1. Jehova chhiahhlawh rinawm tam tak chuan eng dinhmun harsa tak takte nge an hmachhawn?

KHAWVEL pum huapa Jehova chhiahhlawh tam tak chuan rilru hahna leh dinhmun harsa tak takte an hmachhawn a. In kohhranah chutiang dinhmuna awmte chu i hria em? Kristian ṭhenkhat chuan natna khirh tak, a nih loh leh hmangaih takte thihna chu an hmachhawn a. Mi dangte chu an chhûngkaw zînga mi emaw, an ṭhian ṭha takin emaw thutak a chhuahsan avângin rilru hrehawm takin an awm a. Mi dang lehte chuan leilung chhiatna avânga harsatnate an tuar bawk. Chûng kan unau zawng zawngte chuan thlamuanna an mamawh a ni. Anni chu engtin nge kan ṭanpui theih?

2. Engvângin nge tirhkoh Paula chuan thlamuanna mamawh châng a neih?

² Tirhkoh Paula nun chu dinhmun hlauhawm takah vawi tam tak a awm a. (2 Kor. 11:23-28) Tisa lama hrisêl lohna ni thei ‘tisaa hlîng’ chu a tawrh a ngai bawk. (2 Kor. 12:7) Chu bâkah, tûn hmaa a rawngbâwlpui Dema chuan “tûn lai khawvêl hi a ngainat avangin” a kalsan a, chumi avânga a rilru hrehawmna pawh a hmachhawn a ngai bawk. (2 Tim. 4:10) Paula chu mahni hmasialna tel lova mi dangte ṭanpuitu thlarauva hriak thih Kristian huaisen tak ni mah se, ani chuan lunghnual châng a nei ve ṭhîn a ni.—Rom 9:1, 2.

3. Tute hnên aṭangin nge Paula’n thlamuanna leh ṭanpuina a dawn?

³ Paula chuan a mamawh tak thlamuanna leh ṭanpuina a dawng a ni. Engtin nge? Jehova chuan amah tichak tûrin a thlarau thianghlim a hmang tih a chiang hle. (2 Kor. 4:7; Phil. 4:13) Kristian unaute hmangin a thlamuan bawk. Paula chuan a Kristian unau ṭhenkhat chu “thlamuantute” angin a sawi a. (Kol. 4:11) An hming a târ lan zîngah chuan Aristarka te, Tukika te, leh  Marka te an tel a. Anni chuan Paula chu chhel taka tuar chhuak tûra ṭanpuiin an tichak a ni. Eng miziate’n nge chûng Kristian pathumte chu thlamuantu ṭha tak nihtîr? Kan inthlamuan tawn a, kan infuih tawn hunah, engtin nge an entawn tûr ṭha siam chu kan zui theih?

4. Engtin nge Aristarka chu Paula tân ṭhian rinawm tak a nih?

⁴ Aristarka chu Makedonia ram Thessalonika khuaa Kristian a ni a, Paula tâna ṭhian rinawm tak a ni. Aristarka chungchâng kan hriat hmasak berna chu, missonary nia Paula khual zin ṭum thumnaa Ephesi khua a tlawhna chanchinah a ni a. Paula a thawhpui laiin, Aristarka chu mipuiin an man a. (Tirh. 19:29) A tâwpa chhuah a nih chuan, mahni himna zawng lovin, rinawm takin Paula a zui zâwk a ni. Thla engemaw zât a liam hnua Grik rama dodâltute’n Paula nunna lâk an tum zawm zêl chung pawhin, Aristarka chu Paula hnênah a la awm reng a. (Tirh. 20:2-4) C.E. 58 vêlah, Paula chu tân ina khung tûra Rom khuaa thawn a nih khân, Aristarka chuan kawng tluanin a zui zêl a, kawnga an tawh lawng chhiatna chu an hmachhawn tlâng a ni. (Tirh. 27:1, 2, 41) Rom khua an thlen chuan, hun engemaw chen chu tân inah Paula nên an awm niin a lang. (Kol. 4:10) Chutiang ṭhian rinawm tak avânga Paula’n chakna leh thlamuanna a nei chu a mak lo ve!

