil ngaihsaktu chuan a nun kawngin Pathian a tilâwm lo tih a hre thiam thei lo tih a sawi a. Mahse, thlarau lam thil ngaihsaktu chuan Pathian thil thlîr dânte chu a hre thiam a. Ani chuan tîsa lam nun kawng chu Jehova’n a pawm lo tih a hria a ni. (1 Korinth 2:14-16; 3:1-3) Krista rilru ang nei upate chuan unaute’n tîsa lam nun kawng an  zawh ṭan tih an hriat vêleh ṭanpui nghâl an tum a ni. Upate’n min ṭanpui an tum a nih chuan, an ṭanpuina chu pawmin a ṭûl angin kan inthlâk danglam ang em? Chutianga kan tih chuan, thlarau lama chak lehzual kan duh tak zet tih kan lantîr a ni ang.—Thuhriltu 7:5, 9.

7. Thlarau lam thil ngaihsaktu chu Bible hriatna nei mi mai a ni lo tih engtin nge kan hriat?

⁷ Thlarau lam thil ngaihsaktu ni tûr chuan Bible hriatna neih mai chu a tâwk lo. Lal Solomona chuan Jehova chungchâng a hre tam hle a, a thufing ṭhenkhat phei chu Bible-ah a chuang hial a ni. Mahse, a hnuah, Jehova nêna an inlaichînna a derthâwng a, a rinawm reng ta lo a ni. (1 Lalte 4:29, 30; 11:4-6) Chuvângin, Bible hriatna bâkah, eng nge kan la mamawh? Kan rinna kan tihngheh zawm zêl a ngai a ni. (Kolossa 2:6, 7) Chu chu engtin nge kan tih ang?

8, 9. (a) Kan rinna tichak tûrin engin nge min ṭanpui ang? (b) Kan zir a, kan chhût ngun huna kan thiltum chu eng nge ni? (A thupui chunga milem en rawh.)

⁸ Kum zabi khatnaah, Paula chuan Kristiante chu ‘puitlin lam pan’ tûrin a fuih a. (Hebrai 6:1) He fuihna hi tûn laiah engtin nge kan nunpui theih? Kan tih theih dân pawimawh tak pakhat chu How to Remain in God’s Love tih lehkha bu zirna hi a ni. Chu chuan Bible thu bulte i nuna i hman theih dân hre thiam tûrin a ṭanpui ang che. Chu lehkhabu chu i zir tawh a nih chuan i rinna tichak tûra ṭanpui theitu zir tûr thu leh hla chhuah dangte pawh a awm a ni. (Kolossa 1:23) Kan thil zirte chhût ngun a ngaih bâkah, kan nunpui theih dân tûr hre tûrin Jehova hnênah ṭanpuina kan dîl pawh a ngai bawk.

⁹ Kan zir a, kan chhût ngun huna kan thiltum chu Jehova tihlâwm leh a thuâwih duhna thûk tak neih a ni a. (Sâm 40:8; 119:97) Thlarau lama kan hma sâwnna dang theitu thil engpawh ka hnâwl a ngai bawk.—Tita 2:11, 12.

10. Ṭhalaite chuan thlarau lama chak lehzual tûrin eng nge an tih theih?

¹⁰ Ṭhalai i nih chuan thlarau lam thiltumte i nei em? Bethel-a rawngbâwl unaupa pakhat chuan bial inkhâwmpuia baptisma châng tûr  ṭhalaite chu biain an thlarau lam thiltumte a zâwt ṭhîn a. Tam tak chuan nakina Jehova rawng an bâwl duh dânte ngun takin an ngaihtuah lâwk tih a hmu a. Ṭhenkhat chuan hunbi kima Jehova rawngbâwl emaw, thuchhuahtu mamawh zualna hmuna insawn emaw an tum a ni. Mahse, ṭhalai ṭhenkhat erawh chuan a zawhna chu an chhâng thei lo a ni. Chu chu thlarau lam thiltumte neih ngai lovah an inngai tihna a ni em? Ṭhalai i nih chuan heti hian inzâwt rawh: ‘Ka nu leh pate’n ti tûra min duh vâng maia inkhâwmahte leh thlawhhma rawngbâwlnaahte tel ka ni em? A nih loh leh, keimah ngeiin Pathian nêna inṭhian ṭhatna ka nei em?’ tiin. Ni e, ṭhalai kan ni emaw, puitling kan ni emaw kan vaiin thlarau lam thiltumte kan nei tûr a ni. Chûng thiltumte chuan thlarau lama chak lehzual tûrin min ṭanpui ang.—Thuhriltu 12:1, 13.

