1. Isua tân Pathian Lehkha Thu a pawimawh tih engin nge târ lang?

 ISUA zirtîrna ngaihthlâk chu eng ang nge ni ang tih han mitthla chhin teh. Pathian Lehkhabu Thianghlima, a thu hriatsate chu vawi tam tak a sawi chhâwng a ni! Baptisma a chan hnua a thusawi chhinchhiah hmasak ber leh, a thih hmaa a thusawi hnuhnûng ṭhenkhatahte pawh, Isua chuan Pathian Lehkha Thute a sawi chhâwng a ni. b (Deut. 8:3; Sâm 31:5; Lk. 4:4; 23:46) Chu bâkah, chûng thilthleng pahnihte inkâr, kum thum leh a chanve chhûng pawh khân, Isua chuan Pathian Lehkha Thute chu vântlâng hmaah chhiarin, a sawi chhâwng fo va, chûngte chu a hrilhfiah ṭhîn bawk.—Mt. 5:17, 18, 21, 22, 27, 28; Lk. 4:16-20.

2. Isua chu a ṭhan len zêl rualin, Pathian Lehkha Thu hre chiang tûrin engin nge ṭanpui? (A kâwma milem en rawh.)

² A rawngbâwlna a ṭan hma kum tam tak chhûng khân, Isua chuan Pathian Thu chu vawi tam tak a chhiarin, a ngaithla fo va. In lamah chuan, Mari leh Josefate’n nî tina chhûngkaw tîtînaa Pathian Lehkha Thu an sawite chu a hre ṭhîn ngei ang. c (Deut. 6:6, 7) Chawlhni apiangin a chhûngte rualin, inkhâwmna inah a inkhâwm ṭhîn ang tih kan chiang thei bawk. (Lk. 4:16) Chuta a awm lai chuan, Pathian Lehkha Thu chhiarte chu ngun takin a ngaithla ngei ang. A hnuah, amah ngeiin chûng Lehkha Thianghlimte chu a chhiar thiam ta a ni. Chuvângin, Isua chuan Pathian Lehkha Thu chu a hre chiang mai ni lovin, chûngte chu a ngainain, a inthununtîr bawk. Entîr nân, kum 12  mi lek a nih laia biak ina thilthleng kha han ngaihtuah lêt teh. Mosia Dân hre bel êm êm zirtîrtute pawhin, “[Isua’n] a hriatzia leh a chhânzia chu mak an ti hle” a ni.—Lk. 2:46, 47, 52.

3. He thuziakah hian eng nge kan ngaihtuah ang?

³ Keini pawhin Bible chhiar ziahin, Pathian Thu hriatna leh ngainatna kan nei thei a. A nih leh, engtin nge kan thu chhiar chu kan hlâwkpui lehzual theih ang? Lehkhaziaktu te, Pharisai te, Saddukaite pawh tiamin, Dân hre chiang takte hnêna Isua thusawi aṭangin kan inzir thei a ni. Chûng sakhaw hruaitute chuan Pathian Lehkha Thu chhiar fo mah se, an thu chhiarte chu an hlâwkpui lo. Chûng mite’n Pathian Lehkha Thu hlâwkpui lehzual tûra an tih ngai thil pathumte chu Isua’n a târ lang a. An hnêna a thusawite chuan (1) kan thu chhiar hre thiam tûr te, (2) thlarau lam ro hlu hmu chhuak tûr te, leh (3) Pathian Thu insiam ṭhattîr tûrtea kan theihna ti hmasâwn tûrin min ṭanpui dâwn a ni.

4. Luka 10:25-29-na hian Pathian Thu chhiar chungchângah eng nge min zirtîr?

⁴ Pathian Thu kan chhiarte chu a awmzia hriatthiam kan duh a. Kan hriatthiam loh chuan, kan hlâwkpui pumhlûm thei lo vang. Entîr nân, Isua leh “Dân hretu tu emaw” inbiakna hi lo ngaihtuah ta ila. (Luka 10:25-29 chhiar rawh.) Chu pain chatuana nunna a neih theih nâna a tih ngai a zawh khân, Isua chuan: “Dân lehkhabuah eng nge ziak ni? Chutah chuan eng nge i chhiar ṭhin?” tia zâwtin Pathian Thu a kawhhmuh a ni. Chu pa chuan Pathian leh vêngte hmangaihna chungchâng târ lanna thute chu la chhuakin chhânna dik tak a pe a. (Lev. 19:18; Deut. 6:5) Mahse, a dawta a sawi: “Ka vêngte chu tu nge ni?” a tih hi chhinchhiah ang che. Ani chuan a thu chhiar awmze dik tak a hre thiam lo tih a târ lang a. Chuvângin, chûng thute chu nunpui dân tûr dik tak a hre thiam lo a ni.

