1-2. Vântirhkoh pakhatin Isua thlâna hmeichhiate chu eng nge a hrilh a, an hnênah Isua’n eng kaihhruaina nge a pêk?

C.E. 33, Nisan 16, zîng hma tak a ni a. Pathian ṭih tak hmeichhe ṭhenkhat chuan ni khat leh a chanve aia rei Lal Isua Krista ruang an zalhna thlân lam chu an pan a. A ruanga englo rimtuite leh hriak rimtuite hnawih tûra kalte chuan a hmun an va thlen chuan thlân chu a ruaka an hmuh avângin mak an ti hle! Vântirhkoh pakhatin chûng zirtîrte hnênah chuan Isua chu thihna ata a tholeh tawh tih a hrilh a, “Galili ramah in hmaah a kal e; chutah chuan amah chu in hmu ang,” tiin a hrilh bawk.—Mt. 28:1-7; Lk. 23:56; 24:10.

² Chûng hmeichhiate’n thlân an chhuahsan hnu chuan, Isua’n anni chu a va pan a, “Kal ta ula, Galili rama kal tûrin ka unaute va hrilh rawh u; chutah chuan mi hmu ang,” tiin kaihhruaina a pe a ni. (Mt. 28:10) Chutianga inhmuhkhâwmna chu a thawhleh hnua ruahmanna a siam hmasak ber a nih avângin, a zirtîrte hnênah kaihhruaina pawimawh tak pêk tûr a nei a ni ngei ang!

3-4. Engvângin nge Matthaia 28:19, 20-a chhinchhiah thupêk chu tirhkohte tân chauhva pêk a ni lo tia kan sawi theih? (A kâwma milem en rawh.)

³ Matthaia 28:16-20 chhiar rawh. Isua ruahman, chu inhmuhkhâwmnaah chuan, ani chuan kum zabi khatna chhûnga a zirtîrte hlen chhuah tûr hna pawimawh tak a sawi a, chu chu tûn laia kan thawh mêk rawngbâwlna hi a ni. Isua chuan: “Chutichuan, kal ula, hnam tina mi zirtîrahte siam ula, . . . thu ka pêk zawng zawng che u pawm tûrin zirtîr rawh u,” tiin a sawi a ni.

⁴ Isua chuan a hnungzuitu zawng zawngte chu thu hril tûrin a duh a. Ani chuan chu thupêk chu a tirhkoh rinawm  11 te tân chauh a pe lo. Chu chu engtin nge kan hriat theih? Zirtîrte siam tûra Galili bial chhûnga tlâng pakhata thu a pêk lai khân, tirhkohte chauh an awm em? Vântirhkohvin hmeichhiate hnênah: “[Galili-ah] chuan amah chu in hmu ang,” tia a sawi kha hre reng ang che. Chuvângin, hmeichhe rinawmte pawh, chu inhmuhkhâwmnaah chuan an awm ve ngei ang. Mahse, chu mai chu a la ni lo. Tirhkoh Paula chuan Isua chu “unau zanga aia tam hnênah a inlâr leh,” tiin a sawi a ni. (1 Kor. 15:6) Khawi hmunah nge?

5. Korinth thawn khat 15:6-na hian Matthaia bung 28-a târ lan Galili biala inhmuhkhâwmna a kâwk tih engvângin nge kan rin theih?

⁵ Paula’n 1 Korinth 15:6-a thu a sawi hian Matthaia bung 28-a târ lan Galili biala inhmuhkhâwmna hi a rilruah a awm tia ngaihtuahna tûr chhan ṭha tak kan nei a. A chhante chu eng nge ni? Pakhatnaah chuan, Isua zirtîr a tam zâwk chu Galili mite an ni a. Chuvângin, Galili biala tlâng pakhat chu Jerusalem khuaa mi mal in pakhat ai chuan mi tam tak kal khâwm nân hmun ṭha zâwk a ni ngei ang. Pahnihnaah, tholeh Isua chuan Jerusalem khuaa mi mal in pakhatah a tirhkoh 11-te chu a hmu tawh a. Chuvângin, thu hrilh leh zirtîrte siam tûra kaihhruaina chu a tirhkohte chauh pe duh ni se chuan, a tirhkoh te, hmeichhia te, leh mi dangte chu Galili biala amah hmu tûra hrilh lovin, Jerusalem khuaah khân a hrilh ngei ang.—Lk. 24:33, 36.

