1. Kan nunna hi Pathian Jehova tân engtiang khawpa hlu nge a nih?

 I ṬHIAN pakhatin in a pe che angah han inmitthla chhin teh. In chu a bang ṭhen lai a khawk a, a chung pawh a far bawk. Chutiang a ni chung pawhin, in chu dollar maktaduai tam tak hu a la ni tho a ni. Chu in chu i hlutin, ṭha takin i enkawl ngei ang tih a chiang. Chutiang chiah chuan, Jehova’n thilpêk hlu tak nunna min pe a. A nihna takah chuan, kan nunna a ngaihhlutzia chu a Fapa tlanna atâna min pein a lantîr a ni.—Joh. 3:16.

2. Korinth thawn hnih 7:1-in a târ lan angin, Jehova’n engti tûrin nge min beisei?

² Jehova chu nunna Tuikhur a ni a. (Sâm 36:9) Tirhkoh Paula chuan he thutak hi hriain: “Amah avângin kan nung, kan che, kan awm a ni si a,” tiin a sawi a ni. (Tirh. 17:25, 28) Chuvângin, kan nunna hi Pathian thilthlâwnpêk a ni tih kan sawi thei a ni. Ani chuan kan nun zawm zêl theih nâna kan mamawhte chu hmangaihna nei takin min pe a. (Tirh. 14:15-17) Mahse, kan nun chu mak tak maiin a vênghim lo. Chu aiin, theih tâwp chhuaha kan tisa lam leh, thlarau lam hrisêlna ngaihsak tûrin min beisei zâwk a ni. (2 Korinth 7:1 chhiar rawh.) Engvângin nge kan hrisêlna leh kan nunna kan vênhim ang a, engtin nge chutiang chuan kan tih theih ang?

3. Hrisêl taka awm reng kan tum nachhan tûr pakhat chu eng nge ni?

³ Hrisêl taka awm reng kan tum nachhan tûr pakhat chu a  ṭha thei ang bera Jehova rawng kan bâwl theih nân a ni a. (Mk. 12:30) Kan taksa chu “inthawina nung leh thianghlim leh Pathian lawm tlâk” ni tûra hlan kan duh a; chuvângin, kan hrisêlna khawih pawi thei nia kan hriatte chu tih loh kan thlang a ni. (Rom 12:1) Amaherawhchu, chutianga tih loh kan thlang chung pawhin, dam ṭha takin kan awm reng ang tih kan sawi thei lo. Mahse, nunna thilpêk hi kan ngaihlu a ni tih kan Pa vâna mi hriattîr kan duh avângin, hrisêl taka awm reng thei tûrin kan tih theih apiang kan ti a ni.

4. Lal Davida’n eng nge tih a duh?

⁴ Lal Davida chuan: “Thi ila, leilâwtah chhuk ila, i tân hlâwkna eng nge awm? Vaivutin a fak dâwn che em ni? I thutak hi a hriattîr dâwn em ni?” tia ziakin Pathian thilpêk nunna a ngaihhlut chhan chu a sawi a. (Sâm 30:9) Davida’n chûng thute chu a nun tâwp lama a ziah a ni mai thei. Mahse, ani chuan Jehova rawng a bâwl chhunzawm zêl theih nân, a theih anga rei hrisêl taka dam reng a tum a ni. Kan za hian chutianga tih chu kan tum ṭheuh ngei ang.

5. Eng ang khawpa upa emaw, engtianga nasaa dam lo emaw pawh ni ila, eng nge kan tih theih?

⁵ Dam lohna leh kum upatna avângin, tûn hmaa kan thil tih ṭhin tam tak chu kan ti thei tawh lo pawh a ni thei a. Chuvângin, kan rilru a hrehawmin kan lunghnual pawh a ni thei. Mahse, a ṭha thei ang bera inenkawl kan tum tûr a ni. Engvângin nge? A chhan chu, eng ang khawpa upa emaw, engtianga nasaa dam lo emaw pawh ni ila, Lal Davida angin Jehova kan la fak thei reng a ni. Kan Pathianin kan ṭha famkim lo chung pawha, min ngaihhlutzia hriatna chuan rilru a va khawih tak êm! (Mt. 10:29-31) Kan lo boral a nih pawhin, ani chuan min kaihthawh leh a châk hle ang. (Job. 14:14, 15) Chuvângin, kan dam lai hian kan hrisêlna leh nunna vênhim nâna kan tih theihte tih chu kan duh a ni.

