1-2. Jehova chhiahhlawh tam tak chuan eng dinhmunte nge an hmachhawn a, chu chuan engtin nge a nghawng theih?

HENG dinhmun pathumte hi han ngaihtuah teh: Ṭhalai unaupa chuan natna khirh tak a tuar a. Mi taima tak pa valai unaupa chuan a hna a chân a, theih tâwp a chhuah chung pawhin, hna dang a hmu thei lo. Kum upa unaunu rinawm tak chu Jehova rawngbâwlnaa a tih theihte a tlêm telh telh a ni.

² Kan târ lan tâk dinhmun zînga pakhat i tawng a nih chuan ṭangkaina rêng nei tawh lo niin i inngai mai thei. Chûng dinhmunte chuan i hlimna a la bo theiin, a âwm tâwka mahni inhlutna i neih chu a tichhe thei a, mi dangte nêna in inlaichînnaah harsatna a thlen thei a ni.

3. Setana leh a thununa awmte chuan mihring nunna chu engtin nge an ngaih?

³ He khawvêl hian Setana’n mihringte nun a thlîr dân chu a entawn a. Setana chuan mihringte chu hlutna nei lo nia inhre tûrin a cheibâwl reng a. Ani chuan Pathian thuâwih lohnain thihna a thlen dâwn tih hre reng chungin, Evi chu zalênna kawng zawh tûrin khawngaihna nei hlek lovin a fuih a ni. He khawvêl sumdâwnna te, politics te, leh sakhuanate hi a thunun reng a. Chuvângin, sumdâwng mite, politician-te, leh sakhaw hruaitu tam takin mihring nunna leh zahawmnate ngaih pawimawhna chhe tê mah an nei lo chu thil mak a ni lo.

4. He thuziakah hian eng nge kan sawiho vang?

 ⁴ Kawng leh lamah chuan, Jehova chuan a âwm tâwka mahni inhlutna nei tûra min duh avângin, hlutna nei lo nia inhriatna min neihtîrtu dinhmunte kan hmachhawn hunah pawh min ṭanpui a ni. (Sâm 136:23; Rom 12:3) He thuziakah hian Jehova’n hêng dinhmun pathumte kan hmachhawn huna min ṭanpui dân kan sawiho vang: (1) Natna kan tawrh hunah, (2) sum leh pai lama harsatna kan tawh hunah, leh (3) kum upatnain Jehova rawngbâwlnaa ṭangkai tawh lo nia inhriatna min neihtîr hunah, tihte hi. Tûnah chuan, mi tin hi Jehova tân kan hlu ṭheuh tih kan hriat chian theih chhan i lo en hmasa ang u.

5. Mihringte chu Jehova’n a ngaihlu tak zet tih engin nge rinnghehtîr che?

⁵ Leia vaivut aṭanga siam ni mah ila, vaivut ṭhûm khat aiin nasa takin kan hlu a ni. (Gen. 2:7) Jehova tân kan hlu tih kan hriat theih chhan ṭhenkhat hi han ngaihtuah teh. Ani chuan mihringte chu a miziate entawn thei tûrin a siam a. (Gen. 1:27) Chutiang chuan, leia thil siam dangte aia chungnung zâwkah siamin, lei leh ramsate enkawl tûrin mawhphurhna a pe a ni.—Sâm 8:4-8.

6. Jehova’n mihring ṭha famkim lote chu a ngaihlu tih eng finfiahna dang nge kan neih?

⁶ Adama bawhchhiat hnuah pawh, Jehova chuan mihringte chu a la ngaihlu reng a. Kan sualte thupha chawi nân a Fapa duh tak Isua pe hial khawpin min ngaihlu a ni. (1 Joh. 4:9, 10) Tlanna chu an hlâwkpui theih nân, Jehova chuan Adama sual avânga thi ta “mi felte leh fel lote” chu a kaitho leh ang. (Tirh. 24:15) A Thu, Bible chuan kan hrisêlna te, kan sum leh pai dinhmun te, leh kan kumte chu eng pawh ni se, a tân kan hlu tih a târ lang a ni.—Tirh. 10:34, 35.