11. (a) Thlarau lam thil ngaihsaktu ni tûrin eng nge kan tih ngai? (b) Kan entawn theih Bible-a entîrna pakhat chu eng nge ni?

¹¹ Kan hmasâwn theihna lai kan hmuh hnu chuan inthlâk danglamna kan siam ṭan a ngai a. Chutianga tih leh tih loh chu kan nung dâwn nge kan thi dâwn tih hriltu a nih avângin a pawimawh hle. (Rom 8:6-8) Jehova chuan ṭha famkim ni tûrin min beisei lova, min ṭanpui tûrin a thlarau thianghlim min pe zâwk a ni. Mahse, keimahni ngeiin kan thawhrim a la ngai a. Governing Body member pakhat Unau John Barr-a chuan ṭum khat chu Luka 13:24-a thu hi heti hian a sawi  a: “Mi tam tak chu chak chho tûra an taihmâk tâwk loh avângin an hlawhtling lo a ni,” tiin. Vântirhkoh nêna inbuan a, malsâwmna a hmuh hma loh chelh tlattu Jakoba ang nih kan duh a ni. (Genesis 32:26-28) Bible zirna chu nuam kan ti a nih pawhin Bible chu intihhlim nâna thawnthu kan chhiar ang lekin kan chhiar tûr a ni lo. Min ṭanpuitu tûr thutak hlu tak takte hmuh chhuah kan tum tûr a ni.

12, 13. (a) Rom 15:5-a thute nunpui tûrin engin nge min ṭanpui ang? (b) Petera entawn tûr siam leh a fuihna chuan engtin nge min ṭanpui theih? (c) Thlarau lama chak lehzual tûrin eng nge i tih theih? (“Thlarau Lama Hma sâwn Tûra I Tih Theihte” tih bâwm chu en rawh.)

¹² Thlarau lama hma sâwn tûra kan thawhrim chuan thlarau thianghlimin kan ngaihtuah dân thlâkthleng tûrin min ṭanpui ang. Zawi zawiin, Krista ngaihtuah anga ngaihtuah dân kan zir thei a ni. (Rom 15:5) Thlarau thianghlim chuan châkna ṭha lote tibo tûr leh Pathian tilâwm thei miziate nei tûrin min ṭanpui thei a. (Galatia 5:16, 22, 23) Khawvêl neihnunna leh hlimhlawpna lam kan ngaihven tih kan inhre chhuak a nih pawhin, kan beidawng tûr a ni lo. Thil dikte kan ngaihven tlat theih nân Jehova hnênah thlarau thianghlim kan dîl zawm zêl tûr a ni. (Luka 11:13) Tirhkoh Petera kha hre reng rawh. Ani pawh Krista angin a ngaihtuah reng bîk lo. (Matthaia 16:22, 23; Luka 22:34, 54-62; Galatia 2:11-14) Mahse, a beidawng lova, tichuan Jehova’n a ṭanpui a ni. Petera chuan Krista anga ngaihtuah tûrin zawi zawiin a zir a. Keini pawh chutiang chuan kan ti ve thei a ni.

¹³ A hnuah, Petera chuan min ṭanpuitu tûr miziate chu a târ lang a. (2 Petera 1:5-8 chhiar rawh.) Insûmtheihna, chhelna, unaute hmangaihna, leh mize ṭha dangte nei tûrin theih tâwp kan chhuah a ngai a ni. Nî tinin heti hian kan inzâwt thei a ni, ‘Thlarau lama chak lehzual tûra min ṭanpuitu eng mizia nge vawiinah neih ka tum?’ tiin.

14. Thlarau lam thil ngaihsaktu nihna chuan engtin nge kan nun a nghawng ang?

¹⁴ Krista anga kan ngaihtuah chuan hnathawhnaah leh school-a ka chêt dân, kan thusawi dân, leh nî tina thu tlûkna kan siam dânah nghawng a nei ang a. Kan thu tlûkna siamte chuan Krista entawn kan tumzia a târ lang ang. Thlarau lam thil ngaihsaktu kan tih avângin Jehova nêna kan inlaichînna tichhe thei thil engmah tih kan duh lo. Thil sual ti tûra thlêm kan nih hunah thlarau lam thil kan ngaihsaknain thlêmna do thei tûrin min ṭanpui ang a. Thu tlûkna kan siam hmain, heti hian kan inzâwt hmasa ang: ‘Eng Bible thu bulte’n nge min ṭanpui thei? Krista chu ni se, he dinhmunah eng nge a tih ang? Engin nge Jehova tilâwm ang?’ tiin. Chutianga ngaihtuah chu chîn ṭhanah kan neih a ngai a ni. Chuvângin, dinhmun lo awm thei ṭhenkhat i lo sawiho vang u. Chu dinhmun tinte tân, thu tlûkna fing siam tûra min ṭanpui thei Bible thu bul pakhat zêl kan en ang.