6. Ei leh in chungchângah Jehova’n kan lakah eng nge a beisei?

⁶ Bible chu hrisêlna lama inenkawlna, a nih loh leh ei leh in lama inkaihhruaina lehkhabu ni lo mah se, chûng thilte chungchânga Jehova ngaih dân chu a târ lang a. Entîr nân, ani chuan kan taksa tichhe thei ‘pang tina thei thilte pumpelh’ tûrin min fuih a ni. (Thur. 11:10) Nunna atâna hlauhawm, ei leh in duh luatna leh zu ruihnate chu Bible-in a dem a. (Thuf. 23:20) Ei leh in tûr leh, ei zât tûr chungchânga thu tlûkna kan siam hunah, insûmtheihna lantîr tûrin Jehova’n min beisei a ni.—1 Kor. 6:12; 9:25.

7. Thufingte 2:11-a kan hmuh fuihna chuan, kan hrisêlna chungchânga thu tlûkna ṭhate siam tûrin engtin nge min ṭanpui?

⁷ Kan remhriatna hmangin, Pathian min pêk nunna kan ngaihhlutzia lantîrtu thu tlûknate kan siam thei a. (Sâm 119:99, 100; Thufingte 2:11 chhiar rawh.) Entîr nân, kan ei tûr fîmkhur takin kan thlang a. Kan ngainat tak ei leh in pakhat chu dam loh phah nân kan hmang a nih chuan, kan pianpui finnain chu thil ei lo tûr chuan min chêttîr ang. Kham taka mut te, insawizawi ziah te, invawn fai ziah te, leh kan chênna in tihthianghlim ziahte chu kan tân a finthlâk a ni.

8. Bible chuan kan himna chu Jehova tân a pawimawhzia engtin nge a târ lan?

⁸ Israelte hnêna Jehova Dân pêkah chuan, inah leh hnathawhna hmuna chêtsualna  pawi tak thleng lo tûra ṭanpuitu kaihhruainate a tel a. (Ex. 21:28, 29; Deut. 22:8) Tum rêng vâng ni lova tualthahna chuan a titu chungah sawhkhâwk pawi tak a thlen a ni. (Deut. 19:4, 5) Dân chuan tum rêng vâng ni lova, nau la piang lo chunga chhiatna thlentu chungah pawh hremna a phût bawk. (Ex. 21:22, 23) Jehova’n him taka awm tum tlat tûrin min duh tih Bible chuan a târ lang chiang hle.

9. Chêtsualnate thleng lo tûrin eng nge kan tih theih? (Milem en bawk rawh.)

⁹ Inah leh hnathawhna hmunah him taka awm tum tlatin, Pathian thilpêk nunna kan ngaihhlutzia kan lantîr a. Entîr nân, thil hriam te, bâwlhlo hlauhawm te, leh damdawite chu mi dangte tâna hlauhawm lo tûr zâwngin kan tirîral a, chûng thilte chu naupangte hmuh mai theih loh tûrin kan dah bawk. Mei kan chhêm hunah te, tui kan chhuan hunah te, leh current hmang chi hmanraw dangte kan hman hunah kalsan mai lo tûrin kan fîmkhur a ni. Damdawi te, zû te, leh mut kham loh avângtea rilru fîm kan put loh laiin motor kan khalh lo va, kan khalh hunah pawh phone khawihin rilru kan lâkpêntîr lo bawk.