5. Ṭawngṭaina leh muangchânga chhiarna chuan kan hriatthiamna chu engtin nge a tihpun theih?

⁵ Taima taka chhiar ziahin, Pathian Thu kan hriatthiamna chu kan tipung thei a. Hêng thurâwnte hian a ṭanpui thei ang che. I chhiar hmain ṭawngṭai rawh. Bible hre thiam tûra Jehova ṭanpuina kan mamawh avângin, rilru pe taka chhiar thei tûrin a thlarau thianghlim ṭanpuina kan dîl thei a ni. Tichuan, muang chângin chhiar ang che. Chu chuan i thu chhiarte hre thiam tûrin a ṭanpui dâwn che a ni. Bible a ria chhiar, a nih loh leh aw thunsa ngaihthlâk paha chhiar chu i hlâwkpui mai thei a. Aw thunsa i ngaihthlâkna leh a thute a bua i lo en ve zêlna chuan, hre thiam tûr te, hre reng tûr te, leh i thu chhiar hlâwkpui lehzual tûrtein a ṭanpui dâwn che a ni. (Jos. 1:8) I chhiar zawhah, Jehova hnênah a Thu a pêk che avânga lâwmthu sawiin, leh i thu chhiarte nunpui thei tûra a ṭanpuina dîlin ṭawngṭai leh ang che.

6. Bible i chhiar laiin, zawhnate inzawh leh tawi têa ziah chhuahna chuan engvângin nge a ṭanpui theih che? (Milem en bawk rawh.)

⁶ Bible hre thiam lehzual tûra ṭanpui theitu che thurâwn dang pahnih a la awm a. I thu chhiar chungchângah zawhnate inzâwt ang che. Thilthleng pakhat i chhiar hunah heti hian inzâwt rawh: ‘Chutah chuan tute nge tel? Tuin nge thu sawi? Tu nge a biak a, engvângin nge? Chûng thilte chu khawi hmun leh, eng huna thleng nge?’ tiin. Chûng zawhnate chuan, i thu chhiarin a sawi tum chu ngaihtuaha hre thiam  tûrin a ṭanpui ang che. Chu bâkah, i thu chhiar chu tâwi têin ziak chhuak bawk rawh. Chutianga i ziah chhuah chuan, i ngaihtuah nasa lehzual a, chu chuan hre thiam lehzual tûrin a ṭanpui dâwn che a ni. Ziah chhuahna chuan i thu chhiar hre reng tûrin a ṭanpui thei bawk che. Zawhnate i ziak chhuak thei a, zir bingna i neih aṭanga i thu chhar chhuahte i ziak thei bawk a, a thu pawimawh laite i khaikhâwm theiin, i thu chhiar i hman theih dân tûr tawi têa i ziah theih bâkah, i thu chhiar chungchânga i ngaih dânte i ziak thei bawk a ni. Chutianga i tih chuan, Pathian Thu chu i tân liau liauva a thuchah anga thlîr tûrin a ṭanpui thei che tih i hmu ang.

7. Bible kan chhiar hunah, eng nge kan neih ngai a, engvângin nge? (Matthaia 24:15)

⁷ Bible-a kan thu chhiarte hre thiam tûra kan neih ngai thil pawimawh tak chu Isua’n a sawi a—chu chu hriatthiam theihna a ni. (Matthaia 24:15 chhiar rawh.) Hriatthiam theihna chu eng nge ni? Chu chu thu pakhat thu dang nêna a inzawmna leh, thu dang laka a danglamna hriat theihna leh chiang taka a târ lan loh thute hriatthiamna a ni. Chu bâkah, Isua sawi angin Bible hrilh lâwkna thlen famkimtîrtu thilthlengte hre tûrin hriatthiam theihna kan neih a ngai a. Bible-a kan thu chhiar zawng zawngte hlâwkpui pumhlûm thei tûr pawhin, chu chu kan neih a ngai a ni.

8. Engtin nge hriatthiam theihna nêna Bible kan chhiar theih ang?

⁸ Jehova chuan a chhiahhlawhte chu hriatthiam theihna a pe a. Chuvângin, a hnênah ṭawngṭai la, chumi nei chho thei tûr chuan a ṭanpuina dîl ang che. (Thuf. 2:6) Engtin nge i ṭawngṭaina mila thil i tih theih ang? I thu chhiarte chu ngun takin chhût la, i thil hriat dangte nên a inzawm dân chhinchhiah ang che. Nangmah ṭanpui tûr chein, Jehova Thuhretute Tâna Zir Bingna Hmanrua ang chi, Bible zirna ṭanpuitu chu râwn ang che. Chûng  hmanruate chuan, Bible thu hre thiam tûr leh i nunpui theih dân tûr kawngte hmu thiam tûrin a ṭanpui ang che. (Heb. 5:14) Hriatthiam theihna nêna i chhiar chuan Bible thu i hriatthiamna a pung ang.

