1. Engvângin nge tûn hun hi tûn hma zawng aia a danglam bîk?

MIHRING chanchina hun danglam takah kan nung a. Bible sawi lâwk angin, Jehova chuan “hnam tin zînga mi te, chi tin zînga mi te, mi tin zînga mi te, ṭawng tin zînga mi te” aṭangin mipui tam tak a khâwm mêk a ni. Anni chu ‘achhûn azâna a [Pathian] rawngbâwl ṭhîn’ mi hlim tak maktaduai riat aia tam “hnam ropui tak an ni.” (Thu Puan 7:9, 15; Isaia 60:22) Tûn hmain, Pathian leh an mihringpuite hmangaihtu hetiang khawpa tam hi a la awm ang lo.

2. Pathian ṭhian ni lote hnênah eng ang hmangaihna dik lo tak nge kan hmuh? (A thupui chunga milem en rawh.)

² Mahse, Bible-in kan hun laia thleng tûr chungchâng a sawi lâwk angin, Pathian ṭhian ni lote chuan hmangaihna dik lo tak, mahni hmasialna chu an nei a. Tirhkoh Paula’n nî hnuhnûngahte chuan, mite chu “mahni inhmangaihtu te, tangka ngainatu te,” leh “Pathian hmangaih aia mahni lâwmna mai hmangaih zâwktu te,” an ni ang tiin a ziak a ni. (2 Timothea 3:1-4) He mahni hmasial hmangaihna chu Pathian hmangaihna nêna  inkalh chiah a ni. Mahni hmasialna thiltumte ûmna chuan hlimna min neihtîr thei tûrah minte’n ngai mah se, chutiang chu a ni lo. Chu aiin, hmasialna khawvêl a siamin, mi tin tân harsatna a thlen zâwk a ni.

3. He thuziakah eng nge kan sawiho vang? Engvângin nge?

³ Tirhkoh Paula chuan mahni hmasial hmangaihna chu a hluar dâwn tih leh Kristiante tân a hlauhawm dâwn tih a hria a. Chuvângin, mahni hmasial hmangaihna lantîrtute chu “hawisan” tûr leh pumpelh tûrin a vaukhân a ni. (2 Timothea 3:5) Mahse, chutiang mite chu kan pumpelh vêk thei lo va. A nih leh, kan chheh vêla mite rilru put hmang laka invêng tûr leh hmangaihna Pathian Jehova tilâwm tûrin eng nge kan tih theih? Pathianin nei tûra min duh hmangaihna leh 2 Timothea 3:2-4-a kan hmuh hmangaihnate in ang lohna chu i lo en ang u. Tichuan, mahni kan inendik thei ang a, hlimna leh lungawina dik tak min thlentu hmangaihna lantîr theih dân kan hmu ang.

4. Engemaw chen mahni kan inhmangaihna chu engvângin nge thil sual a nih loh?

⁴ Paula chuan mite chu: “Mi, mahni inhmangaihtu te,” an ni ang tiin a ziak a. Mahni inhmangaih chu thil sual a ni a tihna a ni em? Ni lo, mahni inhmangaih chu thil pângngai tak leh thil ṭûl a ni a. Jehova’n chutiang ni tûrin min siam a ni. Isua chuan: “Nangmah i inhmangaih angin i vêngte pawh i hmangaih tûr a ni,” tiin a sawi a. (Marka 12:31) Dik tak chuan, mahni kan inhmangaih loh chuan mi dang kan hmangaih thei lo. Bible chuan: “Pasalte pawhin mahni taksate angin mahni nupuite chu an hmangaih tûr a ni. Mahni nupui hmangaihtu chu mahni inhmangaih a ni. Tuman mahni tisa an haw ngai si lo va, an châwmin an duat zâwk ṭhîn a ni,” tih pawh min hrilh bawk. (Ephesi 5:28, 29) Chuvângin, engemaw chen chu mahni kan inhmangaih tûr tih a chiang hle.

