1, 2. Kum 2018-ah, eng thilthlengin nge kawng danglam taka min inpumkhattîr a, engvângin nge? (A thupui chunga milem en rawh.)

KUM 2018, March 31-ah khawvêl pumpuia mi maktaduai tam tak chu kum khata vawi khat chuah neih ṭhin hun pawimawh tak hmang tûrin an kal khâwm dâwn a. Nî tlâk hnuah, Jehova Thuhretute leh mi dang tam tak chu kan tâna Isua inthawina hre reng tûrin an inhmukhâwm ang. Kum tin hian, Krista thih Hriatrengnain khawvêla thilthleng dang zawng aiin kawng mak takin mite chu a inpumkhattîr a ni.

² Jehova leh Isua chuan thilthleng pawimawh tak hmang tûra khawvêl pum huapa mi maktaduai tam takte chhum lo chat lova an kal an hmuh chuan an hlim ngei ang. ‘Mipui tam tak tuma chhiar sên loh, hnam tin zînga mi te, chi tin zînga mi te, mi tin zînga mi te, ṭawng tin zînga mi te chuan kan Pathian lalṭhutphaha ṭhua hnênah leh, Berâm No hnênah chhandamna,’ tia an au thu Bible-in a sawi a. (Thu Puan 7:9, 10) Kum tin hian  Hriatrengnaah mi tam takin Jehova leh Isua thiltih ropui takte avânga chawimawina an hlan ṭhîn chu a va ropui tak em!

3. He thuziak hian eng zawhnate nge a chhân ang?

³ He thuziakah hian hêng zawhna palite chhânna kan hmu a ni: (1) Hriatrengna aṭanga hlâwkna dik tak ka hmuh theih nân engtin nge ka inbuatsaih theih? (2) Eng kawngtein nge Hriatrengna chuan Pathian mi zawng zawngte chu a inpumkhattîr? (3) Pathian mite zînga inpumkhatna awm tûrin eng nge ka tih theih? (4) Hriatrengna hnuhnûng ber chu a awm ngai ang em? A awm ngai a nih chuan, engtik hunah nge? tih hi.

4. Engvângin nge Hriatrengnaa tel chu kan tâna pawimawh tak a nih?

⁴ Engvângin nge Hriatrengnaa tel chu kan tân a pawimawh? A chhan pakhat chu inkhâwma tel hi Jehova kan biak dân kawng khat a ni a. Kum khat chhûnga inkhâwm azawnga pawimawh bera tel thei tûra theih tâwp chhuahtute chu Jehova leh Isua’n an hria tih kan chiang thei a ni. Hriatrengna inkhâwmnaah kan kal thei lo hulhual a nih loh chuan, chumi hmunah kan awm ngei tih Jehova leh Isua’n min hmu se kan duh a ni. Inkhâwmte chu kan tân a pawimawh tih thiltiha kan lantîr chuan Jehova chu a ‘hriat rengna lehkhabua’ kan hming chhinchhiah tûrin kan hrilh ang a ni. Chu lehkhabu chu “nunna bu,” tia koh a ni a. Chutah chuan Jehova’n chatuan nunna pêk a duh zawng zawngte hming a chuang a ni.—Malakia 3:16; Thu Puan 20:15.

