Canadian biala awm French ṭawng hmanna Quebec Khawpuiah ka piang a. Ka nu leh pa, Louis-a leh Zélia-i te chuan hmangaihna nei takin min enkawl seilian a ni. Ka pa chu mi ngawichawi tak leh lehkha chhiar nuam ti mi a ni a. Kei chuan lehkha ziah nuam ka ti a, engtik niah emaw chuan chanchinbu mi nih ka tum a ni.

Kum 12 mi ka nihin, ka pa hnathawhpui Rodolphe Soucy-a leh a ṭhian pakhat chu kan inah an lo lêng a. Anni chu Jehova Thuhretute an ni. Thuhretute chungchâng hi ka hre tam lo hle a, an sakhua pawh ka ngaihven lo bawk. Mahse, Bible hmanga zawhnate an chhân dân chu ṭha ka ti hle a. Ka nu leh pate pawhin ṭha an tih êm avângin, Bible zirna neih chu kan duh ta a ni.

Chutih hun lai chuan, Catholic school-ah ka kal a. A châng chângin, Bible zirnaa ka thu hriatte chu ka school kalpuite hnênah ka hrilh ṭhîn a. A tâwpah, kan zirtîrtu puithiamte chuan chu chu an lo hre ta a. An zînga pakhat chuan ka thusawite chu a dik lo tih Bible hmanga finfiah aiin, class pum hmaah hel hmang angin min sawichhe ta vak mai a! Hrehawm ti hle mah ila, chutianga sawichhiata ka awmna chuan school-a kan zir sakhuana lam thute chu Bible sawi nên a inmil lo tih min hriattîr avângin, ka tân malsâwmnaah a chang ta zâwk a ni. Chu school chu a chhuahsan a ngai tih ka hre ta a. Ka nu leh pate remtihnain, school dangah ka insawn ta a ni.

Bible ka zir zawm zêl a; mahse, in tin kala rawngbâwl chu ka hreh êm avângin, thlarau lamah hma ka sâwn chak lo hle a. Kan awmna bial chu Catholic Church chuan nasa takin a thunun a, kan thu hrilh rawngbâwlna pawh a dodâl nasa  hle. Quebec biala politic hruaitu lû Maurice Duplessis-a chu church nên an inṭhian ṭha hle a. A ṭanpuinain, tualchhûng mite chuan Thuhretute chu an tibuaiin, an bei ṭhîn a ni. Chutih hun laia thu hril tûr chuan huaisenna neih a ngai hle.

Ka hlauhna hneh tûra min ṭanpuitu chu Gilead School vawi 9-na zir chhuak unau John Rae-a a ni a. Thiltawn ngah tak unau John-a chu zaidam tak, inngaitlâwm tak, leh pan nuam tak a ni a. Tlang takin zilhna min pe khât hle a; mahse, entawn tûr ṭha siamin min zirtir nasa zâwk a ni. John-a chuan French ṭawng a thiam vak loh avângin rawngbâwlnaah kan inkawp fo va, ṭawng ka lehlinsak ṭhîn a. John-a nêna thawh dunna chuan a tâwpah thutak tâna huaisen taka ding ngam tûrin min ṭanpui a ni. Thuhretute nêna kan intawn hmasak ber aṭanga a kum sâwmna, May 26, 1951-ah baptisma ka chang ta a ni.

Quebec Khawpuia kan kohhran tê tak têah chuan unaute chu pioneer an ni deuh vek a. An entawn tûr ṭha siam chuan pioneer thawk tûrin min chêttîr a ni. Chutih hun lai chuan, in tina thu hrilh rawngbâwlnaah Bible chauh kan hmang ṭhîn a. Thu leh hla chhuahte a awm loh avângin, Bible chu thiam taka kan hman a ngai a ni. Chuvângin, thutak humhim nân Bible chângte hriat tam lehzual ka tum a. Mahse, mi tam tak chuan sawrkâr leh Catholic Church phalna a awm loh chuan Bible tak ngial pawh an chhiar duh lo.

