1-2. Matthaia 5:11-a sawi angin, engtin nge fiahnate chu kan thlîr ang?

ISUA chuan a hnungzuitute’n lâwmna dik tak an nei ang tih a tiam a. Amah hmangaihtute chuan fiahnate pawh an hmachhawn dâwn tih a hrilh bawk. (Mt. 10:22, 23; Lk. 6:20-23) Krista zirtîrte kan nih avângin kan lâwm hle a ni. A nih leh, chhûngte dodâlna te, sawrkâr tihduhdahna te, leh thil dik lo ti tûra kan hnathawhpuite leh school kalpuite nawrluihnate hmachhawn thei dinhmuna din chu engtin nge i ngaih? Chutiang thilthleng theite’n lungkhamna min neihtîr thei chu hriatthiamawm tak a ni.

² Mite chuan tihduhdahna chu thil lâwmawm angin an thlîr lo tlângpui a. Mahse, Pathian Thu chuan lâwmna anga thlîr tûrin min hrilh a ni. Entîr nân, zirtîr Jakoba chuan fiahnate kan tawh hunah a lutuka lungkham aiin lâwmna anga thlîr zâwk tûrin min fuih a. (Jak. 1:2, 12) Isua pawhin tihduhdah kan nih hunah lâwm tûrin min hrilh a ni. (Matthaia 5:11 chhiar rawh.) A nih leh, engtin nge fiahnate hmachhawn chung pawha lâwmna kan neih reng theih? Kristian hmasate hnêna Jakoba lehkhathawna thu ṭhenkhat ngaihtuahna aṭangin thil tam tak kan zir thei a ni. Tûnah, chûng Kristiante hmachhawn harsatnate chu i lo ngaihtuah hmasa ang u.

3. Jakoba chu Isua zirtîr a nih hnu lawkah, eng thil nge thleng?

³ Isua unaupa Jakoba chu zirtîr a nih hnu lawkah, Jerusalema Kristiante chuan dodâlna an hmachhawn a. (Tirh. 1:14; 5:17, 18) Zirtîr Stephana tihhlum a nih khân, Kristian tam tak chuan Jerusalem khua an chhuahsan a, “Judai leh Samari ram  khaw tinah an darh ta vek a,” Kupra leh Antiokei khuate thlengin an kal a ni. (Tirh. 7: 58–8:1; 11:19) Chûng zirtîrte chuan harsatna tam tak an hmachhawn ngei ang tih kan mitthla thei. Chuti chung pawhin, an kalna apianga ṭhahnemngai taka chanchin ṭha an hrilh avângin, Rom Lalram pum puiah kohhrante an din a. (1 Pet. 1:1) Mahse, harsatna khirh zâwkte pawh an la hmachhawn dâwn a ni.

4. Kristian hmasate hmachhawn ngai fiahna dangte chu eng nge ni?

⁴ Kristian hmasate chuan fiahna chi hrang hrang an tâwk a. Entîr nân, C.E. 50 vêl khân, Rom Ram Awptu Klaudia chuan Juda zawng zawgte chu Rom chhuahsan tûrin thu a pe a. Chuvângin, Juda Kristiante chu an in leh lote chhuahsan a, hmun danga awm tûra tihluih an ni. (Tirh. 18:1-3) C.E. 61 vêlah, tirhkoh Paula chuan a Kristian unaute’n sawichhiatna te, tân ina khung te, leh rawkte an tawh thu a ziak a. (Heb. 10:32-34) Mi dangte ang bawkin, Kristiante chuan retheihna leh natnate chu chhel taka an tawrh a ngai bawk a ni.—Rom 15:26; Phil. 2:25-27.

5. Eng zawhnate nge kan sawiho vang?

⁵ C.E. 62 hmaa Jakoba’n a lehkhathawn a ziah lai chuan a unaute hmachhawn fiahnate chu a hre chiang hle a. Jehova’n ani chu chûng Kristiante’n fiahnate an hmachhawn chung pawha lâwmna nei reng tûra ṭanpuitu fuihna ṭha takte ziak tûrin thlarauvin a thâwk khum a ni. Jakoba lehkhathawn chu ennawnin hêng zawhnate hi chhân i lo tum ang u: Jakoba sawi lâwmna chu eng nge ni? Kristiante neih lâwmna chu engin nge la bo thei? Engtin nge finna te, rinna te, leh huaisennate chuan fiahnate tâwk chung pawha lâwmna nei reng tûra min ṭanpui theih? tihte hi.

