ZIR TUR THUZIAK 5
Inkhâwma Kan Telnain Kan Chungchâng A Târ Lante
“A lo kal leh hma loh zawng Lalpa thihna chu in entîr ṭhîn a ni si a.”—1 KOR. 11:26.
HLA 149 Tlanna Avânga Lâwmna
THLIR LAWKNA *
1-2. (a) Lalpa Zanriah atâna mi maktaduai tam tak an kal khâwm hunah Jehova’n eng nge a hmuh? (A kâwma milem en rawh.) (b) He thuziakah hian eng nge kan sawiho vang?
LALPA Zanriah hmang tûra khawvêl puma mi maktaduai tam tak an kal khâwm Jehova’n a hmu chu han mitthla teh. Ani chuan mipui tam tak kal khâwm chu en satliah mai ni lovin, chuta telte chu a mi mal tinin a hria a ni. Entîr nân, rinawm taka kum tina kal ṭhînte chu a hmu a. Chûng zîngah chuan tihduhdahna nasa tak kâra lo kalte pawh an tel ngei ang. Mi dangte chuan chawlhkâr tin inkhâwmahte tel thei reng lo mah se, Hriatrengna inkhâwm chu loh theih lohva kal ngai niin an thlîr a. Jehova chuan Hriatrengna inkhâwm chungchâng an hriat duh avânga a vawi khatna atâna lo telte pawh a hria a ni.
2 Jehova chu Hriatrengna inkhâwma mi tam tak an kal a hmuh chuan a hlim hle a. (Lk. 22:19) Mahse, ani chuan chuta lo kal zât chu a ngai pawimawh ber lo. An kal chhan chu a tân a pawimawh zâwk a ni. He thuziakah hian, he zawhna pawimawh tak: Jehova’n amah hmangaihtute tâna a buatsaih kum tina neih Hriatrengna inkhâwmah chauh ni lovin, chawlhkâr tin inkhâwmahte engvângin nge kan tel ang? tih hi kan sawiho vang.
Lalpa Zanriah hmang tûra lo kal khawvêl puma mi maktaduai tam takte chu lo lawm an ni (Paragraph 1-2-na en rawh)
INNGAIHTLAWMNAIN INKHAWM TURIN MIN CHETTIR
3-4. (a) Engvângin nge inkhâwmahte kan tel ṭhin? (b) Inkhâwma kan telna chuan kan chungchâng eng nge a târ lan? (c) Korinth thawnkhat 11:23-26-a thute ṭanchhanin, engvângin nge Hriatrengna inkhâwm chu kan pelh tûr a nih loh?
3 Kohhran inkhâwma kan tel chhan ber chu kan biakna pêng pakhat a nih vâng a ni. Chu bâkah, Jehova zirtîrna dawn kan duh avânga inkhâwm kan ni bawk. Mi chapote chuan zirtîr ngai niin an inhre lo va. (3 Joh. 9) Chu mi nêna inkalh takin, keini chuan Jehova leh a inawpna pâwl zirtîra awm chu kan duh tak zet a ni.—Is. 30:20; Joh. 6:45.
4 Inkhâwma kan telna chuan mi inngaitlâwm kan nihzia te, zirtîrna dawn kan duhzia te, leh inpeih renga kan awmziate a târ lang a. Isua thih Hriatrengna zân pawimawh taka kan tel chhan chu kal ngei ngei ngai nia kan ngaih vâng mai ni lovin, Isua thupêk: “Mi hriat reng nân hei hi ti ṭhîn rawh u,” tih chu inngaitlâwm taka zawm kan duh vâng a ni. (1 Korinth 11:23-26 chhiar rawh.) Chu inkhâwm chuan nakin hun atâna kan beiseina a tinghet a, Jehova min hmangaihzia pawh min hriatnawntîr a ni. Mahse, Jehova chuan kum khatah vawi khat aia tam kan infuih a, kan intihchak a ngai tih a hria a. Chuvângin, chawlhkâr tin inkhâwmte min buatsaihsak a, chûng inkhâwmahte tel tûrin min fuih a ni. Inngaihtlâwmna chuan thuâwih tûrin min chêttîr a. Chawlhkâr tin hian inkhâwm atâna inbuatsaih nân leh kan inkhâwm nân dârkâr tam tak kan hmang ṭhîn a ni.
