1-2. (a) Mosia chu eng ang mi nia târ lan nge a nih a, eng nge a tih? (b) Thuhnuairawlhna nei tûrin eng chêttîrtu nge kan neih ngai?

BIBLE chuan Mosia chu “lei chunga mihring zawng zawnga zaidam lâwtlak a ni,” tiin a sawi a. (Num. 12:3) Ani chu mi chak lo, thu tlûkna siam ngam lo, leh mite hmachhawn ngam lo a ni tihna a ni em? Mi ṭhenkhat chuan mi thuhnuairawlh chu chutiang ang chu an ni tiin an ngai mai thei. Mahse, chu ngaih dân chu a dik lo hulhual a ni. Mosia chu mi chak tak, thu tlûkna siam ngam, leh Pathian chhiahhlawh huaisen tak a ni a. Ani chuan Jehova ṭanpuinain, Aigupta rorêltu thiltithei tak chu a hmachhawn a, thlalêrah mi 3,000,000 vêl a kaihruai a, Israel hnam chu an hmêlmate hneh tûrin a ṭanpui a ni.

² Mosia hmachhawn ang harsatnate chu kan hmachhawn lo va; mahse, nî tin mai hian thuhnuairawlhna neih tiharsatu mite leh dinhmunte chu kan hmachhawn a ngai a. Mahse, chu mizia nei chho tûra chêttîrtu thiltithei tak kan nei a ni. Jehova chuan “thuhnuairawlhte erawh chuan ram hi an luah ang,” tiin min tiam a. (Sâm 37:11) Mi thuhnuairawlh niin i inngai em? Mi dangte’n chutiang chuan an thlîr che em? Chûng zawhna pawimawh takte kan chhân hmanin, mi thuhnuairawlh nih awmzia kan hriat a ngai a ni.

3-4. (a) Thuhnuairawlhna chu eng nêna inang nge a nih? (b) Mi thuhnuairawlh ni tûr chuan eng mize pali nge kan neih ngai a, engvângin nge?

³ Thuhnuairawlhna * chu lem ziak mawi tak ang a ni a. Eng  kawngin nge? Lem ziak thiamin rawng nalh tak takte chawhpawlha lem a ziah angin, mi thuhnuairawlh ni tûr chuan mize duhawm tak takte kan neih a ngai a. Chûng miziate zînga langsâr zualte chu inngaihtlâwmna, intukluhna, ngilneihna, leh chhûngrila huaisenna hi a ni. Jehova tihlâwm kan duh chuan engvângin nge chûng miziate chu kan neih a ngaih?

⁴ Mi inngaitlâwmte chauhvin Pathian duh zâwng tihduhna an nei ang. Pathian duh zâwng zînga pakhat chu mi thuhnuairawlh kan nih hi a ni. (Mt. 5:5; Gal. 5:23) Pathian duh zâwng kan tih hian, Setana kan tithinrim a. Mi inngaitlâwm leh thuhnuairawlh kan ni chung pawhin, Setana khawvêla mite chuan min hua a. (Joh. 15:18, 19) Chuvângin, Setana do tûrin huaisenna kan neih a ngai a ni.

5-6. (a) Engvângin nge Setana’n thuhnuairawlhte chu a huat? (b) Eng zawhnate nge kan sawiho vang?

⁵ Mi thuhnuairawlh nêna inkalh chiah chu mi chapo a ni a, chutiang mi chuan a thinrimna a thunun lo va, Jehova thu a awih lo bawk. Chu tak chu Setana mizia a ni. Thuhnuairawlhte a hua chu a mak lo ve! Thuhnuairawlhte chuan Setana neih loh mize ṭhate an neih avângin ani chu mi sual a nihzia an târ lang a ni. Setana tâna tawrh hrehawm lehzual chu dâwtpa a nihzia an târ lang hi a ni. Engvângin nge? A thusawi leh a thiltihte chu engpawh ni se, thuhnuairawlhte chu Jehova rawngbâwl bânsan tûra a dan theih loh vang a ni!—Job. 2:3-5.

