DAN hnuaiah chuan, ṭhurote leh pârvate chu Jehova hnêna thilhlan atâna pawm theih an ni a. Chûng sava chi hnihte chu inthawina chungchâng sawina dânahte chuan a ruala târ lan an niin, a eng emaw zâwk zâwk hlan theih an ni. (Lev. 1:14; 12:8; 14:30) Engvângin nge chu chu thil ṭha tak a nih? A chhan pakhat chu ṭhurote chu englai pawha hmuh theih a nih loh vâng a ni. Engvângin nge hmuh reng theih a nih loh?

Ṭhurote chu khaw lum laia Israel ram tluana insawn kual reng ṭhîn sava an ni a. October thla apiangin, chhim lam khaw lumna ramah insawnin, nipui hunah Israel ramah an kîr leh ṭhîn a ni. (HTK. 2:11, 12; Jer. 8:7) Bible hun lai chuan, thlasik chhûnga inthawina atâna ṭhuro hlan chu Israel mite tân thil awlsam a ni lo tihna a ni.

Kawng leh lamah chuan, pârvate chu an insawn kual ve loh avângin kum tluanin Israel rama hmuh theih a ni a. Chu mai bâkah, pârvate chu an khawi ṭhîn a ni. Bible Plants and Animals tih lehkhabu chuan, “Palestina rama khaw tê leh khawpuiahte chuan pârvate chu hmun tinah hmuh tûr a awm a. In tinah hian pârva chênna tûr bâwm, a nih loh leh bangah kuate a awm,” tiin a sawi.—Isaia 60:8 nên khaikhin rawh.

Jehova chuan Israel mite’n kum tluana awlsam taka an hmuh theih savate chu thilhlan atâna pawmsakin hmangaihna leh hriatthiampuina a neihzia a lantîr a ni.