1. Jehova chunga Davida rilru put hmang chu eng nge ni a, chu chuan engti tûrin nge a chêttîr?

LAL DAVIDA chuan: “LALPA chu a ropui a, nasa taka fak tûr a ni,” tiin a ziak a. (Sâm 145:3) Ani chuan Jehova a hmangaih a, chu chuan Pathian chu “Inkhâwmho zîngahte,” fak tûrin a chêttîr a ni. (Sâm 22:22; 40:5) Nang pawhin Jehova i hmangaih a, Davida’n: “Aw LALPA, kan pu Israela Pathian, chatuana fakin awm rawh,” tia a sawi hi i pawm ngei ang tih chu rinhlelh rual a ni lo.—1 Chro. 29:10-13.

2. (a) Engtin nge Jehova kan fak theih? (b) Unau ṭhenkhatin eng harsatna nge an neih a, eng nge kan sawiho vang?

² Tûn laiah, Jehova kan fak theih dân kawng khat chu Kristian inkhâwma chhânna pêk hi a ni. Mahse, kan unau tam tak chuan chhânna pêk chu harsa an ti hle a. Inkhâwma chhânna pêk chu an hlauh avângin an pe ngam ṭhîn lo va. Engtin nge chu hlauhna chu an hneh theih? Eng thurâwn ṭangkai takin nge mi tichak thei chhânna pe ṭheuh tûra min ṭanpui theih? Chûng zawhnate kan chhân hmain, inkhâwma chhânna kan pêk chhan bulpui pali kan sawiho hmasa ang.

3-5. (a) Hebrai 13:15-nain a sawi angin, engvângin nge inkhâwmah chhânna kan pêk? (b) Chhânna inang kan pe ṭheuh tûr a ni em? Hrilhfiah rawh.

³ Jehova chuan amah fak theihna chanvo hlu min pe ṭheuh va. (Sâm 119:108) Inkhâwma kan chhânna pêkte hi “faka inthawina” zînga mi a ni a, chu chu tumahin kan tân min tihsak thei lo. (Hebrai 13:15 chhiar rawh.) Jehova’n inthawina, a nih loh leh chhânna inang pe ṭheuh tûrin min phût em? Phût lo!

 ⁴ Jehova chuan kan theihnate leh kan dinhmunte a inang lo tih a hria a, a hnêna kan pêk theih inthawinate chu a hlut tak zet a ni. Israel mite hnên aṭanga a pawm zâwng inthawinate chu han ngaihtuah teh. Israel ṭhenkhat chuan berâm no emaw, kêl emaw chu inthawi nân an hlan thei a. Mahse, Israel mi rethei chuan “ṭhuro pahnih emaw, pârva no pahnih emaw,” a hlan thei a ni. Chûng sava pahnih pawh a pêk theih loh chuan, Jehova’n “chhangphut dip tak, epha hmun sâwma ṭhena hmun khat,” chu a pawm a. (Lev. 5:7, 11) Chhangphut chu tlâwm hle mah se, “dip tak” a nih chuan, Jehova’n chu inthawina chu a hlut tho a ni.

⁵ Ngilneihna nei tak kan Pathian chuan tûn laiah pawh chutiang chuan a la thlîr reng a. Chhânna kan pêk hian, thusawi thiam tak Apollova ang leh mi thlêm thiam tak Paula anga chhânna ṭha tak pe ṭheuh tûrin min beisei lo. (Tirh. 18:24; 26:28) Kan thiam ang tâwk a, a ṭha thei ang bera chhânna kan pêk chu Jehova duh zâwng tak a ni. Dâr tangka dere pahnih thlâktu hmeithai kha hre reng ang che. A neih zawng zawng a pêk avângin, ani chu Jehova tân a hlu hle a ni.—Lk. 21:1-4.

6. (a) Hebrai 10:24, 25-a sawi angin, mi dangte chhânna chuan engtin nge min nghawng theih? (b) Engtin nge mi tichak thei tak chhânnate avânga kan lâwmzia kan lantîr theih?

⁶ Chhânna pêkna hmangin kan intichak tawn a ni. (Hebrai 10:24, 25 chhiar rawh.) Inkhâwma chhânna chi hrang hrang kan hriat hian nuam kan ti a. Naupangte’n thinlung taka chhânna tâwitê an pêk hian kan hlim bawk. Tuemawin thutak a hmuh dân chungchâng phûr taka a sawi kan hriat hian kan chak phah sawt ṭhîn a. Mi zakzum tak, a nih loh leh kan ṭawng an zir ṭan chuah chung pawha ‘intihuaisen a’ chhânna petute chu kan hlut hle bawk. (1 Thes. 2:2) Theih tâwp an chhuah avânga kan lâwmzia engtin nge kan lantîr theih? Inkhâwm bânah mi tichak thei tak chhânna an pêk avângin lâwmthu kan hrilh thei a. Kan lâwmzia kan lantîr theih dân kawng dang leh chu mahni ngeiin chhânna kan pêk hi a ni. Chutiang chuan inkhâwmnaahte fuihna kan dawng mai ni lovin, mi dangte pawh kan tichak bawk.—Rom 1:11, 12.