⁶ Eng hunah nge mi thuhnuairawlh nih chu harsa kan tih mai theih? Engvângin nge thuhnuairawlhna kan neih zawm zêl ang? Chûng zawhnate chhâng tûrin, Mosia te, Babulona sal tâng Hebrai mi pathum te, leh Isua entawn tûr siamte chu kan ennawn ang.

7-8. Zah lo taka cheibâwl a nih khân, Mosia’n engtin nge a chhân lêt?

⁷ Thuneihna pêk kan nih hunah: Thuneitute tân thuhnuairawlhna neih reng chu a harsa thei a, a bîk takin, a kaihhruaina hnuaia awm tuemawin zah lo taka a cheibâwl hunah leh thu tlûkna ṭha siam lo nia a puh hunah a harsa lehzual thei a ni. Chutiang chu i tawng ngai em? Chhûngkaw zînga miin chutianga a tih chuan engtin nge ni ang? Engtin nge i chhân lêt ang? Mosia’n chutiang dinhmun a hmachhawn dân chu ngaihtuah ang che.

 ⁸ Jehova chuan Mosia chu Israel mite hruaituah a ruat a, chu hnam atâna dânte pawh a ziahtîr a. Jehova’n a ṭanpui tih rinhlelh rual a ni lo. Chuti chûng pawhin, Mosia farnu Miriami leh a unaupa Arona chuan ani chu dodâlin a nupui neih chungchângah an sawisêl a ni. Mosia dinhmun anga ding mi ṭhenkhat chuan an thinrimin, phuba an la duh mai thei ang—mahse, Mosia chu chutiang a ni lo. Ani chu a thinrim mai mai lo. Jehova hnênah Miriami a hremna chu titâwp tûrin a ngensak zâwk a ni. (Num. 12:1-13) Engvângin nge Mosia’n chutianga a chhân lêt?

9-10. (a) Jehova’n Mosia chu eng hre thiam tûrin nge a ṭanpui? (b) Chhûngkaw lûte leh kohhran upate chuan Mosia hnên aṭangin eng nge an zir theih?

⁹ Mosia chuan Jehova zirtîr nih chu a duh a. Aigupta lal chhûngkaw zînga mi a nih lai, tûn hma kum 40 vêl kha chuan Mosia chu mi thuhnuairawlh a ni lo. Dik tak chuan, thinrim hma tak a nih avângin, dik lo taka thiltitu nia a ngaih mi pakhat chu a that a ni. Ani chuan a thiltih chu Jehova’n a pawm niin a ngai a. Jehova chuan Mosia chu Israel mite kaihruai tûr chuan huaisenna neih aia tam a mamawh tih hre thiam tûrin kum 40 chhûng a ṭanpui a; mi thuhnuairawlh a nih a ngai a ni. Mi thuhnuairawlh ni tûr chuan, inngaihtlâwmna, intukluhna, leh zaidamnate a neih a ngai bawk. Chûng miziate a neih chhoh avângin kaihruaitu ṭha tak a rawn ni ta a ni.—Ex. 2:11, 12; Tirh. 7:21-30, 36.

¹⁰ Tûn laiah, chhûngkaw lûte leh kohhran upate chuan Mosia an entawn a ngai a. Zah lo taka cheibâwl an nih hunah, an thinrim nghâl mai tûr a ni lo. Mahni ngeiin an neih tlinlohnate chu inngaitlâwm takin an pawm tûr a ni. (Thur. 7:9, 20) Buainate an chinfel hunah intulût takin Jehova kaihhruaina an zâwm tûr a ni a. Mite chu ngilnei takin an chhâng ṭhîn tûr a ni. (Thuf. 15:1) Chutianga chhâng lêttu chhûngkaw lûte leh kohhran upate chuan Jehova an tilâwm a, remna an awmtîr a, thuhnuairawlhna kawngah entawn tûr ṭha an siam a ni.

11-13. Hebria mi pathumte chuan kan tân eng entawn tûr nge an siam?

