HMEICHHE pahnih chu Philippines rama Baguio Khawpuia sumdâwnna bialah an kal a. Vântlâng hmuna thu hrilhna nawrlîr chu hmu mah se, an va pan lo. Nawrlîr bula ding unaunu Helen-i chuan anni chu râl khat aṭangin a lo nuih sâng a. Chu hmeichhe pahnih chuan an kal pêl mai a; mahse, unaunu Helen-i nui hmêl nêlawm tak chuan an rilru a hneh hle a ni.

A hnuah, bus chuanga an haw kawngah Kingdom Hall-a jw.org sign board lian tak intâr chu an hmu a. A hmaa an lo hmuh thu hrilhna nawrlîra thu inziak nên a inang tih an hre chhuak a. Bus aṭanga chhukin, Kingdom Hall gate-a kohhran hrang hrangte inkhâwm hun duan târ chu an va en a ni.

Chu hmeichhe pahnih chu inkhâwm lo awm hmasa ber pakhatah chuan an va tel a. Kingdom Hall chhûng an luh chuan tu nge an hmuh? Unaunu Helen-i! Nui sânga anmahni lo en rengtu kha a ni tih an hre nghâl a. Unaunu Helen-i chuan: “Min rawn pan chuan ka zâm ru deuh khawp a. Thil tihsual ka nei emaw ka inti hman hial a ni,” tiin a sawi. Mahse, hmeichhe pahnih chuan thil awm dânte chu an hrilhfiah a ni.

Chu hmeichhe tleirâwl pahnih chuan inkhâwma tel leh unaute nêna inbiak chu nuam an ti hle a, an tlângnêl nghâl a ni. Inkhâwm bâna unau dangte’n hall an tithianghlim tih an hmuh chuan an ṭanpui ve theih leh theih loh an zâwt hial a ni. Tûnah chuan hmeichhe pakhat zâwk chu Philippines ramah a awm tawh lo va; mahse, a pakhat zâwk chu inkhâwmahte telin Bible a zir ṭan tawh a ni—chûng zawng zawng chu nui hmêl vâng maia inṭan a ni!