ZIR TUR THUZIAK 3
Engtin Nge Kan Thinlung Kan Vên Ṭhat Theih?
“Thil dang ber aiin i thinlung vêng ṭha rawh.”—THUF. 4:23.
HLA 52 I Thinlung Vêng Ṭha Rawh
THLIR LAWKNA *
1-3. (a) Engvângin nge Jehova’n Solomona a hmangaih a, eng malsâwmnate nge a dawn? (b) He thuziakah hian eng zawhnate nge chhân a nih ang?
SOLOMONA chu a tleirâwl lai aṭangin Israel lal a ni a. A lal ṭan tirh chuan a mumangah Jehova’n: “Dîl teh, engnge ka pêk ang che?” tiin a zâwt a. Solomona chuan: “Kei zawng naupang chhia mai ka ni a; thu haw lam leh kal lam pawh hi ka la hre lo va. . . . Chutichuan i mite rorêlsakna tûrin i chhiahhlawh hi thuâwihna thinlung pe ang che,” tiin a chhâng a. (1 Lal. 3:5-10, New World Translation) “Thuâwihna thinlung”—inngaitlâwm taka ngenna a va ni tak êm! Jehova’n Solomona a hmangaih pawh hi a mak lo ve! (2 Sam. 12:24) Kan Pathian chuan lal tleirâwl tak chhânna chu a lawm êm avângin “finna leh hriatna thinlung” a pe ta a ni.—1 Lal. 3:12.
2 Solomona chuan a rinawm chhûng chu malsâwmna tam tak a dawng a. “Israelte Pathian, LALPA hming atân” biak in sak theihna chavo hlu a nei a ni. (1 Lal. 8:20) Pathian pêk finna avângin a hmingthang hle a. Pathian thlarau thâwk khuma a awm laia a thusawite chu Bible-a bu thumah chhinchhiah a ni bawk. Chûng zînga pakhat chu Thufingte bu hi a ni.
3 Thufingte bu-ah hian thinlung tih ṭawngkam hi vawi za lai târ lan a ni a. Entîr nân, Thufingte 4:23-ah: “Thil dang ber aiin i thinlung vêng ṭha rawh,” tih kan chhiar a ni. He Bible chânga “thinlung” tih ṭawngkam hian eng nge a kawh? Chu zawhna chu he thuziakah hian chhân a ni ang. Engtin nge Setana’n kan thinlung tihchhiat a tum? Kan thinlung vêng ṭha tûrin eng nge kan tih theih? tih zawhna dang pahnih chhânna pawh kan sawiho bawk ang. Pathian chunga rinawm reng tûr chuan chûng zawhna pawimawh tak chhânnate chu kan hriat a ngai a ni.
“I THINLUNG”—CHU CHU ENG NGE NI?
4-5. (a) Engtin nge Sâm 51:6-na chuan “thinlung” tih ṭawngkamin a sawi tum chu hre thiam tûra min ṭanpui? (b) Kan taksa hrisêlnain chhûng lama kan nihna a pawimawh dân engtin nge a târ lan?
4 Thufingte 4:23-a, “thinlung” tih ṭawngkam hian ‘chhûngril lam,’ a nih loh leh ‘lang lo lam’ a kâwk a. (Sâm 51:6 chhiar rawh.) Thu danga sawi chuan “thinlung” tih ṭawngkam hian kan ngaihtuahna te, rilru vei zâwng te, chêttîrtu te, leh châknate a kâwk a. Chu chu pâwn lama kan lan dân mai ni lovin, chhûngril lama kan nihna dik tak a ni.
5 Kan taksa hrisêlnain chhûng lama kan nihna a pawimawhzia a târ lan dân hi han ngaihtuah teh. A hmasain, taksa hrisêl reng tûr chuan ei in ṭhate kan ei a, kan taksa kan sawizawi reng a ngai a. Chutiang bawkin, thlarau lam hrisêl reng tûr chuan thlarau lam chaw ṭha kan ei a, Jehova chunga rinna kan lantîr reng a ngai a ni. Chutianga lantîrnaah chuan kan thu hriatte nunpui a, kan rinna chungchâng sawi chhuahte a tel a. (Rom 10:8-10; Jak. 2:26) A pahnihnaah, kan taksa chhûng lamah natna nei reng chung pawhin, pâwn lamah hrisêl tak angin kan lang mai thei. Chutiang bawkin, theocratic hun duante kan neih dân azirin, kan rinna chu nghet tak niin kan ngai mai thei a; mahse, chhûngril lamah châkna sualte kan nei reng thei a ni. (1 Kor. 10:12; Jak. 1:14, 15) Setana chuan a ngaihtuah dân anga min ngaihtuahtîr a duh tih kan hre reng tûr a ni. A nih leh, engtin nge chutianga tih a tum? Engtin nge mahni kan invên theih?
