Ka nu leh pate chuan an inneih hma kum 1920 chho bâwr vêlah thutak an hmu a. Kei chu kum 1939 tîr lamah ka piang a. Ṭhalai ka nih angin, ka nu leh pate rualin Kristian inkâwmahte leh Theocratic Ministry School-ahte ka tel ṭhîn a ni. Ka thusawi hmasak ber ṭuma speaker stand chung aṭanga mipui ka hmuh theih nâna bâwm chunga ka din lai kha tûn thlengin ka la hre reng. Kum ruk chauh ka ni a, unau puitling tak takte’n min thlîr ṭhup tih ka hriat avângin ka zâm hle a ni.

Ka pain rawngbâwl huna ka thu sawi dân tûrte chu lehkha phêkah min ziahsak a. Keimah chauhva in tin ka kal hmasak ber ṭum chuan kum riat mi chauh ka ni a. In neituin ka thusawina lehkha phêk a chhiar hnua “Let God Be True,” tih lehkha bu a dawn lai chuan ka phûr hle! Ka thiltawn chu ka pa hrilh tûrin kawngah ka tlân thla a. Rawngbâwlna leh inkhâwmte chuan min tihlimin, hunbi kima Jehova rawngbâwl duhna nei tûrin min ṭanpui a ni.

Ka pain Vênnainsâng kum khat tâna min lâksak aṭangin Bible thutak chuan ka chungah nghawng a nei lehzual a. Dâk in aṭanga copy khat ka dawn apiangin phûr takin ka chhiar ṭhîn. Jehova ka rinna chu a nghet lehzual a, chu chuan a hnêna inpumpêk tûrin min chêttîr a ni.

Kum 1950-a New York Khawpui-a neih Theocracy’s Increase Inkhâwmpui-ah kan chhûngkuain kan tel a. August 3, Nilaithawhṭanni atâna thupui chu “Missionary Day,” tih a ni. Chumi nî chuan, a hnua Governing Body nia rawngbâwl Unau Carey Barber-a chuan baptisma channa thusawi a nei a. A thusawi zawha baptisma chang tûrte tâna zawhna pahnih a zawh chuan, ding chungin, “Aw!” ka ti a. Kum 11 mi chauh ni mah ila, rahbi pawimawh tak ka rap tih ka inhria a ni. Mahse, tui hleuh ka la thiam loh avângin tuia  chhuk chu ka hlau va. Ka puin min hruai a, engmah hlau lo tûrin min hrilh a. Unaute chuan an kutin min chelh reng a; pakhatin min hnim pil a, pakhatin tui aṭangin min chawi chhuak a. Ka kein a chhuat pawh dek lovin kan zo ta der mai a. Chu ni pawimawh tak aṭang chuan Jehova’n ka kawngte chu min kawhhmuh zawm zêl a ni.

School ka zawh chuan pioneer thawh ka duh hle a; mahse, min zirtîrtute chuan zirna sâng ûm tûrin min fuih a. Min nawrluihna ka do zawh tâk loh avângin university ka kal a; mahse, zirnaa rilru zawng zawng pe chungin thutakah nghet takin kan ding thei lo tih ka hre ta thuai a; chuvângin, university chu bânsan tûrin thu tlûkna ka siam ta a ni. Chumi chungchâng chu Jehova hnênah ṭawngṭaiin ka thlen a; tichuan, a kum khatna tâwpa chhuahna lehkha ka theh lût a. Tichuan, Jehova rinchhanin pioneer ka thawk ṭan nghâl a ni.

Kum 1957, July thlaah Wellingborough khawpuiah hunbi kimin rawng ka bâwl ṭan a. London Bethel-a unaute hnênah ka thawhpui atâna pioneer thiltawn ngah tak min pe tûrin ka dîl a. Unau Bert Vaisey-a chu min zirtîrtu a lo ni a, a ṭhahnemngaihna chuan rawngbâwlna hun duan ṭha tak nei tûrin min ṭanpui a ni. Ka awmna kohhranah chuan kei leh kum upa unaunu paruk leh Unau Vaisey-a kan awm a. Inkhâwm zawng zawng atâna inbuatsaihna leh inkhâwma telna chuan Jehova rinchhan tûr leh ka rinna târ lang tûrin hun remchâng min pe a ni.