5. Thufingte 17:17-a sawi angin, engtin nge ṭhian rinawm tak kan nih theih?

⁵ Aristarka angin, an dinhmun ṭhat lai chauh ni lovin, an ‘mangan nîah’ pawh kan unaute chu thlâwp tlatin, an tân ṭhian rinawm tak kan ni thei a. (Thufingte 17:17 chhiar rawh.) Harsatna a awm tawh loh hnuah pawh, kan unaute chuan thlamuanna an la mamawh reng thei a ni. Cancer natna avânga thla thum chhûnga a nu leh pa chântu Frances-i * chuan: “Hun rei tak chhûng chu fiahna khirh tak kan hmachhawn ni hian ka hria. Ka nu leh pate’n min boralsan aṭanga hun engemaw chen a liam hnuah pawh ka la tuar reng tih min hriatpuitu ṭhian rinawmte chungah ka lâwm hle a ni,” tiin a sawi.

6. Rinawmna chuan eng ti tûrin nge min chêttîr ang?

 ⁶ Ṭhian rinawmte chu an unaute ṭanpui tûrin an inpe a. Entîr nân, unau Peter-a chuan nunna atâna hlauhthâwnawm natna khirh tak a tuar a. A nupui Kathryn-i chuan: “Kohhrana nupa tuak khatin damdawi in pakhatah min hruai a, chutah chuan Peter-a natna chu kan hre ta a. Chumi ni aṭang chuan kan dinhmun harsa tak chu chhel taka kan tawrh chhuah theih nân min ṭanpui an tum ta a ni,” tiin a sawi. Fiahna kan tawhte chhel taka tuar chhuak thei tûra min ṭanpuitu ṭhian dik takte neih chu a va thlamuanthlâk tak êm!

7-8. Kolossa 4:7-9-naa sawi angin, engtin nge Tukika chuan rinchhan tlâk a nizia a târ lan?

⁷ Asia ram, Rom khuaa mi, Kristian Tukika chu Paula ṭhian rinawm tak a ni a. (Tirh. 20:4) C.E. 55 vêlah, Paula chuan Juda Kristiante tâna chhawmdâwlna thawhlâwmte khawn tûrin ruahmanna a siam a, chu mawphurhna pawimawh tak ṭanpui tûrin Tukika chu a tîr a ni thei. (2 Kor. 8:18-20) A hnuah, Paula chu a ṭum khatna atâna Rom khuaa tân ina khung a nih khân, Tukika chuan Paula thuchah kengtu angin rawng a bâwl a. Ani chuan Asia rama kohhranho hnêna Paula lehkha thawnte leh fuihna thuchahte chu a hriattîr a ni.—Kol. 4:7-9.

⁸ Tukika chu Paula tân ṭhian rinchhan tlâk tak a ni reng a. (Tit. 3:12) Chutih hun laia Kristiante chu Tukika anga rinchhan tlâk an ni vek lo. C.E. 65 vêla a ṭum hnihna atâna tân ina khung a nih khân, Paula chuan Asia rama Kristian tam takin an kawm duh loh thu a ziak a, chu chu dodâltute an hlauh vâng a ni thei. (2 Tim. 1:15) Mahse, Paula chuan Tukika chu a rinchhan thei a, chanvo dang pawh a pêk belh a ni. (2 Tim. 4:12) Tukika ang ṭhian ṭha tak a neih avângin a lâwm hle ngei ang.

