1-2. (a) Kan za hian eng nge kan duh ṭheuh? (b) Eng nge kan chian theih?

KAN za hian hmangaih nih kan duh ṭheuh va. Dik taka cheibâwl kan duh ṭheuh bawk. Hmangaih kan hlawh lohva, dik lo taka cheibâwl kan nih fo chuan hlutna nei lo leh beisei bo niin kan inhre thei a ni.

² Jehova chuan hmangaihna dawn kan duhin, rorêlna fel kan thlahlel tak zet tih a hria a. (Sâm 33:5) Kan Pathian chuan min hmangaih tak zetin dik taka cheibâwl ni tûrin min duh tih kan chiang thei a ni. Chu chu Jehova’n Mosia hmanga Israel hnamte hnêna a pêk Dân, ngun taka kan bih chian chuan a lang fiah hle a. Hmangaihna i mamawh ngawih ngawih a, dik lo taka cheibâwl i nih avânga i rilru a na hle a nih chuan Jehova’n a mite a ngaihsakzia Mosia Dânin * a târ lante chu khawngaihin ngaihtuah ang che.

3. (a) Rom 13:8-10-a hrilhfiah angin, Mosia Dân kan zir hian eng nge kan hriat? (b) He thuziakah hian eng zawhnate nge kan chhân ang?

³ Mosia Dânte kan zir hian, min hmangaihtu kan Pathian Jehova rilru put hmang duhawm takte chu kan hre thei a. (Rom 13:8-10 chhiar rawh.) He thuziakah hian, Israel mite hnêna pêk chûng dân ṭhenkhatte chu kan bih chiang ang a, tichuan, hêng zawhna: Engvângin nge Dân chu hmangaihnaa innghat a ni tia kan sawi theih? Engvângin nge Dân chuan rorêlna fel a dah pawimawh tia kan sawi theih? Thuneihna neite chu Dân zâwm tûra engtianga phût nge an nih? Dân chuan a bîk takin tute nge a humhim? tih chhânnate kan hmu ang. Chûng zawhnate  chhânna chuan thlamuanna leh beiseina min pêk bâkah, min hmangaihtu kan Pa min hnaihtîr lehzual a ni.—Tirh. 17:27; Rom 15:4.

4. (a) Engvângin nge Mosia Dân chu hmangaihnaa innghat tia kan sawi theih? (b) Matthaia 22:36-40-a chhinchhiah angin, Isua’n eng thupêk nge a sawi uar?

⁴ Jehova thiltih zawng zawng chu hmangaihnaa chêttîr a nih avângin Mosia Dân chu hmangaihnaa innghat a ni tiin kan sawi thei a. (1 Joh. 4:8) Jehova chuan chu dân bulpui chu thupêk pahnih ṭanchhanin a pe a—Pathian hmangaihna leh vêngte hmangaihna a ni. (Lev. 19:18; Deut. 6:5; Matthaia 22:36-40 chhiar rawh.) Chuvângin, dân 600 leh thupêk tinte chuan Jehova hmangaihna hmêlhmangte a târ lang tih kan beisei thei a ni. Entîrna ṭhenkhat i lo en ang u.

5-6. Jehova’n nupate chu eng ti tûrin nge a duh a, ani chuan eng chungchâng nge a hriat? Entîrna pe rawh.

⁵ I kawppui chungah rinawm la, i fate chu ngaihsak rawh. Jehova chuan nupate chu dam chhûng daih hmangaihna nghet tak nei tûrin a duh a. (Gen. 2:24; Mt. 19:3-6) Uirêna chu dân bawhchhiatna azawnga hmangaihna neih lohthlâk ber thilsual pakhat a ni. Chhan ṭha tak avângin, Thu Sâwm pêk zînga a pasarihna chuan uirêna chu a khap a. (Deut. 5:18) Chu chu “Pathian chunga” thil tihsualna a ni a, kawppuite chunga kutthlâkna râwng tak a ni. (Gen. 39:7-9) Uirê sana awm zâwka chuan kum tam tak chhûng, rilru natna a nei thei bawk.

