1. He paragraph-a târ lan Jehova Thuhretu pathumte hi engtin nge Jehova tân an din ngheh tlat?

JEHOVA Thuhretute telna hêng dinhmun pathum hi han ngaihtuah teh. (1) School zirtîrtuin a class-a zirlai zawng zawng kût ni hmang tûra a sâwmte zîngah hmeichhe tleirâwl pakhat pawh a tel ve a. Chu hmeichhe tleirâwl chuan, chu kût ni chuan Pathian a tilâwm lo tih a hriat avângin zirtîrtu hnênah zahthiam takin a tel theih loh thu a hrilh a ni. (2) Mipa tleirâwl zakzum tak chu in tin kalin thu a hril a. A luh lehna tûr in chu tûn hmaa Jehova Thuhretute nuihzattu a school kalpui pakhat awmna a ni tih a hria a. Mahse, chu inah chuan kalin kawngkâ chu a va kik a ni. (3) Pa pakhat chu a chhûngkaw châwm nân a thawkrim hle a, ni khat chu a hnathawhna puin dân kalh zâwnga thil engemaw ti tûrin a phût a. Mahse, hna a chân thei chung pawhin, Pathianin a chhiahhlawhte chu dik taka ti tûr leh a dân zâwm tûra a phût avângin, chutianga a awm a ngaih thu a hrilhfiah a ni.—Rom 13:1-4; Heb. 13:18.

2. Eng zawhnate nge kan ngaihtuah ang a, engvângin nge?

² Chûng mi pathumteah chuan eng mizia nge i hmuh? Huaisenna leh dik taka thiltih ang chi mize tam tak i hmu mai thei a. Mahse, chiang taka lang mize hlu tak pakhat chu rinawmna hi a ni. An pathum chuan Jehova chungah an rinawm ṭheuh va. Pathian tehnate nêna inmil lo thiltih chu an hnâwl a. Chutianga thilti tûrin an pathum chuan rinawmnain a chêttîr a ni. Jehova chuan chu mizia an lantîr avângin a chhuang ngei ang. Chutiang bawkin, keini pawh kan Pa vâna miin min chhuang ve se, tih kan duh a. Chuvângin, hêng zawhna: Rinawmna chu eng nge ni? Engvângin nge rinawmna kan lantîr a ngaih? He hun harsa tak kârah pawh rinawmna vawn reng kan tumna chu engtin nge kan tihngheh theih? tihte hi i lo ngaihtuah ang u.

3. (a) Rinawmna chuan kan tân eng awmzia nge a neih? (b) A famkim, hmêlhemna nei lo, leh a puma himte chu kan tân a pawimawh tih eng entîrnatein nge târ lang?

³ Pathian chhiahhlawhte kan nih angin, kan tân chuan rinawmna tih chu Mi tak tak anga thinlung zawng zawnga Jehova hmangaih leh a hnêna inpumpêk tlatna a ni a; kan thu tlûkna siam apiangah a duh zâwng kan dah hmasa ang. Bible-a rinawmna tih thu mal hman dân ṭhenkhat hi han ngaihtuah teh. A awmze bulpui chu: famkim, hmêlhem lo, a nih loh leh a pumin tihna a ni. Entîr nân, Israel mite chu Jehova hnênah ranin an inthawi ṭhîn a, Dân chuan ran chu hmêlhem lo a nih tûr thu a sawi. * (Lev. 22:21, 22) Pathian mite tân ran kebai, beng ṭha lo, a nih loh leh mitdel chu hlân phal a ni lova; a silawng pawh hlan theih a ni hek lo. Jehova tân chuan ran chu a famkim, hmêlhem lo, a nih loh leh a puma him a nih a pawimawh hle. (Mal. 1:6-9) Jehova’n a hmêlhem lo leh a puma him a ngaih pawimawh chhan chu kan hre thiam thei a. A chhan chu, thei rah emaw, lehkhabu emaw, a nih loh leh hmanraw pakhat emaw lei dâwn ta ila, a ṭawih lai awm, a phêk kim lo, a nih loh leh a part kim lo emaw chu kan lei duh lo. Kan duh chu a famkim, hmêlhemna nei lo, leh a puma him a ni. Jehova chuan amah kan hmangaihna leh a chunga kan rinawmna chu chutiang bawk ni tûrin a duh a. Chu chu a famkim, hmêlhemna nei lo, leh a puma him a ni tûr a ni.