6. Luka 6:22, 23-a sawi angin, engvângin nge Kristiante chuan fiahnate tâwk chung pawha lâwmna an neih reng theih?

⁶ Mite chu hrisêlna ṭha tak te, sum leh pai tam tak te, leh chhûngkuaa inlaichhînna ṭhate an neih chauhvin lâwmna nei thei tûrah an inngai a. Mahse, Jakoba sawi lâwmna chu Pathian thlarau rah pêng zînga mi a ni a, dinhmun a zira neih lâwmna a ni lo. (Gal. 5:22) Kristiante chuan Pathian Jehova an tilâwm tih leh Isua entawn tûr siam an zui tih an hriat avângin lâwmna, a nih loh leh hlimna nasa tak an nei a. (Luka 6:22, 23 chhiar rawh; Kol. 1:10, 11) Khâwnvâr chu a alh reng theih nâna dârthlalanga vênhim a nih angin, chutiang hlimna chu Kristiante thinlungah a awm reng a ni. Kan dam loh hunah leh sum leh pai kan tlâkchham hunah pawh, hlimna kan hloh chuang lo. Mite’n min sawichhiat hunah leh chhûngte leh mi dangte dodâlna kan tawh hunah pawh hlimna kan nei reng a. Kan hlimna lâk bo an tum apiangin a zual zâwk mah a ni. Kan rinna avânga kan tawh fiahnate chuan Krista zirtîr dik tak kan nihzia a nemnghet a. (Mt. 10:22; 24:9; Joh. 15:20) Chhan ṭha tak avângin Jakoba chuan: “Fiahna tinrêng in tawh hunin lâwmna hlîrah ngai rawh u,” tiin a ziak a ni.—Jak. 1:2, 3, Baptist Mid-Missions’ Translation.

7-8. Engtin nge kan rinna fiahna chu kan hlâwkpui theih?

⁷ Jakoba chuan Kristiante’n fiahna khirh tak hmachhawn an inhuam chhan dang pawh a sawi a. Ani chuan: “In rinna fiahna chuan chhelna a siam,” tiin a sawi. (Jak. 1:2, 3) Fiahnate chu chem chher nâna hman mei nêna khaikhin theih a ni a. Thîr chu meia an rawh ling hnua tuia an han chiah daih leh chuan a chang lehzual sawt ṭhîn. Chutiang bawkin, fiahnate kan tawrh chhuah hnu chuan kan rinna chu a nghet lehzual a ni. Chuvângin, Jakoba chuan: “In famkim a, in puma in him theih nân chhelna chuan thawk famkim rawh se,” tiin a ziak a. (Jak. 1:4) Fiahnate chuan kan rinna a tichak lehzual tih kan hriat hian chûngte chu lâwm takin kan tuar chhuak thei a ni.

⁸ Jakoba chuan a lehkhathawnah kan hlimna la bo theitu thil ṭhenkhat pawh a târ lang a. Chûngte chu eng nge ni a, engtin nge kan hneh theih?

9. Engvângin nge finna kan mamawh?

⁹Harsatna: Tih tûr ber hriat lohna. Fiahna kan tawh hian, Jehova tilâwm a, kan unaute hlâwkpui tûr leh kan rinawmna vawng reng tûra min ṭanpuitu duhthlannate siam tûrin Amah chu rinchhan kan duh a. (Jer. 10:23) Kan tih tûr leh min dodâltute chhân lêt dân tûr hriat nân finna kan mamawh bawk. Tih tûr ber kan hriat loh chuan kan dinhmunte avângin  kan lunghnual thei a, kan hlimna pawh kan hloh nghâl thei a ni.

10. Jakoba 1:5-na chuan finna nei tûra kan tih ngai engte nge min hrilh?

¹⁰Chinfel dân: Jehova hnênah finna dîl rawh. Fiahnate lâwm taka hmachhawn thei tûr chuan thu tlûkna ṭha siam tûra kan mamawh finna min pe tûrin Jehova hnênah ṭawngṭaiin kan dîl hmasa tûr a ni a. (Jakoba 1:5 chhiar rawh.) Jehova’n kan ṭawngṭainate a chhâng nghâl lo nia kan hriat chuan engtin nge ni ang? Jakoba chuan Pathian hnêna ‘dîl zawm zêl’ tûrin min fuih a. Pathianin a hnêna finna kan dîl zawm zêlna chu thil ninawmah a ngai lo va, thinrim nân a hmang hek lo. Kan Pa vâna mi chuan fiahnate chhel taka tuar chhuak thei tûra finna kan dîl chuan ‘ui lo vin’ min pe ang. (Sâm 25:12, 13) Fiahna kan tawhte chu a hmu a, min khawngaih tak zet avângin min ṭanpui a duh hle a ni. Chu tak chu a ni, kan hlimna chhan tûr chu! A nih chuan, engtin nge Jehova’n finna min pêk?