15, 16. Engtin nge Krista anga ngaihtuahna chuan (a) kawppui tûr thlannaah, (b) ṭhian thlannaah thu tlûkna fing siam tûra min ṭanpui theih?

¹⁵ Kawppui tûr thlanna. Bible thu bul chu 2 Korinth 6:14, 15-ah kan hmu a. (Chhiar rawh.) Paula chuan thlarau lam thil ngaihsaktute chuan khawvêl mi, a nih loh leh tîsa lam thil ngaihsaktute thil thlîr dân angin an thlîr lo tih chiang takin a târ lang a ni. He thu bul hian kawppui tûr thlannaah engtin nge a ṭanpui theih che?

¹⁶ Ṭhian thlanna. Bible thu bul chu 1 Korinth 15:33-ah kan hmu a. (Chhiar rawh.)  Thlarau lam thil ngaihsaktu chuan a rinna tiderthâwng theitute chu ṭhianah a siam lo vang. He thu bul hi dinhmun hrang hranga i nunpui theih dân han ngaihtuah teh. Entîr nân, social network hman dân chungchânga thu tlûkna siam tûrin engtin nge a ṭanpui theih che? Hmêl hriat lohte chu online game i khelhpui dâwn leh dâwn loh chungchânga thu tlûkna siam tûrin engtin nge a ṭanpui theih che?

17-19. Thlarau lam thil ngaihsaktu nihna chuan (a) thiltih ṭangkai lote pumpelh tûrin, (b) thiltum ṭha nei tûrin, leh (c) inrem lohnate chingfel tûrin engtin nge a ṭangpui che?

¹⁷ Kan thlarau lam tichhe thei thiltihte. Vaukhânna pawimawh tak chu Hebrai 6:1-ah kan hmu a. (Chhiar rawh.) Kan pumpelh tûr “thiltih thite” chu eng nge ni? Thlarau lama kan chak lehzualna dâltu thiltih ṭangkai lote hi a ni a. Thiltih thite chungchânga he vaukhânna hian: ‘He thiltih hi a ṭangkai nge ṭangkai lo? He sumdâwnnaah hian ka tel a ṭha ang em? Khawvêl dinhmun thlâk danglam tumtu pâwl chu engvânga zawm lo tûr nge ka nih?’ tih ang chi zawhnate chhâng tûrin min ṭanpui thei a ni.

¹⁸ Thlarau lam thiltumte. Tlâng Chunga a Thusawiah, Isua chuan thiltum chungchângah thurâwn ṭha tak min pe a. (Matthaia 6:33) Thlarau lam thil ngaihsaktu chuan a nunah Lalram a dah hmasa a ni. He thu bul hian: ‘School ka zawh hnuah university-ah ka zir zawm ang em? Hna ngialnghet neih ka tum ang em?’ tih ang chi zawhnate chhâng tûrin min ṭanpui ang.

¹⁹ Inrem lohna. Rom khua Kristiante hnêna Paula fuihna chuan mi dangte nên inrem lohna kan neih hunah min ṭanpui thei a ni. (Rom 12:18) Krista kan entawn avângin ‘mi zawng zawng nên inrem’ kan tum a. Mi dangte nên kan inrem loh hunah engtin nge kan chhân lêt? Mi dang ngaih dân pawm chu harsa kan ti em? A nih loh leh, remna siam tumtu niin hriat kan hlawh em?—Jakoba 3:18.

20. Engvângin nge thlarau lama hma sâwn chu kan duh?

²⁰ Chûng entîrnate chuan Pathian thlarau thianghlim kaihhruai kan ni tih finfiahtu thu tlûknate siam tûra Bible thu bulte’n min ṭanpui theih dân a târ lang a ni. Thlarau lam thil ngaihsaktu kan nih chuan nun hlim tak leh lungawithlâk tak kan nei ngei ang. A chunga kan sawi tâk Robert-a chuan: “Jehova nên inlaichînna ṭha ka siam hnu chuan pasal ṭha zâwk leh pa ṭha zâwk ka ni a. Lungawina leh hlimna ka nei ta a ni,” tiin a sawi. Thlarau lam mi nia hma sâwn tûra theih tâwp kan chhuah chuan hlâwkna tam tak kan hmu ang. Tûnah ngei pawh nun hlim awm zâwk kan nei ang a, nakin hunah “nunna taktak” chu kan chên ang.—1 Timothea 6:19.