Sipaia ka ṭan duh loh avânga tân ina khung ka nih hnu lawkah, special pioneer unaunu Barbara-i nên kan intawng a. Kum 1959-ah kan innei a, min tirhna hmun apianga rawngbâwl chu kan duh a ni. A tîr chuan, England hmâr thlang lama awm Lancashire khawpuia rawngbâwl tûrin min ruat a. Chumi hnuah, kum 1961, January thlaah, London Bethel-a neih thla khat chhûng awh Lalram Rawngbâwlna School-a kal tûra sâwm ka ni a. School kan zir zawh chuan, bial kantu nia rawngbâwl tûra min ruat chu mak ka ti khawp mai. Birmingham khawpuiah chawlhkâr hnih chhûng chu thiltawn ngah tak bial kantu hnên aṭangin zirtîrna ka dawng a, ka nupui Barbara-i pawh a tel ve a. Chumi hnuah, rawngbâwl tûra min ruatna hmun Lancashire leh Cheshire khawpuiahte chuan kan kîr leh a ni.

Kum 1962, August thlaa chawlh kan lâk laiin, branch office aṭangin lehkha kan dawng a. Chu lehkhaah chuan Gilead School kal tûra dîlna form pawh a tel! Ṭawngṭaia kan ngaihtuah hnu chuan, form chu Barbara-i nên kan ziak khat a, branch office-in an phût angin kan thawn lêt leh nghâl a. Thla nga a liam hnu chuan, thla sâwm chhûng awh Gilead vawi 38-naa theocratic zirtîrna dawng tûrin Brooklyn, New York khawpui chu kan pan ta a ni.

Gilead School-ah chuan Pathian Thu leh inawpna pâwl chungchâng chauh ni lovin, kan unaute chungchâng pawh kan zir tel bawk a. Kum 25 pawh la tling lo mah ila, kan school kalpuite hnên aṭangin thil tam tak kan zir a ni. Min zirtîrtute zînga pakhat Unau Fred Rusk-a nî tina ka  thawhpui thei chu ka tân chanvo hlu tak a ni. A sawi fo ṭhin zir tûr pawimawh tak pakhat chu unaute fuihna kan pêk apiangin Bible ṭanchhana pêk tûr tih hi a ni a. Min zirtîrtute zîngah chuan Unau Nathan Knorr-a te, Unau Frederick Franz-a te, leh Unau Karl Klein-a te ang thiltawn ngah tak unaute an tel a. Zirlaite chuan Unau A. H. Macmillan-a entawn tûr siam ṭha tak aṭangin thil tam tak kan zir a, ani chuan fiahna hun tia sawi theih kum 1914 aṭanga 1919 tîr lam thlenga Jehova’n a mite a kaihhruai dânte min zirtîr a ni.

Gilead School kan zir zawh dâwn hnaih chuan Unau Knorr-a’n Barbara-i nên Africa ram, Burundi khawpuia chanvo pêk kan nih thu min hrilh a. Chutih hun lai chuan Burundi rama thuchhuahtu zât hriat nân Yearbook-a en tûrin Bethel library lamah hmanhmawh takin kan kal a. Chu rama thuchhuahtu awm zât târ lanna kan zawng hmu zo lo chu mak kan ti khawp mai! Ni e, kan la hriat ngai meuh loh khawmuala awm bial tharah kan kal dâwn a. Kan lungngai hle! Mahse, tih tak zeta ṭawngṭaina chuan rilru hahdamna min neihtîr a ni.

Kan chanvo thar chuan, kan lo tawn ṭhinte nên inanna pakhat mah a nei lo—sik leh sa te, hnam dân te, leh ṭawngte thlengin. Tûnah chuan French ṭawng chu kan thiam tawh a. Awmna tûr hmun chungchângah harsatna kan la nei a ni. Kan thlen hnu ni hnihnaah, kan Gilead School kalpui unau Harry Arnott-a chuan a rawngbâwlna hmun Zambia ram lama a haw pahin min rawn tlawh a. In pakhat min zawn hmuhsak a, chu chu kan tân missionary in hmasa ber a lo ni ta a. Mahse, rei vak lo vah chuan Jehova Thuhretute chungchâng engmah hre lotu tualchhûng thuneitute hnên aṭangin dodâlna kan hmachhawn ṭan a. Kan chanvo neihah kan hlim ṭan dâwn chauh tih veleh, thuneitute’n sawrkâr pêk hnathawh phalna kan neih loh chuan chuta kan awm chhunzawm theih loh thu min hrilh a. Lungchhiatthlâk takin, chu ram chu kan chhuahsan a ngai a, ram thar mila kan insiamrem leh a ngai a ni, tûn ṭumah chuan Uganda rama rawngbâwl tûra ruat kan ni.

