1. Persia lal be tûra hmalâknaah eng nge tel?

KUM 2,500 vêl kal taa Persia rama chêng angah han inchan teh. Thil engemaw chungchânga lal i biak duh avângin, lal chênna khawpui Susan-ah chuan i kal ta a. Mahse, lal i biak hmain a phalna i lâk hmasak a ngai ang. Chutiang a nih loh chuan, i nunna i chân thei a ni.—Est. 4:10-11.

2. Jehova pan chu engtin nge kan ngaih ang?

² Jehova chu Persia lal ang a nih loh avângin kan va lâwm tak êm! Ani chu mihring rorêltute aiin nasa takin chungnung zâwk mah se, eng hunah pawh kan be thei a ni. Ani chuan zalên taka amah pan tûrin min duh a. Entîr nân, Jehova chuan Siamtu Ropui, Engkimtithei, leh Lal Chungnungber tih ang chi nihna sâng tak takte nei mah se, tlângnêl taka “Pa” tia ko tûrin min duh a ni. (Mt. 6:9) Jehova’n amah hnaih nia inhriatna nei tûra min duh chu a va hlimawm tak êm!

3. Engvângin nge Jehova chu “Pa” tia kan koh theih a, he thuziakah hian eng nge kan sawiho vang?

³ Jehova chu nunna zawng zawng Hnâr a nih avângin, “Pa” tia koh chu a inâwm hle. (Sâm 36:9) Kan Pa a nih avângin, a thu âwih tûrin mawhphurhna kan nei a. Ti tûra min duhte kan tih chuan, malsâwmna ropui tak takte kan dawng ang. (Heb. 12:9) Chûng malsâwmnate zîngah chuan vâna chatuan nunna emaw, leia chatuan nunna emaw a tel a ni. Tûnah ngei pawh hlâwkna tam tak kan dawng bawk. He thuziakah hian Jehova’n hmangaihna nei tak Pa anga tûna thil a tih dân leh nakin hunah pawh min thlahthlam ngai lo vang tih kan chian theih chhante kan sawiho vang. A hmasain, kan Pa vâna mi chuan min hmangaih tak zetin, min ngaihsak tih kan rin theih chhan i lo sawiho vang u.

4. Engvângin nge mi ṭhenkhatin Jehova chu Pa anga thlîr harsa an tih?

⁴ Pathian chu Pa anga thlîr harsa i ti em? Ṭhenkhat chuan Jehova nêna khaikhin chuan tê lutuk leh pawimawhna nei lo niin an inngai mai thei a. Pathian Engkimtitheia chuan a mi mal takin min ngaihsak ṭheuh tih chu rin harsa an ti a ni. Mahse, hmangaihna nei tak kan Pa chuan chutiang ngaih dân chu nei tûrin min duh lo. Nunna min pein, amah nêna inlaichînna nei tûrin min duh a. He thu dik hi a sawi hnuah, tirhkoh Paula chuan Atheni khuaa a thusawi ngaithlatute hnênah Jehova chuan “min hlat lo ṭheuh si a,” tiin a hrilh a ni. (Tirh. 17:24-29) Naupangin hmangaihna leh ngaihsakna nei tak a nu leh pate a be ṭhîn angin, Pathian chuan amah be tûrin min duh a ni.

5. Kristian unaunu thiltawn aṭangin eng nge kan zir?

⁵ Mi dangte chuan an pate ngeiin an chungah hmangaihna leh ngainatna chhe tê mah an lantîr loh avângin, Jehova chu Pa anga thlîr harsa an ti a ni. Kristian unaunu sawi hi han ngaihtuah teh. Ani chuan: “Ka pa chu chaltlai taka ṭawng ṭhîn a ni a. Bible ka zir ṭan chuan, kan Pa vâna mi hnaih chu harsa ka ti hle. Mahse, Jehova ka hriat chian hnu chuan, engkim a inthlâk vek a ni,” tiin a sawi. Chutiang chu i tawng ve tawh em? I tawng a nih chuan Jehova chu Pa azawnga Pa ṭha ber angin i thlîr thei tih ring tlat ang che.

6. Matthaia 11:27-a sawi angin, Jehova’n hmangaihna nei tak Pa anga amah thlîr tûra min ṭanpui dân kawng khat chu eng nge ni?