9. Eng Bible thutak pawimawh tak nge Saddukaite’n an pawm loh?

⁹ Saddukaite chuan Hebrai Pathian Lehkha Thu bu hmasa lam pangate chu an hre bel hle a; mahse, thlarauva thâwk khum chûng lehkhabutea thutak pawimawh takte chu an pawm lo a ni. Entîr nân, Saddukaite’n thawhlehna chungchâng an zawh laia Isua chhân dân kha lo ngaihtuah ta ila. Ani chuan: “Mosia lehkhabua hnim buk thuah khân, Pathianin, ‘Kei Abrahama Pathian, Isaaka Pathian, Jakoba Pathian ka ni,’ ti a, a biakzia kha in chhiar lo vem ni?” tiin a zâwt a ni. (Mk. 12:18, 26) Saddukaite chuan chu thu chu vawi tam tak an chhiar ngei ang a; mahse, Isua zawhna chuan Bible thutak pawimawh tak—thawhlehna zirtîrna—chu an pawm lo tih a târ lang a ni.—Mk. 12:27; Lk. 20:38. d

10. Bible kan chhiar huna kan ngaihven tûr chu eng nge ni?

¹⁰ Eng nge kan zir theih? Bible kan chhiar hunah châng pakhat emaw, thilthleng pakhat emawin min zirtîr theih zawng zawng chu hriat kan duh a. Zirtîrna bulpuite chauh ni lovin, thutak ril takte leh thu bul inphûm rûte chu hmuh chhuah kan duh a ni.

11. Timothea thawn hnih 3:16, 17-na thu nêna inmilin, engtin nge Bible-a lunghlute i hmuh chhuah theih ang?

¹¹ Bible i chhiar hunah engtin nge thlarau lam ro hlute i hmuh chhuah theih ang? 2 Timothea 3:16, 17-in a sawi hi lo ngaihtuah ta ila. (Chhiar rawh.) “Pathian Lehkha Thu zawng zawng hi” (1) zirtîr kawngah te, (2) thiam loh chantîr kawngah te, (3) zilh kawngah te, leh (4) felna zirtîr kawngah te “a sâwt bawk a ni” tih chhinchhiah ang che. Chûng a hlâwkna palite chu Bible bu i chhiar ngai vak lohte aṭang pawhin i hmu thei a ni. I thil chhiarin Jehova, a thiltum, leh Pathian thu bul chungchânga a thil zirtîr che chu hmu thiam tûrin bih chiang rawh. Thiam loh chantîrna kawnga a ṭangkai dân ngaihtuah la. Bible chângte’n ngaihtuahna ṭha lo, a nih loh leh rilru put hmang ṭha lote hriaa, hnâwl tûr leh Jehova chunga rinawm reng tûra a ṭanpui dân che hriatna hmangin, chutiang chuan i ti thei a ni. I thu chhiar lai chu thlîr dân dik lo zilh nân, a nih loh leh siam ṭhat nâna i hman theih dân bih chiang ang che. Chu thlîr dân dik lo chu tuemawin rawngbâwlnaa a sawi pawh a ni thei. I Bible châng chhiarahte chuan Jehova thlîr anga, thil thlîr ve tûra felna zirtîr theitu che a awm em tih zawng ang che. Hêng thil palite hi rilrua i vawn tlat chuan, i Bible chhiarna  hlâwkpui lehzual tûra ṭanpui theitu che thlarau lam lunghlute i lai chhuak ang.

12. Engvângin nge Isua’n Pharisaite chu, “In chhiar lo vem ni?” tia a zawh?

¹² Isua chuan Pharisaite hnênah pawh Pathian Lehkha Thu thlîr dân dik lo an neih lailang tûrin, “In chhiar lo vem ni?” tiin a zâwt bawk a. (Mt. 12:1-7) e Chumi ṭum chuan, Pharisaite’n Isua zirtîrte chu Chawlhni dân bawhchhiaah an puh a ni. Anmahni a chhân lêtnaah, Isua chuan Bible entîrna pahnih a sawi a, Hosea bua châng pakhat a lâk chhuah chuan, Pharisaite’n Chawlhni dân pêk a nih chhan an hre thiam lo tih leh, khawngaihna an lantîr lo tih a târ lang a ni. Engvângin nge hêng mite hi an Pathian Thu chhiarin a siam ṭhat loh? A chhan chu sawisêl duhna leh chapona rilru put hmang nêna an chhiar vâng a ni. An rilru put hmang chuan an thu chhiarte an hriatthiamna tûr a dâl a ni.—Mt. 23:23; Joh. 5:39, 40.