⁶ Jehova chuan kan kawppuite kan cheibâwl dân chu a ngaihvên hle a. Ani chuan Israel nupuite chu ṭha taka cheibâwl ni tûrin a duh a ni. Dân zah thiam tak pasal chuan a nupui a hmangaih ang a, chhan ho tak avângin a nupui a ṭhen lo vang. (Deut. 24:1-4; Mt. 19:3, 8) Buaina lian tak a lo awm erawh chuan a ṭhen thei a, inṭhenna lehkha a siamsak tûr a ni. Chu lehkha chuan hmeichhia chu nungchang bawlhhlawhna chungchânga puhna dik lo lak ata a vênghim a. Chu bâkah, pasalin a nupui chu inṭhenna lehkha a pêk hmain, khuaa upate a râwn phawt tûr a ni. Chutiang kawngin, upate chuan nupate chu inṭhen lo tûra ṭanpui theihna hun remchâng an nei ang. Israel miin a nupui chu mahni hmasialna avânga a ṭhen hunah, Jehova a inrawlh reng lo. Nimahsela, chu nupui hrehawm tawrhna leh mittui chu a hmu a, a rilru natna chu a tawrhpui a ni.—Mal. 2:13-16.

7-8. (a) Jehova’n nu leh pate chu eng ti tûrin nge thu a pêk? (A kâwma milem en rawh.) (b) Eng zir tûr nge kan neih?

⁷ Dân chuan Jehova’n naupangte ṭhatna tûr a ngaihsak tak zet tih a târ lang bawk. Ani chuan nu leh pate chu an fate tisa lam mamawh chauh ni lovin, an thlarau lam mamawh pawh pe tûrin thu a pe a. Nu leh pate chuan an hun remchâng neih apiang chu Jehova Dân ngaihlu tûr leh amah hmangaih tûra an fate ṭanpui nân an hmang tûr a ni. (Deut. 6:6-9; 7:13) Jehova’n Israel mite a hrem chhan pakhat chu râwng taka an fate an cheibâwl vâng a ni a. (Jer. 7:31, 33) Nu leh pate chuan an fate chu thlahthlam theih leh dik lo taka cheibâwl theih thil engemaw ang maia ngai lovin, Jehova hnên aṭanga an dawn thilpêk hlu tak, rochan angin an thlîr tûr a ni.—Sâm 127:3.

⁸ Zir Tûrte: Jehova chuan nupate an in cheibâwl tawn dân chu a ngaihsak hle a. Ani chuan nu leh pate chu an fate hmangaih tûrin a duh a, an fate an cheibâwl dânah mawh a phurhtîr ang.

9-11. Engvângin nge Jehova dân pêkah awhna chu khap a nih?

⁹ Awt suh. Thu Sâwm pêka a tâwp berna chuan mi dangte thil awhna, a nih loh leh châkna ṭha lo neih chu a khap a. (Deut. 5:21;  Rom 7:7) Jehova chuan thil hlu tak a zirtîr duh avângin he dân hi a pe a, a mite chuan an thinlung—an ngaihtuahna leh an rilru vei zâwng—chu an thunun tûr a ni. Ani chuan thil sual tihna chu ngaihtuahna sual leh rilru vei zâwng ṭha lo aṭanga lo inṭan a ni tih a hria a. (Thuf. 4:23) Israel miin a thinlungah châkna sual a ṭhan chhohtîr chuan, mi dangte chu hmangaihna nei lo takin a cheibâwl ang. Entîr nân, Lal Davida pawh, chu thangah chuan a âwk a. Ani chu mi ṭha tak ni mah se, ṭum khat chu mi nupui a awt a ni. A châkna chuan sualah a hruai a. (Jak. 1:14, 15) Davida chu uirêna sualah a tlu lût a, chu hmeichhe pasal chu bum a tum a, a hnuah a that ta a ni.—2 Sam. 11:2-4; 12:7-11.