5. Hriatrengna hun thlen hma chawlhkârahte chuan engtin nge ‘rinnaa kan awm leh awm loh kan inchhin theih’?

⁵ Hriatrengna hun thlen hma chawlhkârahte chuan ṭawngṭai nân leh Jehova nêna kan inlaichînna ngheh dânte ngun taka ngaihtuah nân hunte kan pe tûr a ni. (2 Korinth 13:5 chhiar rawh.) Tirhkoh Paula chuan Kristiante chu: “Rinnaah chuan in awm emaw, nangmahni ngei inchhin ṭhîn ula,” tiin a hrilh a. Chu chu engtin nge kan tih theih? Heti hian kan inzâwt thei a ni: ‘He pâwl hi Jehova’n a duhzâwng hlen chhuah nâna a hman pâwl awmchhun a ni tih ka ring tak tak em? Thu hrilhnaah leh chanchin ṭha hrilhnaah theih tâwp ka chhuah em? Hun hnuhnûngah kan awmin Setana rorêlna tâwpna a hnai tawh tih ka rin tak zetzia ka thiltihte’n a târ lang em? Jehova leh Isua chunga ka rinna chu Jehova rawng ka bâwl ṭan tir laia a ngheh angin a la nghet em?’ (Matthaia 24:14; 2 Timothea 3:1; Hebrai 3:14) Chûng zawhnate chhânna ngaihtuahna chuan mi eng ang nge kan ni tih “in fiah ṭhîn” tûrin min ṭanpui ang.

6. (a) Chatuan nunna kan hmuh theih dân kawng awmchhun chu eng nge ni? (b) Upa pakhatin kum tina neih Hriatrengna atân engtin nge a inbuatsaih a, chutiang chuan engtin nge i tih ve theih?

⁶ Hriatrengna atâna kan inbuatsaih theih dân kawng khat chu he hun pawimawh  chhan hrilhfiahtu thuziakte chhiara ngaihtuah hi a ni a. (Johana 3:16; 17:3 chhiar rawh.) Chatuan nunna kan neih theih dân kawng awmchhun chu Jehova hriatna leh a Fapa Isuaa rinna neih hi a ni. Hriatrengna atâna inbuatsaihnaah anmahni nêna min inhnaihtîrtu zirna ṭha tak kan nei thei a. He hi kum rei tak upa ni tawh unaupa tih dân a ni. Kum tam tak chhûng chu, Hriatrengna leh Jehova leh Isua min hmangaihna chungchâng târ lannaVênnainsâng-a thuziakte chu a la khâwm a. Hriatrengna hun thlen hma chawlhkârahte chuan chûng thuziakte chu chhiar nawn lehin chu hun a pawimawh chhânte ngun takin a ngaihtuah a ni. Thuziak pahnih khat thlan belh châng a nei a. Hriatrengna atâna Bible chhiar tûrte pawh chhiarin ngun takin a ngaihtuah bawk. He upa hian chutianga tiin kum tin thil tharte a zir chhuak ṭhîn a. A pawimawh ber chu a inzirna chuan Jehova leh Isua a hmangaihna a tipung a ni. Chutianga inzirna i nei ve a nih chuan Jehova leh Isua i hmangaihna a pung ngei ang. An thiltihte avânga i lâwmna pawh a pung bawk ang a, Hriatrengna chu i hlâwkpui lehzual ang.

7. (a) Lalpa Zanriah hmasa ber zân khân Isua chu eng atân nge a ṭawngṭai? (b) Isua ṭawngṭaina chu Jehova’n a chhâng tih engin nge târ lang?

⁷ Lalpa Zanriah hmasa ber zân khân, Isua chuan a bîk taka ṭawngṭaina a nei a. A Pa nêna an neih inpumkhatna duhawm tak chungchâng a sawi a. A zirtîrte pawh chutiang bawka inpumkhat ve tûrin a ṭawngṭaisak bawk. (Johana 17:20, 21 chhiar rawh.) Jehova chuan a Fapa duh tak ṭawngṭaina chu a chhâng tak zet a ni. Inkhâwm dang zawng aiin Hriatrengna inkhâwmin Jehova Thuhretute chu a inpumkhattîr a. Chu mi nî chuan, khawvêl ram hrang hrangah leh vun rawng chi hrang hrang mi maktaduai tam takte chu an inhmukhâwm a, Jehova’n a Fapa a rawntîr tih an rinzia an lantîr a ni. Hmun ṭhenkhatah chuan biakna hmunkhata hnam inang lote an in hmukhâwm chu thil pângngai lo tak a ni a, chutianga thil an tih chu mite’n thiltih âwm lo tak angah an ngai a ni. Mahse, Jehova leh Isua’n chutiang chuan an ngai ve lo. An tân, Hriatrengna inkhâwma kan inpumkhat chu thil duhawm tak a ni.