⁶ Jehova’n hmangaihna nei tak Pa anga amah thlîr tûra min ṭanpui dân kawng khat chu, Bible-a chhinchhiah Isua thusawi leh thiltihte hmangin a ni. (Matthaia 11:27 chhiar rawh.) Isua chuan a Pa miziate chu ṭha famkima a entawn avângin, ani chuan: “Tupawh mi hmu chu Pa hmu a ni,” tiin a sawi thei a. (Joh. 14:9) Chu bâkah, Pa a nih anga Jehova thil hlen chhuahte chu a sawi fo va. Chanchin Ṭha Ziak paliahte chuan Isua’n Jehova sawi nân “Pa” tih thu mal chu a hmang fo a ni. Engvângin nge Isua chuan Jehova chungchâng chu a sawi nawn fo? A chhan pakhat chu, mite’n Jehova chu hmangaihna nei tak Pa anga an rin theih nân a ni.—Joh. 17:25, 26.

7. A Fapa a cheibâwl dân aṭangin Jehova chungchâng eng nge kan zir?

⁷ A Fapa Isua a cheibâwl dân aṭanga Jehova chungchâng kan zir theihte chu han ngaihtuah teh. Jehova chuan Isua ṭawngṭainate chu englai pawhin a ngaihthlâksak a. A ngaithla mai ni lovin, a chhâng bawk a ni. (Joh. 11:41, 42) Eng ang fiahna pawh tawk mah se, Isua chuan a Pa hmangaihna leh ṭanpuina a dawng tih a hria.—Lk. 22:42, 43.

8. Eng kawngtein nge Jehova’n Isua chu a ṭanpui?

⁸ Isua chuan: “Pa zâra nung ka ni,” tia sawiin a Pa chu a nunna Hnâr leh chhawmdâwltu a ni tih a pawm a. (Joh. 6:57) Ani chuan a Pa chu a rinchhan pumhlûm a, Jehova chuan a tisa lam mamawhte chu a pe a ni. A pawimawh ber chu, Jehova’n Isua thlarau lam mamawh a ngaihsak hi a ni.—Mt. 4:4.

9. Jehova’n Isua tân hmangaihna leh ngaihsakna nei tak Pa a nihzia engtin nge a lantîr?

⁹ Hmangaihna nei tak Pa a nih angin, Jehova chuan Isua chu a ṭanpui reng tih a hriat chiantîr a. (Mt. 26:53; Joh. 8:16) Ani chuan Isua chu amah tina theitu zawng zawng lakah vênghim lo mah se, tuar chhuak thei tûrin a ṭanpui a ni. Isua pawhin a hrehawm tawrhte chu rei lo tê atân chauh a ni tih a hre bawk. (Heb. 12:1, 2) Jehova chuan Isua thusawite ngaithlain, a mamawhte pein, zirtîrin, leh ṭanpuiin a ngaihsakzia a târ lang a ni. (Joh. 5:20; 8:28) Tûnah chuan, kan Pa vâna miin Isua a ngaihsak anga min ngaihsak dân i lo sawiho vang u.

10. Sâm 66:19, 20-a sawi angin, Jehova’n min hmangaih tih engtin nge a lantîr?

¹⁰ Jehova chuan kan ṭawngṭainate a ngaithla. (Sâm 66:19, 20 chhiar rawh.) Ani chuan engemaw châng chauhva ṭawngṭai tûrin min duh lo va, ṭawngṭai fo tûrin min fuih zâwk a ni. (1 Thes. 5:17) Khawi hmunah pawh awm mah ila, eng hunah pawh Pathian chu zah takin kan pan thei a. Kan ṭawngṭainate ngaithla hman lo khawpin a buai lo va, ngaihthlâk a inpeih reng a ni. Jehova’n kan ṭawngṭainate a ngaithla tih kan hriat hian, chu chuan amah min hnaihtîr a. Fakna hla phuahtu chuan: “LALPA chu ka hmangaih a ni, ka aw . . . a ngaihthlâk avângin,” tiin a sawi a ni.—Sâm 116:1.