Visa tel lova Uganda rama kal chu kan hlau deuh va; mahse, Jehova kan rinchhan tlat a ni. Uganda rama mamawh zualna hmuna rawngbâwl mêk Canadian unaupa pakhatin immigration officer hnênah kan dinhmunte min hrilhfiahsak a; tichuan, dân anga ram chhûnga awm phalna lehkha kan hmuh hma chu thla engemawti chhûng  awm phalna min pe a. Chûng kan thiltawnte chuan Jehova’n min ṭanpui tih min rinnghehtîr a ni.

Kan chanvo thara dinhmunte chu Burundi ram nên chuan a inang lo hle a. Ram pumpuiah Thuhretu mi 28 chauh awm mah se, thu hrilh rawngbâwlna chu awmze nei taka ṭan a ni tawh a. Bial chhûngah chuan Sâpṭawng thiam mi tam tak kan hmu a. Mahse, ngaihventute hmasâwn tûra ṭanpui thei tûr chuan tualchhûng ṭawng tam tak zînga pakhat tal kan thiam a ngai tih kan hre ta thuai a. Luganda ṭawng hmanna ber Kampala khawpuiah thu kan hril ṭan a, an ṭawng thiam chu kan tum ta a ni. Thiam taka sawi thei tûr chuan kum engemaw zât a ngai a; mahse, chu chuan kan rawngbâwlnaah a ṭha zâwngin nghawng nasa tak a nei a ni. Kan Bible zirpuite thlarau lam mamawhte chu kan hre thiam lehzual ṭan a. Anni pawhin thinlung inhawng takin, an thu zirte chungchânga an ngaih dânte min hrilh a ni.

Thutak pawm duhtu mi inngaitlâwm tak takte kan hmuh avânga kan lâwmna chu beisei loh tak chanvo hlu dang kan dawnnain a belhchhah a, chu chu bial kantu nia rawngbâwla ram pum puia zinkual theihna hi a ni. Kenya branch kaihhruaina hnuaiah, special pioneer-te mamawh zual berna hmun hriat theih nân ram pum puiah kan zinkual ṭhîn a. Mite chuan Thuhretute la hmu ngai lo mah se, hawihhâwm takin min lo lâwm fo ṭhîn a. Ṭha taka min lo lawm mai bâkah, kan ei tûrte pawh min buatsaihsak ṭhîn bawk.

Khualzin theihna hun remchâng dang a lo awm leh a. Kampala khawpui aṭangin Kenyan rama Mombasa lawng chawlhna hmun chu panin rêlin ni hnih ka zin a, chuta ṭang chuan Indian Ocean pâwn lama awm Seychelles thliarkârah lawngin ka zin leh a. A hnuah, ka nupui Barbara-i chuan kum 1965 aṭanga 1972 thlengin, Seychelles thliarkâr ka tlawh apiangin min zui ṭhîn. Chutih hun lai chuan, thuchhuahtu pahnih chauh an awm a, a hnuah group ang leh kohhran nghet tak angin a ding ta a ni. Kan zinna hmun dangte chu Eritrea te, Ethiopia te, leh Sudan ramte a ni.

Sipaiin sawrkâr thuneihna a chelh hnu chuan Uganda ram dinhmun chu a danglam chak hle a. A hnu kumahte chuan dinhmunte chu a khirh chho hlein, he Bible fuihna “Kaisara thilte chu Kaisara hnênah pe ula,” tih zawm chu a finthlâk ber tih kan hre ta a ni. (Mk. 12:17) Ṭum khat chu, chumi rama awm ram dang mi zawng zawng chu an in aṭanga police station hnai bera hming ziak lût tûra tih an ni a. An thupêk chu kan zâwm nghâl vat a. A hnu ni rei vak lo vah, Kampala khawpuia motor-a kan kal laiin, police officer-te chuan kei leh ka ṭhian missionary chu min rawn pan a. Kan hlauthâwng khawp mai! Enthlatute niin min puh a, police station hmun puiah min hruai a, chutah chuan mite tibuai lova rawngbâwltute kan nih thu kan hrilhfiah a. Police-te hnênah kan hming kan ziah luh tawh thu kan hrilh a; mahse, kan thusawi chu an âwih duh lo va. Chûng police-te chuan missionary in bul hnai bera police office-ah min hruai a. Kan hming chu ziah luh a ni tawh tih hretu chuta officer chuan min hriain, min vêngtu police-te chu min chhuah tûra a hrilh chuan kan hahdam ta huai mai!

