1. Mipate’n lû nihna an thlîr dân chu engin nge thunun mai thei?

“LU” TIH thu mal hian i tân eng awmzia nge a neih? Mipa ṭhenkhat chu an nupui fanaute an cheibâwl dânah an hnam dân emaw, an chhûngkaw ṭobul emawin a thunun a. Europe-a awm unaunu Yanita-i sawi hi lo chhinchhiah ang che, ani chuan: “Ka awmna hmuna mite chuan hmeichhiate chu mipa aia hnuaihnung zâwk leh sal ang maia thlîr tûr, tih ngaih dân nghet tak an nei,” tiin a sawi. United States rama unau Luke-a chuan: “Pa ṭhenkhatin an fapate hnênah hmeichhiate chu en liam mai tûr, an ngaih dân chu lâk thutak vak a ngai lo, tiin an zirtîr,” tih a sawi. Mahse, chûng rilru put hmang chu mipate’n lû nihna an hman dân tûr atâna Jehova duh dân a ni lo. (Marka 7:13 nên khaikhin rawh.) A nih leh, engtin nge mipa chuan chhûngkaw lû ṭha tak nih dân a zir theih?

2. Chhûngkaw lûin eng nge a hriat ngai a, engvângin nge?

² Chhûngkaw lû ṭha tak ni tûr chuan mipain Jehova’n a laka a thil phûtte a hriat hmasak a ngai a. Chu bâkah, Jehova’n lû nihna a pêk chhan leh Jehova leh Isua entawn tûr siamte a entawn theih dân a hriat a ngai bawk. Engvângin nge mipain chutiang hriatna a neih chu a pawimawh? Jehova’n chhûngkaw lûte chu thuneihna engemaw chen a pêk vâng leh chûngte chu ṭha taka hmang tûra a beisei vâng a ni.—Lk. 12:48b.

3. Korinth thawn khat 11:3-a târ lan thute aṭangin lû nihna chungchâng eng nge kan hriat?

³ Korinth thawn khat 11:3 chhiar rawh. He Bible châng hian Jehova’n lei leh vâna a chhûngkua a rêlbâwl dân a târ lang a. Lû nihna chuan thil pahnih—thuneihna leh mawhphurhna a keng tel a ni. Ani chuan “lû” a nih loh leh thuneihna sâng ber a chelh a, vântirhkohte leh mihringte pawh ni se,  a fate zawng zawng chuan lû nihna an kenkawh dânah a hnênah mahni chanchin an sawi ang. (Rom 14:10; Eph. 3:14-19) Ani chuan Isua chu kohhran chungah thuneihna a pe a; mahse, Isua chuan min cheibâwl dânah Jehova hnênah a chanchin a sawi a ngai a ni. (1 Kor. 15:27) Chu bâkah, pasal hnênah nupui fanaute chunga thuneihna a pe a; mahse, a chhûngkua a cheibâwl dânah Jehova leh Isua hmaah a chanchin a la sawi dâwn a ni.—1 Pet. 3:7.

4. Jehova leh Isua’n eng thuneihna nge an neih?

⁴ Lei leh vâna chhûngkaw Lû ber a nih angin, Jehova chuan a fate awm dân tûr chungchânga dân siam tûr leh chûng dânte kengkawh tûrin thuneihna a nei a. (Is. 33:22) Kristian kohhranho lû a nih angin, Isua pawhin dân siam tûr leh kengkawh tûrin dikna a nei bawk.—Gal. 6:2; Kol. 1:18-20.

5. Kristian chhûngkaw lûte chuan eng thuneihna nge an neih a, an thuneihna chuan eng chen nge a huam?

⁵ Jehova leh Isua entawn tûr siamte zuiin Kristian chhûngkaw lûte chuan an chhûngkaw tâna thu tlûkna siam tûrin thuneihna an nei a. (Rom 7:2; Eph. 6:4) Mahse, an thuneihna chuan chin tâwk a nei a ni. Entîr nân, an dân siamte chuan Pathian thu bulte a ṭanchhan tûr a ni a. (Thuf. 3:5, 6) Chhûngkaw lû chuan a chhûngkua ni lote tâna dân siam tûrin thuneihna a nei lo. (Rom 14:4) Chu bâkah, a fate chuan an lo puitlin chhoh va, in hrang an chan hunah pawh ani chu la zah zawm zêl mah se, anni chu a lû nihna hnuaiah an awm tawh lo a ni.—Mt. 19:5.

