ZIR TUR THUZIAK 7
Kan Pa Jehova Chu Kan Hmangaih Tak Zet
“Amahin min hmangaih hmasak avângin kan hmangaih a ni.”—1 JOH. 4:19.
HLA 3 Kan Chakna, Kan Beisei, Kan Rinchhan
THLIR LAWKNA *
1-2. Engvângin nge Jehova’n a chhûngkaw zînga tel theihna kawng min hawnsak a, engtin nge min hawnsak?
JEHOVA chuan amah betu chhûngkaw zînga tel tûrin min sâwm a. Chu chu sâwmna ropui tak a va ni êm! He chhûngkua hi Pathian tâna mahni inpumpêk a, a Fapa tlanna inthawina chunga rinna lantîrtute hmanga din a ni a. Chhûngkaw hlim tak kan ni. Tûnah ngei pawh nun awmze nei tak kan nei a, chu bâkah, vânah a ni emaw, lei Paradis-ah a ni emaw chatuana nun beiseina kan nei a ni.
2 Jehova chuan min hmangaih avânga nasa taka chânin, a chhûngkaw zînga tel theihna kawng min hawnsak a. (Joh. 3:16) ‘Mana lei kan ni tawh.’ (1 Kor. 6:20) Ani chuan amah nêna inlaichînna ṭha tak kan neih theih nân tlanna chu min buatsaihsak a ni. Lei leh vâna Mi ropui ber chu Pa anga koh theihna chanvo hlu kan nei a ni. Chu bâkah, thuziak hmasaa kan sawiho tâk ang khân, Jehova chu pa azawnga Pa ṭha ber a ni bawk.
3. Eng zawhnate nge kan inzawh mai theih? (“ Jehova’n Min Hria Em?” tih bâwm chu en bawk rawh)
3 Bible ziaktu pakhat angin: “Ka chunga a thiltih ṭhat zawng zawng avâng hian LALPA chu eng nge ka pêk ve thung ang?” tiin kan inzâwt mai thei a. (Sâm 116:12) A chhânna chu, kan Pa vâna mi chu kan rûl thei ngai lo vang tih hi a ni. Chuti chung pawhin, min hmangaihna chuan amah hmangaih lêt tûrin min chêttîr a. Tirhkoh Johana chuan: “Amahin min hmangaih hmasak avângin kan hmangaih a ni,” tiin a ziak a ni. (1 Joh. 4:19) A nih leh, eng kawngtein nge kan Pa vâna mi kan hmangaih tih kan lantîr theih?
JEHOVA HNAIH RENG RAWH
Ṭawngṭaia amah hnaih tlatin, a thuâwihin, leh mi dangte chu amah hmangaih tûra ṭanpuiin, kan Pa vâna mi Jehova chu kan hmangaih tak zetzia kan lantîr (Paragraph 4-14-na en rawh)
4. Jakoba 4:8-a sawi angin, engvângin nge Jehova hnaih tûra theih tâwp kan chhuah ang?
4 Jehova chuan amah hnaih tûr leh inbiak pawhna nei tûrin min duh a. (Jakoba 4:8 chhiar rawh.) Ani chuan “ṭawngṭaina kawngah chuan ṭawngṭai fan fan” tûrin min fuih a, kan ṭawngṭainate chu englai pawhin min ngaihthlâksak ṭhîn a ni. (Rom 12:12) Kan ṭawngṭaina ngaithla hman lo khawpin a buai lutuk emaw, a chau lutuk emaw ngai lo. A Thu, Bible chhiarna leh kan thu chhiarte hre thiam tûra min ṭanpuitu thu leh hla chhuahte chhiarna hmangin, a thusawi kan ngaithla a ni. Kristian inkhâwmahte ṭha taka ngaithlain a thusawi kan ngaithla bawk. Inbiak pawhna ṭhain naupangte chu an nu leh pate hnaih tûra a ṭanpui angin, Jehova nêna inbiak pawhna kan neih ziahna chuan amah hnaih reng tûrin min ṭanpui a ni.
Paragraph 5-na en rawh
5. Engtin nge kan ṭawngṭainate chu kan tihhmasâwn theih?
5 Pathian nêna in inbiak pawh dân chu han ngaihtuah teh. Jehova chuan kan thinlung chu a hmaa leih baw tûrin min duh a. (Sâm 62:8) Chuvângin, he zawhna hi kan inzâwt tûr a ni: ‘Ka ṭawngṭainate chu a pâwnlâng mai leh ziah chhuahsa ang mai nge ni a, thinlung tak aṭanga chhuak zâwk?’ tiin. Jehova chu i hmangaih tak zetin, amah nêna inlaichînna nghet tak neih zawm zêl chu i duh ngei ang. Chutianga ti tûr chuan, amah nêna inbiak pawhna i neih ziah a ngai a ni. I thurûkte chu a hnênah hrilh la, i hlimnate leh i lungngaihnate chu a hnênah hriattîr ang che. A ṭanpuina i dîl thei tih ring tlat rawh.
