1. Isua’n tâwpna hun chungchângah a zirtîrte chu eng nge a hrilh a, eng vaukhânna nge a pêk?

 ISUA thih hma ni rei lo têah, a zirtîr palite chuan: “Khawvêl tâwpna chhinchhiahna chu eng nge ni ang?” tiin ani chu an zâwt a. (Mt. 24:3) Chûng zirtîrte chuan Juda kalhmang tâwp hun an hriat theih dân tûr an ngaihtuah niin a lang. A chhânnaah, Isua chuan Juda kalhmang tâwpna chungchâng mai bâkah, tûna kan awm mêkna, “khawvêl tâwpna” hun chungchâng pawh a sawi tel bawk. Tâwpna hun chungchângah Isua’n: “Nimahsela chu mi ni leh a dâr thu chu Pa chauh lo chuan tu man, vâna vântirhkohte pawhin, Fapa pawhin an hre lo,” tiin a sawi a. Chumi hnuah, a zirtîr zawng zawngte chu ‘inring renga awm’ tûrin a vaukhân a ni.—Mk. 13:32-37.

2. Juda kalhmang hnuaia awmte tân, engvângin nge inring renga awm a pawimawh?

² Kum zabi khatnaa Juda Kristiante chu an nun chhanhim a nih theih nân inring renga an awm a ngai a. Isua’n a hnungzuitute chu Juda kalhmang a tâwp dâwn tih an hriat theihna tûrte a hrilh a ni. Ani chuan: “Sipaihoten Jerusalem khua an hual in hmuh hunah, a boral dâwn tih hria ang che u,” tiin a sawi a. Chutih hunah chuan, Isua vaukhânna chu zâwmin ‘tlângahte an tlân bo’ a ngai ang. (Lk. 21:20, 21) Chu vaukhânna zâwmtute chu Rom mite’n Jerusalem an tihchhiat laiin an dam khawchhuak a ni.

3. He thuziakah hian eng nge kan sawiho vang?

 ³ He khawvêl kalhmang suaksual tâwpna hunah kan awm mêk a. Chuvângin, keini pawh ngaihven leh inring rengin kan awm tûr a ni. He thuziakah hian khawvêla thilthlengte ngaihven reng chunga kan inbûk tâwk theih dân te, fîmkhur taka kan awm theih dân te, leh hun kan la neihte fing taka kan hman theih dânte kan sawiho vang.

4. Tûn lai khawvêla thilthlengte’n Bible hrilh lâwkna a thlen famkimtîr dân chu engvângin nge kan ngaihven ang?

⁴ Tûn lai khawvêla thilthlengte’n Bible hrilh lâwkna a thlen famkimtîr dân ngaihven nachhan tûr ṭha tak kan nei a. Entîr nân, Isua chuan Setana kalhmang tâwpna a hnai tih hre tûra min ṭanpuitu tûr thilthlengte chungchâng min hrilh a ni. (Mt. 24:3-14) Tirhkoh Petera’n kan rinna a chak reng theih nân, hrilh lâwkna thlen famkimnate chu ngaihven tûrin min fuih a. (2 Pet. 1:19-21) Bible-a bu hnuhnûng ber chu: “Isua Krista thu puan chhuah, Pathianin a bâwihte hriattîr atân a hnêna a pêk, thil lo awm lawk tûr thu chu,” tiin a inṭan a ni. (Thup. 1:1) Chuvângin, tûn lai khawvêla thilthlengte leh, chumiin Bible hrilh lâwkna a thlen famkimtîr mai theih dânte chu hriat kan châk hle a. Chu bâkah, chûng thilthlengte chungchâng unaute nêna sawiho kan châk hle thei bawk.

5. Eng thil nge kan pumpelh ang a, eng nge kan tih ang? (Milem en bawk rawh.)

⁵ Amaherawhchu, Bible hrilh lâwknate chungchâng kan sawiho hunah, rinthua thil sawi chu kan pumpelh tûr a ni. Engvângin nge? A chhan chu, kohhran chhûnga inrem lohna awmtîr thei eng thu mah sawi kan duh loh vâng a ni. Entîr nân, khawvêl hruaitute’n indona eng emaw titâwp a, remna leh muanna an awmtîr theih dân tûr an sawi kan hre mai thei a. Chutiang thuchhuah chuan, 1 Thessalonika 5:3-a Bible hrilh lâwkna a thlen famkimtîr anga rinthua lo sawi aiin, chumi chungchânga thu leh hla tihchhuah thar ber chu hriat kan tum zâwk tûr a ni. Jehova inawpna pâwlin a tihchhuah thu leh hla ṭanchhana thil kan sawiho hian, kohhran chu “ngaihtuahna hmunkhata” awm reng tûrin kan ṭanpui a ni.—1 Kor. 1:10; 4:6.

