1-2. (a) Isua chuan a thih hriatrengna chu samkhai taka hmang tûrin min duh tih engvângin nge kan beisei theih? (b) Isua neih eng miziate nge kan sawiho vang?

KUM tina neih Krista thih Hriatrengna huna thilthleng chu i sawi thei em? Kan zînga a tam zâwk chuan Lalpa Zanriaha thilthlengte chu an hre chhuak thei ang tih rinhlelh rual a ni lo. Engvângin nge? Chu zanriah chu samkhai taka buatsaih a nih vâng a ni. Mahse, chu chu thilthleng pawimawh tak a ni a. Chuvângin, ‘Engvângin nge chu zanriah chu samkhai taka buatsaih a nih?’ tiin kan zâwt mai thei.

² He leia rawng a bâwl chhûngin Isua chuan thutak pawimawhzia chu tluangtlam tak, fiah tak, leh hriatthiam awlsam taka a zirtîr avângin mite hriat a hlawh a. (Mt. 7:28, 29) Chutiang bawkin, a thih hriatrengna * chu samkhai tak; mahse, awmze nei taka hmang tûrin min zirtîr a ni. He Hriatrengna zanriah leh chu mi ṭuma Isua thusawi leh thiltih ṭhenkhat chu i lo bih chiang ang u. Isua inngaihtlâwmzia te, huaisenzia te, leh hmangaihna a neihziate kan hre thiam lehzual ang a, amah kan entawn lehzual theih dân pawh kan hre bawk ang.

3. Matthaia 26:26-28-a chhinchhiah a nih angin, engtin nge Isua hmêlhriattîr Hriatrengna chu samkhai taka buatsaih a nih a, a thil hman pahnihte chuan eng nge a entîr?

³ Isua chuan a thih Hriatrengna chu a tirhkoh rinawm 11-te a hmêlhriattîr a. Ani chuan Kalhlên Kût hmannaa chhang  bâng chu hmangin, chu hriatrengna chu samkhai takin a hmanpui a ni. (Matthaia 26:26-28 chhiar rawh.) Chhang dawidim telh loh leh chuta awmsa uain chauh a hmang a. Isua’n a tirhkohte hnênah chu thil pahnih chuan nakin lawka an tâna a hlan tûr a taksa ṭha famkim leh thisen chu a entîr tih a hrilh a ni. Tirhkohte chuan chu thilthleng pawimawh tak, samkhai taka a hman dân chu mak an ti kher lo vang. Engvângin nge?

4. Marthi hnêna Isua thurâwn pêk chuan Hriatrengna zanriah samkhai taka a hman chhan hre thiam tûrin engtin nge min ṭanpui?

⁴ A hma thla engemaw zât, Isua rawngbâwl a kum thumna chhûnga Isua’n a ṭhian ṭha Lazara te, Marthi te, leh Mari te a va tlawh laia thilthleng kha han ngaihtuah teh. Chuta a chawlhhahdam lai chuan Isua’n a zirtîr ṭan a. Chutah chuan Marthi chu awm mah se, a mikhual zahawm tâna ei tûr tam tak buatsaihin a buai hle a. Isua’n chu chu a hmuhin, englai pawha ei tûr tam tak buatsaih reng a ngai lo tih Marthi a hriattîr duh avângin ani chu ngilnei takin a ṭanpui a ni. (Lk. 10:40-42) A hnuah, inthawina atâna a thih hma dâr kâr rei lotêah Isua chuan a thurâwn pêk chu amah ngeiin a nunpui a. Hriatrengna zanriah chu samkhai takin a hmang a ni. Chu chuan Isua chungchâng eng nge min zirtîr?

5. He zanriah samkhai tak hian Isua chungchâng eng nge a târ lan a, chu chu engtin nge Philippi 2:5-8-a thu nên a inmil?

⁵ Isua chu a thusawi leh thiltih engkimah a inngaitlâwm hle a. Chuvângin, a lei nun tâwp ber zâna inngaihtlâwmna nasa tak a lantîr pawh kha a mak lo. (Mt. 11:29) Mihring chanchina inthawina ropui ber a hlân ang a, Jehova’n vânah dinhmun sâng tak chelh tûrin a kai tho leh ang tih a hria a. Chuti chung pawhin, a thih hriatrengna chu ropui taka hmang tûra phûtin, ṭûl lo takin mahni a inngaihvêntîr lo. Chu aiin, a zirtîrte hnênah kum khata vawi khat zanriah samkhai tak hmanga amah hre reng tûrin a hrilh a ni. (Joh. 13:15; 1 Kor. 11:23-25) Samkhai tak ni mah se, inâwm taka hman he zanriah hian Isua chu mi chapo a ni lo tih a târ lang a. Inngaihtlâwmna chu vâna kan Lal mize langsâr tak zînga pakhat a nih avângin kan lâwm hle a ni.—Philippi 2:5-8 chhiar rawh.