¹¹ Tihduhdah kan nih hunah: Chanchin tluan chhuakah, mihring thuneitute chuan Jehova mite chu an tiduhdah a. Anni chuan kawng chi hrang hrangin “dân bawhchhetuah” min puh a; mahse, thu dik chu ‘mihring thu aiin Pathian thu zawm’ kan tum vâng zâwk a ni. (Tirh. 5:29) Mite nuihsawh te, tan ina khung te, leh vuakte pawh kan tuar mai thei a. Mahse, Jehova ṭanpuinain, kan thungrul lova, fiahna tuar chung pawhin thuhnuairawlhna kan nei reng a ni.

 ¹² Hebrai sal tâng mi pathum, Hanania te, Misaela te, leh Azaria te entawn tûr siam chu han ngaihtuah teh. * Babulon lal chuan rangkachak milim lian tak hmaa kûn tûrin thu a pe a. Milim chibai an bûk theih loh chhan chu lal hnênah zah thiam takin an hrilh a. Lalin rawhtuina meia thlâk tûra a vau chung pawhin, Pathian lakah an intulût tlat a ni. Jehova chuan anni chu a chhanhim nghâl a; mahse, chutianga a chhanhim an inbeisei lo. Chu aiin, Jehova remtihnaa lo thleng tûr thil engpawh chu inhuam takin an pawm a ni. (Dan. 3:1, 8-28) Anni chuan mi thuhnuairawlhte chu an huaisen tak zet tih an târ lang a—lal te, vauna te, hremna te, a enga mahin Jehova hnêna kan “inpêkna pumhlûm” chu a dang thei lo.—Ex. 20:4, 5, New World Translation.

¹³ Pathian chunga kan rinawmna fiah a nih hunah, engtin nge Hebrai mi pathumte chu kan entawn theih? Jehova’n min ngaihsak ang tih inngaitlâwm takin kan ring a. (Sâm 118:6, 7) Dik lo taka min puhtute chu zaidam tak leh zah takin kan chhâng lêt a ni. (1 Pet. 3:15) Min hmangaihtu kan Pa nêna kan inṭhian ṭhatna tihchhiat chu kan phal ngai lo vang.

14-15. (a) Kan rilru a hah hunah eng thil nge thleng thei? (b) Isaia 53:7, 10-a târ lan angin, Isua chu rilru hah chung pawha thuhnuairawlhna lantîrna kawnga entawn tûr ṭha ber a ni tih engvângin nge kan sawi theih?

¹⁴ Rilru hahna kan neih hunah: Chhan hrang hrang avângin rilru hahna kan nei ṭheuh va. Chu chu school exam neih hma emaw, hnathawhna hmuna thil engemaw ka tih hma emawte hian kan nei thei a ni. A nih loh leh, damdawi lama kan inenkawl dân tûr ngaihtuah mai pawhin kan rilru a tihah thei bawk. Kan rilru a hah hian, thuhnuairawlh a harsa a. Tûn hmaa kan ngaihmawh lêm loh thilte pawh kan ngaimawh ṭan thei a ni. Kan ṭawngkam chhuakte chu a vînin, a bung thei a. Rilru hahna i neih chuan, Isua entawn tûr siam chu ngaihtuah ang che.

¹⁵ Leia a nun chhûnga thla tâwp lamah, Isua chu nasa takin a rilru a hah a. Tihhlum a ni ang a, hrehawm nasa tak a tuar ang tih a hria a ni. (Joh. 3:14, 15; Gal. 3:13) A thih hma thla engemawah, a rilru a hah hle tih a sawi a. (Lk. 12:50) A thih hma niah, Isua chuan: “Ka rilru a mangang e,” tiin a sawi a ni. “‘Ka Pa, he mi hun lakah hian mi chhandam rawh,’ ka ti ang em ni? Engpawh ni sela, he mi tûr hi, he mi hun thleng hian ka awm chhan a ni. Ka Pa, i hming chawimawi rawh,” tia ṭawngṭaia a thinlung a phawrh khân, Pathian laka a inngaihtlâwmzia leh a intukluhzia chu kan hre thei a ni. (Joh. 12:27, 28) A hun a thlen chuan, Isua’n a na thei ang ber leh zahthlâk thei ang bera amah tihlumtu tûr Pathian hmêlmate hnênah huaisen takin a inpe a. Rilru hah tak leh nasa taka tihhrehawm a ni chung pawhin, Isua chuan thuhnuairawlh takin Pathian duh zâwng a ti a ni. Isua chu rilru hah chung pawha thuhnuairawlhna lantîrna kawnga entawn tûr ṭha ber a ni tih chiang takin kan sawi thei!—Isaia 53:7, 10 chhiar rawh.