5. Engvângin nge mi inngaitlâwmte chuan Jehova sâwmna chu an chhân lêt?
5 Kum tin hian, mi inngaitlâwm tam tak chuan Jehova’n a zirtîrna dawng tûra a sâwmna chu an pawm a. (Is. 50:4) Anni chuan Hriatrengna inkhâwma lo tel chu nuam an tiin, inkhâwm dang kan neihahte pawh an tel ṭan a ni. (Zak. 8:20-23) Chûng inkhâwma lo tel mi tharte pawh tiamin, kan za hian, “[min] ṭanpuitu leh [min] chhanhimtu” Jehova kaihhruaina leh zirtîrna dawn chu nuam kan ti a. (Sâm 40:17) Ni e, Jehova leh a hmangaih êm êm a Fapa Isua zirtîrna dawng tûra sâwmna pawm aia nuam leh pawimawh zâwk a awm thei dâwn em ni?—Mt. 17:5; 18:20; 28:20.
6. Engtin nge pa pakhat chu a inngaihtlâwmnain Hriatrengna inkhâwma tel tûra a ṭanpui?
6 Kum tin hian, Isua thih Hriatrengna inkhâwma a tam thei ang bera lo tel tûrin theih tâwp chhuahin mite kan sâwm a. Mi inngaitlâwmte chuan kan sâwmna an pawm avângin an hlâwkpui a ni. He entîrna hi han ngaihtuah teh. Kum engemaw zât kal ta khân, mi pakhat chuan Hriatrengna inkhâwm sâwmna a dawng a; mahse, a petu unaupa hnênah a kal theih loh tûr thu a hrilh a ni. Mahse, Hriatrengna zânah, unaupain Kingdom Hall-a inkhâwm tûra chu pa lo kal a hmuh chuan mak a ti hle a. Ṭha taka lawm a hlawhnain a rilru a khawih êm avângin, chu pa chu chawlhkâr tin inkhâwmahte pawh a tel ṭan a ni. Dik tak chuan, kal ta kum chhûng khân, vawi thum chauh inkhâwm a pelh a. Chutianga ṭha taka chhâng lêt tûrin engin nge ṭanpui? A rilru thlâk danglam tûr khawpa a inngaihtlâwm vâng a ni. Amah sâwmtu unaupa chuan, a hnuah, “Ani chu mi inngaitlâwm tak a ni,” tiin a sawi. Jehova’n a lamah a hîp tih a chiang a, tûnah chuan baptisma chang unaupa a ni tawh a ni.—2 Sam. 22:28; Joh. 6:44.
7. Inkhâwma kan thu hriatte leh Bible-a kan thu chhiarte chuan inngaihtlâwmna nei tûrin engtin nge min ṭanpui theih?
7 Inkhâwma kan thu hriatte leh Bible-a kan thu chhiarte chuan inngaihtlâwmna nei tûrin min ṭanpui thei a. Hriatrengna hun thlen hma chawlhkâra kan inkhâwmahte chuan Isua entawn tûr siamte leh tlan nâna nun a pêknaa a lantîr inngaihtlâwmna chu kan ngaihven tlângpui a ni. Hriatrengna hun thlen hma nîahte chuan, Isua thih leh thawhleh hun lai vêla thilthlengte chhiar tûra fuih kan ni bawk. Chûng inkhâwma kan thu hriatte leh Bible-a thilthleng kan chhiarte chuan Isua inthawina avânga kan lâwmna chu a tipung lehzual a. Chu chuan a harsat hunah pawh, Isua inngaihtlâwmna entawn tûr leh Jehova duh zâwng ti tûrin min chêttîr a ni.—Luka 22:41, 42.
HUAISENNAIN INKHAWM TURIN MIN ṬANPUI
8. Engtin nge Isua’n huaisenna a lantîr?
8 Isua lantîr huaisenna pawh entawn kan tum a. A thih hma nîtea a lantîr huaisenna kha han ngaihtuah teh. Nakin lawkah, a hmêlmate chuan an timualpho ang a, an vua ang a, an tihlum ang tih a hria a. (Mt. 20:17-19) Chuti chung pawhin, thihna chu inhuam takin a hmachhawn a ni. A hun a lo thlen chuan, Gethsemane huana a hnêna awm a tirhkoh rinawmte chu: “Tho ula, i kal ang u; en teh u, mi mantîrtu tûr chu a lo hnaih tâk hi,” tiin a hrilh a. (Mt. 26:36, 46) Amah man tûra hriamhrei keng mipuite an lo kal chuan a ding chhuak a, tu nge a nih tih a insawi hnuah, sipaite hnênah a tirhkohte kaltîr tûrin a hrilh a ni. (Joh. 18:3-8) Isua chuan huaisenna nasa tak a va lantîr chiang êm! Tûn laiah, hriak thih Kristiante leh berâm dangte chuan Isua lantîr huaisenna chu entawn an tum tlat a ni. Engtin nge?