6. Fiahnate kan tawh hunah engtin nge Isua inngaihtlâwmna kan entawn theih?

⁶ Engtin nge Isua inngaihtlâwmna kan entawn theih? Mahni aia mi dangte ṭhatna tûr dah hmasak zâwkna hmangin a ni.  (Phil. 2:3, 4) Isua lei nun tâwp ber zân kha han ngaihtuah leh teh. Ani chuan hrehawm tuarin a thi dâwn tih hre mah se, amah avânga lungngaia awm tûr a tirhkoh rinawmte chu a ngaihtuah hle a. Chuvângin, chu zân hnuhnûng ber chu anmahni zirtîr a, fuih a, tihchak nân a hmang a ni. (Joh. 14:25-31) Isua chuan mahni aiin mi dangte ṭhatna tûr a ngaihsak zâwk tih inngaitlâwm takin a lantîr a. Kan tân entawn tûr ṭha a va ni tak êm!

7. Isua chuan Lalpa Zanriah a hmêlhriattîr hnu lawkah engtin nge huaisenna a lantîr?

⁷ Isua chuan Lalpa Zanriah a hmêlhriattîr hnu lawkah huaisenna nasa tak a lantîr a. Engtin nge a lantîr? A tâna a Pa duh zâwngah chuan Pathian sawichhetu anga zahthlâk taka tihhlum a tel tih hre mah se, chu chu inhuam takin a pawm a ni. (Mt. 26:65, 66; Lk. 22:41, 42) Isua chuan Jehova hming chawimawi a, Pathian lalchungnunna ṭan tlatin, leh inlam lêt mihring tâna tâwp nei lo nunna kawng a hawn theih nân rinawmna famkim chu a vawng tlat a. Chutih rualin, a hnungzuite chu nakin lawka an hmachhawn tûrte atân a buatsaih a ni.

8. (a) Isua’n a tirhkoh rinawmte chu eng nge a hrilh? (b) A thih hnu kumahte chuan huaisenna kawnga Isua entawn tûr siam chu engtin nge a zirtîrte’n an entawn?

⁸ Isua chuan a neih mai theih lungkhamnate chu ngai pawimawh lovin, a tirhkoh rinawmte mamawh ngaihsak tlatna hmangin huaisenna a lantîr bawk. Juda a hnawhchhuah hnua a hmêlhriattîr zanriah samkhai tak chuan hriak thih a hnungzuite chu Isua thisen an hlâwkpui dân tûr leh thuthlung thara an tel dân tûrte a hriatnawntîr ang. (1 Kor. 10:16, 17) Isua chuan a hnungzuite hnênah an vân lam kohna phua nung thei tûrin an laka a Pa nêna an beiseite chu a hrilh a. (Joh. 15:12-15) A tirhkohte chu an la tawh tûr fiahnate pawh a  hrilh bawk. Tichuan, a entawn tûr siam chu târ langin an hnênah thlamuang tak, a ni loh leh huaisen taka awm tûrin a hrilh a ni. (Joh. 16:1-4a, 33) Kum tam tak hnuah pawh, Isua zirtîrte chuan mahni inpêkna nun kawng chu zawhin, huaisenna an lantîr reng a. Nasa taka tawrh ngai fiahna chi hrang hrang an tawh hunah pawh an inṭanpui tawn a ni.—Heb. 10:33, 34.