6. Engvângin nge Jehova’n lû nihna chu a din?

⁶ Jehova chuan a chhûngkuate a hmangaih avângin lû nihna chu a din a. Chu chu a hnên aṭanga kan dawn thilpêk a ni. Lû nihna chuan Jehova chhûngkua chu inrem taka awm tûr leh fel taka thil ti tûrin a ṭanpui a. (1 Kor. 14:33, 40) Lû nihna kengkawhtu an awm loh chuan Jehova chhûngkuaah fel taka inrêlbâwlna leh hlimna a awm thei lo vang. Entîr nân, thu tlûkna siamtu tûr ber an awm lo vang a, chumi bawhzuitu tûr pawh an awm hek lo vang.

7. Ephesi 5:25, 28-a sawi angin, Jehova’n mipate chu eng anga hmeichhiate cheibâwl tûrin nge a duh?

⁷ Pathian din lû nihna ruahmanna chu thil ṭha tak a nih chuan, engvângin nge tûn laia hmeichhe tam tak chu an pasalte hnuaichhiah leh rah beh nia an inhriat? A chhan chu mipa tam takin chhûngkaw tâna Jehova tehnate an zawm loh vâng leh tualchhûnga mite tih dân leh hnam dânte an zui vâng a ni. Mahni hmasialna avângin an nupuite chu ṭha lo takin an cheibâwl pawh a ni thei. Entîr nân, pasal chuan mahni indah pawimawh a duh vâng leh mi dang hmaa “mipa dik tak” a nihzia lantîr a duh avângin a nupui chu a rap bet mai thei a. A nupui chu amah hmangaih tûrin a tilui thei lo va; mahse, amah hlau tûra ti thei niin a inngai mai thei bawk. Ani chuan chutiang hlauhna chu a nupui thunun nân a hmang mai thei a ni. * Chutiang ngaih dân leh thiltihte chuan hmeichhiate dawn tûr chawimawina leh zahna a thlen loh bâkah, chu chu Jehova duh dân nên pawh a inkalh chiang hle a ni.—Ephesi 5:25, 28 chhiar rawh.

8. Engtin nge mipain chhûngkaw lû ṭha tak nih dân a zir theih?

⁸ Mipa chuan Jehova leh Isua’n lû nihna an kenkawh dân entawnna hmangin chhûngkaw  lû ṭha tak nih dân a zir thei a. Pathian Jehova leh Isua lantîr mizia pahnihte ngaihtuah la, chhûngkaw lûin a nupui fanaute a cheibâwl hunah chûng mizia pahnihte a lantîr theih dân pawh ngaihtuah bawk ang che.

9. Engtin nge Jehova’n inngaihtlâwmna a lantîr?

⁹Inngaihtlâwmna. Jehova chu lei leh vâna fing ber mah ni se, ani chuan a chhiahhlawhte ngaih dân chu ṭha takin a ngaihthlâksak a. (Gen. 18:23, 24, 32) A thuneihna hnuaia awmte’n thurâwn an pêk pawh a remti a ni. (1 Lal. 22:19-22) Jehova chu a ṭha famkim a; mahse, ṭha famkim tûrin min beisei lo. Chu aiin, a rawngbâwltu mi ṭha famkim lote chu hlawhtling tûrin a ṭanpui zâwk a ni. (Sâm 113:6, 7) Dik tak chuan, Bible-in Pathian Jehova chu “ṭanpuitu” tiin a târ lang a. (Sâm 27:9; Heb. 13:6) Lal Davida pawhin Jehova inngaihtlâwmna avâng chauhvin hna ropui takte a hlen thei tih a hria a ni.—2 Sam. 22:36.

