1. Isua tihdam Samari mi chuan engtin nge a lâwmzia a lantîr?

MI SAWMTE dinhmun chu a khirh hle a. Phâr an vei a, an hma lam hun chu a thim hle a ni. Mahse, ni khat chu hla tak aṭangin Zirtîrtu Ropui Isua an hmu a. Isua’n natna chi hrang hrang a tidam tih an hriat avângin anni pawh a tihdam theih an ring a ni. Chuvângin, aw ring takin: “Isu, zirtirtu, min khawngaih rawh,” an ti a. Mi sawmte chu tihdamin an awm ta a. An vaiin Isua ngilneihna avângin an lâwm ngei ang. Mahse, an zînga pakhat chuan lâwmna châng a hre mai ni lovin, Isua hnênah lâwmthu a sawi a. * Tihdama awm, chu Samari mi chuan “aw ring takin,” Pathian a chawimawi a ni.—Lk. 17:12-19.

2-3. (a) Engvângin nge lâwmna kan lantîr loh mai theih? (b) He thuziakah hian eng nge kan sawiho vang?

² Samari mi angin, mi ngilneite chungah kan lâwmzia lantîr chu kan duh a. Mahse, a châng chuan ṭawngkamin emaw, thiltihin emaw kan lâwmzia lantîr chu kan theihnghilh mai thei a ni.

³ He thuziakah hian, thusawi leh thiltiha kan lâwmzia lantîr a pawimawh chhan kan ngaihtuah ang a. Bible-a chuang lâwmna lantîrtute leh lantîr lotute entawn tûr siam chu kan hria ang. Chu bâkah, lâwmthu kan sawi theih dân kawng ṭhenkhatte kan sawiho bawk ang.

4-5. Engvângin nge lâwmthu kan sawi ang?

⁴ Jehova chuan lâwmthu sawina kawngah kan tân entawn tûr ṭha a siam a. A lantîr dân kawng khat chu a duh zâwng titute lâwmman a pe ṭhîn hi a ni. (2 Sam. 22:21; Sâm 13:6; Mt.  10:40, 41) Bible chuan: “A fa duh takte angin Pathian awm dân latute ni rawh u,” tiin min fuih a. (Eph. 5:1) Chuvângin, lâwmthu kan sawi chhan ber chu Jehova entawn kan duh vâng a ni.

⁵ Mi dangte hnêna lâwmthu kan sawi duh chhan dang leh chu han ngaihtuah teh. Lâwmthu sawi chu chaw tui tak ang a ni a, ei khâwm a nih hian a tui lehzual. Kan thiltihin mi dang a tilâwm a ni tih kan hriat hian, keini pawh kan hlim a. Chutiang bawkin, kan lâwmzia kan sawi chhuah hian, mi dangte kan tihlim a ni. Kan lâwmthu sawina dawngtu chuan min ṭanpui tûr leh kan mamawh tak min pe tûra a ṭan lâkna chu kan sâwtpui a ni tih a hria a. Chu chuan, amah leh kan inkâra inṭhianna chu a tinghet lehzual a ni.

6. Lâwmthu sawina leh rangkachaka siam apple inanna ṭhenkhat chu eng nge ni?

⁶ Kan lâwmthu sawi chu a hlu hle a. Bible chuan: “A âwm tak thu sawi hi tangkaraw bâwma rangkachak apple ang a ni,” tiin a sawi. (Thuf. 25:11) Tangkaraw bâwma dah rangkachaka siam apple mawi dân tûr chu han mitthla la, a hlut dân tûr chu han ngaihtuah teh! Chutiang thilpêk chu dawng ta la, engtin nge i awm ang? Ni e, mi dangte hnêna i lâwmthu sawi chu chutiang anga hlu a ni. Hei hi han ngaihtuah teh: Rangkachaka siam apple chu kum rei tak chhûng daih a ni a. Chutiang bawkin, i lâwmthu sawi chu a dawngtu chuan a dam chhûngin a hre reng ang a, a hlut hle bawk ang.