Kum 1952-ah tualchhûnga unaunu rinawm tak Simone Patry-i nên kan innei a. Montreal khawpuiah kan insawn a; tichuan, kum khat chhûngin, fanu Lise-i kan nei a. Kan inneih hma lawkin pioneer chawlhsan mah ila, chhûngkuaa kohhran thiltihtea kan tel kim theih nân ka nupui Simone-i nên chuan samkhai taka nun kan tum tlat a ni.

Kum sâwm aliam hnu chuan rawngbâwlna zauh dân tûr chungchâng ngun takin ka ngaihtuah leh a. Kum 1962-ah, Canada Bethel-a neih thla khat awh Upate tâna Lalram Rawngbâwlna School ka kalnaah unau Camille Ouellette-a nên pindan khatah kan awm a. Unau Camille-a chu nupui fanau nei ni mah se, rawngbâwlnaa a ṭhahnem ngaihna chuan ka rilru a hneh hle. Chutih hun lai chuan, Quebec bialah fate enkawl chunga pioneer thawk nu leh pa an tlêm hle a; mahse, chu chu Camille-a thiltum a ni. Chutianga kan awm tlân lai chuan, ka dinhmunte ngaihtuah chiang tûrin min fuih a. Thla tlêm tê hnuah chuan, regular pioneer niin rawng ka bâwl leh  thei tih ka hre thiam ta. Ṭhenkhat chuan ka thu tlûkna siam chu ṭha an ti lo va; mahse, rawngbâwlnaa nasa lehzuala thawh ka tumna chu Jehova’n mal min sâwm ang tih ring tlatin, pioneer chu ka thawk leh ta a ni.

Kum 1964-ah, Simone-i nên kan pianna Quebec Khawpuiah special pioneer nia rawngbâwl tûra ruat kan ni a, chutah chuan kum engemaw zât rawng kan bâwl a ni. Tûn ṭumah hi chuan, thu hrilh rawngbâwlnain hma a sâwn tawh hle a; mahse, dodâlnate kan la hmachhawn reng a ni.

Inrini tlâi khat chu, Quebec Khawpui aṭanga hla vak lo, Sainte-Marie khuaah man ka tâwk a. Phalna nei lova in tin kala thu ka hrilh avângin officer pakhat chuan police station-ah min hruai a, tân inah min khung a ni. A hnuah, rorêltu nêlawm loh tak Baillargeon-a hmaa hruai ka ni a. Ani chuan court-a ka aiawha ding tûr chu min zâwt a. Thuhretu ukil hmingthang tak Glen How-a * hming ka’n sawi chuan hlauhthâwn hmêl tak hian: “E khai! Ani chu a ni thei lo vang!” tiin a sawi nghâl a. Chutih hun lai chuan, unau Glen How-a chu dân lama Thuhretute humhimtu hmingthang tak a ni a. Rei vak lovah, court chuan min chhuah zalên ta a ni.

Quebec biala kan rawngbâwlna dodâl a nihna chuan inkhâwmna tûr hmun ṭha zawn hmuh a tiharsa bawk. Kan kohhran tê tak tê chuan tihlumna awm lo, motor dahna hmun hlui tak chauh kan hmu thei a. Unaute chuan thlasik vawt tak chhûnga intih lum nân in chhûng tihlumna chi khat (oil heater) an hmang a. Chu chu inkhâwm ṭan hmain kan aiho va, thiltawn ṭha tak takte kan inhrilh tawn ṭhîn a ni.

Kum tam tak chhûng thu hrilh rawngbâwlnain a rah chhuah ṭhate hmuh chu a phûrawm hle. Kum 1960 chho bâwr vêl khân, Quebec Khawpuiah te, Côte-Nord bialah te, leh Gaspé-a thliarkârahte chuan kohhran tlêm tê chauh a la awm a. Mahse, tûnah chuan, chûng hmunahte chuan bial hnih aia tam a awm tawh a, unaute chu Kingdom Hall mawi takah an inkhâwm thei tawh a ni.