10. Engtin nge Isua’n inngaihtlâwmna a lantîr?

¹⁰ Isua entawn tûr siam hi han ngaihtuah teh. Ani chu a zirtîrte tân Lal leh Hotu mah ni se, an ke a silsak a. Pathianin Bible-a chu a thiltih a chhinchhiah chhan chu eng nge ni? Mi dangte pawh tiamin, chhûngkaw lûte tâna entawn tûr siam a duh vâng a ni tih a chiang hle. Isua ngeiin: “In chunga ka tih ang hian nangni pawhin in tih vena tûrin ka tihhmuh che u a ni si a,” tiin a sawi. (Joh. 13:12-17) Isua chuan thuneihna sâng tak nei mah se, mi dangte chu a rawngbâwl tûrin a beisei lo. Chu aiin, ani chuan mi dangte rawng a bâwlsak zâwk a ni.—Mt. 20:28.

11. Chhûngkaw lû chuan Jehova leh Isua entawn tûr siam aṭangin inngaihtlâwmna chungchângah eng nge a zir theih?

¹¹Kan zir tûrte. Chhûngkaw lû chuan kawng tam takin inngaihtlâwmna a lantîr thei a. Entîr nân, a nupui fanaute chu ṭha famkim tûrin a beisei lo va. A ngaih dân an pawmpui loh hunah pawh a chhûngte ngaih dân chu a ngaihthlâksak a ni. United States rama awm unaunu Marley-i chuan: “Ka pasal nên ngaih dân inan loh châng kan nei a. Mahse, ka ngaih dânte min zâwt a, thu tlûkna a siam hmaa ngun taka a ngaihtuah ṭhin avângin min ngaihluin, min zah a ni tih ka hria,” tiin a sawi. Chu bâkah, tualchhûnga mite chuan in chhûng hnate chu hmeichhe hna angin ngai mah se, pasal inngaitlâwm tak chuan chûng hnate chu inhuam takin  a thawk a ni. Chu chu a awlsam lo thei. Engvângin nge? Unaunu Rachel-i chuan, “Ka awmna hmunah chuan pasalin thlêng sil leh in chhûng tihfainaahte a nupui a ṭanpui a nih chuan an ṭhenawmte leh chhûngkhat lainate chuan ‘mipa dik takah’ an ngai lo thei a. Nupui ngam lo niin an ngai ang,” tiin a sawi. Chutiang ngaih dân hluarna hmuna awm i nih chuan, chhiahhlawhte thawh tûr anga ngaih ni mah se, Isua’n a zirtîrte ke a silsak tih hre reng ang che. Chhûngkaw lû ṭha tak chuan mahni hming ṭhatna tûr ni lovin, a nupui fanaute ṭhatna tûr a ngaihtuah zâwk a. Chhûngkaw lû ṭha tak ni tûrin inngaihtlâwmna bâkah eng mize dangte nge neih ngai?

12. Hmangaihna chuan Jehova leh Isua chu eng ti tûrin a chêttîr?

¹²Hmangaihna. Jehova thiltih zawng zawng chu hmangaihna avânga tih a ni a. (1 Joh. 4:7, 8) Ani chuan a Thu, Bible leh a inawpna pâwl hmangin kan thlarau lam mamawhte chu hmangaihna nei takin min pe a. Min hmangaihzia min hriat chiantîrna hmangin him nia inhriatna min neihtîr bawk. A nih leh, tisa lama kan mamawhte chungchâng hi eng nge ni ve? Jehova chuan ‘kan lâwmna tûrin thil tam tak’ min pe a. (1 Tim. 6:17) Thil kan tihsual hunah min thunun a nih pawhin, min la hmangaih reng a. Hmangaihna avângin tlanna min ruahmansak a ni. Isua pawhin min hmangaih êm avângin, kan tân a nun a pe a. (Joh. 3:16; 15:13) Jehova leh Isua’n an chunga rinawmte an hmangaihna nghet tak chu eng mahin a tichhe thei lo.—Joh. 13:1; Rom 8:35, 38, 39.