6. Petera thawn hnih 3:11-13 aṭangin eng nge kan zir theih?

⁶ Petera thawn hnih 3:11-13 chhiar rawh. Tirhkoh Petera chuan Bible hrilh lâwknate kan bih chian hunah thlîr dân inbûk tâwk tak nei tûrin min ṭanpui a. Ani chuan, “Pathian ni lo thlen hun tûr chu beisei” tûrin min fuih a ni. Engvângin nge? Jehova’n Armageddon a rawn thlentîr ‘nî leh hun’ tûr chu chhût chhuah kan tum vâng ni lovin, kan hun la neih hi ‘awm dân thianghlim leh Pathian ngaihsaka’ awmna atâna hman kan duh vâng zâwk a ni. (Mt. 24:36; Lk. 12:40) Thu danga sawi chuan, nungchang thianghlim vawn reng kan duh a, Jehova rawngbâwlnaa theih tâwp kan chhuahna chuan amah kan hmangaihna thûk tak a târ lang a ni tih chian kan duh bawk. Chutianga ti tûr chuan, kan fîmkhur a ngai a ni.

7. Engtin nge kan fîmkhur tih kan lantîr theih? (Luka 21:34)

⁷ Isua chuan a zirtîrte chu khawvêla thilthlengte chauh ngaihven lovin, an thiltiha fîmkhur tel tûr pawhin a hrilh bawk a. Chu chu Luka 21:34-a vaukhânna thu-ah hian chiang takin a lang a ni. (Chhiar rawh.) Isua thusawi: “Fîmkhur rawh u,” tih chu chhinchhiah  ang che. Mi fîmkhur chu Pathian Jehova nêna an inlaichînna tichhe thei, thil hlauhawm eng pawh lakah a harhvâng reng a, chûng thilte pumpelh tûr chuan hma a la bawk. Chutiang kawng chuan Pathian hmangaihnaah a awm reng a ni.—Thuf. 22:3; Jud. 20, 21.

8. Tirhkoh Paula’n Kristiante chu eng fuihna nge a pêk?

⁸ Tirhkoh Paula’n Kristiante chu fîmkhur tûrin a fuih a. Entîr nân, Ephesi khuaa Kristiante chu: “Mi fing lote anga awm lovin, mi fingte anga awm zâwkin, in awm dânah fîmkhur rawh u,” tiin a hrilh a ni. (Eph. 5:15, 16) Setana chuan Jehova nêna kan inṭhianna tihchhiat a tum reng a; chuvângin, a beihna eng pawh laka invêng thei tûrin Bible chuan “Lalpa duh zâwng eng nge ni tih lo hre zâwk rawh u,” tiin min fuih a ni.—Eph. 5:17.

9. Kan tâna Jehova duh zâwng chu engtin nge kan hriat theih?

⁹ Jehova nêna kan inṭhianna tichhe thei thil zawng zawng chu Bible-in a târ lang vek lo va. Bible-in chiang taka a târ lan loh dinhmunte chungchângah thu tlûkna kan siam a ngai fo ṭhîn. Duh thlanna fingte siam thei tûr chuan “Lalpa duh zâwng” kan hriat a ngai a. Pathian Thu zira, chhût ngunna nei ziahin a duh zâwng chu kan hre thei a ni. Jehova duh zâwng kan hriatthiam a, “Krista rilru” ang put kan tum poh leh, kan thil tih tûr chungchângah dân chiang tak a awm loh hunah pawh ‘mi fingte angin’ kan awm thei lehzual ang. (1 Kor. 2:14-16) Hlauhawm ṭhenkhat chu awlsam taka hriat theih a nih laiin; hriat mai harsate pawh a awm bawk a ni.

10. Kan pumpelh ngai thil hlauhawm ṭhenkhat chu engte nge?

¹⁰ Thil hlauhawm kan pumpelh ngaite zîngah chuan; inchhaider te, zu ruih te, a lutuka ei te, mi dang tina zâwnga thusawi te bâkah, tharum thawhna lam hawi intihhlimna te, saruak lem leh thuziak te, leh chutiang lam thil ente a tel a. (Sâm 101:3) Kan khingpui Diabola chuan Jehova nêna kan inṭhianna tihchhiat theihna hun remchâng a zawng reng a ni. (1 Pet. 5:8) Kan fîmkhur loh chuan Setana’n kan rilru leh thinlungah thîkna, rinawm lohna, duhâmna, huatna, chapona, leh lungnih lohnate a tuh thei a. (Gal. 5:19-21) A tîrah chuan, chûng rilru put hmangte chu a nasa lutuk lo pawh a ni thei. Mahse, paih bo tûra hma kan lâk vat loh chuan, hnim hlîng nei ang maia lo ṭhangin harsatna a thlen dâwn a ni.—Jak. 1:14, 15.