7. Jehova’n a chhiahhlawhte chu a ngaihlu tih kan rin theih chhan dang leh chu eng nge ni?

⁷ Jehova’n min ngaihlu tih kan rin theih chhan dangte pawh a awm a. Ani chuan a lamah min hîpin, chanchin ṭha kan chhân lêt dân chu a hria a ni. (Joh. 6:44) Jehova kan hnaih chuan, ani pawhin min hnaih ang. (Jak. 4:8) Ani chuan a tâna kan hlutzia târ langin, hun sêngin min zirtîr a. Tûnah eng ang mi nge kan nih tih leh nakinah eng ang mi nge kan la nih dâwn tih a hria a ni. Chu bâkah, min hmangaih avângin min thunun ṭhîn bawk. (Thuf. 3:11, 12) Jehova’n min ngaihlu tih finfiahna thiltithei tak a va ni êm!

8. Sâm 18:27-29-a chhinchhiah thute chuan kan harsatnate kan thlîr dân chu engtin nge a nghawng theih?

⁸ Mi ṭhenkhatin Lal Davida chu hlutna nei lo angin ngai mah se, ani chuan Jehova’n a hmangahin, a ṭanpui tih a hria a. Chutianga a hriatna chuan a dinhmun a thlîr dânah nghawng a nei a ni. (2 Sam. 16:5-7) Kan lunghnual hunah leh hrasatna kan hmachhawn hunah, Jehova chuan dinhmunte chu kawng danga hmu thiam tûr leh harsatna eng pawh pal tlang thei tûrin min ṭanpui thei a ni. (Sâm 18:27-29 chhiar rawh.) Jehova’n min ṭanpui chuan, hlim taka a rawng kan bâwlna chu engmahin a dang thei lo vang. (Rom 8:31) Tûnah chuan, Jehova’n min hmangaihin, min ngaihlu tih kan hriat chian a ngaih lehzualna dinhmun pathumte i lo en ang u.

9. Natna avânga kan hrehawm tawrhnain engtin nge mahni kan inthlîr dân chu a nghawng mai theih?

⁹ Natna avânga hrehawm kan tawrh hian kan lunghnual theiin, ṭangkaina rêng nei tawh lo anga inhriatna kan nei thei a. Mite’n kan theih chin tâwk an hriat hunah emaw, mi dang ṭanpuina kan rinchhan a ngaih hunah emaw nuam lo kan ti mai thei. Mi dangin kan  natna an hre lo a nih pawhin, tûn hmaa kan thiltih ṭhinte kan tih theih tawh loh avângin mahni insitna rilru kan nei thei a. Chutiang hun harsaahte chuan Jehova’n min tichak ṭhîn a ni. Engtin nge?

10. Thufingte 12:25-a sawi angin, kan dam loh hunah engin nge min ṭanpui thei?

¹⁰ Kan dam loh hian, “thu ṭha” chuan min tichak thei a. (Thufingte 12:25 chhiar rawh.) Jehova chuan kan dam lo chung pawhin, a tân kan hlu a ni tih min hriatchhuahtîrtu thu ṭha tam tak Bible-ah a ziak a. (Sâm 31:19; 41:3) Thlarauva thâwk khum chûng thute kan chhiar nawn fo chuan, kan natna avânga lungkhamna kan neihte chingfel thei tûrin Jehova’n min ṭanpui ang.