13. Chhûngkaw lûin a chhûngkaw chunga hmangaihna a lantîr chu engvângin nge a pawimawh? (“ Engtin Nge Nupui Nei Thar Chuan A Nupui Zahna A Dawn Theih?” tih bâwm chu en bawk rawh.)

¹³Kan zir tûrte. Chhûngkaw lû thiltih engkim chu hmangaihna avânga tih a ni tûr a ni. Engvângin nge chu chu thil pawimawh tak a nih? Tirhkoh Johana chuan: “Miin . . . a unau [a nih loh leh, a chhûngkua] a hmuh tawh renga mah a hmangaih loh chuan, Pathian a hmuh ngai lohva chu engtin nge a hmangaih theih ang?” tia zawhna siamin a chhâng a ni. (1 Joh. 4:11, 20) A bîk takin,  a chhûngkua hmangaih a, Jehova leh Isua entawn duhtu mipa chuan a chhûngkaw thlarau lam, rilru lam, leh tisa lam mamawhte chu a phuhhrûksak ang. (1 Tim. 5:8) A fate chu a zirtîrin a thunun ang a. Jehova chawimawi tûr leh a chhûngkuate hlâwkpui tûr thu tlûkna siam tûrin a inzir zawm zêl ang. Chûng thilte chu a mal mala ngaihtuahin, chhûngkaw lûin chumi chungchânga Jehova leh Isua a entawn theih dânte chu i lo enho vang u.

14. Chhûngkaw lû chuan a chhûngkaw thlarau lam mamawh chu engtin nge a pêk?

¹⁴A chhûngte thlarau lam mamawh a pe. Isua chuan a Pa entawnin a hnungzuitute thlarau lam mamawh chu a ngaihtuah reng a. (Mt. 5:3, 6; Mk. 6:34) Chutiang bawkin, chhûngkaw lû ngaih pawimawh hmasak ber tûr chu a chhûngte thlarau lam mamawh pêk hi a ni. (Deut. 6:6-9) Chu chu chhûngkua anga Pathian Thu chhiarna te, zir ziahna te, inkhâwmah leh chanchin ṭha hrilhnaa tel ziahna te, leh mi tinte chu Jehova nêna inṭhianna nghet tak siama vawng reng tûra ṭanpuinate hmangin a pe thei a ni.

15. Chhûngkaw lûin a chhûngte rilru lam mamawh a ngaihsak theih dân kawng khat chu eng nge ni?

¹⁵A chhûngte rilru lam mamawh a pe. Jehova chuan Isua chu a hmangaih thu tlang takin a hrilh a. (Mt. 3:17) Isua pawhin a hnungzuite a hmangaihzia chu a thiltih leh thusawi hmangin a lantîr a ni. Anni pawhin an hmangaihzia an lantîr bawk. (Joh. 15:9, 12, 13; 21:16) Chhûngkaw lû chuan a nupui fanaute a hmangaihna chu anmahni Bible zirpuina ang chi thiltih hmangin a lantîr thei a. Chu bâkah, anmahni a hmangaih thu leh a ngaihhlut thu hrilhin, a remchân hunah mi dang hmaah a fak bawk tûr a ni.—Thuf. 31:28, 29.

16. Chhûngkaw lûin eng nge a tih ngai a, chu chu engtin nge inbûk tâwk taka a tih theih?

¹⁶A chhûngte tisa lam mamawh a pe. Jehova chuan Israel mite chu thu an âwih loh avânga hrem an nih lai pawhin an mamawh bulpuite chu a ngaihsak reng a. (Deut. 2:7; 29:5) Tûn laiah pawh kan mamawh bulpuite chu min la ngaihsak reng a ni. (Mt. 6:31-33; 7:11) Chutiang bawkin, Isua chuan a hnungzuite chu ei tûr pein a hrai a. (Mt. 14:17-20) An hrisêlna pawh a ngaihsak bawk a ni. (Mt. 4:24) Chhûngkaw lû chuan Jehova a tihlâwm theih nân a chhûngte tisa lam mamawh chu a pe tûr a ni a. Mahse, a inbûk tâwk thiam erawh a ngai a ni. A chhûngte thlarau lam leh rilru lam mamawhte ngaihsak hman lo khawpin eizawnna lamah a inhmang lutuk tûr a ni lo.