4. (a) Engvângin nge mi ṭha famkim lo chu a rinawm theih? (b) Sâm 103:12-14-a târ lan angin, Jehova’n kan lakah eng nge a beisei.

⁴ Rinawm tûr chuan kan ṭha famkim tûr a ni tiin kan ngai tûr a ni em? Dik tak chuan, thil tam tak kan tisualin, tling lo hle niin kan inhre mai thei a. Rinawm tûr chuan ṭha famkim tûrin kan inngai tûr a nih loh chhan pahnih hi ngaihtuah ang che. Pakhatnaah, Jehova chuan kan tlin lohna ringawt a ngaihven lo. Bible chuan heti hian min hrilh a ni: “LALPA, nangin khawlohnate i chhinchhiah chuan, Aw LALPA, tunge ding ang le?” tiin. (Sâm 130:3) Mihring ṭha famkim lo, sual fate kan ni tih a hria a, ani chuan inhuam takin min ngaidam a ni. (Sâm 86:5) Pahnihnaah, Jehova chuan kan theih chin tâwk a hria a, kan tih theih aia tam ti tûrin min beisei lo. (Sâm 103:12-14 chhiar rawh.) A nih leh, eng awmze neiin nge Pathian mit hmuhah famkim, hmêlhem lo, leh a puma hima kan awm theih?

5. Jehova chhiahhlawhte chuan rinawm tûrin engvângin nge hmangaihna an neih a ngaih?

⁵ Jehova chhiahhlawhte tâna rinawm theih dân bul ber chu hmangaihna a ni a. Vâna kan Pa, Pathian kan hmangaihna leh a hnêna kan inpêk pumhlumna chu a famkim, hmêlhem lo, leh a puma him a ni reng tûr a ni. Fiahna kan tâwk chung pawha, chutianga kan hmangaih reng chuan kan rinawm tihna a ni. (1 Chro. 28:9; Mt. 22:37) A tîra kan sawi tâk Thuhretu pathumte kha han ngaihtuah leh teh. Chutianga rinawmna chu engvângin nge an lantîr? Hmeichhe tleirâwl chuan school-a intihhlimna chu a huat vâng emaw, mipa tleirâwl chuan kawngkaa zak taka awm chu a duh vâng emaw, a nih loh leh chhûngkaw pa ber chuan a hna chân a duh vâng emaw a ni em? Ni lo ve. Chu aiin, Jehova’n tehna fel tak a nei tih an hria a, an Pa vâna mi tihlâwm chu an tum tlat zâwk a ni. Jehova an hmangaihna chuan thu tlûkna an siamnaah a duh zâwng dah hmasa tûrin a chêttîr a. An rinawmna chu thiltihin an lantîr a ni.

6. (a) Engvângin nge kan rinawm a ngaih? (b) Engtin nge Adama leh Evi chuan rinawmna an lantîr loh?

⁶ Engvângin nge kan rinawm ṭheuh a pawimawh? Setana chuan Jehova a cho avângin i rinawm a ngai a, nang pawh a cho che a ni. Chu hel hmang vântirhkoh chuan Eden huanah Setana, a nih loh leh “Dodâltu” niin a insiam a. Ani chuan Pathian chu mi sual, mahni hmasial, leh dik lo taka Rorêltu nia puhin Jehova hming a sawichhia a ni. Lungchhiatthlâk takin, Adama leh Evi chu Setana lamah ṭangin Pathian Jehova lakah an hel a. (Gen. 3:1-6) Eden huana an awm lai chuan Jehova an hmangaihna tihngheh theihna hun remchâng tam tak an nei a ni. Mahse, Setana’n chona a chawhchhuah lai chuan an hmangaihna chu a famkim, hmêlhem lo, leh a puma him a ni lo va. Zawhna dang lo chhuak leh chu: Mihring tupawh hi Pathian Jehova an hmangaih avângin a chungah an rinawm reng thei ang em? Thu danga sawi chuan, mihringte chuan rinawmna an lantîr thei em? Chûng zawhnate chu Joba nuna thilthleng aṭanga lo chhuak a ni.

