1. Bible avânga i lâwm nachhan tûr chu eng nge ni?

 BIBLE min pêk avângin Pathian Jehova chungah kan va lâwm tak êm! Ani chuan Bible-ah tûn laia kan harsatna tawhte, hlawhtling taka hmachhawn tûra min ṭanpui theitu thurâwn fing tak min pe a. Hma lam hun beiseina ṭha tak min pe bawk. Chu aia pawimawh zâwk chu, Jehova chuan Bible chu a mize tam tak târ lan nân a hmang a ni. A mize duhawm takte kan ngaihtuah hian, chu chuan kan thinlung a khawih hle a; amah nêna inṭhianna ṭha tak neih chhohna hmanga, kan Pathian hnaih tûra chêttîrin kan awm a ni.—Sâm 25:14.

2. Eng kawngtein nge Jehova’n mihringte hnênah a inhriattîr?

² Jehova chuan mite chu amah hre tûrin a duh a. Hmân lai khân, mumang te, inlârna te, leh vântirhkohte hmangin a inhriattîr a ni. (Num. 12:6; Tirh. 10:3, 4) Mahse, hêng mumang te, inlârna te, leh vântirhkohte hnên aṭanga thuchahte hi ziah chhuah ni lo se chuan kan zir thei lo vang. Chuvângin, Jehova’n kan hriat atâna a duhte chu ‘lehkhabuah a ziahtîr’ a ni. (Jer. 30:2) ‘Pathian dik kawng chu a ṭhat famkim’ avângin, hetianga min biak pawh dân kawng hi a ṭhain, kan hlâwkpui ang tih kan ring tlat thei a ni.—Sâm 18:30.

3. Engtin nge Pathian Jehova’n Bible a vawn ṭhat? (Isaia 40:8)

³ Isaia 40:8 chhiar rawh. Pathian Thu chuan kum sâng tam tak chhûng, mi rinawm a hmei a pate hnênah kaihhruaina fing tak a lo pe tawh ṭhîn a. Chu chu engtin nge a nih theih? A nihna takah chuan, hun rei tawh taka ziah Pathian Lehkha Thute chu thil chhe awl taka ziah a ni a; chuvângin, tûn laiah a tîra ziakte chu hmuh tûr pakhat mah a awm tawh lo. Mahse, Jehova’n chûng thu thianghlimte chu mite a ziah chhâwntîr a.  A ziak chhâwngtute chu ṭha famkim lo ni mah se, an fîmkhur tak zet a ni. Entîr nân, Hebrai Pathian Lehkha Thu chungchângah mi thiam pakhat chuan heti hian a ziak a ni: “Hmân lai lehkhabute zîngah hetianga dik taka ziak chhâwn hi a awm lo tia sawi theih a ni,” tiin. Hun rei tawh taka ziak a ni chung te, a ziahna atâna thil chhe awl tak hman a ni chung te, leh a ziak chhâwngtute an ṭha famkim lo chung pawhin, tûn laia kan Bible chhiara thute hian a Ziaktu, Jehova ngaihtuahna a keng tih kan ring tlat thei a ni.

4. He thuziakah hian eng nge kan sawiho vang?

⁴ Jehova chu “thilpêk ṭha leh thilpêk famkim zawng zawng” lo chhuahna Hnâr a ni a. (Jak. 1:17) Bible hi Jehova thil min pêkte zînga ṭha ber pakhat a ni. Thilpêk chuan a petu chungchâng—min hriat chianzia leh kan mamawhte a hriatzia—min hrilh a. Chu chu Bible min Petu chungchângah pawh a dik chiah a ni. He thilpêk ngun taka kan chhût hian, Jehova chungchâng tam tak kan hria a. Min hriat chianzia leh kan mamawhte a hriatzia kan hre bawk. He thuziakah hian Bible-in Jehova mizia pathum: a finna, a rorêlna dik, leh a hmangaihnate a târ lan dân kan sawiho vang. A hmasa berin, Bible-in Pathian finna a târ lan dân kawngte i lo ngaihtuah ang u.

5. Bible-in Pathian finna a târ lan dân kawng khat chu eng nge ni?

⁵ Jehova chuan a thurâwn pêk fing tak kan mamawh tih a hria a. A thilpêk, Bible hi a finnain a khat a ni. Bible thurâwn pêk chuan mite chungah nghawng ṭha tak a nei a. Mite nun a thlâk thei a ni. Mosia’n Bible bu hmasa lamte a ziah lai khân, Pathian mi Israelte chu: “In tân thil eng mah lo mai mai a ni lo va, in nunna a ni si,” tiin a hrilh a ni. (Deut. 32:47) Pathian Lehkha Thu zâwmtute chuan nun hlimawm leh hlawhtling an nei thei a. (Sâm 1:2, 3) Pathian Thu chu hun rei tak kaltaa ziak ni mah se, mite nun a ṭha zâwnga thlâk tûrin thiltihtheihna a la nei reng a ni. Entîr nân, jw.org-a “Bible-in Nun A Thlâk Danglam,” tih hnuaia thuziak hrang hrangahte chuan, Bible-in tûn laia “a ringtute chhûnga thawk” tûra thiltihtheihna a neih dân târ langtu thiltawn 50 chuang i hmu ang.—1 Thes. 2:13.