9. Huaisenna lantîrna kawngah engtin nge Isua ka entawn theih?

⁹ Tûn laiah pawh, huaisenna kawnga Isua entawn tûr siam chu kan entawn a. Entîr nân, rinna avânga tihduhdah tuar kan unaute ṭanpui tûr chuan huaisenna neih a ngai a ni. A châng chuan kan unaute chu dik lo taka tân ina khung an ni a. Chutiang thil a thlen hunah, an aiawha thusawi pawh tiamin, an tâna kan tih theih apiang kan ti tûr a ni. (Phil. 1:14; Heb. 13:19) Huaisenna kan lantîr theih dân kawng dang leh chu “huai taka,” thu hrilh zawm zêl hi a ni a. (Tirh. 14:3) Mite’n Lalram thuchah chu dodâlin, min tiduhdah mah se, Isua angin thu hrilh zawm zêl kan tum tlat a ni. Mahse, huaisenna kan tlâkchham châng pawh a awm mai thei. Eng nge kan tih theih?

10. Hriatrengna thlen hma chawlhkârahte chuan eng nge kan tih ang a, engvângin nge?

¹⁰ Krista tlanna inthawina avânga kan neih beiseina chungchâng ngaihtuahna aṭangin huaisenna kan nei lehzual thei a. (Joh. 3:16; Eph. 1:7) Hriatrengna thlen hma chawlhkârahte chuan tlanna avânga kan lâwmzia lantîr theihna hun remchâng ṭha tak kan nei a ni. Chûng hunahte chuan Hriatrengna atâna Bible chhiar tûrte chu chhiar la, Isua thih dâwn hnaiha thilthlengte chu ṭawngṭaiin chhût ngun ang che. Tichuan, Lalpa Zanriah hmang tûra kan lo kal khâwm hunah  Hriatrengna entîrnate awmzia leh chhûng entîrnate’n khaikhin rual loh hlutna an neih dânte kan hre thiam lehzual ang. Jehova leh Isua’n kan tâna an thiltihte leh chûng thiltihte chu keimahni leh kan hmangaihte’n kan hlâwkpui dân kan hriatthiam chuan kan beiseina a nghet lehzual ang a, a tâwp thlenga chhel taka tuar chhuak tûrin min chêttîr ang.—Heb. 12:3.

11-12. Eng thute nge kan hriat tawh?

¹¹ Lalpa Zanriah chuan tlanna inthawina hlutzia bâkah, Isua mize langsâr tak inngaihtlâwmna leh huaisenna chu min hriattîr tawh a. Kan tâna min ngensaktu, vâna kan Puithiam Lal niin Isua’n chûng miziate a la lantîr reng chu kan va lâwm tak êm! (Heb. 7:24, 25) Thinlung taka kan lâwmzia lantîr nân, Isua thupêk angin, a thih hriatrengna chu kan hmang reng tûr a ni. (Lk. 22:19, 20) Chu chu nî pawimawh ber Nisan 14-ah kan hmang ṭhîn a ni.

¹² Kan tâna thi tûra Isua chêttîrtu mize dang leh chu Lalpa Zanriah hmêlhmang pângngai tak aṭangin kan hre thei a. Leia a awm laiin, chu mizia avâng chuan hriat a hlawh hle a. Chu mizia chu eng nge ni?

13. Johnana 15:9 leh 1 Johana 4:8-10 chuan Jehova leh Isua lantîr hmangaihna chu engtin nge a târ lan a, chu an hmangaihna chu tute’n nge hlâwkpui?

¹³ Isua chuan a thiltih engkimah Jehova min hmangaihna nasa tak chu ṭha famkimin a lantîr a. (Joh. 15:9; 1 Joh. 4:8-10 chhiar rawh.) A pawimawh ber chu, kan tâna a nun pe tûrin Isua chu a thinlungah chêttîrin a awm a. Hriak thih kan ni emaw, “berâm dang” kan ni emaw pawh ni se, Jehova leh a Fapain chu inthawina hmanga kan tâna an lantîr hmangaihna chu kan hlâwkpui a ni. (Joh. 10:16; 1 Joh. 2:2) Hriatrengna zanriah atâna a hman entîrnate pawh hi han ngaihtuah teh; chûng chuan Isua’n a zirtîrte a hmangaihzia leh a ngaihtuahzia a târ lang bawk. Engtin nge a târ lan?

14. Eng kawngin nge Isua’n a zirtîrte a hmangaihzia a lantîr?

¹⁴ Isua chuan chawhlui ropui tak ni lovin, zanriah samkhai tak buatsaih chu eipuiin, hriak thih a hnungzuite a hmangaihzia a târ lang a. Hunte a liam zêl chuan, chûng hriak thihte chuan tân inah pawh tiamin, dinhmun hrang hrang hnuaiah Hriatrengna chu kum tin an hman a ngai dâwn a. (Thup. 2:10) Isua thu chu an zâwm thei ang em? Thei e!