6. Engtin nge Matthaia 28:20-na chuan zirtîr siam tûra thupêk chu tûn lai hun atân pawh a ni tih a târ lan a, chu thupêk chu tûn laiah engtiang khawpin nge zawm a nih?

⁶ A chhan pawimawh tak pathumna hi lo chhinchhiah rawh. Zirtîrte siam tûra Isua thupêk chu kum zabi khatnaa Kristiante tân chauh a ni lo. Chu chu engtin nge kan hriat? Isua’n a hnungzuitute hnêna kaihhruaina a pêk chu: “Kei kumkhuain, khawvêl tâwp thleng pawhin, in hnênah ka awm zêl ang,” tiin a titâwp a. (Mt. 28:20) Isua sawi ang ngeiin, tûnah pawh, zirtîr siam hna chu nasa taka thawh mêk a ni. Han ngaihtuah teh! Kum tin hian mi 3,00,000 dâwn lai chu Jehova Thuhretute nia baptisma changin, Isua Krista zirtîrte an lo ni.

7. Tûnah eng nge kan sawiho vang a, engvângin nge?

⁷ Bible zirlai tam takte chuan baptisma chang thei khawpin hma an sâwn a. Mahse, ṭhenkhat chuan Krista zirtîr nih an hreh niin a lang. Anni chuan Bible zir chu nuam ti hle mah se, baptisma chang thei tûr khawpin hma an sâwn lo a ni. Bible zirpui i nei a nih chuan, i Bible zirpuite chu an thu zirte nunpui tûr leh Krista zirtîr ni tûra ṭanpui chu i duh ngei ang. He thuziakah hian kan zirpuite thinglung thleng tûra kan zirtîr theih dân leh thlarau lama hmasâwn tûra kan ṭanpui theih dân sawiho a ni ang. Engvângin nge hemi chungchâng hi kan sawiho vang? A chhan chu, kan zirpui chhunzawm dâwn leh dâwn loh chungchânga thu tlûkna kan siam a ngaih hun a awm mai theih vâng a ni.

8. Engvângin nge thinlung thleng tûra zirtîr chu a harsat theih?

⁸ Jehova chuan mite chu amah an hmangaih avânga a rawngbâwl tûrin a duh a. Chuvângin, kan thiltum chu Jehova’n mi mal takin a ngaihsak tak zetin, a hmangaih tak zet tih hre thiam tûra kan Bible zirpuite ṭanpui hi a ni. Chu bâkah, Jehova chu “Pa nei lote pa leh hmeithaite ngaihtuahtu” anga hmu tûra ṭanpui chu kan duh bawk. (Sâm 68:5) I zirpuite’n Jehova’n a hmangaih tak zetzia an hriatthiam chuan, chu chuan an thinlung a khawihin, Pathian an hmangaihna chu a tipung ang. Zirlai ṭhenkhat chuan an pate ngeiin an chungah hmangaihna leh ngainatna an lantîr loh avângin, Jehova chu hmangaihna nei tak Pa anga thlîr harsa an ti mai thei a. (2 Tim. 3:1, 3) Chuvângin, Bible i  zirpui hunah, Jehova mize duhawm takte chu sawi uar ang che. I zirpui chu hmangaihna nei tak kan Pathian chuan chatuan nunna nei tûrin a duh tih leh chumi nei thei tûra amah ṭanpui chu a inpeih reng tih hre thiam tûrin ṭanpui ang che. Eng thil dangte nge kan la tih theih?

9-10. Bible zirpui kan neih hunah eng thu leh hla chhuahte nge kan hman ang a, engvângin nge chûng lehkhabute chu kan hman ang?

⁹ “Bible Hian Eng Nge Min Zirtîr?” tih leh “Pathian Hmangaihnaah Chuan Invawng Ṭha Rawh,” tih lehkhabute chu hmang ang che. Chûng thu leh hla chhuahte chu zirlaite thinlung thleng thei tûra ṭanpui nâna a bîk taka duan a ni. Entîr nân, Min Zirtîr tih lehkhabu bung 1-na chuan hêng zawhnate hi a chhâng a ni: Pathianin min ngaihsak em? Engtin nge Pathianin mite hrehawm tawrhna chu a ngaih? tih leh Jehova ṭhian kan ni thei em? tihte hi. Pathian Hmangaihna tih lehkhabu hi eng nge ni ve? Chu lehkhabu chuan zirlai chu Bible thu bulte nunpuinain a nun a tihhmasâwn dân leh Jehova a hnaih lehzualtîr dânte hre thiam  tûrin a ṭanpui ang. Chûng lehkhabute chu mi dangte zirtîr nân i lo hmang tawh a nih pawhin, zir tûr apiangte chu in zir hmain ṭha takin inbuatsaih la, Bible zirlaiin a mamawh bîkte chu rilruah vawng tlat ang che.