SETANA’N KAN THINLUNG TIHCHHIAT A TUM DAN
6. Setana thiltum chu eng nge ni a, chu chu engtin nge tihhlawhtlin a tum?
6 Setana chuan Jehova tehnate ngaihthah a, mahni hmasialna nei a, amah anga hel hmang ni tûrin min duh a. Mahse, ani chuan a ngaihtuah dân leh a tih dân anga ti tûrin min tilui thei lo. Chuvângin, a thiltum hlen chhuah nân kawng dang hman a tum a. Entîr nân, a tihchhiat tawh mite hualvêlin min awmtîr a ni. (1 Joh. 5:19) Ṭhian sualte chuan kan ngaihtuahna leh thiltihte an “tikhawlo” emaw, “tichhia” emaw thei tih kan hre reng chung pawhin, chûng mite chu kan kawm duh a beisei a. (1 Kor. 15:33) Chu tih dân chu hmangin Lal Solomona chu a hneh a ni. Ani chuan milem pathian betu hmeichhe tam tak nupuiah a nei a, a tâwpah, Jehova lak ata “a thinlung an hruai kawisak ta a.”—1 Lal. 11:3.
Setana’n a ngaihtuah dân anga min ngaihtuahtîr a tumna lakah engtin nge kan invênhim theih? (Paragraph 7-na en rawh) *
7. Setana chuan a ngaihtuah dân theh darh nân eng thil dang nge a hman a, engvângin nge chu mi chungchânga kan fîmkhur a ngaih?
7 Setana chuan a ngaihtuah dân theh darh nân film te, leh TV te a hmang a. Ani chuan thawnthute’n min tihlim mai ni lovin, ngaihtuah dân te, rilru vei zâwng te, leh thiltih dânte min zirtîr tih a hria a ni. Isua’n chu zirtîr dân chu a hmang ṭangkai a. Entîr nân, Samari mi ṭha leh a ro sum khawhraltu fapa tlan bo tehkhin thu a sawi kha han ngaihtuah teh. (Mt. 13:34; Lk. 10:29-37; 15:11-32) Mahse, Setana ngaihtuahna thununa awmte chuan min tichhe tûrin thawnthute an hmang thei a. Thlîr dân inbûk tâwk tak kan neih a ngai a ni. Film leh TV te chuan kan ngaihtuahna tibawlhhlawh lovin, min tihlim theiin, finna min neihtîr thei ngei mai. Mahse, kan fîmkhur a ngai. Intihhlimna kan thlan hunah, heti hian kan inzâwt tûr a ni, ‘He film emaw, TV emawa ka thil en hian ka tisa châknaah insûmtheihna nei lo tûrin min zirtîr em?’ tiin. (Gal. 5:19-21; Eph. 2:1-3) I thil en chuan Setana ngaihtuah dân a chawi lâr tih i hriat chuan eng nge i tih ang? Inkaichhâwn theih natna laka i fîmkhur angin chûngte chu i pumpelh duh ngei ang!
8. Engtin nge nu leh pate chuan an fate chu thinlung vêng ṭha tûra an ṭanpui theih?
8 Nu leh pate u, Setana’n in fate thinlung tihchhiat a tumna laka vênghim tûrin mawhphurhna pawimawh tak in nei a. In fate chu natna laka vênghim tûrin theih tâwp in chhuah ngei ang. In chenna in chu tithianghlimin, nang leh i fate natna kaitîr theitu thil reng reng chu in paih bo a ni. Chutiang bawkin, in fate chu film te, TV te, electronic game-te, website-te aṭanga Setana ngaihtuahna thununa awm lo tûrin in vênhim a ngai a ni. Jehova chuan in fate thlarau lam hrisêlna ngaihsak tûrin thuneihna a pe che u a. (Thuf. 1:8; Eph. 6:1, 4) Chuvângin, chhûngkuaah Bible tehnate mila dân siam chu hlau suh. In fate chu an en theih filmte leh en theih loh filmte chu hrilhin, chutianga thu tlûkna in siam chhânte hre thiam tûrin ṭanpui ang che u. (Mt. 5:37) An lo upat chhoh zêl rualin, Jehova tehnate mila thil dik leh dik lote mahnia thliar hrang thiam tûrin zirtîr rawh. (Heb. 5:14) In fate chuan in thusawi aṭangin thil tam tak an zir ang a, a bîk takin, in thiltih aṭangin an zir tam lehzual ang tih hre reng ang che u.—Deut. 6:6, 7; Rom 2:21.
