YOMARA-I leh a naute pahnih—Marcelo-a leh Hiver-a—chu Guatemala rama thingtlâng khaw pakhatah an awm a. Yomara-i chuan Thuhretute nên Bible a zir ṭan a, a hnuah, a naute pawhin an rawn zir ve a ni. Mahse, harsatna an nei a. An unau thum chuan an mit a del a, mitdel hawrawp an chhiar thiam lo bawk. Chuvângin, anmahni Bible zirtîrtu chuan zirlaia thute leh, Bible châng târ lante chu a chhiarsak ṭhîn a ni.

Kohhran inkhâwma tel chu an tân harsatna dang a ni leh a. An hnaih bera awm Kingdom Hall chu minute 40 kal a ni a, anmahni chauh chuan an kal thei lo a ni. Mahse, unaute chuan inkhâwm zawng zawnga an tel theih nân, an tân ruahmanna an siamsak a. Chûng unau thumte’n chawlhkâr chhûng inkhâwma chanvote an rawn neih ṭan chuan, an thusawi tûrte an hriat reng theih nân unaute’n an ṭanpui leh a ni.

Kum 2019, May thla khân, kohhran inkhâwmte chu an awmna khuaa neih ṭan a ni a. Chutih hun lai chuan, regular pioneer nupa tuak khat chu an khuaah chuan an insawn a. Chu nupa tuak chuan mitdel hawrawp an thiam lo chung pawhin, chûng unau thumte ziak leh chhiar thiam tûra zirtîr chu thiltumah an nei a. Tichuan, library-ah kalin mi dangte mitdel hawrawp hman dân an zirtîr theih nân, chumi chungchâng ziakna lehkhabu an va hawh a ni.

Thla rei lote hnuah, unau thumte chuan mitdel hawrawp ziak leh chhiar chu an thiam ta thuai mai a, chu chuan thlarau lamah hma a sâwntîr lehzual a ni. Tûnah chuan, Yomara-i, Marcelo-a, leh Hiver-a te chuan regular pioneer niin rawng an bâwl a. Unau Marcelo-a chu kohhranho rawngbâwltu a ni bawk. An unau thum chuan kâr tluanin thlarau lam thiltihnaahte an inhmang nasa hle a. Ṭhahnemngaihna kawnga unaute tihhmuhtu an ni.

Chûng unau thumte chu kohhranin hmangaih taka a ṭanpui avângin an lâwm hle a. Unaunu Yomara-i chuan, “Thuhretute nêna kan inhmuh ṭan phat aṭangin, kan chungah Kristian hmangaihna an lantîr a ni,” tiin a sawi. Unau Marcelo-a chuan: “Tualchhûng kohhranah ṭhian ṭha takte kan nei a, hmangaihnaa inpumkhat khawvêl pum huapa unaute zîngah kan tel a ni,” tiin a sawi ve bawk. Unaunu Yomara-i leh a naute pahnih chuan, lei pumpui paradis-a a chan hun hmuh chu an nghâkhlel tak zet a ni.—Sâm 37:10, 11; Is. 35:5.