7. Chhânna kan pêk hian engtin nge kan hlâwkpui?

⁷ Chhânna kan pêk hian mahni ngeiin kan hlâwkpui. (Is. 48:17) Engtin nge? A  hmasain, inkhâwma chhânna pêk kan tum hian ṭha takin kan inbuatsaih tlângpui ṭhîn a. Ṭha taka kan inbuatsaih hian, Pathian Thu hriatthiamna kan nei lehzual a ni. Chutianga kan hriatthiam poh leh kan thu zirte kan nunpui lehzual thei a. Pahnihnaah, sawihonaa kan tel avângin, inkhâwm chu nuam kan ti lehzual ngei ang. Pathumnaah, chhânna pe tûra theih tâwp chhuah a ngaih avângin, kan sawiho tâk thute chu inkhâwm bân hnuah pawh kan la hre reng ṭhîn a ni.

8-9. (a) Malakia 3:16-a târ lan angin, kan chhânna pêkte chu engtin nge Jehova’n a ngaih nia i rin? (b) Unau ṭhenkhat chuan eng harsatna nge an la neih mai theih?

⁸ Kan rinna kan târ lan hian Jehova kan tilâwm. Inkhâwma chhânna pe tûra theih tâwp kan chhuah hian Jehova’n a ngaithlain, a hlut tak zet tih kan chiang thei a. (Malakia 3:16 chhiar rawh.) Amah tilawm tûra theih tâwp kan chhuahna chu mal min sâwmin a hlutzia a lantîr a ni.—Mal. 3:10.

⁹ Inkhâwma chhânna pêk chhan tûr ṭha kan nei tih a chiang hle. Mahse, unau ṭhenkhatin bân an phar ngam lo pawh a ni mai thei. Chutianga i awm a nih chuan, lunghnual suh. Inkhâwma tam lehzuala chhânna kan pêk theih nâna min ṭanpui theitu Bible thu bul te, entîrna ṭhenkhat te, leh thurâwn ṭha ṭhenkhatte i lo ngaihtuah ang u.

10. (a) Kan zînga tam takin eng hlauhna nge an neih? (b) Chhânna pe tûra hlauhna chu engvângin nge thil ṭha tak a nih theih?

¹⁰ Chhânna pe tûra bân phar i tum chhin ringawt pawh hian i zam deuh ṭhîn em? Chutiang i nih chuan, nangmah chuah i ni lo. Kan zînga a tam zâwk chuan chhânna kan pêk hian hlauhna engemaw chen kan nei ṭheuh va. Chutianga i hlauhna hneh thei tûr chuan i hlauh chhan i hriat hmasat a ngai a ni. I sawi tum theihnghilh emaw, chhân dik loh emaw i hlauh vâng a ni em? I chhânna chu mi dangte chhânna ang tluka a ṭhat loh i hlauh vâng a ni em? Dik tak chuan, chutianga hlauhna i nei chu thil ṭha tak a ni thei. Chu chuan mi inngaitlâwm  tak i ni tih leh mi dangte chu nangmah aia ṭha zâwkah i ngai tih a târ lang a ni. Jehova’n chu mizia chu a ngaina a. (Sâm 138:6; Phil. 2:3) Mahse, Jehova chuan amah fak tûr leh inkhâwma i unaute tichak tûrin a duh che a ni. (1 Thes. 5:11) Ani chuan a hmangaih che a, i mamawh huaisenna a pe ang che.

11. Bible-a eng hriatnawntîrnatein nge min ṭanpui thei?

¹¹ Bible-a hriatnawntîrna ṭhenkhat hi han ngaihtuah teh. Bible chuan kan thusawiah leh thusawi dânah thil kan tisual ṭheuh tih min hrilh a. (Jak. 3:2) Jehova chuan ṭha famkim tûrin min beisei lo va, kan unaute pawh a beisei hek lo. (Sâm 103:12-14) Anni chu thlarau lama kan chhûngkua an ni a, min hmangaihtute an ni. (Mk. 10:29, 30; Joh. 13:35) Anni chuan kan chhânna pêkte chu a dik chiah loh châng a awm tih an hre thiam a ni.

12-13. Nehemia leh Jona entawn tûr siam aṭangin eng nge kan zir theih?