¹⁰ A nih leh, zirlai chuan kan Zirtîrna Hmanraw Bâwma tel lo, lehkhabu dang pakhata târ lan thute a ngaihven zâwk a nih chuan engtin nge ni ang? Kan târ lan tâk Bible zirna ṭanpuitu atâna duan lehkhabu zînga pakhat nêna zirna in neih zawm zêl theih nân, chu a lehkhabu ngaihven chu mahnia chhiar tûrin i fuih thei a ni.

11. Eng hunah nge Bible zirna chu ṭawngṭaina nên kan ṭan a, kan tihtâwp ang, chumi chungchâng chu engtin nge i sawi hmuh theih?

¹¹ Zirna chu ṭawngṭaina nên ṭan rawh. A tlângpui thuin, Bible zirna mumal tak kan neih ṭan tawh chuan ṭawngṭaia ṭan leh titâwp chu a ṭha ber a ni. Bible hi Pathian thlarau thianghlim ṭanpuina chauhva hriatthiam theih a ni tih hre tûrin kan Bible zirpuite chu kan ṭanpui tûr a ni. Bible zirtîrtu ṭhenkhat chuan Jakoba 1:5-a: “In zîngah tupawhin finna a tlâkchham chuan, . . . Pathian chu dîl rawh se,” tih chu chhiarin, kan ṭawngṭai chhan chu an hrilhfiah a. Chumi hnuah, zirna kaihruaitu chuan zirlai chu, “Engtin nge Pathian hnênah finna kan dîl theih?” tiin a zâwt a. Zirlai chuan Pathian hnêna ṭawngṭai tûr kan ni tih chu a pawm ngei a rinawm.

12. Kan Bible zirpui chu a ṭawngṭai dân tihmasâwn tûra ṭanpui nân engtin nge Sâm 139:2-4-na chu kan hman ang?

¹² Zirlai chu ṭawngṭai dân zirtîr rawh. Thinlung taka a ṭawngṭaina chu Jehova’n ngaihthlâk a duh tih hrilhfiah ang che. Kan mi mal ṭawngṭainaahte chuan mi dangte kan hrilh hreh mai theih kan rilru vei zâwngte chu Jehova hnênah tîm lovin kan hrilh thei tih hrilhfiah bawk rawh. Dik tak chuan, Jehova chuan chhûng rila kan ngaihtuahnate chu a hre vek a ni. (Sâm 139:2-4 chhiar rawh.) Kan zirpuite chu ngaihtuahna ṭha lo an neihte siam ṭha thei tûr leh an thil chîn ṭha lote bânsan thei tûra Pathian hnêna ṭawngṭai tûrin kan fuih thei bawk. Entîr nân, hun engemawti chhûng Bible zir tawh tuemaw chuan milem bia sakhua aṭanga lo chhuak kût ni hman chu nuam a ti hle thei a. Chu chu a dik lo tih hre mah se, chûng thiltih ṭhenkhata tel chu nuam a la ti reng a ni. Chuvângin, Jehova hnêna a rilru vei zâwngte dik taka hrilh tûr leh Pathian ngainat zâwngte chauh ngaina thei tûra ṭanpuina dîl tûrin fuih ang che.—Sâm 97:10.

13. (a) Engvângin nge kan Bible zirpuite chu inkhâwma lo tel tûra a rang thei ang bera kan sâwm ang? (b) Engtin nge zirpui chu Kingdom Hall-a tlângnêl taka awm tûra kan siam theih?