8. Jehova’n Ezekiela hnênah eng thuchah nge a pêk?

⁸ Jehova mite kan nih angin, hetianga kan inpumkhat hi thil mak a ni lo. Jehova’n he inpumkhatna hi Ezekiela hnêna a thuchah pêkah a sawi lâwk a. Ezekiela chu “Juda” tân tiang pakhat, “Josefa,” tân tiang pakhat la tûr leh chu tiang pahnih chu pakhata a lo chan theih nân zawm tûrin a hrilh a ni. (Ezekiela 37:15-17 chhiar rawh.) Kum 2016, July Vênnainsâng (English) chhuak “Chhiartute Zawhna” chuan: “A zâwlnei Ezekiela hmangin, Jehova’n a mite chu Ram Tiamah an kîr leh ang a, hnam khat niin pumkhat an ni leh ang tih a sawi a. Chu hrilh lâwkna chuan he hun hnuhnûng chhûnga Pathian betute pawh hnam khat niin an inpumkhat ang tih a sawi lâwk bawk,” tiin a hrilhfiah a ni.

9. Kum tina neih Hriatrengna inkhâwmah Ezekiela hrilh lâwk inpumkhatna chu engtin nge kan hmuh?

⁹ Kum 1919 tîr lamah, Jehova chuan a hmasain hriak thihte chu din ṭha lehin a inpumkhattîr a. Anni chu “Juda” tâna tiang ang an ni. A hnuah, leia chatuan nun beiseina nei mi tam takte chuan hriak thihte chu an rawn zawm ṭan a. Lei lam beiseina nei chûng mite  chu “Josefa” tâna tiang ang an ni. Jehova chuan chu tiang pahnih chu inzawm tûrin, a kut ngeiin “Pakhatah ka siam ang,” tiin a tiam a. (Ezekiela 37:19) Hriak thihte leh “berâm dang” chu “pâwl khatin” a awmtîr a. (Johana 10:16; Zakaria 8:23) Tûn laiah, chu pâwl hnih chu inpumkhatin Jehova an be tlang a ni. Ezekiela hrilh lâwknaa Pathian “rawngbâwltu Davida” tia koh Lal pakhat Isua Krista an nei a. (Ezekiela 37:24, 25) Ezekiela hmanga hrilh lâwk a nih angin, Isua thihna hre reng tûra kan inhmuh khâwm hun, kum tina neih Hriatrengnaah chu pâwl pahnihte inpumkhatna chu kan hmu a ni. A nih leh, mi mal tin hian Pathian mite neih inpumkhatna chu vawng reng tûr leh awmtîr tûrin eng nge kan tih theih?

10. Engtin nge Pathian mite zînga inpumkhatna kan awmtîr theih?

¹⁰ Pathian mite zînga inpumkhatna kan awmtîr theih dân kawng khat chu eng nge ni? Inngaitlâwm tûra theih tâwp chhuahna hmangin a ni. Isua leia a awm lai khân, a zirtîrte chu inngaitlâwm tûrin a hrilh a. (Matthaia 23:12) Khawvêl mite chuan mi dangte aia pawimawh zâwkah an inngai fo va. Mahse, kan inngaitlâwm a nih chuan, kohhrana hruaitu unaupate chu kan zahin, an kaihhruainate kan zâwm ang. Chutianga kan tih chauhvin kohhran chu a inpumkhat thei a ni. A pawimawh ber chu, kan inngaihtlâwm  reng chuan Pathian kan tilâwm ang. Ani chuan ‘chapote a dodâl a, inngaitlâwmte erawh chu khawngaihna a pêk ṭhin,’ vâng a ni.—1 Petera 5:5.