5. A lutuka mahni inhmangaihtute chu engtin nge i sawi ang?

⁵ 2 Timothea 3:2-a kan hmuh mahni inhmangaihna hi hmangaihna pângngai leh ṭha a ni lo va. Chu chu mahni hmasialna a ni. Mi chu a lutuka a inhmangaih chuan inngaihhlut tâwk aliamin a inngaihlu tihna a ni. (Rom 12:3 chhiar rawh.) Mi dangte aiin mahni a inngaihsak zâwk a. Thil a kal sual hian mahni ni lovin mi dangte a mawhpuh ṭhîn. Bible hrilhfiahna pakhat chuan chutiang mi chu sakuh chi khatin (hedgehog) ball angin a intimum a, a vun nêm lamin a in tilum a; mahse, mi dangte chu a hmul zum tak a hmuh ṭhîn ang a ni tih a sawi. Chûng mite chu an hlim thei tak tak lo.

6. Pathian kan hmangaihna chuan eng rah ṭhate nge a chhuah?

⁶ Bible lama mi thiamte chuan Paula’n mahni inhmangaihna a târ lan hmasak chhan chu he mizia hian a hnua a târ lan mize ṭha lote a hrin chhuah vâng niin an ring a. Chumi nêna inkalh takin, Pathianin  nei tûra min duh hmangaihna chuan mize ṭhate a neihtîr zâwk a ni. Chu hmangaihna chu hlimna te, remna te, dawhtheihna te, ngilneihna te, ṭhatna te, rinawmna te, thuhnuairawlhna te, insûmtheihnate nên a inkungkaih tlat a ni. (Galatia 5:22, 23) Fakna hla phuahtu chuan: “LALPA Pathiana nei mite chu lâwm takin an awm ṭhîn!” tiin a ziak a. (Sâm 144:15) Jehova chu Pathian hlim a ni a, a mite pawh an hlim a ni. Chu bâkah, a lutuka mahni inhmangaihtute leh an dawn theihte chauh ngaihtuahtute nên in ang lo takin, Jehova chhiahhlâwhte chuan mi dangte thil an pêk avângin an hlim a ni.—Tirhkohte 20:35.

7. Pathian kan hmangaihna endik tûrin eng zawhnate’n nge min ṭanpui ang?

⁷ Mahni kan inhmangaihna chu Pathian kan hmangaihna aiin a nasa zâwk tih engtin nge kan hriat theih? He thurâwn fing hi han ngaihtuah teh: “Elrel leh inngaihhlut avânga engmah ti lovin, mi tinin inngaitlâwm takin mahni aiin mi dang ṭha zâwkah ruat ṭheuh rawh se; mahni ta ta mai en lovin, mi dang ta pawh en ṭheuh zâwk rawh u,” tih hi. (Philippi 2:3, 4) Heti hian kan inzâwt thei a ni: ‘He thurâwn hi ka zâwm em? Pathianin ti tûra min duh chu tih ka tum em? Kohhranah leh thlawhhma rawngbâwlnaah mi dangte ṭanpui theih dân kawng ka zawng em?’ tiin. Kan hun leh thate pêk chu a awlsam reng ṭhîn lo va. Kan thawhrim a, kan nuam tih zâwng thil ṭhenkhatte kan chân pawh a ngai mai thei. Mahse, lei leh vâna Lal Chungnungber kan tilâwm tih hriatna aia min tihlim thei thil dang rêng a awm lo!