11. Engtin nge unaupa pakhatin Jehova ṭanpuina a dawn?

¹¹ Ṭhalai Jorge-a thiltawn hi han ngaihtuah teh. Ani chuan natna khirh tak a tuar a, a zual zêl avângin hlutna nei lo niin a inhria a ni. “Ka natnain min nghawng dân tûr leh ka natna avânga mite ngaihven ka hlawhna chu zak lo tûrin ka lo inbuatsaih lo. Ka dinhmun a tlâk hniam zêl chuan, ka nun inthlâk danglam dân tûr chu ka ngaihtuah a. Ka lunghnual hle a, Jehova chu min ṭanpui tûrin ka ngên a ni,” tiin a sawi. Engtin nge Jehova’n a ṭanpui? “Rilru ding taka thil ka ngaihtuah theih tawh loh avângin, Jehova’n a chhiahhlawhte a ngaihsakzia târ langtu Sâm bu-a châng tâwi laite chhiar tûra fuih ka ni a. Nî tinin chûng Bible chângte chu ka chhiar nawn fo va, chûngte aṭang chuan thlamuanna ka hmu a ni. A hnuah, mite chuan hlim hmêl ka pu lehzual tih an hmu a. A ṭha zâwnga thil ka thlîrna chuan anni pawh a tichak tih min hrilh hial a ni. Jehova’n ka ṭawngṭainate a chhâng tih ka hria! Mahni ka inthlîr dân thlâk danglam tûrin min ṭanpui  a. Natna ka tuar chung pawha Jehova min thlîr dân chungchânga Bible sawite chu ka ngaihtuah ṭan a ni,” tiin a sawi belh bawk.

12. Natna i tawrh hunah, engtin nge Jehova ṭanpuina i dawn theih?

¹² Natna i tuar a nih chuan, Jehova’n i tawrhnate chu a hria tih hre reng ang che. I dinhmunte chu a ṭha zâwnga thlîr thiam tûrin a ṭanpuina dîl la. Tichuan, Jehova’n i tâna a dah ṭhat, Bible-a thu ṭha tak takte chu zawng rawh. Jehova’n a chhiahhlawhte a ngaihhlutzia târ langtu Bible chângte chu ngaihven bîk ang che. Chutianga i tih chuan, rinawm taka a rawngbâwltu zawng zawngte chunga Jehova ṭhatzia chu i hmu ang.—Sâm 84:11.

13. Hna chânnain chhûngkuaa pa ber chu eng ngaih dân nge a neihtîr theih?

¹³ Chhûngkaw tina pa ber chuan a chhûngte nî tin mamawh phuhhrûksak chu a duh a. Mahse, unaupa chuan thil engmah a tisual lo chung pawhin, a hna a chân angah han ngaihtuah teh. Hna dang hmuh tumin theih tâwp chhuah mah se, a hmu thei lo. Chutiang dinhmun a hmachhawn avângin, hlutna nei lo niin a inhre mai thei. Jehova thutiamte ngaihvenna chuan engtin nge a ṭanpui theih?

14. Jehova’n a thutiam a vawn chhante chu eng nge ni?

¹⁴ Jehova chuan a thutiamte chu a vawng reng a. (Jos. 21:45; 23:14) Chutianga a vawn chhan tam tak a awm a ni. A hmasain, a hming nêna inkûngkaihna a neih vâng a ni. Ani chuan a chhiahhlawh rinawmte chu a ngaihsak ang tih a tiam a, chu a thutiam hlen tûrin mawhphûrhna nei niin a inhria a ni. (Sâm 31:1-3) Chu bâkah, Jehova chuan a chhûngkaw zînga mite a ngaihsak lo a nih chuan, kan lunghnual thei tih a hria a. Tisa  lam leh thlarau lama min ṭanpui a tiam a, chu a thutiam hlen tûrin engmahin a dang thei lo!—Mt. 6:30-33; 24:45.

15. (a) Kum zabi khatnaa Kristiante chuan eng harsatna nge an hmachhawn? (b) Sâm 37:18, 19-na chuan eng nge min rinnghehtîr?

¹⁵ Jehova’n a thutiamte a vawn tlat chhan kan hriat reng chuan sum leh pai lama harsatna kan tawh hunah min ṭanpui ang tih kan chiang thei ang. Kum zabi khatnaa Kristiante kha han ngaihtuah teh. Jerusalem khuaa kohhranhote chunga tihduhdahna nasa tak a thlen khân, “tirhkohte chauh lo chu . . . an darh ta vek a.” (Tirh. 8:1) Chu chuan eng nge a thlen theih han ngaihtuah teh. Sum leh pai lama harsatna! Kristiante chuan an in leh lo te, an sumdâwnnate an chân ngei a rinawm. Mahse, Jehova’n a thlahthlam lova, anni pawhin an hlimna an hloh hek lo. (Tirh. 8:4; Heb. 13:5, 6; Jak. 1:2, 3) Jehova’n chûng Kristian rinawmte a ṭanpui ang bawkin, keini pawh min ṭanpui ang.—Sâm 37:18, 19 chhiar rawh.