Kristian inkhâwma tel tûra huaisenna i lantîrna chuan mi dangte a tichak (Paragraph 9-na en rawh) *
9. (a) Inkhâwm ziah tûr chuan engvângin nge huaisenna kan neih a ngaih mai theih? (b) Kan entawn tûr siam chuan rinna avânga lung in tâng kan unaute chu engtin nge a nghawng theih?
9 Inkhâwm ziah tûr chuan dinhmun harsa tak hnuaiah pawh huaisenna kan lantîr a ngai mai thei a. Kan unau ṭhenkhat chu lungngaihna leh lunghnualna neiin, hrisêl lo chûng pawhin an inkhâwm a. Unau dang lehte chu chhûngkuaa mite, a nih loh leh sawrkâr thuneitute dodâlna nasa tak kârah huaisenna lantîrin an inkhâwm a ni. Kan entawn tûr siamin rinna avânga lung in tâng kan unaute a nghawng dân tûr chu han ngaihtuah teh. (Heb. 13:3) Fiahna tâwk chung pawha Jehova rawng kan bâwl zawm zêl tih an hriat chuan, an rinna, an huaisenna leh an rinawmna vawng tlat tûrin a tichak ngei ang. Tirhkoh Paula pawhin chutiang thiltawn chu a nei a ni. Rom khuaa tan ina a awm laiin, a unaute’n Pathian rawng rinawm takin an bâwl tih a hriat apiangin a hlim ṭhîn a. (Phil. 1:3-5, 12-14) Tan in ata a chhuah hma emaw, a chhuah hnu emaw lawk khân, Hebrai mite hnênah lehkha a thawn a. Chu lehkha thawnah chuan chûng Kristian rinawmte chu “unau inhmangaihna” awmtîr zêl tûr leh inkhâwmte bansan lo tûrin a fuih a ni.—Heb. 10:24, 25; 13:1.
10-11. (a) Hriatrengna inkhâwmah tute nge kan sâwm ang? (b) Ephesi 1:7-ah chutianga kan tihna tûr chhan eng nge awm?
10 Hriatrengna inkhâwma tel tûra kan chhûng te, hnathawhpui te, leh ṭhenawmte kan sâwm hian huaisenna kan lantîr a. Engvângin nge chûng mite chu kan sâwm? Jehova leh Isua’n kan tâna min tihsakte avânga kan lâwm êm avângin mi dangte chu Hriatrengna inkhâwma tel ve tûrin sâwm lovin kan awm thei lo. Tlanna hmanga Jehova lantîr “khawngaihna” chu hlâwkpui ve tûrin kan duh a ni.—Ephesi 1:7 chhiar rawh; Thup. 22:17.
11 Huaisenna lantîra inkhâwma kan inhmuh khâwm hian, Pathian leh a Fapain chhinchhiahtlâk taka an lantîr mize dang hlu tak pawh kan târ lang bawk a ni.
HMANGAIHNAIN INKHAWM TURIN MIN CHETTIR
12. (a) Engtin nge kan inkhâwmte chuan Jehova leh Isua hmangaih lehzual tûra min ṭanpui? (b) Korinth thawnhnih 5:14, 15-na chuan Isua entawnnaah eng ti tûrin nge min fuih?
12 Jehova leh Isua kan hmangaihna chuan inkhâwm tûrin min chêttîr a. Inkhâwma kan thu zirte chuan Jehova leh a Fapa kan hmangaihna a tinghet ve thung a ni. Inkhâwmahte chuan kan tâna thil min tihsakte chu hriatnawntîr kan ni fo va. (Rom 5:8) A bîk takin, Hriatrengna inkhâwm hian tlanna ngaihhlut nachâng la hre lote pawh Jehova leh Isua’n an hmangaihzia min hriatnawntîr ṭhîn. Lâwmnaa kan khah avângin, nî tina kan nun dânah Isua entawn kan tum tlat a. (2 Korinth 5:14, 15 chhiar rawh.) Chu bâkah, tlanna min buatsaihsak avângin Jehova chu thinlung taka fak tûra chêttîr kan ni a. Kan fak theih dân kawng khat chu inkhâwma thinlung taka chhânnate pêk hi a ni.