6. Kan Pa vâna mi hnaih reng tûrin eng nge kan tih ngai?
6 Kan Pa vâna mi hnaih reng tûr chuan lâwm nachâng kan hriat a ngai a. Fakna hla phuahtuin: “Aw LALPA ka Pathian, nangin thilmak i tihte leh keimahni lam i ngaihtuahnate hi a tam êm êm mai a, chûng chu i hmâa tihlan sên rual a ni lo va; hriattîrin hril dâwn ila, chhiar sên rual a ni lo vang,” tia a sawi hi kan ṭâwmpui ngei ang. (Sâm 40:5) Jehova chungah lâwm nachâng kan hre mai ni lovin, kan ṭawmgkam leh thiltihin kan lantîr a. Hei hian tûn laia mi tam takte lakah min tidanglam a ni. Pathianin an tâna a tihsakte chunga lâwm nachâng hre lo mite zîngah kan awm a. Dik tak chuan, “ni hnuhnûngahte” kan nung tawh tih târ langtu zînga pakhat chu mite’n lâwm nachâng an hre lo hi a ni. (2 Tim. 3:1, 2) Chu rilru put hmang chu i nei ngai lo vang u!
7. Jehova’n eng ti tûrin min duh a, engvângin nge?
7 Nu leh pate chuan an fate chu inhau lo va, inngeih dial diala awm tûrin an duh a. Chutiang bawkin, Jehova chuan a fate chu inngeih taka awm tûrin a duh a ni. Dik tak chuan, kan inhmangaih tawnna hi Kristian dik kan nihzia chhinchhiahna a ni a. (Joh. 13:35) Fakna hla phuahtuin: “Ngai teh, unaute inngeih dial diala awm khâwm hi a va ṭhain, a va nuam êm!” tia a sawi hi kan ṭâwmpui a ni. (Sâm 133:1) Kan unaute kan hmangaih hian Jehova kan hmangaih tih kan lantir a. (1 Joh. 4:20) ‘Inkhawngaih tawna lainatna neia awm’ chhûngkaw zînga kan tel thei hi a va lâwm awm tak êm!—Eph. 4:32.
THUAWIHNA HMANGIN HMANGAIHNA LANTIR RAWH
Paragraph 8-na en rawh
8. Johana thawn khat 5:3-a sawi angin, Jehova thu kan âwih chhan ber chu eng nge ni?
8 Jehova chuan naupangte chu an nu leh pate thu âwih tûrin a beisei a, keini pawh a thu âwih tûrin min beisei a ni. (Eph. 6:1) Ani chu min Siamtu, kan nunna châwmtu, leh nu leh pa azawnga fing ber a nih avângin a thu kan âwih a phû a. Mahse, Jehova thu kan âwih chhan ber chu amah kan hmangaih vâng a ni. (1 Johana 5:3 chhiar rawh.) A thu kan âwih chhan tûr tam tak a awm chung pawhin, ani chuan a thuâwih tûrin min tilui lo. Zalên taka duh thlan theihna min pe a, amah kan hmangaih avânga a thu kan âwih hian ani chu a lâwm a ni.
9-10. Engvângin nge Pathian tehkhâwngte hriat a, nunpui chu a pawimawh?
9 Nu leh pate chuan an fate chu him tûrin an duh a. Chuvângin, an hlâwkpui theih tûr nungchang lama tehkhâwngte an siamsak a ni. Naupangte’n chûng kaihhruainate an zawm chuan an nu leh pate chu an rinchhanin, an zah tihna a ni a. Kan Pa vâna mi tehkhâwngte hriat a, nunpui chu a va pawimawh lehzual dâwn êm. Chutianga kan tih chuan, Jehova chu kan hmangaihin, kan zah tihna a ni ang a, chu chu mahni ngeiin kan hlâwkpui ang. (Is. 48:17, 18) Chumi nêna inkalh takin, Jehova leh a tehkhâwng hnâwltute chuan a tâwpah chhiatna an inthlen ṭhîn a ni.—Gal. 6:7, 8.
10 Jehova tilâwm zâwnga kan nun hian tisa lam, rilru lam, leh thlarau lamah humhimin kan awm a. Ani chuan kan tâna ṭha ber tûr a hria a. United States rama unaunu Aurora-i chuan, “Jehova thu âwihna chuan nun ṭha ber min neihtîr reng thei tih ka hria,” tiin a sawi. Chu chu kan za atâna thu dik a ni. Jehova kaihhruaina duhawm tak zawmna chu engtin nge i hlâwkpui?
11. Engtin nge ṭawngṭaina chuan min ṭanpui ang?
11 A harsat hunah pawh ṭawngṭaina chuan thuâwih tûrin min ṭanpui thei a. Jehova thuâwih chu harsa tih châng kan nei thei a; mahse, sual tihduhna kan neih chu kan do tlat a ngai a ni. Fakna hla phuahtuin Pathian hnênah: “Thlarau tihnuamin mi chelh reng ang che,” tiin a ngên a. (Sâm 51:12) Regular pioneer thawk mêk Denise-i chuan, “Jehova thupêkte zawm harsa tih châng ka neih hian, thil dik ti tûra chakna nei tûrin ka ṭawngṭai ṭhîn,” tiin a sawi. Jehova chuan chutiang ngenna chu englai pawhin a chhâng ang tih kan chiang thei a ni.—Lk. 11:9-13.