11. Finna nei tûrin eng dang nge kan tih ang?

¹¹ Jehova chuan a Thu, Bible hmangin finna min pe a. (Thuf. 2:6) Chu finna hmu tûr chuan, Pathian Thu leh Bible ṭanchhan thu leh hla chhuahte chu kan zir tûr a ni. Mahse, hriatna neih mai aia tam kan tih a ngai a. Pathian fuihnate chu zâwmin, A finnate chu kan nunah kan lan chhuahtîr tûr a ni. Jakoba chuan: “Thu ngaithlatute mai ni lovin zâwmtute lo ni zâwk rawh u,” tiin a ziak a. (Jak. 1:22) Pathian fuihnate kan nunpui chuan remna te, hriatthiamna te, leh khawngaihnate kan nei lehzual ang a. (Jak. 3:17) Chûng miziate chuan hlimna hloh lova fiahnate tuar chhuak thei tûrin min ṭanpui ang.

12. Engvângin nge Bible kan hriat chian chu a pawimawh?

¹² Pathian Thu, Bible chu dârthlalang ang a ni a, hmasâwn kan ngaihna laite hre tûr leh hma sâwn thei tûrin min ṭanpui a. (Jak. 1:23-25) Entîr nân, Bible kan zir hnu hian kan rilru  chu thunun a ngai tih kan hre mai thei a. Jehova ṭanpuinain, min tilungni lotu tuemaw kan dâwr hunah leh buainate kan hmachhawn hunah thuhnuairawlh taka chhân lêt dân kan zir a ni. Mi thuhnuairawlh tak kan nih avângin nêksâwrnate chu ṭha takin kan chingfel thei a. Rilru fîm tak kan neiin, thu tlûkna ṭha lehzual kan siam thei a ni. (Jak. 3:13) Bible ṭha taka hriat chian chu a va pawimawh tak êm!

13. Engvângin nge Bible-a târ lan mite entawn tûr siam chu kan zir ang?

¹³ A châng chuan kan pumpelh tûr thilte chu thil kan tihsual hnuah chauh kan hre ṭhîn. Mahse, chu chu a harsa zâwnga inzirna a ni. Finna neih theih dân kawng ṭha zâwk chu mi dangte hlawhtlinna leh thil tihsualte aṭanga inzir hi a ni a. Chuvângin, Jakoba chuan Bible-a târ lan Abrahama te, Rahabi te, Joba te, leh Elija te entawn tûr siam chu zui tûrin min fuih a ni. (Jak. 2:21-26; 5:10, 11, 17, 18) Chûng Pathian chhiahhlawh rinawm takte chuan an hlimna la bo theitu fiahnate chu chhel takin an tuar chhuak thei a. Chhelna kawnga an entawn tûr siam chuan Jehova ṭanpuinain kan chhel ve thei tih a târ lang a ni.

14-15. Engvângin nge rinhlelhna kan neih chu kan ngaihthah loh vang?

¹⁴Harsatna: Rinhlelhna neih reng. A châng chuan, Bible-a thu ṭhenkhat chu hriatthiam harsa kan ti thei a. A nih loh leh, Jehova chuan kan ṭawngṭainate chu kan beisei angin a chhâng lo pawh a ni thei bawk. Chu chuan rinhlelhna min neihtîr thei a ni. Chutiang rinhlehna chu kan ngaihthah a nih chuan chu chuan kan rinna a tichak lo theiin, Jehova nêna kan inlaichînna a tichhe thei a. (Jak. 1:7, 8) Nakin hun kan beiseina pawh min hlohtîr hial thei a ni.

¹⁵ Tirhkoh Paula chuan nakin hun kan beiseina chu thîrchakai nên a khaikhin a. (Heb. 6:19) Thîrchakai chuan lawng chu thlipui kâra nghet taka a chelh din theih bâkah, lung lian takte su lo tûrin a chelh ding thei bawk a ni. Mahse, thîrchakai chu lawng nêna a inthlun zawmna thîr khaidiat a chah loh chauhvin a ṭangkai a. Tui êkin thîrchakai khaidiat a ei chhe thei angin, rinhlelhna neih rengna chuan kan rinna a tichhe thei a ni. Rinhlelhna neitu chuan dodâlna a hmachhawn hunah Jehova’n a thutiamte a hlen ang tih a rinna chu a hloh thei a ni. Kan rinna kan hloh chuan, kan beiseina kan hloh ang. Jakoba sawi angin, ringhleltu chu “tuifinriat fâwn, thli chhêm len leh vawrh ang a ni si a.” (Jak. 1:6) Chutiang mi chuan hlimna rêng a neih a rinawm lo!