11. Hriatrengnaa hman chhang leh uain chungchâng ngaihtuahna chuan inpumkhatna awmtîr tûrin engtin nge min ṭanpui theih?

¹¹ Inpumkhatna kan awmtîr theih dân kawng hnihna chu eng nge ni? Chhang leh uainin a entîr dik takte chu ngun takin ngaihtuah rawh. Chu chu Hriatrengna hun thlen hma leh chu mi zân ngeiah kan ti thei a ni. (1 Korinth 11:23-25) Chhang dawidim telh loh chuan inthawina atâna pêk Isua taksa ṭha famkim chu a entîr a. Uain sen chuan a thisen a entîr a ni. Mahse, chûng thu dikte hriatthiam mai aia tam kan tih a ngai a. Isua tlanna inthawinaah hmangaihna sâng ber pahnih lantîrna a tel tih kan hriat reng a ngai bawk. Jehova chuan a Fapa chu kan tân min pe a, Isua pawhin kan tân inhuam takin a nun a pe a ni. An hmangaihna chungchâng kan ngaihtuah hian, anmahni hmangaih ve tûrin min chêttîr a. Chuvângin, kan vaia Jehova kan hmangaihna chuan kan inpumkhatna a tinghet ang.

12. Lal leh a bâwihte chungchâng tehkhin thuah, Jehova’n mi dangte ngaidam tûra min duhzia engtin nge Isua’n chiang taka a sawi?

¹² Inpumkhatna kan awmtîr theih dân kawng thumna chu eng nge ni? Tih tak zeta mite ngaihdam hi a ni a. Chutianga kan tih chuan, Isua inthawina avânga Jehova’n kan sualte a ngaidam thei chu kan lâwmzia kan lantîrna a ni. Ngaihdam a pawimawh chhan târ lan nân Isua chuan lal leh a bâwihte chanchin a sawi a. Matthaia 18:23-34 chu chhiar la, tichuan heti hian inzâwt rawh: ‘Isua zirtîrna chu zâwm tûra chêttîrin ka awm em? Ka unaute chungah dawhtheihna leh hriatthiamna ka nei em? Min tilungni lotute chu ngaihdam ka duh em?’ Sual ṭhenkhat chu a dangte aiin a pawi zâwk thei tih chu a dik a. Chu bâkah, sual ṭhenkhat chu keini ṭha famkim lote tân ngaihdam har tak a ni thei. Mahse, Jehova’n ti tûra min duhte chu Isua tehkhinthu chuan min zirtîr a ni. (Matthaia 18:35 chhiar rawh.) Tih tak zeta inchhîr kan unaute chu kan ngaidam duh lo a nih chuan Jehova pawhin min ngaidam lo vang tih chiang takin a sawi a. Chu tak chu a ni ngun taka kan ngaihtuah tûr chu. Kan inpumkhatna hlu tak humhim tûr leh vawng reng tûr chuan Isua min zirtîr angin mi dangte kan ngaihdam a ngai a ni.

13. Mi dangte nên inrem kan tumna chuan engtin nge inpumkhatna a awmtîr?

¹³ Mite kan ngaihdam hian kan unaute nên inrem kan tum tihna a ni a. Tirhkoh Paula’n inpumkhatna leh remna vawng reng tûr chuan theih tâwp kan chhuah tûr a ni tih a sawi. (Ephesi 4:1-3) Chuvângin, Hriatrengna neih hun lai, a bîk takin, chumi zânah chuan mi dangte i dâwr dân chu ngun takin ngaihtuah ang che. Heti hian inzâwt rawh: ‘Min tilungni lotute chungah ka thinrim reng lo tih chu min hre chiangtute’n an hmu em? Remna leh inpumkhatna awmtîr tûrin theih tâwp ka chhuah tih minte’n an hmu em?’ tiin. Chûngte chu kan ngaihtuah tûr zawhna pawimawh takte a ni.

14. ‘Hmangaihnaa indawh tawnna’ chu engtin nge kan lantîr theih?