MI DANGTE CHU KAN PA HMANGAIH TURIN ṬANPUI RAWH
12. Ephesi 5:1-a sawi angin, eng nge kan tih ang?
12 Ephesi 5:1 chhiar rawh. Jehova “fa duh takte” kan nih angin, theih tâwp chhuahin amah kan entawn a. Mi dangte kan cheibâwl dânah hmangaihna, ngilneihna, leh ngaihdamnate lantîrin, a miziate chu kan entawn a ni. Pathian hre lo mite’n kan nungchang ṭha an hmuh hian, chu chuan a chanchin tam lehzuala zir tûrin a chêttîr thei a ni. (1 Pet. 2:12) Kristian nu leh pate chuan an fate an cheibâwl dânah Jehova entawnna tûr chhan ṭha tak an nei a. Chutianga an tih chuan, an fate chuan hmangaihna nei tak kan Pa nêna mi mal inlaichînna ṭha neih chu an duh ve ngei ang.
Paragraph 13-na en rawh
13. Eng nge kan ngaihven tlat ang?
13 Tleirâwl pakhat chuan a pa chu a chhuangin, a chanchin sawi chu nuam a ti hle a. Chutiang bawkin, keini pawhin kan Pa vâna mi chu kan chhuangin, mi dangte hnênah a chanchin hrilh chu kan duh a ni. “Ka nunna hian LALPA chu a chhuang ang,” tia ziaktu Lal Davida rilru put hmang ang chu kan nei ve a ni. (Sâm 34:2) A nih leh, mi zakzum tak ni ta ila, engtin nge ni ang? Engtin nge huaisenna kan neih theih ang? Jehova thinlung kan tihlâwm theih dân leh mite’n a chanchin an zirna aṭanga hlâwkna nasa tak an hmuh dân tûr te kan ngaihven tlat chuan huaisena kan nei thei ang. Jehova chuan kan mamawh huaisenna chu min pe ang a. Kum zabi khatnaa kan unaute chu huaisenna nei tûra a ṭanpui ang bawkin, keini pawh min ṭanpui ve ang.—1 Thes. 2:2.
14. Zirtîr siamnaa kan tel a pawimawh chhan ṭhenkhat chu engte nge ni?
14 Jehova chuan duhsak bîk a nei lo va, mite ṭobul chu eng pawh ni se, an chunga hmangaihna kan lantîr a hmuh hian a hlim a ni. (Tirh. 10:34, 35) Mite chunga hmangaihna kan lantîr theih dân kawng ṭha ber pakhat chu an hnêna chanchin ṭha hrilh hi a ni. (Mt. 28:19, 20) He hna hian eng nge a hlen chhuah theih? Kan thuchah ngaithlatute chuan tûnah ngei pawh an nun an tihhmasâwn theih bâkah, nakina chatuan nunna pawh an beisei thei a ni.—1 Tim. 4:16.
KAN PA CHU HMANGAIH LA, HLIM RAWH
15-16. Hlimna tûr chhan eng nge kan neih?
15 Jehova chu hmangaihna nei tak pa ang a ni a, a chhûngkua chu hlim tûrin a duh a ni. (Is. 65:14) Harsatnate kan hmachhawn chung pawhin, tûnah ngei pawh kan hlim theihna tûr chhan tam tak a awm a. Entîr nân, kan Pa vâna mi chuan min hmangaih tak zet tih kan chiang thei a. Pathian Thu, Bible chungchângah hriatna dik tak kan nei bawk. (Jer. 15:16) Jehova hmangaih a, nungchang lama a tehna sâng takte ngaina a, inhmangaih tawnna nei chhûngkaw danglam bîk tak zîngah kan tel ve a ni.—Sâm 106:4, 5.
16 Nakinah nun ṭha zâwk kan nei dâwn tih beiseina chiang tak kan neih avângin kan hlim reng thei a. Nakin lawkah, Jehova’n suahsualna zawng zawng a tibo vang a, a Lalram awpna hnuaiah lei hi Paradis-ah a chantîr ang. Mitthite chu an lo tho lehin, kan hmangaih takte nên kan inhmu leh ang tih beiseina ropui tak kan nei bawk. (Joh. 5:28, 29) A va hlimawm dâwn tak êm! A pawimawh ber chu, nakin lawkah, lei leh vâna mi zawng zawngte chuan hmangaihna nei tak kan Pa chu a phû ang ngeiin, an chawimawiin, an fakin, an be tawh ang tih kan chiang a ni.
HLA 12 Pathian Ropui, Jehova
^ par. 5 Kan Pa Jehova chuan min hmangaih tak zetin, amah betu chhûngkaw zîngah min hruai lût a. Chu chuan amah hmangaih tûrin min chêttîr a ni. Min ngaihsaktu kan Pa chu kan hmangaih tih engtin nge kan lantîr theih? He thuziakah hian kan lantîr theih dân kawng ṭhenkhat chu sawiho a ni ang.