8. Kristian ṭhenkhatin Pathian an hmangaih avângin eng nge an tih?

⁸ Kristian ṭhenkhatte chuan Pathian an hmangaih a, tam lehzuala a rawng an bâwl  duh avângin hausak theihna tûr hnate an tlânsan a ni. Doctor Ericka-i chuan damdawi lam hnaa inpêk lutuk aiin pioneer thawh a thlang a. A pasal nên ram engemaw zâtah rawng an bâwl thei a ni. Ani chuan: “Ṭawng dang hmangte ṭanpuinaa kan thiltawn tam tak leh chuta ṭhian kan siamna chuan kan nun a tihausa tak zet a ni,” tiin a sawi. Ericka-i chuan doctor hna thawk reng chungin a hun leh tha tam zâwk chu Jehova chanchin mite zirtîr nân leh a unaute ṭanpui nân a hmang a ni. Chu chuan “thinlung taka hlimna leh lungawina,” min pe tiin a sawi.

9. Tangka sum ngainatu chu engvângin nge a hlim theih loh?

⁹ Paula chuan mite chu “tangka ngainatu te” an ni ang tiin a ziak a. Kum engemaw zât kalta khân, Ireland rama pioneer pakhatin pa pakhat chu Pathian chungchâng a hrilh a. Chu pa chuan a pawisa ipa pawisa ṭhenkhat chu la chhuakin: “Hei hi ka pathian a ni!” a ti a. An pawm duh lo pawh a ni mai thei; mahse, mi tam tak rilru put hmang chu chutiang chu a ni. Sum leh pai leh chu miin a tihtheih thilte chu an ngaina a. Bible erawh chuan: “Tangka sum ngainatu chuan tangka sumah duhtâwk a hmu lo vang,” tiin a vaukhân a ni. (Thuhriltu 5:10) Tangka sum ngainatu chuan duh tâwk a nei ngai lo. A duh belh zêl avângin chumi atân a nun a hmang ral a. Chu chuan ‘lungngaihna tam tak’ a thlen a ni.—1 Timothea 6:9, 10.

10. Bible chuan pachhiatna leh neihnunna chungchâng eng nge a sawi?

¹⁰ Kan vai hian sum kan mamawh tih chu a dik ngei mai. Chu chuan himna engemaw chen min pe thei a. (Thuhriltu 7:12) Kan mamawh bulpuite chauh kan neih hian kan hlim thei ang em? Hlim thei e! (Thuhriltu 5:12 chhiar rawh.) Jakeha fapa Agura chuan: “Pachhiatna emaw, neihnunna emaw mi pe hek suh. Ka tâna mamawh chawin min châwm rawh,” tiin a ziak a. Pachhe lutuk nih a duh loh chhan chu kan hre thiam thei a. Rûkrûknain Pathian a chawimawi loh avângin rûkru tûra thlêm a duh lo tih a sawi a ni. A nih leh, engvângin nge hausak a duh loh? “Chutilochuan ka tlaipuar ang a, ka phat ang chia, ‘LALPA chu tunge ni? Ka ti dah ang e’” tiin a ziak a. (Thufingte 30:8, 9) Pathian aia hausakna rinchhantute chu i hre mai thei a ni.

11. Isua’n sum chungchâng eng nge a sawi?

¹¹ Sum ngainatu chuan Pathian a tilâwm thei lo va. Isua’n: “Tuman hotu pahnih rawng an bâwl kawp thei lo; pakhat huain pakhat an duh ang, a nih loh leh, pakhat ṭanin pakhat an hmusit ang. Pathian leh sum rawng in bâwl kawp thei lo ve,” tiin a sawi a. Chu bâkah: “Leia sûlrûl leh tuiêkin a ei chhiatnaah, rûkruten an reh pawha an rûknaah hian, in tân rote khâwl khâwm suh u,” tiin a sawi belh a ni.—Matthaia 6:19, 20, 24.