9. Setana chawi lâr ngaih dân pakhat chu eng nge ni a, chu chu engvângin nge a hlauhawm?
9 Setana chuan Jehova ngaihtuahna aia mihring finna min rinchhantîrin kan thinlung tihchhiat a tum bawk. (Kol. 2:8) Setana chawi lâr ngaih dân pakhat—hausakna hi nuna thil pawimawh ber a ni tih hi han ngaihtuah teh. Chutiang ngaih dân neite chu mi hausa tak an ni theiin, an ni lo thei bawk. A enga pawh chu ni se, dinhmun hlauhawmah an awm a ni. Engvângin nge? An thiltum a hlawhtlin theih nân an hrilsêlna te, chhûngkaw inlaichînna te, leh Pathian nêna an inlaichînnate chân hial khawpin sum hmuhna chauh an ngaihtuah vâng a ni. (1 Tim. 6:10) Kan Pa vâna mi chuan sum leh pai chungchânga thlîr dân inbûk tâwk tak nei tûra min ṭanpui avângin kan lâwm tak zet a ni.—Thur. 7:12; Lk. 12:15.
ENGTIN NGE KAN THINLUNG KAN VEN ṬHAT THEIH?
Hmân laia râlvêngtute leh kawngkhâr vêngtute angin, i thinlungah thununna ṭha lote a luh loh nân harhvâng taka awmin, hma la ang che (Paragraph 10-11-na en rawh) *
10-11. (a) Mahni invênghim tûrin eng nge kan tih theih? (b) Hmân laia râlvêngtute chuan eng nge an tih ṭhin a, engtin nge kan chhia leh ṭha hriatna chuan râlvêngtu anga hna a thawh?
10 Hlawhtling taka kan thinlung vêng ṭha tûr chuan thil hlauhawmte kan hriatthiam a, mahni invên nân hma kan lâk vat a ngai a. Thufingte 4:23-a “vêng ṭha” tia lehlin thu mal hian râlvêngtu hnathawh min hriat chhuahtîr a. Lal Solomona hun laia râlvêngtute chuan khawpui bang hrûlah dingin râl an vêng ṭhîn a, dinhmun hlauhawm an hmuh chuan hriattîrna an pe ṭhîn a ni. Chu dinhmun mitthlana chuan Setana’n kan ngaihtuahna a tihchhiat loh nâna kan tih tûrte hre thiam tûrin min ṭanpui a ni.
11 Hmân lai chuan râlvêngtute chu kawngkhâr vêngtute nên an thawk dûn ṭhîn a. (2 Sam. 18:24-26) Anni chuan hmêlmate’n an rawn hnaih apiangin kawngkhârte ṭha taka khârin khawpui chu an vênghim a ni. (Neh. 7:1-3) Setana’n kan thinlunga rawn luh a tum hunah—thu danga sawi chuan kan ngaihtuahna te, rilru vei zâwng te, chêttîrtu te, leh châknate thunun a tum hunah Bible hmanga sawizawi kan chhia leh ṭha hriatna * chuan râlvêngtu angin min vaukhân a. Kan chhia leh ṭha hriatnain thil hlauhawm chungchânga min vaukhân apiangin, chu chu kan ngaihthlâk a, a ṭûl anga chhân lêt nghâl tûr a ni.
12-13. Engti tûra thlêm nge kan nih mai theih a, engtin nge kan chhân lêt ang?