¹³ I Bible zirpui chu inkhâwma lo tel tûrin a rang thei ang berin sâwm rawh. Kristian inkhâwma a thu hriatte leh thil hmuhte chuan i Bible zirpui thinlung chu a khawih theiin, hmasâwn tûrin a ṭanpui thei a ni. Kingdom Hall-ah Eng Nge Thleng Ṭhîn? tih video chu chhuahsak la, i ruala rawn inkhâwm tûrin sâwm ang che. A theih chuan a lo kalna tûr leh a haw lehna tûr chu ruahmansak bawk ang che. Bible i zirpui hunah thuchhuahtu dangte tel ve tûra sâwm chu thil ṭha tak a ni. Chutiang kawng chuan, i Bible zirpui chuan kohhrana mi dangte chu a nêl ang a, inkhâwma a lo tel hunah tlângnêl takin a awm thei ang.

14. Engin nge zirlai chu thlarau lama hmasâwn tûra chêttîr thei?

¹⁴ Kan thiltum chu thlarau lama hmasâwn tûra kan Bible zirpuite ṭanpui hi a ni a. (Eph. 4:13) Tuemawin Bible zir a duh hian, mi mal taka a hlâwkpui theih dân chu a ngaihven ber mai thei. Mahse, Jehova a hmangaihna a ṭhan chhoh zêl chuan, kohhran chhûnga mite  pawh tiamin, mi dangte ṭanpui theih dân chu a ngaihtuah ṭan thei a ni. (Mt. 22:37-39) A remchân veleh, sum leh pai hmanga Lalram rawngbâwlna ṭanpui theihna hun remchâng kan neih chu hrilh ang che.

15. Kan Bible zirpuite chu buaina a chhuah huna ṭha taka chingfel tûrin engtin nge kan ṭanpui theih?

¹⁵ Bible zirlai chu buaina a chhuah huna a tih tûrte zirtîr rawh. Entîr nân, i Bible zirpui baptisma la chang rih lo thuchhuahtu chuan kohhrana tuemawin a tihlungnih loh thu a hrilh mai thei che a. Ṭan lam neih mai aiin, Bible-in ti tûra a sawite chu engvângin nge i hrilh lo vang? A unaupa chu a ngaidam thei emaw, a ngaidam thei lo emaw a nih chuan, a ‘unau chu hneh’ tumin ngilnei tak leh hmangaihna nei takin a va pan thei a ni. (Matthaia 18:15 nên khaikhin rawh.) I Bible zirpui chu a thusawi tûrte inbuatsaih tûrin ṭanpui rawh. Ṭha taka dinhmun chingfel thei tûrin JW Library^® app te, Jehova Thuhretute Tâna Zir Bingna Hmanrua te, leh jw.org^® te hman dân chu hrilh ang che. Baptisma a chan hmaa zirtîrna a dawn tam poh leh, a chan hnuah kohhrana unaute nên inlaichînna ṭha a nei lehzual ang.

16. Bible zirpui i neihnaa thuchhuahtu dangte sâwmna aṭangin eng hlâwknate nge i hmuh theih?

¹⁶ Bible in zir huna tel ve tûrin kohhrana unaute leh—bial kan kâr a nih chuan bial kantu chu sâwm rawh. Engvângin nge? A chunga kan târ lante bâkah, thuchhuahtu dangte chuan i Bible zirpui chu i ṭanpui theih loh dân kawng dangin an ṭanpui mai thei a ni. Entîr nân, i Bible zirpui chuan a mei zial zûk chu bânsan a tum a; mahse, vawi tam tak a hlawhchham a ni. Chutianga vawi tam tak lo hlawhchham tawh ṭhîn; mahse a hnua bânsan ta unau tuemaw chu in Bible zirnaa tel ve tûrin sâwm ang che. I unaupa chuan Bible zirpuiin a mamawh tak hre tûrin thurâwn ṭha tak a pe mai thei a ni. Chutiang thiltawn nei unaupa hmaa Bible zirna kaihhruai chu i hreh deuh a nih chuan, chumi ṭum chuan, ani chu kaihruai tûrin i sâwm thei a ni. Bible zirpui i neihnaa mi dang i hruai apiangin, an thiltawn aṭanga inzir tum la. Kan thiltum chu thlarau lama hmasâwn tûra kan Bible zirpuite ṭanpui hi a ni tih hre reng ang che.

17-18. I Bible zirpui neih chu i tihtâwp dâwn leh dâwn loh chungchânga thu tlûkna i siam hunah eng nge i ngaihtuah ang?

