1. Pasal neih tum unaunu chuan eng zawhnate nge a inzawh ang?

KRISTIAN zawng zawngte chu ṭha famkim Isua Krista lû nihna hnuaiah an awm a. Mahse, Kristian hmeichhiain pasal a neih chuan ṭha famkim lo a pasal lû nihna hnuaiah a awm a ni. Chu chuan harsatna a thlen thei a. Chuvângin, pasal neih tum unaunu chu heti hian a inzâwt tûr a ni: ‘He unaupa hi chhûngkaw lû ṭha tak a ni ang tih engtin nge ka hriat theih? Thlarau lam thiltihte chu a nunah a dah pawimawh em? A dah pawimawh lo a nih chuan kan inneih hnuah thlarau lamah ṭha takin hma a hruai ang tih engtin nge ka hriat theih ang?’ tiin. Chu bâkah, hêng zawhnate hi a inzâwt bawk tûr a ni: ‘Kan inneihnaa ṭangkai tûr eng miziate nge tûnah ka neih? Mi dawhthei tak leh thilphal tak ka ni em? Jehova nêna inlaichînna ṭha tak ka nei em?’ tihte hi. (Thur. 4:9, 12) Pasal a neih huna unaunu hlimna chu an inneih hmaa a thu tlûkna siamah engemaw chen a innghat ang.

2. He thuziakah hian eng nge kan sawiho vang?

² Kristian unaunu tam tak chuan an pasalte laka intukluhna kawngah entawn tûr ṭha tak an siam a, an fakawm hle! Chûng hmeichhe rinawmte nêna rawng kan bâwlho theih avângin kan lâwm hle bawk! He thuziakah hian zawhna pathum chhânna kan sawiho vang: (1) Nupuite hmachhawn tûr harsatna ṭhenkhat chu eng nge ni? (2) Engvângin nge nupuiin a pasal laka intukluh chu a duh ang? (3) Kristian pasalte leh nupuite chuan Isua te, Abigaili te, leh Josefa nupui, Isua nu Mari te entawn tûr siam aṭangin intukluhna chungchângah eng nge an zir theih?

3. Engvângin nge inneihna ṭha famkim a awm theih loh?

³ Inneihna hi Pathian hnên aṭanga kan dawn thilpêk ṭha famkim a ni a; mahse, mihringte erawh kan ṭha famkim lo. (1 Joh. 1:8) Chuvângin, Pathian Thuin, “Tisaah chuan hrehawm an tuar ang,” tia a sawi harsatna chu an hmachhawn dâwn a ni. (1 Kor. 7:28) Nupuiin a hmachhawn mai theih harsatna ṭhenkhat hi lo chhinchhiah ang che.

4. Engvângin nge nupui chuan a pasal laka intukluh chu hnuaichhiahna anga a ngaih mai theih?

⁴ Nupui chuan a ṭobul avângin a pasal laka intukluh chu amah hnuaichhiahna angin a ngai mai thei a. United States rama awm unaunu Marisol-i chuan, “Ka seilenna hmunah chuan hmeichhiate chu kawng engkimah mipate nên an intluktlâng tûr a ni tia sawi a ni ṭhîn a. Jehova’n lû nihna a din a, hmeichhiate chu chanvo tlâwm zâwk leh zahawm tak a pe tih ka hria. Mahse, lû nihna chungchânga thlîr dân inbûk tâwk tak neih erawh thil harsa tak a ni,” tiin a sawi.