11. Jehova’n kan ṭawngṭainate chu engtin nge a chhân?

¹¹ Kan Pa chuan kan ṭawngṭainate chu ngaithla mai lovin, a chhâng bawk. Tirhkoh Johana chuan: ‘Eng pawh a duh zâwng anga kan dîl chuan anin min ngaihthlâksak ṭhîn,’ tiin min hrilh a. (1 Joh. 5:14, 15) Ni e, Jehova chuan kan ṭawngṭainate chu kan beisei angin a chhâng lo mai thei. Mahse, kan tâna ṭha ber tûr a hriat avângin, kan dîlnate chu a châng chuan min tihhlawhtlinsak lo, a nih loh leh nghâk rih tûrin min duh a ni.—2 Kor. 12:7-9.

12-13. Kan Pa vâna mi chuan kan mamawhte chu eng kawngtein nge min pêk?

¹² Jehova chuan kan mamawhte min pe. Ani chuan pa zawng zawng hnêna ti tûra a phût chu amah ngeiin a ti a. (1 Tim. 5:8) A fate tisa lam mamawhte chu a ngaihsak a ni. Ei leh bar te, silh leh fên te, leh awmna tûr inte chungchângah lungkam lo tûrin min duh a. (Mt. 6:32, 33; 7:11) Hmangaihna nei tak pa angin, Jehova chuan nakin huna kan mamawh zawng zawng min phuhhrûksak tûrin ruahmanna a siam a ni.

¹³ A pawimawh ber chu, Jehova’n kan thlarau lam mamawhte min pe hi a ni a. Ama chungchâng, a thiltum, nun awmzia, leh nakin hun chungchânga thu dik chu a Thu hmangin min hrilh a ni. Thu tak kan zir ṭan hian amah hre tûra min ṭanpuitu kan nu leh pate, a nih loh leh mi dangte hmangin kan chungah mi mal ngaihsakna a lantîr a. Hmangaihna nei tak kohhran upate leh thlarau lama puitling kan unaute hnên aṭangin ṭanpuina kan dawng zawm zêl a ni. Chu bâkah, Jehova chuan kohhran inkhâwmte hmangin thlarau lama kan chhûngte rualin min zirtîr bawk. Hêngte leh kawng dangin, Jehova chuan kan zaa chungah pa anga min ngaihsakna chu a lantîr a ni.—Sâm 32:8.

14. Engvângin nge Jehova’n min zirtîr a, engtin nge min zirtîr?

¹⁴ Jehova chuan min zirtîr. Isua angin, ṭha famkim kan ni lo va. Chuvângin, hmangaihna nei tak kan Pa chuan zirtîrna min pêk hian a ṭûl hunah min thunun bawk. A Thu Bible-in: “Lalpa chuan a hmangaih chu a thunun ṭhîn,” tih min hriat nawntîr a ni. (Heb. 12:6, 7) Jehova chuan kawng tam takin min thunun a. Entîr nân, Bible-a kan thu chhiar emaw, inkhâwmnaa kan thu hriat emaw chuan min siam ṭha thei a. A nih loh leh, kan mamawh ṭanpuina chu kohhran upate hmangin min pe mai thei bawk. Jehova min thunun dân chu engtiang pawh ni se, chu chu hmangaihna avânga pêk a ni ṭhîn.—Jer. 30:11.

15. Eng kawngtein nge Jehova’n min vênhim?

¹⁵ Jehova chuan fiahnate kan hmachhawn hunah min ṭanpui. Chhûngte ngaihsak tak pain harsatna kârah a fate a ṭanpui ṭhîn angin, kan Pa vâna mi chuan fiahnate kan hmachhawn hunah min ṭanpui reng ṭhîn. Thlarau lam dinhmun hlauhawm laka min vênghim tûrin a thlarau thianghlim a hmang a ni.  (Lk. 11:13) Jehova chuan kan ngaihtuahnate pawh a vênghim bawk. Entîr nân, beiseina ropui tak min pe a. Nakin hun atâna chu beiseina chuan harsatnate chhel taka tuar chhuak thei tûrin min ṭanpui a ni. Hei hi han ngaihtuah teh: Kan chungah thil ṭha lo eng pawh lo thleng se, hmangaihna nei tak kan Pa chuan hrehawm kan tawrh engpawh chu a tireh ang. Kan hmachhawn fiahna engpawh chu rei lo tê atân chauh a ni a; mahse, Jehova min pêk malsâwmnate erawh chatuan daih a ni.—2 Kor. 4:16-18.