15-16. Engtin nge unau ṭhenkhat chuan dinhmun harsa tak hnuaiah pawh Lalpa Zanriah an hman theih?

¹⁵ Vawiin nî thleng hian Kristian dikte chuan Isua thih hriatrengna chu an la hmang a. A châng chuan dinhmun harsa tak hnuaiah pawh, tih dân ṭhin angin Lalpa Zanriah chu theih tâwp chhuahin an hmang zawm zêl a ni. A hnuaia entîrnate hi chhinchhiah ang che. China rama tân ina khung hran a nih laiin Unau Harold King-a chuan hriatrengna hman dân tûr a ngaihtuah a. A thil neihte hmangin Hriatrengna entîrnate chu a rûkin a buatsaih a ni. A hman nî tûr pawh fîmkhur takin a chhût a. A hun a lo thlen chuan, lung inah amah chauhvin hla a sa a, a ṭawngṭai a, Bible ṭanchhan thusawina a nei a ni.

¹⁶ Entîrna dang pakhat pawh a awm a. Khawvêl Indopui II-na hun laia concentration camp-a tâng unaunu ṭhenkhat chuan Lalpa Zanriah hmang tûrin an nun an thâp a. Mahse, chuta an hman entîrnate chu samkhai tak a nih avângin, a rûkin an hmang thei a ni. Heti hian an sawi a: “Kan ding kual a, a laiah chuan entîrnate chu ṭhutthleng chungah dahin, puan vârin kan khuh a. Current êng avânga mite’n min hmuh theih loh nân mombati  kan chhi êng a. . . . Kan chakna zawng zawng hmanga kan Pa hming kan tihthianghlim theih nân a hnênah phûr takin thu kan tiam nawn mawlh mawlh a ni,” tiin. Rinna nghet tak an va lantîr nasa êm! Isua chuan dinhmun harsa tak hnuaiah pawh Hriatrengna hmang thei tûra min ṭanpui avângin kan chungah hmangaihna a va lantîr nasa tak êm!

17. Eng zawhnate nge kan inzawh ang?

¹⁷ Hriatrengna hun kan hnaih telh telh rualin, hêng zawhnate hi kan inzâwt thei a ni: ‘Hmangaihna lantîrna kawngah engtin nge Isua ka entawn lehzual theih? Mahni aiin ka Kristian unaute mamawh chu ka ngaihsak zâwk em? Ka unaute chu an tihtheih aia nasain ka beisei em? a nih loh leh an tlin tâwk chu ka hriatpui em?’ tiin. Engtik lai pawha Isua entawnin “inlainat tawn,” i tum ṭheuh ang u.—1 Pet. 3:8.

18-19. (a) Eng nge kan chian theih? (b) Eng tih nge kan tum tlat ang?

¹⁸ Krista thih Hriatrengna chu vawi tam kan hman a ngai tawh lo vang. Hrehawm nasa tak chhûnga Isua “a lo kal” hunah, vâna kal tûra “a thlante” zînga la bangte chu a lâwr khâwm ang a, chutih hunah chuan Hriatrengna chu hman a ngai tawh lo vang.—1 Kor. 11:26; Mt. 24:31.

¹⁹ Hriatrengna zanriah hman a nih tawh loh hunah pawh, Jehova mite chuan samkhai taka buatsaih he zanriah hi mihringte lantîr tawh azawnga inngaihtlâwmna, huaisenna, leh hmangaihna nasa ber angin kan la hre reng ang tih a chiang hle. Chutih hunah chuan, he zanriah danglam tak hmangtute chuan chutih huna nung dama awmte hlâwkpuina tûrin chu mi chungchâng chu an hrilh ang tih rinhlelh rual a ni lo. Mahse, he zanriah hi tûnah ngei pawh hlâwkpui tûr chuan Isua inngaihtlâwmna te, huaisenna te, leh hmangaihnate chu entawn kan tum tlat tûr a ni. Chutianga kan tih chuan Jehova hnên aṭangin lâwmman kan dawng ang tih kan ring nghet thei a ni.—2 Pet. 1:10, 11.