16. Rinhlelhna kan nei a nih chuan eng nge kan tih ang?

¹⁶Chinfel dân: I rinhlelhna chu paih bo la; i rinna chu tichak rawh. Hma la nghâl vat ang che. Zâwlnei Elija hun laiin, Jehova mite chu rilru bulbâl nei lovin an awm a. Elija chuan an hnênah: “Tuilairapin eng chen nge in awm dâwn? LALPA chu Pathian a nih chuan, amah chu zui ula; tin, Baala a nih leh, amah chu zui rawh u,” tiin a hrilh a. (1 Lal. 18:21) Tûn laiah pawh chutiang bawk chu a ni. Jehova chu Pathian a ni a, Bible chu a Thu niin, Jehova Thuhretute chu a mite an ni tih mahni ngeia hre chiang tûrin zir bingna ṭhenkhat kan neih a ngai a. (1 Thes. 5:21) Chutianga tihna chuan kan rinhlelhnate a paih bo theih bâkah, kan rinna pawh a tichak thei a ni. Kan rinhlelhnate paih bo tûra ṭanpuina kan mamawh a nih chuan, kohhran upate kan pan thei a. Hlim taka Jehova rawngbâwl zawm zêl kan duh chuan hma kan la nghâl vat tûr a ni.

17. Huaisenna kan hloh chuan eng nge thleng ang?

¹⁷Harsatna: Lunghnualna neih. Bible chuan: “Mangan nîa i chauh mai chuan i chakna a bei tham a ni,” tiin a sawi a. (Thuf. 24:10) ‘Chau’ tia lehlin Hebrai thu mal hian “huaisenna  hloh” tih a kâwk thei a. Huaisenna i hloh chuan i hlimna pawh i hloh thuai ang.

18. Chhel tih awmzia chu eng nge ni?

¹⁸Chinfel dân: Chhel taka tuar chhuak thei tûra huaisenna pe tûr chein Jehova rinchhan rawh. Fiahnate chhel taka tuar chhuak thei tûr chuan huaisenna kan neih a ngai a. (Jak. 5:11) ‘Chhel’ tia lehlin Jakoba thu mal hman chuan mahni dinhmuna nghet taka ding tlattu chu min ngaihtuahtîr a. Nasa taka hmêlmate beihna a tâwk chung pawha chhe tê pawha hnung tawlh duh lo sipai huaisen tak chu kan hre chhuak mai thei a ni.

19. Tirhkoh Paula entawn tûr siam aṭangin eng nge kan zir theih?

¹⁹ Tirhkoh Paula chuan huaisenna leh chhelna kawngah entawn tûr ṭha tak a siam a. Chak loh chângte chu a nei ngei mai. Mahse, a mamawh chakna pe tûra Jehova a rinchhan tlat avângin a tuar chhuak thei a ni. (2 Kor. 12:8-10; Phil. 4:13) Jehova ṭanpuina kan mamawh tih inngaitlâwm taka kan pawm chuan, chutiang chakna leh huaisenna chu kan nei ve thei ang.—Jak. 4:10.

20-21. Eng nge kan rin tlat theih?

²⁰ Fiahna kan tawhte hi Jehova hremna a ni lo tih kan chiang a. Jakoba chuan: “Tu man thlêmna an tawh laiin, ‘Pathian thlêm ka ni,’ ti suh se; Pathian chu sual thlêm rual a ni lo, amah pawhin tu mah a thlêm ngai lo,” tih min hrilh a ni. (Jak. 1:13) Chu thu dik kan rin ngheh tlatna chuan hmangaihna nei tak kan Pa vâna mi chu min hnaihtîr lehzual a ni.—Jak. 4:8.

²¹ Jehova chuan “danglamna leh herna hlim rêng rêng” a nei lo. (Jak. 1:17) Ani chuan kum zabi khatnaa Kristiante chu fiahna tuar chhuak thei tûra a ṭanpui ang bawkin, tûn laiah pawh min ṭanpui ngei ang. Finna te, rinna te, leh huaisennate nei tûrin Jehova hnênah tih tak zetin dîl ang che. I ṭawngṭainate chu a chhâng ngei ang. Tichuan, fiahnate tawk chung pawha hlimna nei reng thei tûrin a ṭanpui ang che tih i ring tlat thei a ni.