BIBLE hun lai chuan, mo man chu inneihna ruahmanna siam hunah monu chhûngte hnêna pêk a ni ṭhîn a. Mo manah chuan thil hlu tak te, ran te, leh sumte a tel thei a. A châng chuan, Rakili a neih theih nâna a pa hnêna kum sarih chhûng rawngbâwl remtitu Jakoba dinhmun angin, inhlawhnate pawh a tel a ni. (Gen. 29:17, 18, 20) Chutianga an tih chhan chu eng nge ni?

Bible lama mi thiam Carol Meyers-a chuan: “Mo man chu an fanu hna thawh tûrte an chân tâk avânga chumi aiawha monu chhûngte hnêna pêk a ni a, chu chu [lo neia eizawng] chhûngkuate tâna thil pawimawh tak a ni,” tiin a sawi. Chu bâkah, mo man chuan inneihna avânga chu chhûngkaw pahnihte inlaichînna pawh a tinghet thei bawk. Chu chhûngkaw pahnih inlaichînna chuan hun harsate an tawh chhûngin inṭanpui tawnna a neihtîr thei a. Chu bâkah, mo man chuan hmeichhia chu mi hual tawh a ni tih leh a pa ngaihsakna leh vênhimna aṭangin a pasal tûr ngaihsakna leh vênhimna hnuaiah a awm tawh dâwn tih hriattîrna a pe bawk.

Mo man pêkna chuan nupui chu lei leh hralh theih bungrua ang mai a ni tih a kâwk lo. Ancient Israel—Its Life and Institutions tih lehkhabu chuan: “Monu chhûngte hnêna sum emaw, a tlukpui thil emaw pêkna chuan inneihna chu Israel mite tân lei theih thil angin a lantîr tih a chiang a. Mahse, [mo man] chu hmeichhe man ni lovin, monu chhûngte hnêna a aiawha pêk thil anga thlîr niin a lang,” tiin a sawi.

Tûn laiah pawh, ram ṭhenkhatah chuan mite chuan mo man pêk chu an la chîng zawm zêl a. Kristian nu leh pate’n mo man an phût hunah, a âwm tâwk aia tam phût lohna hmangin, “thil âwm tâwk an hriatzia mi zawng zawng” an hriattîr a ni. (Phil. 4:5, NWT; 1 Kor. 10:32, 33) Chutiang chuan, “tangka ngainatu,” a nih loh leh mi duhâm an nih lohzia an lantîr a. (2 Tim. 3:2) Chu bâkah, Kristian nu leh pate’n a lutuka mo man an phût loh hian mopa tûr tân mo man a thawh chhuah thlenga inneih hun a pawh sei a ngai lo vang a. A nih loh leh, mopa tûr chuan mo man a thawh chhuah theih nâna hunbi kima hna thawk tûrin pioneer nia a rawngbâwlna chu a bânsan a ngai hek lo vang.

Ram ṭhenkhatah chuan, dânin mo man bituk chin a ruat a. Chutiang rama awm Kristian nu leh pate chuan chûng dânte chu an zâwm tûr a ni. Engvângin nge? Bible chuan Kristiante chu ‘rorêltute thu thua awm’ tûr leh Pathian dân nêna inkalh lo an dân zamte chu zâwm tûrin a phût a ni.—Rom 13:1; Tirh. 5:29.