¹⁰ Jehova chuan thinlung a hriat theih avângin Israel mite’n awhna chungchânga dân an bawhchhia chu a hria a. (1 Chro. 28:9) Dân chuan awhna chungchângah a mite chu nungchang ṭhat lohna thlentu ngaihtuahna sual rêng rêng pumpelh tûrin a hrilh a ni. Jehova chu fing tak leh hmangaihna nei tak Pa a va ni êm!

¹¹ Zir Tûrte: Jehova chuan pâwn lam lan dân piah lam thlengin a hmu a. Ani chuan kan thinlung, kan chhûngrîl lam thlengin a hmu a ni. (1 Sam. 16:7) Kan ngaihtuahna te, rilru vei zâwng te, leh thiltih engpawh chu a lakah thuhrûk theih a ni lo. Kan ṭhatna laite a zawng a, chutiang mize ṭhate nei tûrin min fuih bawk. Mahse, thil sual kan tih hmain kan ngaihtuahna sualte hre tûr leh thunun tûrin min duh a ni.—2 Chro. 16:9; Mt. 5:27-30.

12. Mosia Dân chuan eng nge a sawi uar?

¹² Mosia Dân chuan Jehova’n rorêlna fel a ngaina tih a sawi uar bawk a. (Sâm 37:28; Is. 61:8) Ani chuan mi dangte ṭha taka cheibâwlna kawngah entawn tûr ṭha famkim a siam a ni. Israel mite chu Jehova pêk dân an zawm chuan malsâwm an ni a. A tehna fel leh dik an ngaihthah chuan, hrehawm an tawrh phah a ni. Thu Sâwm pêka dân pahnih hi han ngaihtuah teh.

13-14. Thu Sâwm pêka a hmasa lam pahnih chuan eng nge a phût a, engtin nge chûng dânte zawmna chu Israel mite’n an hlâwkpui?

¹³ Jehova chauh chibai bûk rawh. Thu Sâwm pêk a hmasa lam pahnih chuan Israel mite chu Jehova chauh be tûrin a phût a, milem biakna chu a vaukhân a ni. (Ex. 20:3-6) Chûng thupêkte chu Jehova hlâwkpui atâna pêk a ni lo. Chu aiin, a mite hlâwkpui tûr atân zâwk a ni. A mite chu a chunga an rinawm reng chuan an hlawhtling ang a. Hnam dang pathiante an biak erawh chuan hrehawm an tuar ang.

¹⁴ Kanaan mite chungchâng hi han ngaihtuah teh. Anni chuan Pathian nung leh dik ni lovin, nunna nei lo milem pathiante an bia a. Chuvângin, an hlutna a kiam telh telh a ni. (Sâm 115:4-8) An biakna pêng pakhatah chuan, nungchang bawlhhlawhna leh inthawinaa râpthlâk taka naupangte hlanna a tel a. Chutiang bawkin, Israel mite’n Jehova hnâwla milem an biak chuan an dinhmunte a tlahniamin, an chhûngkua pawhin an tawrh phah a ni. (2 Chro. 28:1-4) Thuneitute chuan rorêlna fel chungchânga Jehova tehnate chu an ngaihthah a. An thuneihna chu dik lo takin an hmang a, mi chak lote leh chanhaite chu an hnehchhiah a ni. (Ezek. 34:1-4) Jehova chuan chûng ṭanpuitu nei lo hmeichhiate leh naupangte tân ro a rêlsak dâwn tih Israel mite chu a vaukhân a. (Deut. 10:17, 18; 27:19) Chu mi nêna inkalh takin, Jehova chuan a mite chu a chunga an rinawm a, dik taka an incheibâwl tawn chuan mal a sâwm a ni.—1 Lal. 10:4-9.

15. Jehova chungchângah eng nge kan zir theih?

¹⁵ Zir Tûrte: Jehova rawngbâwltu nia inchhâlte  chuan A tehnate an ngaihthah a, a mite an tihhrehawm chuan Jehova chu mawhpuh tûr a ni lo. Mahse, Jehova chuan min hmangaih a, rorêlna dik lo avânga hrehawm kan tawrh chu a hria a ni. Ani chuan nuin a fa hrehawm tawrhna a tawrhpui aia nasain kan hrehawm tawrh chu min tawrhpui zâwk a. (Is. 49:15) Kan hrehawm tawrhnate chu min tihvensak nghâl lo mah se, a hun takah chuan, sim duh lova thilsual titute chu mi dangte an cheibâwl dânah an chungthu a rêl ang.