13. Eng ang rilru put hmang neiin nge Bible kan chhiar ang a, engvângin nge?

¹³ Isua thusawi aṭangin, rilru dik tak puin Bible kan chhiar tûr a ni tih kan zir a. Pharisaite ang lo takin, kan inngaitlâwmin zir duhna kan nei tûr a ni. ‘Thuchah chu thuhnuairawlh takin kan pawm’ tûr a ni bawk. (Jak. 1:21, Parallel Bible) Thuhnuairawlh tak kan nih chuan, Pathian Thuin min siam ṭhat kan inphal ang a. Sawisêl duhna leh chapona rilru put hmang kan hnâwl chauhvin zahngaihna, khawngaihna, leh hmangaihna chungchânga Bible-a thute chuan min siam ṭha thei ang.

14. Bible kan insiam ṭhattîr leh tîr loh engtin nge kan hriat theih ang? (Milem en bawk rawh.)

¹⁴ Mi dangte kan cheibâwl dân chuan Pathian  Thu kan insiam ṭhattîr leh tîr loh a lantîr thei a. Pharisaite chuan an rilru put hmang chu Pathian Thu an siam ṭhattîr loh avângin, ‘mi thiamte chu thiam loh an chantîr’ a ni. (Mt. 12:7) Chutiang bawkin, mi dangte kan thlîr dân leh kan cheibâwl dân chuan Pathian Thu kan insiam ṭhattîr leh tîr loh a târ lang a ni. Entîr nân, mi dangte ṭhatna lai kan hmuh chu kan sawi ṭhîn nge ni a, an tlin lohnate chu kan sawi ziah ṭhîn zâwk? Khawngaihna nei tak leh ngaihdam peih tak nge kan nih a, mite kan sawisêlin thinurna kan pai reng zâwk? Chutianga mahni inenfiahna chuan kan ngaihtuahna te, kan rilru put hmang te, leh kan thiltihte chu kan thu chhiar kan insiam ṭhattîr leh tîr loh a târ lang thei a ni.—1 Tim. 4:12, 15; Heb. 4:12.

15. Isua’n Pathian Lehkhabu Thianghlim chu engtin nge a ngaih?

¹⁵ Isua chuan Pathian Lehkhabu Thianghlim chu a ngaina hle a, Sâm 40:8-a ziak: “Aw ka Pathian, i duh zâwng tih hi ka lâwm zâwng tak a ni; a ni, i dân thu chu ka thinlungah a awm reng e,” tih thute hian Isua rilru put hmang chu a lo sawi lâwk a. Chuvângin, Jehova rawngbâwlnaah a hlimin a hlawhtling hle. Pathian Thu kan chhiar a, ngainat kan zir chuan kan hlimin kan hlawhtling ve thei a ni.—Sâm 1:1-3.

16. Pathian Thu chhiarna hlâwkpui lehzual tûrin eng nge i tih ang? (“ Isua Thusawite Chuan I Thu Chhiarte Hre Thiam Tûrin A Ṭanpui Thei Che,” tih bâwm en rawh.)

¹⁶ Isua thusawi leh entawn tûr siamte nêna inmilin kan Bible chhiar dân chu i tihmasâwn zêl ang u. Ṭawngṭai te, zawi muanga chhiar te, zawhna inzawh te, leh tâwi têa chhinchhiahtein Bible kan hriatthiamna chu kan tipung thei a. Bible ṭanchhan thu leh hla chhuahte hmanga kan thu chhiarte ngun taka zir chiangin, hriatthiam theihna kan hmang thei a ni. Kan hriat ṭhan loh thute pawh tiamin, thilthlengte aṭanga thlarau lam ro hlute chu zawngin, Bible thiam lehzuala hman dân kan zir thei bawk a. Pathian Thu kan chhiar hunah rilru put hmang dik neih tum tlatin kan insiam ṭhattîr thei bawk. Chutianga theih tâwp chhuaha kan tih chuan, kan Bible chhiar chu kan hlâwkpui lehzualin, Jehova kan hnaih lehzual dâwn a ni.—Sâm 119:17, 18; Jak. 4:8.