7. Sâm 27:4-a kan hmuh angin, Davida leh fakna hla phuahtu dangte chuan engtin nge lâwmthu an sawi?

⁷ Tûn hmaa Pathian chhiahhlawhte chuan lâwmna an lantîr a. Chûng zînga pakhat chu Davida a ni. (Sâm 27:4 chhiar rawh.) Ani chuan biakna dik chu a hlut hle a, chu chu a thiltihin a lantîr a. Biak in sak nân a ro  hlu tam tak a thawh a ni. Asapha thlahte chuan fakna hlate ziakin emaw, sain emaw an lâwmzia an lantîr a. Hla pakhatah chuan Pathian chunga an lâwmzia leh Jehova ‘thilmak tihte’ an ngaihhlutzia an târ lang a ni. (Sâm 75:1) Davida leh Asapha thlahte chuan Jehova hnên aṭanga an dawn malsâwmna zawng zawng avânga an lâwmzia lantîr an duh tih a chiang hle. Chûng fakna hla phuahtute i entawn theih dân chu i ngaihtuah chhuak thei em?

8-9. Engtin nge tirhkoh Paula’n a Kristian unaute chunga a lâwmzia a târ lan a, chu chuan eng nge a rah chhuah?

⁸ Tirhkoh Paula chuan a unaute a hlutzia chu an chungchâng a sawinaah a târ lang a. An chunga a lâwmzia chu a mi mal ṭawngṭainaah Pathian a hrilh ṭhîn a ni. An hnêna lehkha a ziah khân lâwmthu a sawi bawk. Rom 16-naa, a châng hmasa lam 15 thlengin, Paula chuan a Kristian unau 27-te hming a târ lang a. A bîk takin, Priskilli leh Akuila-te chu a tâna “nghâwng dawhte” tiin a sawi nawn a, Phoibi chu amah Paula pawh tiamin, “mi tam tak puitu,” tiin a sawi bawk. Chûng a hmangaih tak leh a unau thawkrimte chu a fak a ni.—Rom 16:1-15.

⁹ Paula chuan a Kristian unaute chu an ṭha famkim lo tih a hria a; mahse, Rom mite hnêna a lehkha thawn tâwp lamah, an mize ṭhate chu a sawi lang zâwk a ni. Chûng unaute chuan kohhran hnêna Paula lehkha thawn ring taka chhiar an hriat huna an phûr dân tûr chu han mitthla teh! Chu chuan Paula nêna an inṭhian ṭhatna chu a tinghet ngei ang. In kohhrana mite thusawi leh thiltih ṭhatte avângin lâwmthu i sawi ṭhîn em?

10. Isua’n a hnungzuitute hnêna lâwmthu a sawina aṭangin eng nge kan zir theih?

¹⁰ Asia Minor-a kohhran ṭhenkhatte hnêna a lehkha thawnah Isua chuan a hnungzuite thiltih avângin lâwmthu a sawi a. Entîr nân, Thuatira kohhran hnêna a lehkha thawnnaah heti hian a sawi ṭan a ni: “I thiltihzia te, i hmangaihzia te, i rinzia te, i rawngbâwlzia te, i chhelzia te ka hria, i thiltih hnuhnûng berte chu atîra mi ai khân a nasa zâwk tih ka hre bawk,” tiin. (Thup. 2:19) Isua chuan an thiltih hmasâwnna chauh târ lang lovin, thil ṭha ti tûra chêttîrtu an miziate avângin a fak bawk. Thuatira kohhrana mi ṭhenkhat chu zilh an ngai chung pawhin, Isua chuan a lehkha thawn tîr lamah leh tâwp lamah a fuih a. (Thup. 2:25-28) Kohhran zawng zawng hruaitu nia Isua thuneihna chu han ngaihtuah teh. A tâna kan thiltihte avângin lâwmthu min hrilh a ngai lo va. Chuti chung pawhin, a ngaihhlut tak zetzia a sawi a ni. Upate tân entawn tûr ṭha a va ni tak êm!

11. Hebrai 12:16-a târ lan angin, Esauva chuan thil thianghlim chungchângah eng rilru put hmang nge a neih?

¹¹ Lungchhiatthlâk takin, Bible-a mi ṭhenkhat chuan lâwmna an lantîr lo va. Entîr nân, Esauva chu Jehova hmangaihtu nu leh pate enkawlna hnuaia seilian ni mah se, thil thianghlimte ngaihhlutna a lantîr lo va. (Hebrai 12:16 chhiar rawh.) Lâwmna châng a hriat lohzia engtin nge a lo lanchhuah? Esauva chuan a fa tîr nihna chu a nau Jakoba hnênah englo chhumkawi nên a thleng ta mai a ni. (Gen. 25:30-34) A hnuah, a duh thlanna avângin tih tak zetin a inchhîr leh a. Mahse, a thil neih chungah lâwmna châng a hre lova, fa tîr nih malsâwmna a dawn loh avângin phunnawina tûr chhan a nei lo.