¹² Kan hlauhnate hneh tûra min ṭanpui thei Bible-a entîrna ṭhenkhat hi han ngaihtuah teh. Nehemia chu hre reng ang che. Ani chu lal thiltithei tak ina rawngbâwl a ni a. Jerusalem kulh bang leh kawngkhârte a chhia tih a hriat avângin a lungngai hle a. (Neh. 1:1-4) Lalin a hlim loh chhan sawi tûra a zawh huna a zam dân tûr chu han mitthla teh! Nehemia chu a ṭawngṭai nghâl a, tichuan, lal chu a hrilh ta a. Lal chuan Pathian mite ṭanpui tûrin thil tam tak a ti ta a ni. (Neh. 2:1-8) Jona pawh hi han ngaihtuah teh. Jehova’n Ninevi khuaa mite hnêna thusawi tûra a tih khân, Jona chuan a hlauh êm avângin chu mi khaw pan lohna lamah a tlan bo a ni. (Jon. 1:1-3) Mahse, Jehova ṭanpuinain, Jona chuan a mawhphûrhna chu a hlen thei a. A thusawi chuan Ninevi mite chungah thil ṭha tam tak a thlen a ni. (Jon. 3:5-10) Chhânna kan pêk hmaa kan ṭawngṭai a pawimawhzia Nehemia hnên aṭangin kan hre thei a. Jehova chuan hlauhna nasa tak kan nei chung pawha a rawngbâwl tûrin min ṭanpui thei tih Jona hnên aṭangin kan hre bawk a ni. Dik tak chuan, kohhrana chhânna pêk chu Ninevi mite hnêna rorêlna thuchah sawi aiin a hlauhawm zâwk dâwn em ni?

¹³ Inkhâwmnaa mi tichak thei tak chhânna pe tûrin eng thurâwn ṭhatein nge min ṭanpui thei? Thurâwn pêk ṭhenkhat i lo ngaihtuah ang u.

14. Engvângin nge kan inkhâwm atâna ṭha taka kan inbuatsaih ang a, eng hunah nge chutianga kan tih theih?

¹⁴ Inkhâwm tin atân inbuatsaih rawh. Ṭha taka i inbuatsaih lâwk chuan, chhânna pe tûrin inrintâwkna i nei lehzual ang. (Thuf. 21:5) Ni e, kan hun duan neih dân chu a inang lo va. Kum 80 chuang, hmeithai Eloise-i chuan Zir Tûr Vênnainsâng atân chawlhkâr tîr lamah inbuatsaihna a nei ṭhîn a. Ani chuan, “Ka inbuatsaih lâwk hian inkhâwmte hi nuam ka ti lehzual,” tiin a sawi. Khawvêl lama hunbi kima hnathawk Joy-i chuan Inrin nî chu Vênnainsâng zir nân a hmang a. Ani chuan,  “inkhâwm hnaih lama inzirna ka neih hian ka chhinchhiah thei zâwk,” tiin a sawi. Pioneer leh hna tam tak nei kohhran upa Ike-a chuan, “Vawi khata a vaia en vek aiin, chawlhkâr tluanna hun tlêm têtê pea inzirna neih hi ka tân chuan a ṭha berin ka hria,” tiin a sawi.

15. Engtin nge inkhâwm atân ṭha taka i inbuatsaih theih?

¹⁵ Inkhâwm atâna ṭha taka inbuatsaihnaah eng nge tel? I inzirna chu Jehova hnênah thlarau thianghlim dîlin ṭan ṭhîn ang che. (Lk. 11:13; 1 Joh. 5:14) Tichuan, minute rei lote chhûngin, zir tûr thuziaka a thupuite, thupuitê te, tehkhin thu te, leh zirtîrna bâwmte chu en hmasa la. Paragraph tin i zir laiin, Bible châng târ lante chu a tam thei ang bera chhiar tum ang che. I thu zirte chu chhût ngun la, chhânna i pêk duh laite chu ngaihven bîk ang che. I inbuatsaih ṭhat poh leh, i hlâwkpui lehzual ang a, chhânna pêk a awlsam lehzual bawk ang.—2 Kor. 9:6.

16. In ṭawngin eng hmanruate nge in neih a, chûngte chu engtin nge i hman?

¹⁶ A theih chuan, electronic aṭanga in ṭawnga hmuh theih hmanruate chu hmang rawh. Jehova chuan a inawpna pâwl hmangin inkhâwm atâna kan inbuatsaihnaa min ṭanpui tûrin electronic aṭanga hmuh theih hmanruate min pe a. JW Library^® app aṭangin zir tûr thu leh hla chhuahte chu kan download thei a ni. Tichuan, chûngte chu kan duh hun leh hmun apiangah a lo berah pawh, chhiarin emaw, ngaithlain emaw kan zir thei a. Unau ṭhenkhat chuan he hmanrua hi hnathawh chawlh lai te, school chawlh lâwk chhûng te, leh khual an zin laitein an hmang a. Watchtower Library leh Vênnainsâng ONLINE LIBRARY chuan zirlai thuziaka hriat chian lehzual kan duhte chu awlsam taka zawng hmu tûrin min ṭanpui a ni.