10. Nunna atâna hlauhawm chhiatna a thlen hma leh a thlen chhûngin eng nge kan tih theih?

¹⁰ Nunna tiderthâwng thei thilthlengte chu dan theih loh châng kan nei a. Chu chu leilung chhiatna te, hripui lêng te, leh tharum thawhna avânga buainate a thlen hian a ni lehzual a ni. Mahse, chutiang chhiatnate a thlen hunah kan awmna hmun chhuahsan tûra thupêk leh thuneitute thupêk dangte zâwmin, a him thei ang bera awm leh hlauhawm laka dam khawchhuah kan tum a ni. (Rom 13:1, 5-7) Chhiatna ṭhenkhat lo thleng tûrte chu a lo rin lâwk theih a; chuvângin, lo inbuatsaih lâwk tûra min ṭanpui thei tualchhûng thuneitute inkaihhruaina siamte chu kan zâwm tûr a ni. Entîr nân, tui in tûr te, ei tûr chhe thei lo te, leh damdawi bâwm (first-aid-te) lo chhêk khâwl chu a ṭangkai i ti hle ang.

11. Kan awmnaah hri inkaichhâwn theih a lêng a nih chuan eng tih nge kan inhuam ang?

¹¹ Kan chênna hmunah natna inkaichhâwn theih a lêng a nih chuan eng nge kan tih ang? Kut sil te, inhlata awm te, hmai tuamna vuah te, leh inkhung hran ang chi, rîkrum thil atâna kaihhruainate hi kan zâwm tûr a ni. Chûng thilte kan tih chuan, Pathian min pêk nunna kan ngaihhlutzia kan lantîr a ni.

12. Engtin nge Thufingte 14:15-a thu bul chuan chhiatna a thlen hunah, chanchin ngaihthlâk tûr fîmkhur taka thlang tûra min ṭanpui theih?

¹² Rîkrum thil a thlen hunah kan ṭhiante leh ṭhenawmte zîngah mai ni lovin, chanchin tharahte pawh thu dik lo theh darh a ni thei a. “Thu tin” ring lovin, sawrkâr leh doctor-te hnên aṭanga thu chhuah rin tlâk takte chauh kan ngaithla tûr a ni. (Thufingte 14:15 chhiar rawh.) Governing Body leh branch office-te chuan kohhran inkhâwm leh thu hrilh rawngbâwlna chungchânga kaihhruaina an pêk hmain, thu rin tlâkte hre thei tûrin theih tâwp an chhuah a. (Heb. 13:17) Chu kaihhruaina chu zâwmin, keimahni leh mi dangte chu chhiatna lakah kan vêng a. Khawtlângah kohhran hming kan tiṭha lehzual bawk.—1 Pet. 2:12.

13. Thisen chungchângah Pathian thilpêk nunna kan ngaihlu a ni tih engtin nge kan târ lan?

¹³ Jehova Thuhretute chu thisen hlu tak an zah avângin hriat an hlawh hle a. Damdawi lama rîkrum thilah pawh thisen inthun hnâwlin, thisen chungchânga Jehova dân chu kan zâwm a ni. (Tirh. 15:28, 29) Mahse, chu chu thih kan duh tihna erawh a ni lo. Chu aiin, Pathian thilpêk nunna chu kan ngaihlu a. Thisen tel lo inenkawlna ṭha tak min pêk inhuam damdawi lama mi thiamte ṭanpuina kan zawng a ni.

14. Damdawi lama inenkawlna lian tham mamawhna chu engtin nge kan tihtlêm theih?

¹⁴ He thuziak tîr lama hrisêlna chungchânga thurâwnte kan zâwm a nih chuan, damdawi lama inenkawlna lian tham kan mamawhnate chu kan titlêm thei a. Hrisêl taka kan awm reng chuan, inzai kan ngai a nih pawhin kan ṭha chhuak leh thuai dâwn a ni. Kan in leh hnathawhna hmunte him taka kan vawn a, traffic dânte ṭha taka kan zawm chuan rîkrum thila inzai kan mamawhna dinhmunte kan titlêm thei bawk ang.