7. Joba 1:8-11-a târ lan angin, Jehova leh Setana chuan Joba rinawmna chu engtin nge an ngaih?

⁷ Joba chu Israel mite Aigupta rama an awm hun laia nung dam a ni a. A rinawmna chu a danglam bîk hle. Ani chu keimahni anga ṭha famkim lo leh thil tisual ve tho a ni a. Mahse, Jehova chuan Joba chu a rinawmna avângin a hmangaih a ni. Setana’n mihringte rinawmna chungchângah Jehova chu a lo nuihsawh tawh ṭhîn niin a lang. Chuvângin, Jehova chuan Setana chu Joba a ngaihventîr ta a ni. Joba nun chuan Setana chu dâwtpa a nihzia a târ lang chiang hle! Setana  chuan Joba rinawmna fiah tûrin a dîl a. Jehova chuan a ṭhian Joba chu a ring a, Setana fiah a phal ta a ni.—Joba 1:8-11 chhiar rawh.

8. Engtin nge Setana’n Joba a beih?

⁸ Setana chu nunrâwng tak leh tualthah hmang a ni a. Ani chuan Joba thil neih zawng zawng chu lâksakin, a chhiahhlawhte a tihhlumsak a, a hming ṭhatna chu a tihchhiatsak a ni. A fa duh tak sâwm pawh tihlumin a chhûngkua chu a bei a. Tichuan, Joba chu a kephah aṭanga a lû thlenga pânchhia veitîrin, a hrisêlna tihchhiat tumin a taksa ngei pawh a bei a ni. A nupui chu a mangangin, a lungngai hle a; Joba chu beidawng tûrin leh Pathian anchhia lawh a, thi tûrin a fuih a. Joba ngei pawhin thih a duh a; mahse, a rinawmna chu a vawng tlat a ni. Setana chuan kawng dangin beih a tum leh ta a. Joba ṭhian pathumte chu a hmang a ni. Anni chuan ni engemaw zât chu Joba an tlawh a; mahse, thlamuanna thu reng an sawi lo. Chu aiin, ngilnei lo taka thu sawiin, an sawisêl zâwk a ni. A manganna chu Pathian thlentîr niin, a rinawmna pawh a ngaihsak lo tiin an puh a. A chunga thilthleng râpthlâk takte chu a sual vânga tuar niin an sawi bawk!—Job. 1:13-22; 2:7-11; 15:4, 5; 22:3-6; 25:4-6.

9. Fiahna a tawh laiin, Joba chuan eng tih nge a duh loh?

⁹ Engtin nge Joba chuan chu dinhmun harsa tak chu a hmachhawn? Ani chu mi ṭha famkim a ni lo va. A hnêna lo kal thlamuantu derte chu thinrim takin a hau va, ṭawngkam bung tak takte a sawi chhuak a ni. zâwkah a inchhâl a. (Job. 6:3; 13:4, 5; 32:2; 34:5) Mahse, a dinhmun chhiat ber lai pawhin Pathian Jehova dodâl chu a duh lo. Chûng a ṭhian derte bumna thu chu a ring duh lo va. Ani chuan: “Thiam ka chantîr dâwn teuh lo mai che u, ka thih thlengin ka dikna [a nih loh leh, rinawmna] ka dah bo lo vang,” tiin a sawi a ni. (Job. 27:5) Chu chuan eng thil pawh thleng se, Joba chuan rinawm tlat a tumzia a târ lang a. Keini pawh Joba angin tlâwm lovin, rinawmna kan vawng reng thei a ni.