16-17. (a) Engtin nge Isua ṭhiante chuan a thuhnuairawlhna chu an fiah? (b) Engtin nge Isua kan entawn theih?

¹⁶ Leia a nun tâwp ber zânah, a ṭhian hnai berte thiltihin Isua thuhnuairawlhna chu a fiah a. Chu mi zâna Isua rilru mangan dân tûr chu han mitthla teh. Thih thlengin rinawmna famkim a lantîr ang em? Mi tlûklehdingâwnte nunna chu a rinawmnaah a innghat a. (Rom 5:18, 19) Chu aia pawimawh zâwk chu, a Pa hming ṭhatna pawh a tel hi a ni. (Job. 2:4) Chu bâkah, a ṭhian hnai ber, a tirhkohte nêna chaw hlui an kîl hnuhnun ber khân, an tîtîna chuan ‘an zîngah tu ber nge ropui ber’ tih lam a hawi avângin “inhnialna a lo chhuak a.” Isua  chuan a ṭhiante chu, chu mi nî, tlai lama a zilhna pawh tiamin, hemi chungchângah vawi tam tak a zilh tawh a ni! Isua a thinrim lo chu chhinchhiahtlâk tak a ni. Chu aiin, zaidam takin a hrilh zâwk a. Isua chuan ngilnei tak; mahse, khauh tak siin, an neih ngai rilru put hmang chu târ langin, a hrilhfiah nawn fo va. Rinawm taka amah an thlâwp tlat avângin a ṭhiante chu a fak bawk.—Lk. 22:24-28; Joh. 13:1-5, 12-15.

¹⁷ Chutiang dinhmunah chuan awm ta la, engtin nge i chhân lêt ang? Kan rilru a hah hunah pawh Isua entawnin, mi thuhnuairawlh tak kan ni thei a ni. ‘Indawh tawn’ tûra Jehova thupêk chu inhuam takin kan zâwm a. (Kol. 3:13) Kan za hian kan thusawi leh thiltihin mi dangte kan tithinrim ṭhîn tih kan hriat reng chuan he thupêk hi kan zawm a ni ang. (Thuf. 12:18; Jak. 3:2, 5) Mi dangte chu an mize ṭha avângin fak ṭhîn ang che.—Eph. 4:29.

18. Engtin nge Jehova’n thuhnuairawlhte chu thu tlûkna ṭha siam tûra a ṭanpui a; mahse, anmahni lamah eng nge an tih ngai?

¹⁸ Thu tlûkna ṭha zâwk kan siam ang. Nuna harsatna kan hmachhawn hunah, mi thuhnuairawlh kan nih chauhvin, Jehova chuan thu tlûkna ṭha siam tûrin min ṭanpui ang. Ani chuan “thuhnuairawlhte duhzâwng chu” a ngaithla ang tih a tiam a. (Sâm 10:17-18) Kan ngenna aia tamin min tihsak ang. Bible chuan: “Thuhnuairawlhte chu rorêlna felah a hruai ang a; thuhnuairawlhte chu ama kawng chanchin a zirtîr bawk ang,” tih a tiam a ni. (Sâm 25:9) Jehova chuan chu kaihhruaina chu Bible-ah leh thu leh hla chhuahah te, * “bawi rinawm, fing tak” kaltlanga tihchhuah program-te hmangin min pe a. (Mt. 24:45-47) Jehova min pêk chûng thilte chu zirin, leh kan thu zirte inhuam taka nunpuiin, a ṭanpuina kan mamawh tih inngaitlâwm takin kan pawm tûr a ni.