11. Thil hlauhawm hriat mai harsa kan pumpelh tûr chu eng nge ni a, engvângin nge?

¹¹ Thil hlauhawm hriat mai harsa kan pumpelh ngai pakhat chu ṭhian sual kawm a ni a. He dinhmun hi han ngaihtuah teh. I Kristian thurin ṭâwmpui lo tuemaw nên hna in thawk dûn a. Jehova Thuhretute chu a ṭha zâwnga thlîr tûra i duh avângin, ngilneihna lantîrin i ṭanpui ṭhîn a ni. A chângin, chhûn chaw in ei tlâng a. A hnuah phei chuan, in ei tlâng ziah ta nghe nghe a ni. Eng emaw chângin, in tîtîna chuan nungchang bawlhhlawhna lam a hawi ṭhîn a, a tîrah chuan sawipui loh i tum a ni. Rei lo têah, a thil sawite chu ngaia neiin, pawi tihna i nei tawh lo. Tichuan, ni khat chu hna bân hnua thil inpuiah a sâwm che a, a sâwmna chu i pawm a ni. Zâwi zâwiin, a ngaih dân chu i ṭâwmpui ṭan a. A tih dân anga thil ti ṭan ve tûr chuan hun a ngai rei lo hle ang. Ni e, mi zawng zawng chungah ngilneihna leh zahna kan lantîr tûr chu a ni ngei mai; mahse, kan hun hmanpuite chuan nasa takin min thunun thei tih kan hre reng tûr a ni. (1 Kor. 15:33) Isua min fuih anga kan fîmkhur a nih chuan Jehova tehnate mila nung lote nêna  ṭûl lo taka inkawm chu kan pumpelh ang a. (2 Kor. 6:15) Thil hlauhawm chu hmuin kan pên san ang.

12. Isua zirtîrte’n tâwpna an nghah laiin eng nge an tih ang?

¹² Isua’n a zirtîrte chu tâwpna an nghah laia buai reng tûrin a duh a. Anni chu hnathawh tûr a pe a. “Jerusalem khuaah te, Judai leh Samari ram khaw tinah te, kâwlkil thleng pawhin” chanchin ṭha hril tûrin thu a pe a ni. (Tirh. 1:6-8) Isua hnungzuitute dawn chu hna hautak tham tak a va ni êm! Chu hnaa inpumpêkin fing takin an hun an hmang a ni.

13. Engvângin nge fing taka hun kan hman a ngaih? (Kolossa 4:5)

¹³ Kolossa 4:5 chhiar rawh. Fîmkhur taka awm tûr chuan kan hun hman dân ngun taka kan ngaihtuah a ngai a. “Beisei loh thilthlengte” chuan tupawh min nghawng thei a. (Thur. 9:11, NWT) Kan nun kan chân thut pawh a ni thei a ni.

14-15. Engtin nge kan hun fing taka kan hman theih ang? (Hebrai 6:11, 12) (Milem en bawk rawh.)

¹⁴ Jehova duh zâwng tiin leh amah nêna kan inṭhianna tinghetin fing takin hun kan hmang thei a. (Joh. 14:21) “Nghet takin, tihchêt rual  lohvin, Lalpa hna ṭhahnemngai taka thawk fovin” kan awm a ngai a ni. (1 Kor. 15:58) Chutianga kan tih chuan, tâwpna—kan nun tâwpna emaw, he kalhmang suaksual tâwpna emaw—a lo thleng a nih pawhin inchhîrna kan nei lo vang.—Mt. 24:13; Rom 14:8.

¹⁵ Tûn laiah, khawvêl pum huapa Pathian Ram chanchin an hrilhnaah, Isua’n a zirtîrte chu a kaihruai zâwm zêl a. Ani chuan a thutiam a hlen a ni. Jehova inawpna pâwl hmangin thu hrilh dân tûr min zirtîrin, chanchin ṭha theh darh nâna kan mamawh hmanruate min pe bawk. (Mt. 28:18-20) Thu hrilhna leh zirtîrna hnaa taima taka telin leh, Jehova’n he kalhmang tâwpna a rawn thlentîr hun kan nghah ruala inring renga awmin kan tih tûrte kan ti a. Hebrai 6:11, 12-a fuihna chu nunpuiin, kan beiseina chu a ‘tâwp thlengin’ kan vuan nghet tlat dâwn a ni.—Chhiar rawh.

16. Eng nge tih kan tum tlat ang?

¹⁶ Jehova chuan Setana kalhmang tâwpna tûr, a nî leh dârkâr chu a ruat tawh a. Chu nî a lo thlen chuan, a Thu-a hrilh lâwkna chuang zawng zawng chu a thlen famkimtîr vek ang. Mahse, a châng chuan tâwpna chu lo thleng mai lo tûr angin kan ngai thei a ni. Amaherawhchu, Jehova nî chu “a tlai chuang lo vang.” (Hab. 2:3) Chuvângin, ‘Jehova lam enin, kan chhandamna Pathian chu nghah’ i tum tlat ang u—Mik. 7:7.