17. Jehova leh Isua’n zirtîrna leh thununna min pêkna kawngah entawn tûr eng nge an siam?

¹⁷Zirtîrna a pe. Jehova chuan kan tâna ṭha ber tûr ngaihtuahin min zirtîrin, min thunun a. (Heb. 12:7-9) Isua chuan a Pa ang bawkin a thuneihna hnuaia awmte chu hmangaihna nei takin a zirtîr a ni. (Joh. 15:14, 15) A ṭûl  hunah zirtîrna khauh tak pe mah se, ngilnei tak a ni a. (Mt. 20:24-28) Ṭha famkim lo leh thil tisual fo ṭhîn kan ni tih a hre bawk.—Mt. 26:41.

18. Chhûngkaw lû ṭha tak chuan eng nge a hriat?

¹⁸ Jehova leh Isua entawntu chhûngkaw lû chuan a chhûngte chu an ṭha famkim lo tih a hria a. A nupui fanaute lakah a “vîn” hek lo. (Kol. 3:19) Chu aiin, Galatia 6:1-a thu bul chu nunpuiin leh amah ngei pawh ṭha famkim lo a ni tih inhriain “thuhnuairawlh takin” anni chu a siam ṭha zâwk a ni. Isua angin, ani chuan zirtîr dân ṭha ber chu entawn tûr ṭha hnutchhiah hi a ni tih a hre bawk.—1 Pet. 2:21.

19-20. Thu tlûkna siam a ngaih hunah, engtin nge chhûngkaw lû chuan Jehova leh Isua a entawn theih?

¹⁹Mahni hmasialna nei lovin thu tlûkna a siam. Jehova chuan mi dangte tâna ṭha ber tûr ngaihtuahin thu tlûkna a siam ṭhîn a. Entîr nân, a tâna hlâwkna tûr ni lovin, nun kan chenpui theihna tûrin nunna min pe a. Kan sualte khuh bo nâna a Fapa pe tûrin ani chu tu man an tilui thei lo. Min ṭanpui a duh avângin hmangaihna nei takin a Fapa chu min pe a ni. Isua pawhin, mi dangte hlâwkpui theih tûr thu tlûknate a siam a. (Rom 15:3) Entîr nân, a chauh hle hunah pawh, chawlh hahdam aiin mipuite zirtîr nân hun a hmang zâwk a ni.—Mk. 6:31-34.

²⁰ Chhûngkaw lû ṭha tak chuan a chhûngte tâna thu tlûkna fing siam leh chumi atâna mawhphurhna lâk chu thil harsa tak a ni tih a hria a. Chhan ṭha awm lo leh rilru veina maia innghat thu tlûknate siam loh chu a tum tlat a ni. Chu aiin, thu tlûkna fing a siam theih nân Jehova a inkaihruaitîr zâwk a. * (Thuf. 2:6, 7) Chutiang kawng chuan mahni hlâwkna tûr ni lovin, mi dangte hlâwkna tûr a ngaihtuah ang.—Phil. 2:4.

21. A dawta thuziakah eng nge kan sawiho vang?

²¹ Jehova chuan chhûngkaw lûte chu mawhphurhna pawimawh tak a pe a, chu chu a ṭha thei ang bera hlen tûrin a beisei a ni. Pasalin Jehova leh Isua entawn tûr siam chu theih tâwp chhuaha zui a tum tlat chuan chhûngkaw lû ṭha tak a ni ang. Chu bâkah, nupuiin a chanvote a hlen chuan an inneihna chu a hlimawm lehzual ang. Nupuiin lû nihna chu engtin nge a thlîr ang a, eng harsatnate nge a hmachhawn? Chûng zawhnate chu a dawta thuziakah chhân a ni ang.