13. Jehova leh a Fapa kan hmangaihzia engtin nge kan lantîr theih? Hrilhfiah rawh.
13 Jehova leh a Fapa kan hmangaihzia chu an tâna inhuam taka kan inpêkna hmangin kan lantîr thei a. Inkhâwma tel thei tûrin kawng hrang hranga kan inpêk a ngai ṭhîn a ni. Kohhran tam tak chuan inkhâwm pakhat chu nilênga hna thawh hnu, chauh êm êm hunah an nei a. Inkhâwm dang leh chu mi dangte chawlh hahdam hun, chawlhkâr tâwpah an nei ṭhîn bawk. Jehova chuan chau hle chung pawhin kan inkhâwm tih a hria em? Hre teh meuh mai! Dik takin, Jehova chuan chau hle chung pawha inkhâwm ṭâng ṭânga kan hmangaihzia kan lantîrna chu a hlut lehzual a ni.—Mk. 12:41-44.
14. Engtin nge Isua’n mahni hmasial lo hmangaihna lantîrna kawngah entawn tûr a siam?
14 Isua chuan mahni hmasial lo hmangaihna lantîrna kawngah kan tân entawn tûr a siam a. Ani chuan a zirtîrte tâna thih mai chauh ni lovin, mahni aia an ṭhatna tûr dah pawimawh zâwka nun chu a inhuam a ni. Entîr nân, tisa lamah a chauh hle emaw, a rilru a mangan hle emaw hunah pawh a hnungzuite tân hun a pe a. (Lk. 22:39-46) Mite hnên aṭanga a hmuh theih tûr ni lovin, mite a pêk theih tûrte chu a ngaihtuah tlat zâwk a ni. (Mt. 20:28) Jehova leh kan unaute kan hmangaihna a ngheh chuan, Lalpa Zanriah inkhâwm leh chawlhkâr tin inkhâwmte pawh tel tûrin theih tâwp kan chhuah ngei ang.
15. Tute nge ṭanpui kan tum ber?
Gal. 6:10) Chûng kan unaute chu inkhâwmte, a bîk takin, Hriatrengna inkhâwma lo tel tûra kan fuih hian kan hmangaihzia kan lantîr a. Rawngbâwlnaa tel tawh lo tuemaw chu hmangaihnaa khat kan Pa leh Berâm vêngtu Jehova hnêna a lo kîr leh hian, Jehova leh Isua angin kan lâwm tak zet a ni.—Mt. 18:14.
15 Kristian dik unaute zînga mi kan ni a, kan zînga lo tel ve tûra mi tharte sâwmnaah a tam thei ang bera tel chu nuam kan ti a. Mahse, kan ngaihven ber chu rawngbâwlnaa tel tawh lo, “rinna chhûngte zînga” mite ṭanpui hi a ni. (16. (a) Engtin nge kan infuih tawn theih a, inkhâwmnate chuan engti tûrin nge min ṭanpui? (b) Engvângin nge tûn hi kum khat chhûnga Johana 3:16-a kan hmuh Isua thute hriat chhuah nâna hun ṭha tak a nih?
16 Kum 2019, April 19, Zirtâwp tlaia neih tûr Hriatrengna inkhâwma lo tel tûrin chawlhkâr lo awm tûrahte chuan mi a tam thei ang berin sâwm ang che. (“ Anni Chu I Sâwm Ang Em?” tih bâwm chu en rawh) Kum 2019 chhûng hian, Jehova min buatsaihsak inkhâwm zawng zawnga tel a, entawn tûr siamin i infuih tawn ang u. He khawvêl tâwpna a hnaih rual hian, inngaihtlâwmna te, huaisenna te, leh hmangaihnate nei reng tûrin kan inkhâwm ziah tûr a ni. (1 Thes. 5:8-11) Jehova leh a Fapain min hmangaihzia an lantîr avânga kan lâwmna chu thinlung zawng zawngin i lantîr ang u!—Johana 3:16 chhiar rawh.
HLA 43 Invêng leh Ding Nghetin, Chak Zual Rawh U
^ par. 5 Kum 2019, April 19, Zirtâwp tlaia neih tûr Krista thih Hriatrengna chu kum khat chhûnga inkhâwm pawimawh ber a ni ang. Chu inkhâwma tel tûrin engin nge min chêttîr? Jehova tihlâwm kan duh vâng a ni. He thuziakah hian Hriatrengna inkhâwm leh chawlhkâr tin inkhâwma telnain kan chungchâng a târ lante chu kan sawiho vang.
^ par. 52 MILEM TAR LANTE: Rinna avânga lung in tâng unaupa chu in aṭanga a lehkha dawnin a tichak a. Theihnghilh a ni lo tih a hria a, an awmna bialah tualchhûng buaina a awm chung pawhin, a chhûngte chu Jehova chungah an rinawm tlat tih chanchin a hriatna chuan a tihlim tak zet a ni.