5. Hmeichhiate mawhphurhna chungchângah mi ṭhenkhatin Bible nêna inmil lo eng rilru put hmang nge an neih?

⁵ Kawng leh lamah chuan, tuemawin hmeichhiate chu dinhmun hnuaihnung zâwka awm anga ngaitu pasalah a nei mai thei a. South America rama awm unaunu Ivon-i chuan: “Kan awmna hmunah chuan mipate’n chaw an ei hnuah chauh hmeichhiate’n an ei ṭhîn a. Hmeichhe naupangte chu ei rawngbâwl tûr leh in chhûng tifai tûra beisei an ni a, mipa naupangte chu an nute leh an unaunute rawngbâwlsaka awmin, anni chu ‘chhûngkuaa lal ber’ anga hrilh an ni ṭhîn,” tiin a sawi. Asia khawmuala awm unaunu Yingling-i chuan: “Kan ṭawngah chuan meichhiate tân lehkha zir leh thiamna neih a ngai lo. An tih tûr chu in chhûng hna zawng zawng thawh a ni mai a, an ngaih dânte pawh an pasalte hnêna sawi phal a ni lo, tih lam hawi thufing kan nei a,” tiin a sawi. Bible nêna inmil lo chûng rilru put hmang thununa awm pasal chuan a nupui nun chu a tihrehawmin, Isua a entawn lo va, Pathian Jehova pawh a tilâwm hek lo.—Eph. 5:28, 29; 1 Pet. 3:7.

6. Nupuite chuan Jehova nêna an mi mal inlaichînna tinghet tûrin eng nge an tih ngai?

⁶ Thuziak hmasaa târ lan angin, Jehova chuan Kristian pasalte chu an chhûngkaw thlarau lam, rilru lam, leh tisa lam mamawhte phuhru tûrin a beisei a. (1 Tim. 5:8) Amaherawhchu, pasal nei unaunute pawhin Bible chhiara chhût ngun nân leh Jehova hnêna tih tak zeta ṭawngṭai nân nî tin hun an insiam tûr a ni. Chu chu thil harsa tak a ni thei a. Nupuite chu an buai ṭhin êm avângin chutiang tih nân hun leh tha nei lo niin an inngai mai thei; mahse, chutiang tih nâna hun pêk chu thil pawimawh tak a ni. Engvângin nge? Jehova’n amah nêna mi mal inlaichînna ṭha nei ṭheuh tûr leh chhawm nung zêl tûra min duh vâng a ni.—Tirh. 17:27.

7. Engin nge nupui tân a mawhphurhna hlen tiawlsam lehzual ang?

⁷ Nupui tân a pasal ṭha famkim lo laka intulût tûra theih tâwp chhuah a ngai chu hriatthiamawm tak a ni. Mahse, chutianga intulût tûra Bible-in a phût chhan a hriatthiam chuan Jehova pêk a mawhphurhna hlen chu a awlsam lehzual ang.

8. Ephesi 5:22-24-a târ lan angin, engvângin nge Kristian nupui chuan a pasal laka intukluh chu a duh ang?

⁸ Kristian nupui chuan Jehova thil phût a nih avângin a pasal laka intukluh chu a duh ngei ang. (Ephesi 5:22-24 chhiar rawh.) Ani  chuan Jehova chu hmangaihnaa chêttîrin a awm reng ṭhîn tih leh a tâna ṭha ber tûr chauh a phût ṭhîn tih hriain, a Pa vâna mi chu a rinchhan tlat a ni.—Deut. 6:24; 1 Joh. 5:3.

9. Kristian unaunuin a pasal thuneihna a zah hian eng thil nge thleng ṭhîn?

⁹ Khawvêl mite chuan hmeichhiate chu Jehova tehnate ngaihthah tûr leh intukluhna chu hnehchhiahna anga thlîr tûrin an fuih a. Chutiang ngaih dân theh lârtu chuan hmangaihna nei tak Pathian chu a hre lo. Pathian Jehova chuan a fanu duh takte chu anmahni hnehchhiahna thlentu tûr thupêk a pe ngai lo vang. Jehova chanvo pêk theih tâwp chhuaha hlen tumtu unaunu chuan chhûngkuaah remna a awmtîr a. (Sâm 119:165) Chu chu a pasalin a hlâwkpui bâkah, amah leh a fate pawhin an hlâwkpui bawk.