12 Setana ngaihtuahna thununna aṭanga mahni kan invênhim theih dân entîrna pakhat hi han ngaihtuah teh. Jehova chuan “inngaih leh bawlhhlawh zawng zawng, . . . [kan] zîngan lam pawh lamin awm suh se,” tiin min zirtîr a. (Eph. 5:3) A nih leh, hnathawhnaah leh school-ah kan rualpuite’n nungchang bawlhhlawhna chungchâng sawi ṭan ta se, eng nge kan tih ang? “Pathian ngaihsak lohna leh khawvêl châknate” chu kan bânsan tûr a ni tih kan hria a. (Tit. 2:12-13) Râlvêngtu angin kan chhia leh ṭha hriatna chuan thil hlauhawm lakah min vaukhân ang. (Rom 2:13-16) A nih leh, chu chu kan ngaithla ang em? Kan rualpuite sawi chu ngaihthlâk kan châk emaw, thil min hmuhte chu en kan châk emaw pawh a ni mai thei. Mahse, chutih hunah chuan titina thlâkin emaw, an zîng aṭanga kal chhuakin emaw dinhmun hlauhawmte chu kan pumpelh tûr a ni.
13 Kan rualpuite’n thil dik lote min ngaihtuahtîr emaw, min tihtîr emaw huna hnâwl ngam tûr chuan huaisen a ngai a. Jehova chuan theih tâwp kan chhuahna chu a hmuin, Setana ngaihtuahnate do lêt tûra kan mamawh chakna leh finna min pe ang tih kan chiang thei a ni. (2 Chro. 16:9; Is. 40:29; Jak. 1:5) A nih leh, kan thinlung vêng ṭha tûrin keimahni lamah eng nge kan tih zawm zêl theih?
INVENG TLAT RAWH
14-15. (a) Eng atân nge kan thinlung kan hawn ang a, chu chu engtin nge kan tih theih? (b) Engtin nge Thufingte 4:20-22-na chuan Bible chhiar hlâwkpui lehzual tûra min ṭanpui theih? (“ Chhût Ngun Dân” tih bâwm chu en bawk rawh.)
14 Thinlung vêng ṭha tûr chuan thununna ṭha lote lût lo tûra kan thinlung kawngka khâr a, thununna ṭha dawng thei tûra kan hawn a ngai a. Kulh bang nei khawpui tehkhin thu kha han ngaihtuah leh teh. Kawngkhâr vêngtu chuan hmêlmate an luh theih loh nân khawpui kawngkhârte a khâr a; mahse, hun dangah chuan ei tûr leh thil dangte lâk luh nân chûng kawngkhârte chu a hawn a ngai a. Kawngkhârte chu englai maha hawn a nih ngai loh chuan a chhûnga awmte chu ṭâmin an thi mai ang. Chutiang bawkin, Pathian ngaihtuahna inthununtîr tûrin kan thinlung kawngka chu kan hawn ziah a ngai a ni.
15 Bible-ah hian Jehova ngaihtuahnate a awm avângin kan chhiar apiangin kan ngaihtuah dân te, rilru vei zâwng te, leh thiltihte chu Jehova ngaihtuahna kan thununtîr tihna a ni. Engtin nge Bible chhiarna aṭangin hlâwkna a tam thei ang bera kan hmuh theih? Ṭawngṭaina hi a pawimawh hle. Kristian unaunu pakhat chuan: “Bible ka chhiar hmain Jehova hnênah ka ṭawngṭai a, a Thu-a ‘thilmakte fiah taka hmu’ thei tûra ṭanpuina min pe tûrin ka dîl a ni,” tiin a sawi. (Sâm 119:18) Kan thu chhiarte chu kan chhût ngun a ngai bawk. Kan ṭawngṭai a, kan chhiar a, kan chhût ngun hian Pathian Thu chu “[kan] thinlung lai takah,” a thleng a, Jehova ngaihtuahnate chu kan ngaina ṭan a ni.—Thufingte 4:20-22 chhiar rawh; Sâm 119:97.
16. JW Broadcasting en chu engtin nge mi tam takin an hlâwkpui?
16 Pathian ngaihtuahna kan inthununtîr theih dân kawng dang leh chu JW Broadcasting-a video-te en hi a ni. Nupa tuak khat chuan: “Thla tin chhuak program-te hi kan ṭawngṭainate chhânna a ni chiang hle! Chûngte chuan kan lunghnual hunah leh mal nia kan inhriat hunah min tichak ṭhîn a. Chu bâkah, original hlate chu inah kan ngaithla reng bawk. Music-te chu ei rawngbâwl hunah te, in tihthianghlim hunah te, leh thingpui in hunahte kan ngaithla ṭhîn a ni,” tiin an sawi. Chûng program-te chuan kan thinlung vêng ṭha tûra min ṭanpui bâkah, Jehova ngaihtuah dân anga ngaihtuah tûr leh Setana ngaihtuah dânte do tûrin min zirtîr a ni.