Kum 1970 khân, Simone-i nên bial kan hna thawk tûra sâwm kan ni a. Tichuan, kum 1973-ah district overseer nia rawngbâwl tûra ruat kan ni leh a. Chûng kum chhûngte chuan, bial kantu nia rawngbâwl, entawn tlâk tak unau Laurier Saumur-a * leh unau David Splane-a * te hnên aṭangin thil tam tak ka zir a ni. Bial inkhâwmpui kan neih zawh apiangin, unau David-a nên hian kan zîrtîrna tihhmasâwn dân chungchângah thurâwn kan inpe tawn ṭhîn a. Ṭum khat chu unau David-a’n: “Léonce, i thusawi hnuhnûng ber kha ṭha ka ti khawp mai. Mahse, i thusawi aṭang khân thusawi tûr dang pathum ka buaisaih theih ka ring!” tia min hrilh chu ka la hre reng. Ka thusawiah thu tam tak ka târ lang ṭhîn a. Tawi fel taka sawi dân ka zir a ngai a ni.

 District kantute chu bial kantute fuih tûra mawhphurhna pêk an ni a. Mahse, Quebec biala unau tam tak chuan min hre chiang hle a. Bial kana ka va tlawh châng hian, rawngbâwlnaah thawhpui min duh ṭhîn a. Unaute nêna rawngbâwla thawh dun chu nuam ti hle mah ila, bial kantute chu hun tam tâwk ka hmanpui thei ṭhîn lo a ni. Ṭum khat chu, ngilneihna nei tak bial kantuin heti hian min hrilh a: “Unaute tâna hun i pe chu a ṭha a; mahse, ka tâna lo kal i ni tih theihnghilh lo la ka duh. Kei pawhin fuihna ka mamawh a ni!” tiin. Chu ngilnei taka zilhna chuan inbûk tâwk thiam lehzual tûrin min ṭanpui a ni.

Lungchhiatthlâk takin, kum 1976-ah beisei loh takin thil pawi tak a thleng a. Ka nupui duh tak Simone-i chu nasa takin a dam lova, a hnu lâwkah chuan min boral san ta a ni. Mahni hmasial lo a rilru put hmang leh Jehova a hmangaihna avângin ka tân ṭhian duhawm tak a ni. Rawngbâwlnaa buai rengna chuan amah ka sûnna chu min hnêm tak zet a, chu hun harsa tak chhûnga Jehova min ṭanpuina avângin ka lâwm tak zet a ni. A hnuah, Quebec biala mamawh zualna hmuna rawngbâwl tûra lo kal, Sâpṭawng hmang pioneer ṭhahnemngai tak unaunu Carolyn Elliott-i nên kan innei a. Carolyn-i chu pan nuam tak leh mite ngaihsak tak a ni a, a bîk takin, mi zakzumte leh mal nia inhriate tân a nih lehzual. Bial kan rawngbâwlnaah nasa takin min ṭanpui a ni.

Kum 1978, January thlaah, Quebec khawpuia neih Pioneer Rawngbâwlna School hmasa bera zirtîr tûra sâwm ka ni a. An thu zir tûrte chu kei pawhin ka la zir ngai loh avângin, ka zâm hle a ni. Chu school hmasa berah chuan thiltawn ngah pioneer tam tak an tel avângin ka lâwm tak zet a ni. Kaihruaitu ni mah ila, zirlaite hnên aṭangin thil tam tak ka zir a ni.