12-13. Engtin nge Israel mite’n lâwmna châng an hre lo tih an târ lan a, eng nge a rah chhuah?

 ¹² Israel mite chuan lâwmna lantîrna tûr chhan tam tak an nei a. Anni chu Jehova’n Aigupta rama Hri Sâwm a thlentîr hnuah chhuah zalên an ni a. A hnuah, Pathianin Aigupta sipai zawng zawng Tuipui Sena a tihboral lai pawh khân chhiatna ata a chhanhim a. Israel mite chuan an lâwm êm avângin Jehova hnênah hnehna hla an sa a ni. A nih leh, lâwmna an lantîr reng em?

¹³ Israel mite’n harsatna dang an tawh khân, Jehova’n an tâna thil ṭha a tihsak zawng zawngte chu an theihnghilh ta mai a. Lâwmna châng an hriat lohzia an lantîr leh a ni. (Sâm 106:7) Engtin nge? “Israela thlahte pung khâmho zawng zawng chu Mosia chungah leh Arona chungah an lo phunnawi ta a”—dik tak chuan, Jehova chunga phunnawi an ni. (Ex. 16:2, 8) Jehova chu lâwmna châng hre lo a mite chungah a lungni lo va. A hnuah, Josua leh Kaleba tih loh, Israel hnam pumpui chu thlalêrah an boral ang tih a sawi lâwk a ni. (Num. 14:22-24; 26:65) Hêng entawn tûr ṭha lo takte kan pumpelh theih dân leh entawn tûr ṭhate kan entawn theih dân i lo en ang u.

14-15. (a) Engtin nge nupate chuan lâwmna an inlantîr tawn theih? (b) Engtin nge nu leh pate chuan an fate chu lâwmna châng hre tûra an zirtîr theih?

¹⁴ Chhûngkuaah. Chhûngkuaa mi tinte’n lâwmthu an sawi hian chhûngkuain an hlâwkpui a. Nupate chu lâwmna an inlantîr tawn nasat poh leh, an inhnaih lehzual a ni. An thiltih suala inngaihdam tawn pawh a awlsam lehzual bawk. Nupui hluttu pasal chuan a nupui thusawi leh thil ṭha tihte chu a hre mai ni lovin, “a fak a.” (Thuf. 31:10, 28) Nupui fing chuan a pasal chunga a lâwmnate chu a hriattîr ṭhîn a ni.

¹⁵ Nu leh pate u, in fate chu lâwmna châng hre tûrin engtin nge in zirtîr theih? I fate chuan i thusawi leh thiltihte chu an entawn tih hre reng ang che. Chuvângin, i fate’n i tân thil ṭha an tihsak hunah che lâwmthu sawiin entawn tûr ṭha siam ang che. Chu bâkah, i fate chu mite’n an tâna thil ṭha an tihsak hunah lâwmthu hrilh tûrin zirtîr bawk rawh. Lâwmthu sawi chu thinlung aṭanga lo chhuak tûr a nihzia leh chu chuan nghawng ṭha tak a nei thei tih hre thiam tûrin ṭanpui ang che. Entîr nân, ṭhalai Clary-i chuan: “Ka nu kum 32 mi a nihin, ka pa chu tan ina khung a nih avângin, a fa pathumte chu  amah chauhvin min enkawl seilian a. Kum 32 mi ka rawn nih chuan, chutiang kuma ka nu tâna a harsat dân tûr chu ka ngaihtuah a. Chuvângin, kei leh ka unaute min enkawl seilian tûra a inpêkna zawng zawng chunga ka lâwmzia ka hrilh a ni. Tûn hnai mai khân, ka thusawiin a thinlung a khawih tak zet tih min hrilh a, chûngte chu a ngaihtuah nawn fo va, a nî tin hun hman dân pawh a tinuam hle a ni,” tiin a sawi.