6. Engvângin nge Bible hi lehkhabu dangte ang a ni lo tia kan sawi theih?

⁶ Bible ang hi lehkhabu dang a awm lo. Engvângin nge? A chhan chu a Ziaktu, Pathian Jehova chu engkimtithei, chatuana awm, leh mi dang zawng zawng aia fing zâwk a nih vâng a ni. Lehkhabu tam tak chuan a ziaktute thih hnuah pawh chhiar a la hlawh ṭhîn a; mahse, chûng lehkhabua thurâwnte chu a hnuah chuan a hman tlâk tawh ṭhîn lo. Kawng leh lamah, Bible-a chuang thu bulte chu eng lai pawhin a ṭangkai a, eng huna chêngte tân pawh a ṭangkai tih finfiah a ni bawk. Chu lehkhabu thianghlim chu kan chhiar a, kan chhût ngun hian a Ziaktu chuan Bible thurâwnte kan nunpui theih dân hmu thiam tûrin a thlarau thianghlim thiltithei tak a hmang a ni. (Sâm 119:27; Mal. 3:16; Heb. 4:12) Ni e, Bible thu nung rengte Ziaktu chuan ṭanpui che a inpeih reng a. Chu chuan Bible chhiar ziah duhna min neihtîr tûr a va ni êm!

7. Engtin nge Bible-in hmân laia Pathian mite a inpumkhattîr?

⁷ Bible-in Pathian finna a târ lan dân kawng langsâr tak dang leh chu, Pathian mite chunga inpumkhatna a thlentîr hi a ni a. Israel mite Ram Tiama an luh khân, hmun hrang hrangah an inbêngbel a. Mi ṭhenkhat chu sangha mantute an rawn ni a, mi dangte chuan ran an vulh a, mi dang lehte chuan lo an nei thung. Hmun pakhata chêng Israelte chuan ram chhûng  hmun danga chêng an Israelpuite chu an ngaihsak tawh lo palh thei a. Mahse, Jehova chuan Israel mite chu a Thu chhiar a, a hrilhfiahnate ngaithla tûrin hun hrang hranga inhmukhâwm tûrin ruahmanna a siamsak a ni. (Deut. 31:10-13; Neh. 8:2, 8, 18) Israel mi rinawm tuemaw Jerusalem-ah a rawn thleng a, ram chhûng hmun hrang hrang aṭanga rawn kal a rinpui mi maktaduai têlte a hmuh laia a awm dân tûr chu han mitthla teh! Chutiang chuan Jehova’n a mite chu inpumkhat reng tûrin a ṭanpui a ni. A hnuah, khawtlânga dinhmun leh nihna inang lo tak tak a hmei a pate hmangin Kristian kohhran din a ni a. Mahse, Pathian Thu an ngainat avângin, Pathian dik biaknaah an inpumkhat tlat a ni. Ringtu tharte chuan, Pathian Thu chu an rinpuite ṭanpuina leh an ruala inkhâwmna aṭang chauhvin an hre thiam thei a ni.—Tirh. 2:42; 8:30, 31.

8. Engtin nge Bible-in tûn laia Jehova mite a inpumkhattîr?

⁸ Finnaa khat kan Pathian chuan Bible hmangin a mite chu a la zirtîrin, a la inpumkhattîr zawm zêl a. Bible chu thlarau lam chaw ṭha tak tak kan dawnna hnâr a ni. Bible chhiar a, a hrilhfiahnate ngaithla tûr leh sawiho tûrin kohhran inkhâwmah te, bial inkhâwmpuiah te, leh regional inkhâwmpuiahte kan inhmukhâwm ziah ṭhîn a. Chuvângin, Bible chuan amah betute’n “thu khat vuaa a rawng an bâwl tlân theih nân,” Jehova thiltumah hmun pawimawh tak a luah a ni.—Zep. 3:9.