16. Adama’n hmangaihna nei tak a Pa thu a âwih loh khân, eng thil nge thleng?

¹⁶ A lei lam chhûngkuaa buaina chhuak hmasa ber a chhân lêt dân aṭangin Jehova min hmangaihna chu kan hmu a. Adama’n a Pa vâna mi thu a âwih loh khân, amah leh a thlahte chuan Jehova chhûngkaw hlim tak zîngah tel theihna an nei tawh lo. (Rom 5:12; 7:14) Mahse, Jehova chuan ṭanpuina a la pe chhun zawm zêl a ni.

17. Adama a hel hnuah, Jehova’n eng nge a tih nghâl?

¹⁷ Jehovah chuan Adama chu hrem mah se, la piang tûr a thlahte chu beisei bovin a dah lo. Ani chuan thuâwih mihringte chu a chhûngkaw zînga la lût leh tûrin thu a tiam nghâl a ni. (Gen. 3:15; Rom 8:20, 21) Jehova chuan a hmangaih tak a Fapa Isua tlanna inthawina hmangin chu chu a ruahman a. Kan tâna a Fapa pein, min hmangaih tak zet tih a târ lang a ni.—Joh. 3:16.

18. Jehova chuan a hnên aṭanga kan kal bo hunah pawh a fate ni tûrin min duh tih engvângin nge kan chian theih?

¹⁸ Kan ṭha famkim lo chung pawhin, Jehova chuan a chhûngkaw zînga tel tûrin min duh a, phurrit angin min thlîr ngai lo. Kan tilungni lo emaw, hun engemawti chhûng kan kal bosan emaw a nih pawhin, ani chu kan chungah a  beidawng mai lo. Isua chuan pa anga Jehova min ngaihsakzia chu fapa tlân bo thawnthu nên entîrna a pe a. (Lk. 15:11-32) Chu entîrnaa pa ber chuan a fapa lo haw leh chu a beisei tlat a. A fapa a lo haw leh chuan a pain lâwm takin a lo pawm a ni. Jehova kan kal bosan hnua kan inchhîr leh a nih chuan, hmangaihna nei tak kan Pa chu lâwm taka min pawm tûrin a inpeih reng tih kan chiang thei a ni.

19. Engtin nge Jehova’n Adama thlen chhiatna te chu a siam ṭhat ang?

¹⁹ Kan Pa chuan Adama thlen chhiatna zawng zawng chu a siam ṭha leh vek ang. Adama a hel hnuah, Jehova chuan a Fapa Isua nêna vâna lal leh puithiam nia rawngbâwl tûrin mihring zîng aṭangin mi 1,44,000 chu fate anga nei tûrin thu tlûkna a siam a. Isua leh chûng a rorêlpuite chuan khawvêl tharah thuâwih mihringte chu ṭha famkim ni tûrin an ṭanpui ang a. Thuâwihna chungchânga fiahna hnuhnûng ber an pal tlang hnuah, Pathian chuan anni chu chatuan nunna a pe ang. Kan Pa chuan ṭha famkim a fate’n lei an luah khah a hmuh chuan lungawina a nei tawh ang. Hun hlimawm tak a va ni dâwn êm!

20. Eng kawngtein nge Jehova’n min hmangaih tak zetzia a lantîr a, a dawta thuziakah eng nge kan sawiho vang?

²⁰ Jehova chuan min hmangaih tak zet tih a lantîr a. Pa ṭha ber a nih angin, kan ṭawngṭainate min ngaihthlâksakin, tisa lam leh thlarau lama kan mamawhte chu min phuhhrûksak a ni. Min zîrtîrin, min ṭanpui bawk. Chu bâkah, nakin hunah malsâwmnate min vûr ang. Kan Pain min hmangaihin, min ngaihsak tih hriatna chuan min va tihlim tak êm! A dawta thuziakah chuan, a fate kan nih anga Jehova hmangaihna kan chhân lêt theih dân kan sawiho vang.