16. Eng dinhmunin nge Jehova’n kan biakna a hlut lo nia min ngaihtîr mai thei?

¹⁶ Kan rawn upat chhoh hian, Jehova hnêna kan pêk theihte chu tlêm telh telh nia inhriatna kan nei ṭan thei a. Lal Davida pawh a lo upat chhoh chuan chutiang lungkhamna chu a nei mai thei a ni. (Sâm 71:9) Engtin nge Jehova’n min ṭanpui theih?

17. Unaunu Jheri-i thiltawn aṭangin eng nge kan zir theih?

¹⁷ Unaunu Jheri-i thiltawn hi han ngaihtuah teh. Ani chu Kingdom Hall enkawl ṭhat dân zirtîrnaah tel ve tûra sâwm a ni a; mahse, a kal duh lo. Ani chuan: “Ka upa tawhin, hmeithai mai ka ni a, thiamna engmah ka nei  lo va. Jehova tân hman tlâk ka ni lo,” tiin a sawi. Zirtîrna neih hma zânah, Jehova hnênah thinlung takin a ṭawngṭai a. A tûka Kingdom Hall a va thlen hnuah pawh, chuta tel ve âwm a nih leh nih loh a la ngaihtuah reng a ni. Program an neih chhûngin, thusawitu zînga pakhat chuan kan thiamna neih pawimawh ber chu inhuam taka Jehova zirtîrna dawn kan duhna hi a ni tih a sawi uar a. Jheri-i chuan: “Chu thiamna chu ka nei a lâwm! ka inti a. Jehova’n ka ṭawngṭaina a chhâng tih ka hriat chuan ka mittui a tla hial a ni. Jehova chuan a hnêna pêk theih thil hlu engemaw ka nei tih leh min zirtîr a duh tih min hriattîr a ni!” tiin a sawi. A han thlîr lêt chuan, Jheri-i’n: “Chu zirtîrnaah chuan zam tak, hreh tak leh lunghnual takin ka va kal a. Mahse, inrintâwkna, phûrna, leh mahni inhlutna neiin ka haw a ni!” tiin a sawi a ni.

18. Kan kumte a upat hnuah pawh, Jehova’n kan biakna chu a hlut zawm zêl tih Bible-in engtin nge a târ lan?

¹⁸ Kan kum a upat hnuah pawh, Jehova chuan kan tân thawh tûr hna a la nei reng tih kan chiang thei a. (Sâm 92:12-15) Kan theihnate chu beitham hlein, kan thawhrimnate chu eng mah tham ni lo angin lang mah se, Jehova chuan a rawngbâwlnaa kan tih theih eng pawh chu a hlut tih Isua’n min zirtîr a ni. (Lk. 21:2-4) Chuvângin, i tih theihte chu ngaihven tlat rawh. Entîr nân, Jehova chungchâng i sawi thei a, unaute tân i ṭawngṭaisak theiin, mi dangte chu rinawm tlat tûrin i fuih thei a ni. Jehova chuan i thil hlen chhuahte avâng ni lovin, inhuam taka a thu i âwih avângin, a hnathawhpui angin a thlîr che a ni.—1 Kor. 3:5-9.

19. Rom 8:38, 39-na chuan eng tiamkamna nge min pêk?

¹⁹ A rawngbâwltute ngaihlu tak zettu Pathian Jehova kan be thei chu a va lâwm awm tak êm! Ani chuan a duh zâwng ti tûrin min siam a, biakna dik chuan nun awmze dik tak min neihtîr a ni. (Thup. 4:11) Khawvêlin hlutna nei lo angin min thlîr mah se, Jehova chuan chutiang chuan min thlîr lo. (Heb. 11:16, 38) Natna te, sum leh pai lama harsatna te, leh kum upatnate avânga kan lunghnual hunah pawh, kan Pa vâna mi min hmangaihna ata engmahin min ṭhen thei lo tih i hre reng ang u.—Rom 8:38, 39 chhiar rawh.