¹⁷ I Bible zirpuiin hmasâwnna a neih loh chuan, ‘Ka titâwp ang em?’ tia inzawh a ngaih hun a awm ngei ang. Chutianga thu tlûkna i siam hmain, a theih chin tâwkte chu i ngaihtuah a ngai ang. Ṭhenkhat chu mi dang angin hma an sâwn chak lo thei a. Chuvângin, heti hian inzâwt rawh: ‘Ka Bible zirpui chuan a dinhmun a zirin hmasâwnna chhê tê tal a nei em?’ ‘A thu zirte chu a “pawm,” a nih loh leh a nunpui ṭan em?’ tiin. (Mt. 28:20) Zirlai chu hma a sâwn chak lo pawh a ni thei; mahse, a nunah zawi zawiin inthlâk danglamna a awm tûr a ni.

¹⁸ A nih leh, kan Bible zirpui chuan hun engemawti chhûng a zir hnu pawha hmasâwnna a nei lo emaw, a thu zirte a ngaihlu lo emaw a nih  chuan engtin nge ni ang? He dinhmun hi han ngaihtuah teh: I Bible zirpui chuan Min Zirtir tih lehkhabu chu a zir zo tawh a, Pathian Hmangaihna tih lehkhabu chu a zir ṭan a; mahse, kohhran inkhâwmahte vawi khat mah a tel ngai lo va, Hriatrengna inkhâwmah pawh a tel ngai hek lo! Bible zirna pawh chhan ho lam takte avângin a pelh fo ṭhîn bawk. Chutiang hunah chuan, zirlai chu tlang takin i hrilh a ngai ang. *

19. Bible zirna ngaihlu lo anga lang tuemaw hnênah eng nge i sawi mai theih a, i ngaihtuah ngaite chu eng nge ni?

¹⁹ ‘Jehova Thuhretu pakhat ni tûra i harsatna lian ber chu eng nge ni?’ tiin i zâwt ṭan thei a. Zirlai chuan, ‘Bible zir chu pawi ka ti lo va; mahse, Jehova Thuhretu chu ka ni ngai lo vang!’ tiin a chhâng mai thei che a ni. Hun engemaw chen Bible a zir hnua chutiang rilru put hmang a nei a nih chuan, zirpui chhunzawmna tûr chhan eng nge la awm? Kawng leh lamah chuan, i zirpui chuan hma a sâwn theih loh chhan ber chu a vawi khatna atân a sawi chhuak mai thei a. Entîr nân, in tina thu hrilh rawngbâwlnaa tel thei ngai lo tûrin a inngai pawh a ni thei. A ngaih dânte i hriat tawh chuan, ṭanpui dân tûr i hre thiam lehzual ngei ang.

20. Tirhkohte 13:48-a thu hriatthiamna chuan Bible zirpuina kan neih zawm dâwn leh dâwn loh hre tûrin engtin nge min ṭanpui theih?

²⁰ Lungchhiatthlâk takin, zirlai ṭhenkhat chu Ezekiela hun laia Israel mite ang an ni a. An chungchângah, Jehova’n Ezekiela chu: “Ngai teh, nang chu an tân chuan hmangaihna hla, mawi taka sak leh tum ang i ni ang: i thute chu an ngaithla a; mahse, an zâwm chuang lo vang,” tiin a hrilh a ni. (Ezek. 33:32) Kan zirpui hnêna zirna tihtâwp kan tum thu hrilh chu harsa kan ti mai thei a. Mahse, “hun hi tihtawiin a awm a ni.” (1 Kor. 7:29-31) Hmasâwnna nei lote zirpui nâna hun tam tak hman ai chuan, ‘chatuana nun duhna rilru dik tak neite’ an nihzia târ langtute chu kan zawng zâwk tûr a ni.—Tirhkohte 13:48 chhiar rawh.

21. Kum 2020 atâna kum châng chu eng nge ni a, chu chu engvângin nge inâwm tak a nih?

²¹ Kum 2020 chhûng hian, kan kum chângin zirtîr siamnaa kan thiamna tihhmasâwn dân ngaihven tlat tûrin min ṭanpui ang. Chutah chuan Galili bial a tlâng pakhata inhmuhkhâwmna pawimawh taka Isua thusawi ṭhenkhat pawh a tel a ni: ‘Chutichuan, kal ula, zirtîrte siamin baptis rawh u,’ tih hi.—Mt. 28:19.