16. Lâwmthu sawina chuan mi dangte a tihchak theih dân entîrna pe rawh.

¹⁶ Kohhranah. Kan unaute hnêna lâwmthu kan sawi hian, anni chu kan fuih tihna a ni. Entîr nân, kum 28 mi Jorge-a chu a dam lo nasa hle a. Thla engemaw zât chhûng chu a inkhâwm thei lo va. A inkhâwm theih leh hnuah pawh, inkhâwma a chanvo neihte chu a la chelh thei lo a ni. Jorge-a chuan: “Kohhrana mawhphurhnate ka chelh theih mang loh avângin ka insit ru hle a. Mahse, ṭum khat chu, inkhâwm bânah, unaupa pakhatin: ‘Ka chhûngkaw tâna entawn tûr ṭha i siam avângin lâwmthu hrilh che ka duh a. Kum kal taa i thusawite kan hlâwkpuizia i hre lo mai thei. Thlarau lama hmasâwn tûrin min ṭanpui tak meuh a ni,’ tiin min hrilh a. Ka hnuk a ulhin, ka mittui a tling a. A thusawite chu ka mamawh tak a ni,” tiin a sawi.

17. Kolossa 3:15-a târ lan angin, a thilphalna avângin Jehova chungah kan lâwmzia engtin nge kan lantîr theih?

¹⁷ Kan Pathian thilphal tak hnênah. Jehova chuan thlarau lam chaw hnianghnâr takin min pe a. Entîr nân, kan inkhâwm te, magazine te, leh kan website-te aṭangin kaihhruaina ṭha tak takte kan dawng a. Thusawi i ngaihthlâk hunah, thu leh hla chhuah i chhiar hunah, a nih loh leh broadcasting i en hunah, ‘Hei hi ka mamawh tak a ni,’ i ti ngai em? Engtin nge Jehova chunga kan lâwmzia kan lantîr theih? (Kolossa 3:15 chhiar rawh.) Lantîr theih dân kawng khat chu chûng thilpêk ṭhate avânga kan lâwmzia ṭawngṭaia hrilh hi a ni.—Jak. 1:17.

18. Eng kawngtein nge kan Kingdom Hall kan hlutzia kan lantîr theih?

¹⁸ Kan biakna hmun chu thianghlim tak leh fel fai taka dahin Jehova chungah lâwmthu kan sawi thei bawk. Kingdom Hall tihthianghlimna leh thawm ṭhatnaah kan tel ziah a, kohhrana electronic hmanraw enkawltute chuan ṭha takin an enkawl bawk a ni. Kingdom Hall ṭha taka kan enkawl chuan a chhe mai mai lo ang a, sum tam  tak sênga thawm ṭhat a ngai lo vang. Chutiang kawng chuan, khawvêl pumah Kingdom Hall dangte sak leh thawm ṭhat nân sum kan khâwl khâwm a ni ang.

19. Bial kantu leh a nupui thiltawn aṭangin eng nge kan zir theih?

¹⁹ Kan tâna thawk rimte hnênah. Lâwmthu kan sawi hian, kan thusawiin mi chu a harsatna neihte a thlîr dân a thlâk danglamtîr thei a. Bial kantu leh a nupui thiltawn hi han ngaihtuah teh. Thlasik ni rei taka rawngbâwlna an kal hnu chuan hah takin an haw a. A vawh êm avângin a nupui chu thlasik kâwrlum hain a mu a. Khua a lo vâr chuan, a pasal hnênah bial kan hna a thawh zawm theih a inrin loh thu a hrilh a ni. A hnu lawkah, branch office aṭangin a nupui tân lehkha a lo thleng a. Chu lehkha thawn chu a rawngbâwlna leh a chhelna avânga amah fakna lehkha a ni. Chawlhkâr tina hmun danga insawn ziah a harsat dânte a inziak a. A pasal chuan: “Chu fakna lehkha thawnin a rilru a khawih êm avângin bial kan hna chawlhsan chu a sawi leh tawh ngai lo. Dik tak chuan, bial kan hna chawlhsan ka ngaihtuah hunah pawh thawk zawm zêl tûrin vawi tam tak min fuih zâwk a ni,” tiin a sawi. An nupa chuan kum 40 chuang bial kan hna an thawk thei a ni.

20. Nî tin eng nge tih kan tum ang a, engvângin nge?

²⁰ Kan thusawi leh thiltihin kan lâwmzia nî tin lantîr i tum ang u. Lâwmna lantîr lohna he khawvêlah hian thinlung taka kan thusawi leh thiltihte chu mi dangte tân ni khat dang hmachhawn thei tûra an mamawh chakna a ni thei. Kan lâwmthu sawi ṭawngkamte chuan chatuan daih inṭhian ṭhatna a siam thei a. A pawimawh zâwk chu, thilphal tak leh lâwmna châng hria kan Pa, Jehova kan entawn a ni ang.