¹⁴ Inpumkhatna kan awmtîr theih dân palina chu eng nge ni? Hmangaihna lantîrnaah Jehova kan entawn hi a ni. (1 Johana 4:8) “Ka unaute nêna inrem chu a ngai mai thei; mahse, kan inhnaih kher a ngai lo,” tiin kan sawi ngai tûr a ni lo. Chutianga kan ngaihtuah chuan, “hmangaihnaa indawh tawn”  tûra Paula fuihna hi kan zâwm lo tihna a ni. (Ephesi 4:1-3) Paula’n kan “indawh tawn” tûr a ni tia sawi mai lovin, “hmangaihnaa” ti tûr kan ni tia a sawi hi chhinchhiah ang che. Tah hian danglamna a awm a. Kohhranah mi chi hrang hrangte kan awm a, kan vaiin Jehova’n a lamah min hîp a ni. (Johana 6:44) Chuvângin, anni chu a hmangaihna tûr chhan ṭha tam tak a hmu chiang a. Kan unaute chuan Pathian hmangaihna an phû a nih chuan, engtin nge kan hmangaihna an phû lo tia kan sawi theih? Jehova’n ti tûra min duh angin anni chu duh rêng vângin kan hmangaih tûr a ni.—1 Johana 4:20, 21.

15. Hriatrengna hnuhnûng ber a awm ang tih engtin nge kan hriat?

¹⁵ Engtik nîah emaw chuan Hriatrengna hnuhnûng ber chu kan la hmang ngei ang. Chu chu engtin nge kan hriat? Paula chuan hriak thih Kristiante hnênah kum tina Isua thih hriatrengna in neih hian, “a lo kal leh hma loh zawng Lalpa thihna chu in entîr ṭhîn,” tiin a hrilh a. (1 Korinth 11:26) Isua pawhin tâwpna hun chungchâng a hrilh lâwknaah a “lo kal” tûr thu a sawi bawk. Nakin lâwka lo thleng tûr hrehawm nasa tak chungchâng a sawinaah: “Chutih hunah chuan Mihring Fapa chhinchhiahna chu vânah a lang ang. Chu mi hunah chuan leia chi tinin an âwmte an inchûm ang a, Mihring Fapa hi thiltihtheihna leh ropuina nasa tak nên vân chhûm chunga lo kal an hmu ang. Tin, a vântirhkohte chu, tawtawrâwt ri nasa tak nên a tîr chhuak ang. Anni chuan a thlante chu kâwl kil li ata—vân tâwp aṭanga a tâwp lehlam thlengin—an lâwr khâwm ang,” tiin a sawi a. (Matthaia 24:29-31) Isua chuan leia la awm hriak thih Kristian zawng zawngte vâna a lâk chhoh hunah ‘a thlante chu a lâwr khâwm ang.’ Chu chu Armageddon indo hma, hrehawm nasa tak inṭan hnuah a thleng ang. Chu indonaah chuan Isua leh mi 1,44,000-te chuan leia lalte an do vang a, an hneh ang. (Thu Puan 17:12-14) Isua’n hriak thihte lâwr khâwm tûra a “lo kal” hmaa kan hman Hriatrengna chu kan tân Hriatrengna hnuhnûng ber a ni ang.

16. Engvângin nge kumin Hriatrengnaa tel i tum?

¹⁶ Kum 2018, March 31-a neih tûr Hriatrengnaah tel tum ang che. A mite kan nih angin, inpumkhatna vawng reng thei tûra i tih tûrte i hlen theih nân Jehova hnênah ṭanpuina dîl rawh. (Sâm 133:1 chhiar rawh.) Engtik nîah emaw chuan Hriatrengna hnuhnûng ber chu kan la hmang ang. Chumi nî a thlen hma chuan kum tina kan hman Hriatrengnaa kan lantîr inpumkhatna duhawm tak chu kan hlutzia i lantîr ang u.