16-18. Mosia Dân chu nun pêng hrang hrangah engtianga hman theih nge a nih a, eng zir tûr nge kan neih?

¹⁶ Mosia Dân chuan Israel mite nun pêng hrang hrang a huam avângin, upaa ruatte’n Jehova mite chu dik taka ro an rêlsak a pawimawh hle. Anni chuan thlarau lam thilte chauh ni lovin, tualchhûng leh dân bawhchhiatna chungchâng an chinfel dânah mawhphurhna an nei a ni. A hnuaia entîrnate hi chhinchhiah ang che.

¹⁷ Israel miin tuemaw a thah chuan, ani chu tihhlum nghâl mai tûr a ni lo. A chênna khuaa upate chuan thihna avânga hrem tuar tlâk a nih leh nih loh thu tlûkna an siam hmain dinhmunte chu an enfiah phawt tûr a ni. (Deut. 19:2-7, 11-13) Upate chuan nî tin nun pêng hrang hrang—neih sum chungchânga thu buai chinfel dân aṭanga nupa inkâra thu buai chinfel dân thlengin—ro an rêlsak bawk. (Ex. 21:35; Deut. 22:13-19) Upate’n dik taka ro an rêl a, Israel mite’n Dân an zawm chuan, mi tinin an hlâwkpui a, chu hnam chuan Jehova a chawimawi a ni.—Lev. 20:7, 8; Is. 48:17, 18.

¹⁸ Zir Tûrte: Kan nun pêng hrang hrang chu Jehova tân a pawimawh a. Ani chuan dik tak leh hmangaihna nei taka mite cheibâwl tûrin min duh a. Mahni ina a rûka kan thusawi pawh tiamin, kan sawi leh thiltih apiang chu a hria a ni.—Heb. 4:13.

19-21. (a) Engtin nge upate leh rorêltute chuan Pathian mite chu an cheibâwl ang? (b) Jehova chuan a mite vênhim nân eng dânte nge a siamsak a, eng nge kan zir theih?

¹⁹ Jehova chuan a mite chu an chhehvêl hnamte thununna ṭha lo lak ata vênhim a duh a. Chuvângin, upate leh rorêltute chu thlei bîk nei lova Dân zâwm tlat tûrin a phût a ni. Chûng rorêltute chuan a mite chu ngilneihna nei lo tak leh khirh takin an cheibâwl tûr a ni lo. Chu aiin, rorêlna fel chu an ngaina zâwk tûr a ni.—Deut. 1:13-17; 16:18-20.

²⁰ Jehova chu a mite chunga khawngaihna nei tak a nih avângin dik lo taka incheibâwl tawn lo tûrin dânte a siamsak a. Entîr nân, Dân chuan mi chu dân bawhchhetu nia dik lo taka puh a nih theihnaah chin tâwk a siam a. Lungni lotu chuan amah puhtu chu hre tûrin dikna a nei a ni. (Deut. 19:16-19; 25:1) Thil sual tia puh a nih hmain, a lo berah thuhretu pahnihin finfiahna an pêk a ngai a. (Deut. 17:6; 19:15) A nih leh,  thuhretu pakhat chuahvin a hriat, dân bawhchhia Israel mi chungchâng hi eng nge ni ve? Ani chuan a thil sual tih avângin hrem a ni lo vang tiin a ngai tûr a ni lo. Jehova’n a thiltih chu a hmu a. Chhûngkuaah chuan Pa ber chu thuneihna pêk a ni a; mahse, chu a thuneihna chuan chin tâwk a nei a ni. Chhûngkaw thu buai ṭhenkhatah chuan khuaa upate’n chu thu buaia rawn inrawlh a, thu tâwp siam tûrin mawhphurhna an nei a ni.—Deut. 21:18-21.