17. (a) Chhânna chi hrang hrang inbuatsaih chu engvângin nge a ṭhat? (b) Jehova Ṭhian Ni Ang Che—Chhân Tûr Inbuatsaih Rawh tih video aṭangin eng nge i zir theih?

¹⁷ A theih chuan, zir tûr tin atân chhânna chi hrang hrang inbuatsaih rawh. Engvângin nge? Bân i phar apiangin koh i ni lo mai thei a. Mi dangte pawh i ruala an phar ve mai theih avângin, kaihruaitu chuan chûng zînga pakhat chu a thlang dâwn a. Inkhâwm chu hun duan anga a kal theih nân, kaihruaitu chuan chhânna pe duhtu zawng zawng chu a ko vek kher lo mai thei. Chuvângin, zirna ṭan tir lama koh i nih loh pawhin thinrim emaw, lunghnual emaw mai suh. Chhânna chi hrang hrang i inbuatsaih chuan sawihonaah tel theihna hun remchâng i nei tam lehzual ang. Chhânna atâna i inbuatsaih zînga pakhatah chuan Bible châng chhiar a tel thei a. Mahse, a theih chuan, mahni îr-âwm chhuaka chhâng tûrin inbuatsaih bawk ang che. *

18. Engvângin nge tâwi fel taka kan chhân ang?

¹⁸ Chhânna tâwi fel tak pe rawh. Mi tichak thei tak chhânnate chu tâwi fel tak a ni tlângpui  ṭhîn a. Chuvângin, tâwi fel taka chhân tum la. Second 30 chhûnga chhân zawh theih tum ang che. (Thuf. 10:19; 15:23) Inkhâwmah kum tam tak chhûng chhânna i lo pe ṭhîn a nih chuan, chhânna tâwi fel tak pein entawn tûr ṭha i siam chu thil pawimawh tak a ni. Thil tam tak târ lan duh vânga chhânna sei tak i pêk chuan, unau dangte’n nangmah ang tluka chhâng thiam ve lova inngaiin, chhânna pêk an hreh phah mai thei a. Chu bâkah, chhânna tâwi fel tak chuan inkhâwma mi tam tak tel ve theihna hun a pe bawk. A bîk takin, koh hmasak ber i nih chuan, zawhna chu tluangtlam tak leh tlang takin chhâng ang che. Paragraph chhûnga thu pawimawh zawng zawng chu sawi vek tum suh. Paragraph chhûnga thu pawimawh zual deuhte sawiho zawhah, chhânna dangin i belhchhah leh thei a ni.—“Eng Nge Ka Chhân Theih?” tih bâwm chu en rawh.

19. Engtin nge kaihruaituin a ṭanpui theih che a; mahse, eng nge i tih ngai?

¹⁹ Chhânna i pêk duh paragraph bîk chu kaihruaitu hriattir rawh. Chutianga tih i tum a nih chuan, inkhâwm ṭan hma daihin kaihruaitu hnênah hrilh lâwk la. I chhân duh paragraph a lo thlen chuan kaihruaitu hmuh theih tûrin sâng takin bân phar vat ang che.

20. Engtin nge kohhran inkhâwm chu ṭhiante nêna chaw ei khâwmna ang a nih?

²⁰ Kohhran inkhâwm chu ṭhian ṭhate nêna chawi eikhâwmna angin thlîr ang che. Kohhrana unau ṭhenkhatte chuan chaw ei khâwm tûrin ruahmanna an nei a, chuta ei tûr engemaw siam tûrin an sâwm che angah han mitthla teh. Engtin nge i chhân lêt ang? I huphûrh deuh mai thei a; mahse, unaute duh zâwng tûr thil engemaw chu i theih ang tâwka tihsak i duh ngei ang. A ina min thlengtu Jehova chuan kan inkhâwmnaah hian, thil ṭhaa khat dawhkân min buatsaihsak a. (Sâm 23:5; Mt. 24:45) Thilpêk hotê mah ni se, kan neih ṭha ber a nih chuan, a lâwm a ni. Chuvângin, ṭha takin inbuatsaih la, zalên takin chhâng ang che. Tichuan, Jehova dawhkânah i ei mai ni lovin, kohhranna mite i pêk ve tûr thilpêk engemaw i rawn keng a ni ang.