10. Joba chungchânga Setana chawhchhuah buainaah engtin nge i tel ve?

¹⁰ Joba chungchânga Setana tihchhuah thubuaiah engtin nge i tel ve? Dik tak chuan, ani chuan Pathian Jehova chu i hmangaih tak tak lova, mahni ṭhatna tûr a nih chuan a rawngbâwl i bânsan ang a, i rinawm reng thei lo vang tia sawi ang a ni! (Job. 2:4, 5; Thup. 12:10) Chu chuan engtin nge a awmtîr che? A tihrehawm hle che a ni lâwm ni? Mahse, hei hi han ngaihtuah teh: Jehova chuan hun remchâng ṭha tak pe khawp chein a ring tlat che a ni. I rinawmna chu Setana fiah a phal a. Rinawmna i vawng tlat thei tih a ring a, Setana chu dâwtpa a ni tih finfiah tûrin a ṭanpui che a ni. Chutianga ti tûrin ṭanpui che a tiam bawk. (Heb. 13:6) Lei leh vâna Lalchungnung ber mi rin nih chu chanvo hlu a va ni tak êm! Rinawmna a pawimawh chhan chu i hria em? Chu chuan Setana dâwt sawite hnâwl thei tûr leh kan Pa hming ṭhatna vawng tlat a, a rorêl dân thlâwp tûrin min ṭanpui a ni. Engtin nge he mize pawimawh tak hi kan neih theih?

11. Joba hnên aṭangin eng nge kan zir theih?

¹¹ Setana chuan he hun harsa tak “ni hnuhnûngahte” hian Pathian mite chu a bei nasa lehzual a. (2 Tim. 3:1) He hun khirh takah hian kan rinawmna vawng tlat tûrin engtin nge mahni kan intihchak theih? Hemi chungchângah pawh hian Joba hnên aṭangin thil tam tak kan zir thei a. Fiahna a tawh hma daih aṭang tawhin, Joba chuan rinawmna a lo vawng reng tawh a ni. Rinawmna vawng reng tûra mahni intihchak theih dân chungchânga kan zir theih thil pathumte chu i lo ngaihtuah ang u.

12. (a) Joba 26:7, 8, 14-a târ lan angin, engtin nge Joba chuan Jehova ṭihna leh zahna a neih? (b) Engtin nge kan thinlungah Pathian ṭihna kan neih theih ang?

 ¹² Joba chuan Jehova ṭihna lantîrin a hmangaihna a tinghet. Jehova thil siam ropui tak takte chhût ngun nân a hun a hmang ṭhîn a. (Job. 26:7, 8, 14 chhiar rawh.) Leilung te, vân te, chhûm te, khawpui rite a ngaihtuah chuan mak a ti hle a, thil siam chungchânga a hriatna chu a bei tham hle tih a pawm a ni. Jehova thusawite pawh mak a ti hle bawk. Pathian kamchhuak chungchângah Joba chuan, ‘A kâa thute chu ka roh a,’ tiin a sawi a ni. (Job. 23:12) Jehova a ṭihna leh zahna chuan Joba chu a chêttîr a. A Pa chu a hmangaihin, tihlâwm a duh a ni. Chuvângin, a rinawmna vawn tlat chu a tum nghet telh telh a. Keini pawh Joba anga kan tih a ngai a ni. Pathian thil siam ropui tak takte chu Joba hun laia mite aiin kan hre tam zâwk a. Chu bâkah, Jehova nihna dik tak hre tûrin thlarauva thâwk khum Bible kan nei bawk. Kan thil hriatte chuan thinlung taka amah ṭih tûrin min ṭanpui thei a ni. Jehova kan ṭihna leh zahna chuan amah hmangaih leh a thuâwih tûrin min chêttîr ang a, kan rinawmna vawn reng duhna min neihtîr bawk ang.—Job. 28:28.