A hnu kum 1978-ah chuan “Victorious Faith” tih Khawvêl pum huap Inkhâwmpui chu Montreal’s Olympic Stadium-a neih a ni a. Quebec biala inkhâwmpui neih tawh azawnga inkhâwmpui lian ber niin, mi 80,000 chuang kan tel  a ni. Inkhâwmpuiah chuan News Service Department nêna thawkho tûra ruat ka ni a. Chanchinbu mi tam tak ka bia a, kan chanchin a ṭha zâwng hlîra an târ lang ka hmuh chuan ka lâwm hle. TV-ah leh radio-a biang biaknate chu dârkâr 20 aia tam pêk chhuah a ni a, kan chanchin târ lanna thuziakte chu a za tel tihchhuah a ni bawk. Thuhriattîrna ropui tak a va ni êm!

Kum 1996-ah ka tân inthlâk danglamna lian tak a thleng a. Baptisma ka chan aṭangin French ṭawng hmanna Quebec biala rawng ka bâwl hnu chuan, Sâpṭawng hmanna Toronto biala rawngbâwl tûra ruat ka ni a. Tling lo ka inti hle a, Sâpṭawng ka thiam vak loh avângin thusawi tûr anga ka inngaihtuah ringawt pawhin ka huphurh hle. Jehova rinchhan a, ṭawngṭai nasat lehzual a ngai a ni.

Ka han ngaihtuah lêt hian, Toronto biala kum hnih chhûng ka rawngbâwlna chu nuam ka ti hle tih ka sawi thei a ni. Ka nupui Carolyn-i chuan Sâpṭawng thiam lehzual tûrin dawhthei takin min ṭanpui a, unaute pawhin ṭanpuina leh fuihna min pe nasa hle. Ṭhian thar tam tak kan siam thei nghâl a ni.

Chawlhkâr tâwpa neih inkhâwmpui atâna thiltih tûr tam tak leh inbuatsaihnate bâkah, Zirtâwp tlai lamah in tina rawngbâwlna atân dârkâr khat vêl ka hmang ṭhîn a. Mi ṭhenkhat chuan, ‘Inkhâwmpui hma nîa rawngbâwla lo chhuah chu a ṭûl em ni?’ an ti mai thei. Mahse, rawngbâwlnaa mite nêna inkawmna ṭha tak neihna chuan rilru a tizângkhai tih ka hria a. Tûnah pawh, rawngbâwlnaa tel ziahna chuan min tiphûr reng ṭhîn a ni.

Kum 1998-ah Carolyn-i nên Montreal khawpuiah special pioneer nia rawngbâwl tûra ruat kan ni leh a. Kum tam tak chhûng chu, ka chanvo dawnah chuan a bîk taka neih vântlâng hmuna thu hrilh huaihawtna leh Jehova Thuhretute chungchâng mite hriat sualte siam ṭha tûra chanchinbu mite thawhpuina a tel a. Carolyn-i nên chuan Canada rama tûn hnai maia lo lût, Bible chungchâng hriat belh duhna nei ram dang mite hnêna thu hrilh chu nuam kan ti hle.

Baptisma chang tawh Jehova rawngbâwltu nia ka hun kal tawh kum 68 chhûng ka’n thlîr lêt hian, malsâwmna ka dawng tak zet niin ka inhria. Rawngbâwlna nuam ti tûra inzir leh thutak hre tûra mi tam tak ṭanpui hi manhla tak a ni. Kan fanu Lise-i leh a pasal chuan an fate an lo puitlin hnu chuan, regular pioneer niin rawng an bâwl ṭan a. Rawngbâwlnaa phûr taka a tel zawm zêl ka hmuh hian ka hlim thei hle a ni. Thlarau lama hmasâwn tûr leh theocratic chanvo hrang hrang chelh thei tûra an entawn tûr siam ṭha takte leh an thurâwn fing takte hmanga min ṭanpuitu Kristian unaute chungah a bîk takin ka lâwm a ni. Jehova thlarau thianghlim thiltithei tak kan rinchhan chauhvin, kan chanvo neihah kan rinawm reng thei tih ka hria. (Sâm 51:11) A hming chawimawi theihna chanvo hlu tak min pêk avângin Jehova chungah ka lâwm tak zet a ni!—Sâm 54:6.