15. (a) Durable power of attorney card thar ber kawl reng chu engvângin nge a pawimawh? (Milem en bawk rawh.) (b) Video-a kan hmuh angin, thisen hmanga inenkawlna chungchângah engtin nge thu tlûkna fing kan siam theih ang?

¹⁵ Nunna thilpêk kan ngaihhlut avângin,  durable power of attorney (advance health-care directive) chu ziak khatin, kan kalna apiangah kan keng a. b He card hmang hian thisen thunna leh inenkawlna dang chungchânga kan duh dân chu kan târ lang a ni. Tûna i DPA card hman chu a thar ber a ni em? A thar ziah khah emaw, ziah belh emaw i ngai a nih chuan, ziak khat nghâl ang che. Kan duh dân ziaka chiang taka kan dahna chuan, inenkawlna kan dawnna tûrah ṭûl lo taka khawtlai lo tûrin min ṭanpui ang a. Kan tâna thil hlauhawm thlen thei inhriat sualna pumpelh tûrin, damdawi lama min enkawltute chu kan ṭanpui a ni bawk ang. c

16. DPA card ziah khah dân chungchâng kan hre chiang lo a nih chuan, eng nge kan tih theih?

¹⁶ Kum lama la naupang emaw, hrisêl tak emaw ni mah ila, kan za hian tawh sual tâwk thei leh dam lo thei kan ni a. (Thur. 9:11) Chuvângin, DPA card ziah khah chu thil finthlâk tak a ni ang. Ziah khah dân tûr i chiang lo a nih chuan, tualchhûnga in kohhran upate ṭanpuina dîl ang che. Anni chuan chu card ziah khah dân chu an hre bel  a; mahse, damdawi lama inenkawlna chungchângah thu tlûkna an siamsak lo vang che. Chu chu i mawhphurhna a ni. (Gal. 6:4, 5) Amaherawhchu, i duhthlan theihte chungchâng hre thiam tûrin, leh i duh dân ziaka târ lang tûrin an ṭanpui thei che.

17. Hrisêlna chungchângah a âwm tâwk kan hria tih engtin nge kan lantîr theih?

¹⁷ Kan hrisêlna leh damdawi lama inenkawlna chungchânga kan thu tlûkna tam tak chu, Bible hmanga sawizawi kan chhia leh ṭha hriatna hmanga siam a ni a. (Tirh. 24:16; 1 Tim. 3:9) Kan thu tlûkna siam leh chumi chungchâng mi dangte kan sawipui hunah, Philippi 4:5-a thu bul: “In dawhtheihzia [a nih loh leh, a âwm tâwk in hriatzia] mi zawng zawng hriat ni rawh se,” tih hi kan nunpui tûr a ni. A âwm tâwk kan hriat chuan, kan tisa lam hrisêlna chu a lutukin kan ngaihtuah lo va; kan thlîr dân min ṭâwmpui tûrin mi dangte kan nawrlui bawk hek lo. Kan thu tlûkna siam ang an siam lo a nih pawhin, kan unaute chu kan hmangaihin kan zah a ni.—Rom 14:10-12.

18. Nunna thilpêk avânga kan lâwmzia engtin nge kan lantîr theih?

¹⁸ Kan nun uluk taka enkawlin, leh a hnêna kan neih ṭha ber pein, nunna Hnâr Jehova chunga kan lâwmzia kan lantîr a. (Thup. 4:10, 11) Tûnah chuan, natnate tuarin, chhiatnate kan tawh a la ngai a. Mahse, chu chu min Siamtuin nung tûra min duh dân a ni lo. Nakin lawkah, natna leh thihna awm tawh lohna chatuan nunna min pe ang. (Thup. 21:4) Chumi hun a lo thlen hmaa, nung dama awm leh hmangaihna nei tak kan Pa vâna mi, Jehova rawng kan bâwl thei hi a va ṭha tak êm!