9. Engtin nge Tukika chu kan entawn theih?

⁹ Ṭhian rinchhan tlâk tak niin Tukika kan entawn thei a. Entîr nân, ṭanpui ngai kan unaute chu ṭanpui tûra thu chauhva tiam mai lovin, an tân thil ṭangkai takte kan tihsak a. (Mt. 5:37; Lk. 16:10) Chûng ṭanpui ngai unaute chuan min rinchhan thei tih an hriat chuan, chu chuan a tithlamuang hle thei a. Unaunu  pakhat chuan a chhan hrilhfiahin, “Ṭanpui tûra tiamtu chuan a thutiam ang ngeiin thil a ti ang tih i hriat avângin, i rilru a hahdam a ni,” tiin a sawi a ni.

10. Thufingte 18:24-a târ lan angin, harsatna leh lunghnualna hmachhawntute chuan tute hnên aṭangin nge thlamuanna an hmuh theih?

¹⁰ Harsatna leh lunghnualna hmachhawntute chuan, an ṭhian hnai takte hnên aṭangin thlamuanna an dawng ṭhîn a. (Thufingte 18:24 chhiar rawh.) A fapa hnawhchhuah a nih avânga lunghnual tak Bijay-a chuan, “Ka rilru awm dânte chu ka mi rin theih tuemaw hnêna ka hrilh a ngai,” tiin a sawi. Carlos-a chuan kohhrana a chanvo hlu tak chu a mi mal tlin lohna avângin a chân a. Ani chuan, “Thiam loh chantîr nih hlau lova zalên taka ka ngaih dânte ka sawi chhuah theihna tûr ‘hmun him’ ka mamawh a ni,” tiin a sawi. Carlos-a chuan chutiang hmun him chu, a harsatna pal tlang thei tûra ṭanpuitu kohhran upate hnênah a hmu a. Chu bâkah, upate chu an fingin, a thusawite chu an sawi chhuak dâwn lo tih a hriatna chuan thlamuanna a neihtîr a ni.

11. Engtin nge ṭhian rinchhan tlâk tak leh rinawm tak kan nih theih?

¹¹ Ṭhian rinchhan tlâk tak leh rinawm tak ni tûr chuan dawhtheihna kan neih a ngai a. Zhanna-i chu a pasalin a chhuahsan chuan, a rilru awm dân chu a ṭhian ṭhate hnêna a hrilh avângin thlamuanna a nei a. Ani chuan: “Thu ngai ka sawi nawn kan sawi nawn chung pawhin, dawhthei takin min ngaihthlâksak a ni,” tiin a sawi. Nang pawhin, ngaithlatu ṭha tak niin ṭhian ṭha i nihzia i târ lang thei a ni.

12. Marka chu tu nge a nih a, mite ṭanpui duhna a neih chu engtin nge a lantîr?

¹² Marka chu Jerusalema Juda Kristian pakhat a ni a. A laichîn Barnaba chu hriat hlawh tak missionary a ni. (Kol. 4:10) Marka chhûngkua chu hausa tak niin an lang a; mahse, ani chuan a nunah hausakna chu a dah hmasa ber lo. Marka chuan a dam chhûngin mite ṭanpui duhna a nei a. Chutianga mite ṭanpui chu nuam a ti hle a ni. Entîr nân, ani chuan tirhkoh Paula leh tirhkoh Petera te’n an mawhphurhna an hlennaah an hnênah awm vein, an tisa lam mamawhte chu a ngaihtuahsak niin a lang. (Tirh. 13:2-5; 1 Pet. 5:13) Paula chuan Marka chu ‘Pathian ram thu lama a thawhpui, amah thlamuantu [tichaktu, NW]’ angin a târ lang a ni.—Kol. 4:10, 11.