²¹ Zir Tûrte: Jehova chuan entawn tûr ṭha famkim a siam a, a thiltihah dik lohna rêng a awm lo. (Sâm 9:7) Rinawm taka a tehna vuan tlattute chu lâwmman a pe a, thuneihna dik lo taka hmangtute erawh chu a hrem ṭhîn. (2 Sam. 22:21-23; Ezek. 9:9, 10) Mi ṭhenkhat chu an thil sual tih avângin hremna tuar lo angin lang mah se, Jehova chuan a hun takah an chungah ro a rêl ang. (Thuf. 28:13) An inchhîr loh chuan “Pathian nung kuta tlûk chu thil râpthlâk tak a ni,” tih an hre thuai ang.—Heb. 10:30, 31.

22-24. (a) Dân chuan a bîk takin tute nge a humhim a, Jehova chungchângah eng nge kan hriat? (b) Exodus 22:22-24-ah eng vaukhânna nge kan hmuh?

²² Dân chuan a bîk takin fahrah te, hmeithai te, leh ram dang mite ang chi mahni invênghim thei lote chu a vênghim a. Israel rama rorêltute chu hetianga hrilh an ni: “Ram dang mite leh pa nei lote ro chu dik lo takin in rêlsak tûr a ni lo va, hmeithai puan chu hrêngah in lâksak tûr a ni hek lo,” tiin. (Deut. 24:17) Jehova chuan ram chhûnga mi chanhai berte  chungah mi mal ngaihsakna a lantîr a. Chûng mite dik lo taka cheibâwltute chu a hrem a ni.—Exodus 22:22-24 chhiar rawh.

²³ Dân chuan chhûng khat hnaite nêna mipat hmeichhiatna hman ang chi zawng zawng chu khapin, chhûngkuaa unaute chu inpâwngsualna lak ata a vênghim bawk. (Lev. 18:6-30) Chutiang thil ngaizamtu leh tiṭhîntu an chhehvêl hnamte nêna inang lo takin, Israel mite chuan chutiang thil chîn dânte chu Jehova’n thil tenawm tak anga a thlîr angin an thlîr ve tûr a ni.

²⁴ Zir Tûrte: Jehova chuan mawhphurhna nei tûra a ruatte chu an enkawlna hnuaia awmte hmangaina nei taka ngaihven tûrin a duh a. Ani chuan inpâwngsualna chu a hua a, mi zawng zawng chu, a bîk takin, chanhaite humhim tûr leh dik taka cheibâwl tûrin a duh a ni.

25-26. (a) Engvângin nge hmangaihna leh rorêlna fel chu thaw leh nunna ang a ni tia kan sawi theih? (b) He thuziak inzawma a dawta thuziakah eng nge kan sawiho vang?

²⁵ Hmangaihna leh rorêlna fel chu thaw leh nunna ang a ni a, leiah hian, a pakhat zâwk a awm loh chuan a dang pawh a awm thei lo. Jehova’n dik takin min cheibâwl tih kan rin tlat chuan amah kan hmangaihna pawh a nasa lehzual ang. Pathian kan hmangaih a, a tehna felte kan ngainat chuan mi dangte hmangaih tûr leh dik taka cheibâwl tûra chêttîrin kan awm ang.

²⁶ Mosia Dân thuthlung chuan Jehova nêna inlaichînna ṭha tak nei tûrin min ṭanpui a. Mahse, Isua’n chu Dân chu a tihfamkim hnu chuan, Pathian mite’n an zawm a ngai tawh lo va, chu Dân chu a aia ṭha zâwka thlâk a ni. (Rom 10:4) Tirhkoh Paula chuan, chu Dân chu ‘thil ṭha, lo awm tûrte hlimthla’ tiin a sawi a. (Heb. 10:1) He thuziak inzawma a dawta thuziakah chuan chûng thil ṭhate zînga ṭhenkhat leh Kristian kohhrana hmangaihna leh rorêlna fel a pawimawh chhante kan sawiho vang.