19-21. Kades-ah Mosia’n eng thilsual nge a tih a, chu mi aṭangin eng nge kan zir theih?

¹⁹ Thil sual tih kan pumpelh ang. Mosia hi han ngaihtuah leh teh. Ani chuan kum sâwmbi chhûngin thuhnuairawlhna a nei a, Jehova a tilâwm a ni. A hnuah, thlalêra harsa taka kum 40 chhûng an khualzin tâwp dâwn lamah, thuhnuairawlhna a lantîr lo va. Aiguptaa a nun chhanhimtu ni thei a farnu chu a thi a, Kadesh-ah an phûm a ni. Tûnah, Israel mite chuan ṭha taka ngaihsak an ni lo tiin an phunnawi leh a.  Tûn ṭumah hi chuan, tui an tlâkchham avângin, “Mosia chu an bei ta a.” Jehova’n Mosia hmanga thil mak tam tak a ti chung leh Mosia’n mahni hmasialna nei lova hun rei tak chhûng a kaihruai chung pawhin mite chu an phunnawi a ni. Tui an tlâkchham vâng chauhva phunnawi ni lovin, tui hala an awm chu Mosia thiam lohvah an puh a ni.—Num. 20:1-5, 9-11.

²⁰ A thinrim êm avângin, Mosia chuan a thuhnuairawlhna chu a hloh va. Jehova thu pêk angin, rinna nei taka lungpui chu hrilh lovin, mite chu thinrim takin a bia a, mahni a inchawimawi a ni. Tichuan, lungpui chu vawi hnih a han vua a, tui a lo chhuak ta dur dur mai a. Chapona leh thinrimna chuan thilsual lian tak a tihtîr a ni. (Sâm 106:32, 33) Rei lote chhûng thuhnuairawlhna a tlâkchham avângin, Mosia chu Ram Tiama luh phal a ni ta lo.—Num. 20:12.

²¹ He thilthleng aṭang hian, zir tûr pawimawh tak kan nei a. A hmasain, thuhnuairawlhna rilru put hmang neih reng kan tum tlat tûr a ni. Rei lote chhûng kan ngaihthah a nih chuan, chaponain kan thinlungah hmun a luah ang a, âtthlâk taka thusawi tûr leh thilti tûrin min chêttîr ang. Pahnihnaah, rilru hahna chuan min tihchauh theih avângin nêksâwra kan awm hunah pawh thuhnuairawlhna neih reng kan tum tûr a ni.

22-23. (a) Engvângin nge thuhnuairawlhna kan neih chhun zawm zêl ang? (b) Zephania 2:3-naa thu chuan eng nge a târ lan?

²² Humhim kan ni ang. Nakin lawkah, Jehova chuan leia mi suaksual zawng zawng chu a tiboral ang a, mi thuhnuairawlhte chauh an awm tawh ang. Tichuan, leiah hian remna dik tak a awm tawh ang. (Sâm 37:10, 11) Chûng mi thuhuairawlhte zîngah i tel ve ang em? Zâwlnei Zephania hmanga Jehova sâwmna duhawm tak i chhân lêt chuan i tel ve thei a ni.—Zephania 2:3 chhiar rawh.

²³ Engvângin nge Zephania 2:3-na chuan: “Thuhrûkin in awm thei mahna,” tia a sawi? He Bible châng hian Jehova chuan amah tilâwm duhtute leh a hmangaihte chu a humhim thei lo tihna a ni lo. Chu aiin, humhim ni tûr chuan thil engemaw kan tih a ngai tihna a ni zâwk. Tûnah, thuhnuairawlhna neih kan tum a, Jehova tihlâwm kan tum chuan, “LALPA thinrimna nîah” dam khawchhuah theihna leh chatuanna nun theihna hun remchâng kan nei ngei ang.