12. Samkhai taka nun chuan engtin nge Pathian rawngbâwl tûra min ṭanpui theih? Entîrna pe rawh.

¹² Jehova chhiahhlawh tam tak chuan samkhai taka nun an tum a. Chutianga nunna chuan tam lehzuala Jehova rawngbâwl theihna leh hlimna nasa lehzua a neihtir thei tih an hmu a ni. United States rama awm Jack-a chuan an nu nêna pioneer an thawh theih nân an in lian tak leh an sumdâwnna chu an hralh a. Ani chuan: “Kan in mawi tak leh kan thil neihte kalsan chu a harsa khawp mai,” tiin a sawi. Mahse, kum tam tak chhûng chu a hnathawhnaa harsatnate  avângin lunghnual takin inah a haw ṭhîn a. Ani chuan “Regular pioneer thawk mêk ka nupui chu a hlim ṭhîn hle a. ‘Hnathawhna Pu azawnga Pu ropui ber ka nei alawm!’ a ti a. Tûnah chuan kei pawh pioneer ka thawk ve tawh a, kan nupain Jehova hna kan thawk tlâng a ni,” tiin a sawi.

13. Sum kan thlîr dânah inenfiah tûrin engin nge min ṭanpui thei?

¹³ Sum kan thlîr dân kan inenfiah hunah, heti hian tlang taka kan inzawh a ngai a ni: ‘Ka nun hian sum chungchânga Bible sawite chu ka ring tak tak tih a târ lang em? Sum zawn hi ka tân thil pawimawh ber a ni em? Jehova leh mi dangte nêna kan inlaichînna aiin ro sum lam thil ka ngaihsak zâwk em? Ka mamawh thilte chu Jehova’n min pe ang tih ka ring tak tak em?’ tiin. A chunga rinna nghattute chu Pathianin a tibeidawng ngai lo vang tih kan chiang thei a ni!—Matthaia 6:33.

14. Inbûk tâwk taka mahni lâwmna zawng tih chu eng nge ni?

¹⁴ Bible-in nî hnuhnûngahte chuan mite chu “mahni lâwmna hmangaih zâwktute,” an ni ang tih a sawi lâwk bawk. Mahni leh sum chungchânga thlîr dân inbûk tâwk tak neih chu sualna engmah a awm lo tih kan hriat ang bawkin, inbûk tâwk taka mahni lâwmna zawn pawh hi thil sual a ni lo tih kan hria. Mi ṭhenkhat chuan mahni lâwmna rêng rêng kan zawng tûr a ni lo an ti a; mahse, chu chu kan tâna Jehova duh dân a ni lo. Bible chuan Pathian chhiahhlawh rinawmte chu: “Kal la, lâwm takin i chaw ei la, thinlung hlimin i uain in rawh,” tiin a fuih a ni.—Thuhriltu 9:7.

15. “Mahni lâwmna mai hmangaih zâwktu te” tih awmzia chu eng nge ni?

¹⁵ Timothea thawn hnih 3:4 chuan mahni lâwmna hmangaih zâwktute leh an nuna Pathian ngaihsak lote chungchâng a sawi a. He Bible chângin Pathian aiin mahni lâwmna mai an hmangaih zâwk a ti lo hi chhihchhiah rawh. Chutiang a nih chuan Pathian chu tlêma zâwng an hmangaih tihna a ni ang. Mahse, he Bible châng hian Pathian “aia” tiin a sawi. Bible lama mi thiam pakhat chuan he châng hian: “Pathian hmangaihna engemaw chen an nei ve tho a tihna a ni lo va. Pathian hmangaihna an nei lo hulhual a tihna zâwk a ni,” tiin a sawi. He hi mahni lâwmna hmangaih zâwktute tâna vaukhânna khauh tak a ni a. Bible chuan mahni lâwmna hmangaih zâwktute chu nun nawmsak bâwlnain anmahni “a dîp” ral angin a sawi a ni.—Luka 8:14.

16, 17. Mahni lâwmna thlîr dân chungchângah Isua’n eng entawn tûr nge a siam?