9. Bible thuchah hre thiam tûrin eng mizia nge kan neih ngai? (Luka 10:21)

 ⁹ Jehova finna târ langtu thil dang lo ngaihtuah ta ila. Ani chuan Bible-a a ṭhen lai engemaw zât chu, chhiartu inngaitlâwm takte chauhvin an hriatthiam theih tûr zâwngin a ziak a ni. (Luka 10:21 chhiar rawh.) Khawi hmuna awmte pawhin Bible chu an chhiar a. Mi thiam pakhat chuan, Bible hian “lehkhabu dang zawng aiin chhiartu a ngah a, an chhiar uluk zâwk bawk,” tiin a sawi. Mahse, mi inngaitlâwmte chauhvin a thute chu an hre thiamin, an nunpui a ni.—2 Kor. 3:15, 16.

10. Eng kawng dangin nge Bible-in Jehova finna a târ lan?

¹⁰ Bible-a chuang Jehova finna chu kawng dang pawhin kan zir thei a. Ani chuan a pâwl anga min zirtîr nân mai bâkah, a mi mal taka min zirtîr nân leh min thlamuan nân Bible chu a hmang a ni. Kan za hian a Thu kan chhiarna aṭangin Jehova’n a mi mala min ngaihsakzia kan hre thei a ni. (Is. 30:21) Harsatna i hmachhawn laiin, Bible keuvin, i tân ngeia ziak nia lang châng chu i chhiar fuh tawh thîn em? Ni e, Bible chu mi maktaduai tam takte hriatthiam theih tûra ziak a ni. Engtin nge chutah chuan tûn laia i mamawh tak thute a chuan theih? A chhan chu, Bible Ziaktu chu lei leh vâna fing ber a nih vâng a ni.—2 Tim. 3:16, 17.

11. Bible ziah a nih laiin, Pathianin duhsak bîk a nei lo tih engtin nge a lantîr?

¹¹ Rorêlna dik chu Jehova mize dang leh a ni a. (Deut. 32:4) Chu chu duhsak bîk neih lohna nên a inthlunzawm tlat a, Jehova chuan duhsak bîk a nei lo. (Tirh. 10:34, 35; Rom 2:11) Duhsak bîk a neih lohna chu, a hun laia mi tam takte ṭawng hmana Bible ziak a nihna aṭangin kan hmu thei a ni. Bible bu hmasa lam 39-te chu chutih hun laia Pathian mite’n awlsam taka an hriatthiam theih, Hebrai ṭawng deuh veka ziak a ni a. Mahse, C.E. kum zabi khatnaah erawh chuan, Grik ṭawng chu nasa taka hman a ni a; chuvângin, Bible bu tâwp lam bu 27-te chu Grik ṭawng deuh veka ziak a ni thung. Jehova chuan a Thu chu ṭawng chi khat chauhvin a ziahtîr lo. Tûn laia mi tlûklehdingâwn riat dâwn laite chuan ṭawng chi hrang hrang an hmang a ni. Engtin nge mi tam takin Jehova chungchâng an zir theih?

12. Hêng ni hnuhnûng chhûng hian, Daniela 12:4-na a thlen famkim dân kawng khat chu eng nge ni?

¹² Zâwlnei Daniela kal tlangin, Jehova chuan tâwpna hunah Bible thu “hriatnate a pung dâwn,” tih a tiam a. Chu chu mi tam takin an hre thiam ang. (Daniela 12:4 chhiar rawh.) Chutianga hre thiam tûra ṭanpuitu thil pakhat chu, Bible leh Bible ṭanchhan thu leh hlate lehlinna, tihchhuahna, leh mi tam takte hnêna sem chhuahna hi a ni. Bible hi khawvêla lehkhabu lehlin leh sem chhuah tam ber a ni a. Hralh atâna tih chhuah Bible lehlinte chu a châng chuan a to thei hle. Jehova mite’n Pathian Thu chu a bu pum emaw, a ṭhen lai emaw chu ṭawng 240 chuangin an letling tawh a, chu chu a duh apiangte’n a thlâwnin an nei thei a ni. Chuvângin, hnam tina mite’n tâwpna a thlen hmain, “Ram chanchin ṭha” chu an zir thei a ni. (Mt. 24:14) Dik taka rorêltu kan Pathian chuan mi a tam thei ang berte chu, a Thu chhiarna hmanga amah hriat theihna hun remchâng pêk a duh a. Chu chu kan zaa min hmangaih êm vâng a ni.

13. Engvângin nge Bible-in Jehova hmangaihna a târ lang kan tih theih? (Johana 21:25)

¹³ Bible chuan Jehova mize ropui ber chu hmangaihna a ni tih hre thiam tûrin min  ṭanpui a. (1 Joh. 4:8) Jehova’n Bible-a a telhte leh telh lohte chungchâng hi lo ngaihtuah ta ila. Ani chuan amah nêna inlaichînna nei tûr te, tûna nun hlimawm nei tûr te, leh chatuana nunna nei tûra kan neih ngaite chu min hrilh a. Amaherawhchu, Jehova chuan min hmangaih avângin kan hriat sên loh khawpa tam thute min hrilh lo a ni.—Johana 21:25 chhiar rawh.