10. Unaunu Carol-i thusawi aṭangin eng nge kan zir theih?

¹⁰ Ṭha famkim lo a pasal laka intulûttu nupui chuan lû nihna dintu Pathian Jehova chu a hmangaihin, a zah tih a târ lang a. South America-a awm unaunu Carol-i chuan: “Ka pasalin thil a tisual thei tih ka hria. Chûng a thil tihsualte ka chhân lêt dân chuan Jehova nêna kan inlaichînna ka ngaihlutzia a târ lang tih ka hre bawk. Chuvângin, ka Pa vâna mi tihlâwm nân ka pasal laka intukluh ka tum tlat a ni,” tiin a sawi.

11. Unaunu Aneese-i chu ngaihdamna lantîr tûrin engin nge ṭanpui?

¹¹ A pasalin a rilru hahnate ngaihsak lo nia inhretu nupui tân chuan a pasal zah leh a laka intukluh chu a harsa thei a. Mahse, unaunu Aneese-i’n chutiang dinhmun a chhân lêt dân chu lo chhinchhiah ang che. Ani chuan: “Thinrim loh ka tum tlat a. Kan za hian thil kan tisual fo ṭhîn tih ka hria. Ka thiltum chu Pathian Jehova anga ngaihdam hi a ni. Ngaihdamna ka lantîr hian rilrua thlamuanna ka nei bawk,” tiin a sawi. (Sâm 86:5) Ngaihdam peih tak nupui tân chuan intukluh pawh a awlsam lehzual ngei ang.

12. Bible-ah hian tute entîrnate nge chuang?

¹² Ṭhenkhat chuan mi intulûtte chu chak lo angin an ngai mai thei. Mahse, chu ngaih dân chu a dik lo rêng rêng. Bible-ah hian mi dang laka intulût mi huaisen takte entawn tûr siam  engemaw zât a chuang a. Tûnah chuan, Isua te, Abigaili te, leh Mari te hnên aṭanga kan zir theihte chu i lo sawiho vang u.

13. Engvângin nge Isua chu Jehova laka a intukluh? Hrilhfiah rawh.

¹³Isua chu Pathian Jehova lakah a intulût a; mahse, finna leh thiamna a neih loh vânga intulût a ni lo. Mi fingte chauhvin Isua angin mâwlmang tak leh hriatthiam awlsam takin mite an zirtîr thei a. (Joh. 7:45, 46) Pathian Jehova’n Isua chu mi themthiam tak a ni tih a hriat avângin lei leh vân a siamnaah A bulah a thawhtîr a ni. (Thuf. 8:30; Heb. 1:2-4) Chu bâkah, a thawhleh hnuah “lei leh vâna thuneihna zawng zawng” a pe bawk. (Mt. 28:18) Isua chu fing hle mah se, amah kaihhruaitu atân Pathian Jehova a rinchhan tlat a ni. Engvângin nge? A Pa Jehova a hmangaih avângin.—Joh. 14:31.

14. (a) Pasalte chuan Jehova’n hmeichhiate a thlîr dân aṭangin eng nge an zir theih? (b) Pasalte chuan Thufingte 31-a chhinchhiah thute aṭangin eng nge an zir theih?

¹⁴Pasalte zir theih chu. Pathian Jehova chuan hmeichhiate chu mipate aia hnuaihnung zâwka a thlîr avânga an pasalte laka intulût tûra beisei a ni lo. Ani chuan Isua rorêlpuitu atân mipate chauh ni lovin, hmeichhiate pawh a thlang a ni. (Gal. 3:26-29) Jehova chuan a Fapa hnênah thuneihna hlânin, a rinzia a lantîr a. Chutiang bawkin, pasal fing chuan a nupui hnênah thuneihna engemaw chen a pe ang. Nupui fel mawhphurhna chungchângah, Bible chuan in chhûng khawsak a huaihawt thei a, chhûngkaw tâna thil mamawhte a lei theiin, sumte a enkawl thei tih a târ lang a. (Thufingte 31:15, 16, 18 chhiar rawh.) Ani chu mahni ngaih dân sawi tûra dikna pawh nei lo chhiahhlawh ang a ni lo. Chu aiin, a pasal chuan a ringin, a ngaih dân sawite chu a ngaihthlâksak zâwk a ni. (Thufingte 31:11, 26, 27 chhiar rawh.) Mipain a nupui chu chutiang zahna nêna a cheibâwl chuan, nupui chuan a laka intukluh chu nuam a ti ngei ang.