¹⁶ Isua chuan mahni lâwmna chungchânga inbûk tâwk tak neih tih awmzia chu min hriattîr a. Ani chu “lawi chaw” einaah leh “ruai ropui tak” ṭhehnaah a kal a. (Johana 2:1-10; Luka 5:29) Inneihnaah, uainin a daih tâk loh avângin Isua’n tui chu uaina chantîrin thil mak a ti a. Ṭum dangah pawh Isua a ei a in avânga mite’n an sawisêl khân thlîr dân inbûk tâwk an neih lohzia chiang takin a sawi a ni.—Luka 7:33-36.

 ¹⁷ Mahse, Isua chuan mahni lâwmna chu nuna thil pawimawh berah a dah lo. Jehova a dah hmasa ber a, mi dangte ṭanpui tûrin a tih theih apiang a ti a ni. Mihringte chhandam tûrin nghaisakna banah hrehawm taka thih pawh a inhuam a. Isua chuan a hnungzui duhtute chu: “Miin keimah avânga an hau che u a, an tihduhdah che u a, dâwta sual tinrênga an hêk hunah che u, in eng a la thâwl ang. “Lâwm ulangin, nasa takin hlim rawh u; vânah in lâwmman a awm hnem si a; chutiang bawkin in hmaa zâwlnei awmte pawh an tihduhdah ṭhin kha,” tiin a hrilh a ni.—Matthaia 5:11, 12.

18. Mahni lâwmna kan ngainat lutuk dân inendik tûrin eng zawhnate’n nge min ṭanpui ang?

¹⁸ Mahni lâwmna kan ngainat lutuk dân inendik tûrin engin nge min ṭanpui ang? Heti hian kan inzâwt thei a ni: ‘Intihhlimna chu inkhâwmte leh thlawhhma rawngbâwlna aiin ka ngai pawimawh zâwk em? Pathian rawng ka bâwl duh avângin ka thil ngainat ṭhenkhatte chu chân ka inhuam em? Intihhlimna ka thlan hian, ka duh thlanna chu Jehova’n engtin nge a thlîr ang tih ka ngaihtuah em?’ tiin. Pathian kan hmangaih a, amah tihlâwm kan duh avângin, thil dik lo nia kan hriatte mai ni lovin, amah tilâwm lo theitua kan ngaih thilte pawh fîmkhur takin kan pumpelh a ni.—Matthaia 22:37, 38 chhiar rawh.

19. Hlimna dik tak nei thei lotute chu tute nge an nih?

¹⁹ Setana khawvêl chuan mihringte chu kum 6,000 dâwn lai a tihrehawm tawh a. He hun hnuhnûngahte hian he khawvêl hi sum leh mahni lâwmna mai hmangaihtutein a khat tawh a ni. Thil an neih theihte an ngaihtuahin, an tisa châknate chu an nuna thil pawimawh berah an dah a. Mahse, chûng mite chu an hlim tak tak thei lo! Chutih ahnêkin, Bible chuan: “Jakoba Pathian ṭanpuitua nei chu, lâwm takin a awm ṭhîn, LALPA Pathiana beiseina neitu chu,” tiin a sawi.— Sâm 146:5.

20. Engtin nge Pathian i hmangaihna chuan hlimna a neihtîr che?

²⁰ Jehova chhiahhlawhte chuan ani chu an hmangaih tak zet a, kum tin hian, mi dang tam tak pawhin amah an hriain an hmangaih ve a ni. Pathian Ramin ro a rêl mêk a, chu ram chuan kan ngaihtuah phâk bâk malsâwmnate a rawn thlen thuai ang tih a finfiah a ni! Jehova’n titûra min duhte kan tih hian amah kan tilâwm a, chu chuan hlimna dik tak min neihtîr a ni. Jehova hmangaihtute chu chatuanin an hlim tawh ang! A dawta thuziakah, mahni hmasial hmangaihna aṭanga lo chhuak mize ṭha lo ṭhenkhatte kan sawiho vang a. Chumi hnuah, chûng miziate chu Jehova chhiahhlawhte neih mize ṭhate nên inkalh chiah a nih dân kan hmu ang.