14. Eng kawng dangin nge Bible-a chuang thute chuan Pathianin min hmangaih tih a târ lan?

¹⁴ Pathian Jehova chuan zahawm taka min biain hmangaihna a lantîr bawk a. Bible-ah kan nun kawng tinrênga kan tih theih leh theih lohte sawiin dân chipchiar tak min pe lo va. Chu aiin, thu tlûkna ṭhate siam tûra min ṭanpui tûrin a taka thiltawn te, hrilh lâwkna phûrawm tak te, leh thurâwn ṭangkai takte a hmang a ni. Chutiang kawng chuan, Pathian Thu chuan thinlung taka amah hmangaih tûr leh a thu awih tûrin min chêttîr a ni.

15. (a) Engtin nge Jehova’n a Thu chhiartute chungah ngaihsakna a lantîr? (b) Milemah hian hmeichhe naupang, ṭhalai unaupa, leh kum upa unaunute chuan Bible-a tute chanchin nge an chhût ngun? (Gen. 39:1, 10-12; 2 Lal. 5:1-3; Lk. 2:25-38)

¹⁵ Bible chuan Jehova’n min ngaihsak hle tih a târ lang a ni. Engtin nge? A Thu chu mihring rilru vei zâwng lantîrtu chanchinin a khat a. Bible-a chuang mite chu “keimahni nungchang ang pu” an nih avângin, an rilru vei zâwng chu kan hre thiam thei a. (Jak. 5:17) Chu aia pawimawh zâwk chu, Pathianin keimahni ang mite a cheibâwl dân kan hmuhna aṭangin “[Jehova] chu khawngaihnain a khahzia leh zah a ngaih theihzia,” chiang lehzualin kan hre thiam thei a ni.—Jak. 5:11.

16. Bible-a thil tisualtute chungchâng kan chhiar hian Jehova chungchâng eng nge kan zir? (Isaia 55:7)

 ¹⁶ Bible chuan kawng danga Jehova min hmangaihna pawh a târ lang a. Chu bâkah, thil kan tihsual hunah pawh, kan Pathian chuan min kalsan lo vang tih min tiam a ni. Israel mite chuan Jehova chungah vawi tam tak thil sual an ti a; mahse, inchhîrna dik tak an lantîr chuan anni chu a ngaidam leh ṭhîn a ni. (Isaia 55:7 chhiar rawh.) Kum zabi khatnaa Kristiante pawh khân, Pathianin anmahni a hmangaih hle tih an hria a. Tirhkoh Paula chuan thlarauva thâwk khuma awmin, kawng sual pawi tak zawha inchhîrna lantîrtu chu ‘ngaidam a, thlamuan’ tûrin a Kristian unaute chu a fuih a ni. (2 Kor. 2:6, 7; 1 Kor. 5:1-5) Jehova’n amah betute chu an thil tih sual avânga a hnâwl mai lo hi a va chhinchhiah tlâk tak êm! Chu aiin, anni chu hmangaihna nei takin a ṭanpui a, a siam ṭha a, a ṭhian ni leh tûrin a sâwm bawk a ni. Tûn laia thil sual ti inchhîrna lantîrtu zawng zawngte chungah pawh, chutiang chuan a ti ang tih a tiam a ni.—Jak. 4:8-10.

17. Engvângin nge Bible chu thilpêk chhinchhiah tlâk tak a nih?

¹⁷ Jehova chuan thilpêk duhawm tak min pe a. Engvângin nge chu a thilpêk Bible chu a chhinchhiah tlâk êm êm? Kan hriat tawh angin, Bible chuan Pathian finna, a rorêlna dik, leh a hmangaihnate a târ lan vâng a ni. He lehkhabu hian Jehova’n amah kan hriat a duh tih a târ lang a. Ani chuan a ṭhian ni tûrin min duh a ni.

18. Engtin nge Jehova “thilpêk ṭha” Bible avânga kan lâwmzia kan lantîr theih?

¹⁸ “Thilpêk ṭha” Pathian Thu chu kan ngaihlu hle a. (Jak. 1:17) Chumi kan ngaihhlutzia chu i lantîr zawm zêl ang u. A thu thianghlimte ngun taka chhiarin leh chhût ngunin kan ngaihhlutzia kan lantîr thei a. Chutianga kan tih chuan, a Ziaktu ropui tak chuan theih tâwp kan chhuahna chu mal a sâwm ang tih leh, ‘Pathian hriatna kan chhar chhuak ang,’ tih kan chiang thei a ni.—Thuf. 2:5.