17-18. (a) Lalte pakhatna 8:61-a târ lan angin, Jehova hnên aṭanga kan thil zirte kan nunpui hian eng thilte nge thleng? (b)Lal Hezekia entawn tûr siam aṭangin eng nge kan zir theih? (c) Sâm 139:23, 24-a kan hmuh Davida ṭawngṭaina nêna inmilin, eng atân nge kan ṭawngṭai theih?
17 Thil ṭha tih kan hlâwkpui dân kan hmuh apiangin kan rinna a chak lehzual a. (Jak. 1:2-3) Chu bâkah, Jehova’n a fate zînga mi nia inchhuang taka a sawi theih tûra kan nun avângin kan lâwm hle a, amah tihlâwm kan duhna pawh a nasa lehzual a ni. (Thuf. 27:11) Fiahnate chu thinlung zawng zawnga min ngaihsaktu kan Pa rawng kan bâwl tih târ lanna hun remchâng a ni a. (Sâm 119:113) Chu bâkah, Jehova chu thinlung zawng zawnga kan hmangaihzia lantîr nân a thupêkte zâwm a, a duh zâwng tih kan tum tlat a ni.—1 Lalte 8:61 chhiar rawh.
18 Thil kan tisual thei em? Thei e; mi ṭha famkim kan ni lo. Thil kan tisual a nih chuan Lal Hezekia entawn tûr siam chu hre reng ang che. Ani chuan thil a tisual a. Mahse, inchhîrin, “thinlung ṭha famkim” puin Jehova rawng a bâwl zawm leh a ni. (Is. 38:3-6; 2 Chro. 29:1, 2; 32:25, 26) Keini pawh Setana’n a ngaihtuah dâna min thunun a tumna chu i hnâwl ang u. “Thuâwihna thinlung” nei reng tûrin i ṭawngṭai ang u. (1 Lal. 3:9; Sâm 139:23, 24 chhiar rawh.) Thil dang zawng aia kan thinlung kan vên ṭhat chuan Jehova chungah kan rinawm reng thei ang.
HLA 32 “Tihchêt Rual Lohvin Nghet Rawh U!”
^ par. 5 Jehova chungah kan rinawm dâwn nge ni a, Pathian rawngbâwl bânsan tûrin Setana bumin kan awm zâwk dâwn? A chhânna chu fiahna kan tawrh nasat dânah ni lovin, kan thinlung kan vên ṭhat dânah a innghat a. “Thinlung” tih ṭawngkam hian eng awmzia nge a neih? Engtin nge Setana’n kan thinlung tihchhiat a tum? Engtin nge chu chu kan vên ṭhat theih? He thuziak hian chûng zawhna pawimawh takte chu a chhâng ang.
^ par. 11 ṬAWNGKAM HRILHFIAHNA: Jehova chuan kan ngaihtuahna te, rilru vei zâwng te, leh thiltihte inenfiah a, mahnia thu tlûkna siam theihna min pe a. Bible chuan chutianga tihtheihna chu chhia leh ṭha hriatna tiin a sawi a ni. (Rom 2:13-16; 9:1) Bible-a kan hmuh angin, Bible hmanga sawizawi chhia leh ṭha hriatna chuan kan thil ngaihtuah te, thiltih te, leh thusawite chu Jehova tehna nêna a inmil leh mil loh min hriattîr a ni.
^ par. 56 MILEM TAR LANTE: Baptisma châng tawh unaupa chuan TV a en laiin nungchang bawlhhlawhna lam a rawn lang a. A en zawm dâwn leh dâwn loh chungchângah thu tlûkna a siam a ngai a ni.
^ par. 58 MILEM TAR LANTE: Hmân lai huna râlvêngtu chuan khawpui pâwna thil hlauhawm thleng chu a hmu a. A hnuai lama awm kawngkhâr vêngtute chu a au va, anni chuan an chhâng lêt nghâl vat a, khawpui kawngkhârte an khâr a, chhûng lam aṭangin an kalh a ni.