Chutih hun lai vêl chuan, sipaite’n kawngah min lo dang fo ṭhîn a, a tlângpuiin, sipai zu ruite an ni ṭhîn. Mahse, chutiang hun a thlen apiangin thlaphâng lo tûrin kan ṭawngṭai a; tichuan,  him takin kan paltlang thei zêl a ni. Lungchhiatthlâk takin, kum 1973 khân, ram dang missionary zawng zawng chu Uganda ram chhuahsan tûra thupêk kan ni.

Chanvo thar kan dawng leh a, tûn ṭumah chuan West Africa, Côte d’Ivoire ramah a ni. Chu chuan insiamremna nasa tak min neihtîr a: hnam dân thar hlak zir a ngai a, French ṭawng hman a ngai leh a, ṭobul inang lo missionary-te nêna awmho a ngai leh ta! Chutiang chu ni mah se, rawngbâwlna biala mi inngaitlâwmte leh thinlung ṭha pute’n chanchin ṭha an chhân lêt nghâlna aṭangin Jehova kaihhruaina kan hmu leh a. Pathian Jehova rinchhannain kan kawngte min kawhhmuh dân chu kan nupain kan hmu a ni.

A hnuah, ka nupui Barbara-i chuan cancer natna a vei ta thut mai a. Inenkawlna ṭha tak nei tûrin Europe lamah vawi tam tak kan kal a; mahse, kum 1983-ah chuan Africa khawmualah rawng kan bâwl zawm thei tawh dâwn lo tih kan hre ta a. Chu chu kan nupa tân a lungchhiatthlâk hle!

London Bethel-a rawngbâwla kan awm laiin, ka nupui Barbara-i cancer chuan zual lam a pan zêl a, a tâwpah min boralsan ta a ni. Bethel chhûngkua chuan hmangaihna nei takin min thlamuan a. A bîk takin, nupa tuak khat chuan insiamrem tûr leh Jehova rinchhan zawm zêl tûrin min ṭanpui a. A hnuah, special pioneer lo ni tawh ṭhîn leh Jehova a hmangaihna avânga thlarau lam mi a ni tih hriat theih, pâwn lam aṭanga Bethel-a rawngbâwl tûra nî tina lo kal unaunu nên chuan kan intawng leh a. Kum 1989-ah chu unaunu Ann-i nên chuan kan innei a, chumi hun aṭang chuan tûn thlengin London Bethel-ah rawng kan bâwl a ni.

Kum 1995 aṭanga 2018 thlengin, ram hrang hrang 60 vêl tlawh kualin, headquarters aiawhtu (tûn hma chuan zone overseer tia koh) nia rawngbâwl theihna chanvo hlu ka nei a. Chutianga ka zinnaahte chuan Jehova’n dinhmun hrang hrang hnuaia a chhiahhlawhte mal a sâwm dân chu chiang takin ka hmu a ni.

Kum 2017 khân, chutianga kan zinnaah Africa khawmual kan thleng leh a. Ka nupui Ann-i chu Burundi ram ka hmêlhriattîr theih avâng leh nasa taka an ṭhan chhohna kan hmuh avângin kan hlim hle! Kum 1964-a in tina thu hrila ka kalna kawng ngeiah chuan Bethel in mawi tak a awm tawh a; chu bâkah, chumi ramah chuan thuchhuahtu mi 15,500 aia tam an awm tawh a ni.

Kum 2018-ah zin chhuah theihna ka dawn avângin ka lâwm tak zet a. Chûng kan zinna tûr ram zînga pakhat chu Côte d’Ivoire a ni a. A khawpui Abidjan-a va thlen chu mahni in thleng leh ta ang mai ka ni. Bethel mikhual thlenna room-ah kan thleng a, kan room dawt chiaha awm hriat tuma telephone list ka’n en chuan ka hriat ngai tawh hming unau Sossou-a a lo ni reng a. Abidjan khawpuia rawngbâwla ka awm laiin ani chu city overseer a ni a. Mahse, ka hre sual zâwk a lo ni a. A fapa zâwk a lo ni.

Jehova chuan a thutiam a hlen a. Harsatna tam tak kârah pawh amah kan rinchhan tlat chuan kan kawngte chu min kawhhmuh zêl a ni tih ka thiltawn aṭangin ka hria a. Khawvêl thar thleng pawha êng zual deuh deuh tûr tâwp nei lo nun kawng zawh chu kan duh tak zet a ni.—Thuf. 4:18.