15. Nupuite’n Isua entawn tûr siam aṭangin eng nge an zir theih?

¹⁵Nupuite zir theih chu. Isua chuan thil ropui takte a ti a; mahse, Jehova thuneihna hnuaia intukluh chu tlâwmthlâk angin a ngai lo. (1 Kor. 15:28; Phil. 2:5, 6) Chutiang bawkin, Isua entawn tûr siam zuitu nupui fel chuan a pasal laka intukluh chu tlâwmthlâk angin a ngai lo vang. A pasal a hmangaih vâng chauh ni lovin, a bul berah Pathian Jehova a hmangaih vâng leh a zah avângin a pasal chu a thlâwp ang.

16. Samuela pakhatna 25:3, 23-28-a sawi angin, Abigaili’n eng harsatnate nge a hmachhawn? (A kâwma milem en rawh.)

¹⁶Abigaili pasal hming chu Nabala a ni a. Ani chu mahni hmasial tak, chapo tak, leh lâwm nachâng hre lo tak a ni. Chutiang chu ni mah se, Abigaili chuan a pasal chu ṭhen mai a tum lo. Ngawi renga awmin, Davida leh a mite’n a pasal an thah chu a remti thei a ni. Mahse, chu aiin, a pasal Nabala leh an chhûngkaw hung tak humhim tûrin hma a la vat zâwk a. Abigaili tân sipai 400-te va pan a, ṭha taka Davida chhûtpui tûra huaisenna neih a ngaih dân tûr chu han ngaihtuah teh. Ani chuan a pasal thiltihte chungah mawhphurhna a la ngam hial a. (1 Samuela 25:3, 23-28 chhiar rawh.) Davida chuan sual lian tak ti lo tûra a mamawh thurâwn pe tûrin Jehova’n he hmeichhe huaisen tak hi a hmang tih a hre nghâl a ni.

17. Pasalte chuan Davida leh Abigaili chanchin aṭangin eng nge an zir theih?

¹⁷Pasalte zir theih chu. Abigaili chu hmeichhe fing tak a ni a. Davida chuan a thurâwn pêkte chu ṭha takin a ngaihthlâksak a.  Chuvângin, pawisawi lote thisen chhuahna sual chu a pumpelh theih phah a ni. Chutiang bawkin, pasal fing chuan thu tlûkna pawimawh siam a ngaih hunah a nupui ngaih dân chu ngun takin a ngaihthlâksak ang. A nupui thurâwn pêk chuan thu tlûkna ṭha siam tûrin a ṭanpui thei si a.

18. Nupuite’n Abigaili entawn tûr siam aṭangin eng nge an zir theih?

¹⁸Nupuite zir theih chu. Pathian Jehova hmangaihtu leh zahtu nupui chuan a pasal chu Jehova rawng a bâwl lo emaw, A tehnate milin a nung lo emaw pawh ni se, an chhûngkaw chungah nghawng ṭha tak a nei thei a. Ani chuan an inneihna chu Bible ṭanchhan awm lova tihtâwp a tum lo vang. Chu aiin, zahna leh intukluhna lantîrin, a pasal chu Jehova chanchin zir tûrin chêttîr a tum zâwk ang. (1 Pet. 3:1, 2) A entawn tûr siam chu a pasalin a zui lo a nih pawhin, Pathian Jehova chuan nupui intulût takte rinawmna chu a ngaihlu a ni.