13-14. (a) Joba 31:1-a chhinchhiah angin, Joba chuan thuâwih tak a ni tih engtin nge a târ lan? (b) Engtin nge Joba chu kan entawn theih?

¹³ Thil engkima Joba thuâwihna chuan a rinawmna vawng reng tûrin a tichak. Joba chuan rinawm tûr chuan thuâwih a ngai tih a hria a. Dik tak chuan, thu kan âwih apiang hian rinawm tlat kan tumna chu a nghet lehzual a. Joba chuan a ni tin nunah Pathian thuâwih tûrin theih tâwp a chhuah a ni. Entîr nân, hmeichhiate a cheibâwl dânah a fîmkhur hle a. (Job. 31:1 chhiar rawh.) Nupui nei tawh a nih angin, a nupui ni lo hmeichhe dang ngaih melh chu thil dik a ni lo tih a hria a ni. Tûn lai khawvêlah hian, mipat hmeichhiatna lama thlêmna a hluar hle a. Joba angin, kan  kawppui ni lo tuemaw ngaih melh loh chu kan tum tlat em? Châkna chawktho thei saruak lem leh thuziak reng reng en loh kan tum tlat em? (Mt. 5:28) Ni tin chutiang kawnga insumtheihna kan lantîr chuan rinawmna kan vawng reng thei ang.

¹⁴ Joba chuan sum leh pai lam a thlîr dânah pawh Jehova thu a âwih a. A neih sum leh pai chunga rinna a nghah chuan hrem tlâk khawpin sual lian tak a ti thei tih a hria a ni. (Job. 31:24, 25, 28) Tûn laiah, hausak âtchilhna khawvêlah kan nung a. Bible-in min fuih angin, sum leh pai chungchânga thlîr dân inbûk tâwk tak neih kan tum chuan rinawm tlat kan tumna chu a nghet lehzual ang.—Thuf. 30:8, 9; Mt. 6:19-21.

15. (a) Eng lâwmman beiseinain nge Joba chu a rinawmna vawng reng tûra ṭanpui? (b) Engvângin nge chu chuan Jehova min pêk beiseina thlîr reng tûra min ṭanpui theih?

¹⁵ Joba chuan Pathian pêk tûr lâwmman chu beisei tlatin a rinawmna a vawng tlat. Pathianin a rinawmna chu a ngaihsak tih a ring tlat a. (Job. 31:6) Fiahnate tawk mah se, a tâwpah Jehova’n lâwmman a pe ang tih a ring nghet tlat bawk. Chutianga a rinnghehna chuan a rinawmna vawng reng tûrin a ṭanpui ngei ang. Jehova’n Joba rinawmna chu a hlut êm avângin, ṭha famkim lo a ni chung pawhin nasa takin mal a sâwm a ni! (Job. 42:12-17; Jak. 5:11) Chu aia malsâwmna ropui zâwk pawh a la dawng ang. Jehova’n i rinawmnaah mal a sâwm ang che tih i beisei tlat em? Kan Pathian chu a danglam ngai lo. (Mal. 3:6) Kan rinawmna a hlut tih kan hriat chuan kan thinlungah hma lam hun beiseina êng tak kan nei reng thei ang.—1 Thes. 5:8, 9.

16. Eng tih nge kan tum tlat ang?

¹⁶ I rinawmna chu vawn tlat tum rawh! Rinawmna kawng i zawhnaah mal nia inhriat châng nei mah la, englai mahin i mal ngai lo. Khawvêl puma rinawmna vawng tlattu mi maktaduai tam tak zînga mi i ni ang a. Thihna i hmachhawn a nih pawhin, tûn hmaa an rinawmna vawng tlattu, mi rinawm a hmei a pate zîngah i tel ve ang. (Heb. 11:36-38; 12:1) Joba thusawi: “Ka dikna [a nih loh leh, rinawmna] ka dah bo lo ang,” tih nêna inmilin nun ṭheuh i tum ang u. Kan rinawmna chuan Jehova chu chatuanin chawimawi rawh se!