19. Eng dinhmunahte nge nupui chuan a pasal thu a zawm lo vang?

¹⁹ Kristian nupui intulût tak chuan a pasalin Bible dânte leh thu bulte bawhchhe tûra a tih chuan a thlâwp lo vang. Entîr nân, ring lotu pasal chuan a nupui chu dâwt sawi tûr te, rûk ru tûr te, leh Bible nêna inmil lo nungchang lama inhnamhnawih tûrtein a fuih angah han mitthla teh. Pasal nei tawh unaunute pawh tiamin, Kristian zawng zawngte chuan Pathian Jehova thuâwih chu an dah pawimawh ber tûr a ni. Unaunu chuan Bible thu bulte bawhchhe tûra tihluih a nih chuan chutianga a tih theih loh chhan chu zah thiam tak leh khauh takin a hrilhfiah tûr a ni.—Tirh. 5:29.

20. Mari chuan Pathian Jehova nêna inlaichînna ṭha tak a nei tih engtin nge kan hriat theih?

²⁰Mari chuan Pathian Jehova nêna inlaichînna ṭha tak a nei a. Bible pawh a hre bel hle. Baptistu Johana nu Elizabeti nêna an inbiaknaah Mari chuan Hebrai Pathian Lehkha Thute chu vawi 20 chuang a sawi chhâwng a ni. (Lk. 1:46-55) Hei hi han ngaihtuah teh: Mari chu Josefa nên inhual tawh mah se, Pathian Jehova vântirhkoh chu Josefa hnênah a inlâr hmasa lo va. Mari hnênah inlâr hmasain,  Pathian Fapa a hrin tûr thu a hrilh a ni. (Lk. 1:26-33) Pathian Jehova chuan Mari chu a hriat chian êm avângin, a Fapa chu a hmangaihin a ngaihsak ang tih a ring tlat a. Mari chuan Isua a thih a, a thawhleh hnuah pawh Pathian Jehova nêna inlaichînna ṭha tak a nei zawm zêl a ni.—Tirh. 1:14.

21. Pasalte chuan Bible-a chhinchhiah Mari chungchâng aṭangin eng nge an zir theih?

²¹Pasalte zir theih chu. Pasal fing chuan a nupuiin Bible thute a hriat chian hian a hlim hle a. A nupui chu chhûngkaw lû nih tum anga ngaiin, a chungah lungnih loh nân a hmang lo. A nupuiin Bible leh Bible thu bulte a hre chiang a nih chuan, chu chu chhûngkuain a hlâwkpui ang tih a hria a ni. Ni e, nupui chu a pasal aia hriatna nei zâwk a nih pawhin chhûngkuaa Pathian biakna leh rawngbâwlna pêng hrang hranga hma hruaitu tûr chu a pasal a ni.—Eph. 6:4.

22. Nupuite’n Mari hnên aṭangin eng nge an zir theih?

²²Nupuite zir theih chu. Hmeichhia chu a pasal laka intulût tûr ni mah se, a thlarau lam hrisêlna chu ama mawhphurhna a la ni reng a. (Gal. 6:5) Chutiang ni thei tûr chuan, mi mala inzir nân leh chhût ngun nân hun a insiam a ngai a ni. Chutianga a tihna chuan Pathian Jehova hmangaih a, zah reng tûr leh a pasal laka inhuam taka intulût tûrin a ṭanpui ang.

23. Nupuite chuan an intukluhna chu engtin nge an hlâwkpui a, an chhûngkua leh kohhranin engtin nge an hlâwkpui?

²³ Pathian Jehova an hmangaih avânga an pasalte laka intulûttu nupuite chuan lû nihna chungchânga Jehova ruahmanna hnâwltute aiin lâwmna leh lungâwina an nei lehzual ang. Anni chuan nula tlangvâlte tân entawn tûr ṭha an siam a. Chu bâkah, chhûngkuaah chauh ni lovin, kohhranah pawh boruak muanawm tak an siam a ni. (Tit. 2:3-5) Tûn laiah pawh, rinawm taka Jehova rawngbâwltute zîngah hmeichhia tam tak an tel a. (Sâm 68:11) Mipa kan ni emaw, hmeichhia kan ni emaw kan za hian kohhranah chanvo pawimawh tak kan nei ṭheuh a ni. A dawta thuziakah chuan chûng kan chanvote kan hlen theih dân chu sawiho a ni ang.