13. Engtin nge 2 Timothea 4:11-na chuan rinawm taka Marka rawngbâwlna chu Paula’n a hlut tih a târ lan?

¹³ Marka chu Paula ṭhian ṭha tak zînga mi a ni a. Entîr nân, C.E. 65 vêla Rom khuaa tân ina khung a nih hnuhnûn ber ṭum khân, Paula chuan Timothea hnêna a lehkha thawn pahnihna chu a ziak a. Chu a lehkha thawnah chuan, Timothea chu Rom khuaa a hnêna kal tûr leh Marka pawh hruai tel ve tûrin a hrilh a ni. (2 Tim. 4:11) Paula chuan tûn hmaa rinawm taka Marka rawng lo bâwlna chu a hlut êm avângin, chu hun pawimawh takah chuan Marka chu tel ve tûrin a sâwm tih a chiang hle. Marka chuan Paula chu ei tûr emaw, a lehkha ziahna atâna a mamawh thilte emaw pein, kawng tam takin a ṭanpui a ni thei. Ṭanpuina leh fuihna a dawnte chuan, Paula chu tihhlum a nih hma nîahte chuan chhelna nei tûrin a ṭanpui ngei ang.

14-15. Matthaia 7:12-na chuan kawng ṭangkai taka mi dangte kan ṭanpui theih dân chungchângah eng nge min zirtîr theih?

¹⁴ Matthaia 7:12 chhiar rawh. Hun harsa tak kan pal tlang laia kawng tam taka min ṭanpuitute chu kan va ngaihlu tak êm! Beisei loh taka a pa chântu Ryan-a chuan “Nî tina i thiltih ṭhinte pawh hrehawm i tawrh lai chuan tih theih loh angin a lang a. Ṭanpuina ṭangkai tak  chu—thil tê tham tak anga lang pawh—thlamuantu ṭha tak a ni thei,” tiin a sawi.

¹⁵ Mite ngaihsak tak leh thil chîk mi kan nih chuan, mi dangte ṭanpui theih dân kawng ṭangkai tak takte chu kan hmu thei ngei ang. Entîr nân, unaunu pakhat chuan kan târ lan tâk Peter-a leh Kathryn-i chu damdawi lama an inenkawlna zawng zawngah ṭanpui a tum a. Peter-a leh Kathryn-i te chuan motor an khalh theih tawh loh avângin, chu unaunu chuan an veivah theih nân a indawta ṭanpui tûrin kohhran aṭanga mahni inpe unaute tân hun duan a siam a ni. Chu ruahmanna siam chuan a ṭanpui em? Kathryn-i chuan, “Kan phur rit tak chu hlân thlâksak niin ka inhria,” tiin a sawi. I ngilneihna thiltih chhê tê pawhin mi dangte chu nasa takin a thlamuan thei tih hre reng ang che.

16. Mite thlamuanna chungchângah Marka entawn tûr siam aṭangin eng zir tûr pawimawh tak nge kan neih?

¹⁶ Kum zabi khatnaa zirtîr Marka chu Kristian mi taima tak a ni a. A hming chawia a ziah Chanchin Ṭha pawh tiamin, theocratic chanvo pawimawh tak takte a chelh a. Chuti chung pawhin, Marka chuan Paula thlamuan nân a hunte a hmang a, Paula chuan Marka hnêna ṭanpuina dîl chu a hreh lo bawk. Râpthlâk taka thihnaa chhûngte chântu Angela-i chuan hmangaihna nei taka amah thlamuantute inpêkna chu a ngai hlu hle a. “Ṭhiante’n ṭanpui duhna tak tak an neih hian, anni chu pan nuam tak an ni a. Ṭanpuina pe hreh angin an lang lo,” tiin a sawi. Heti hian kan inzâwt thei a ni: ‘Kawng ṭangkai taka Kristian unaute thlamuan ṭhîntu nia hriat ka ni em?’ tiin.

17. Korinth thawn hnih 1:3, 4-a thute chhût ngunna chuan engtin nge mi dangte thlamuan tûra min chêttîr theih?

¹⁷ Thlamuanna mamawh unaute zawn hmuh chu thil harsa a ni lo. Mi dangin keimahni min thlamuanna thu ṭha tak takte chu kan hrilh thei a ni. Thihnaa a pi chântu unaunu Nino-i chuan: “Jehova mi hman nih kan duh phawt chuan, mi dangte thlamuan tûrin min hmang thei a ni,” tiin a sawi. (2 Korinth 1:3, 4 chhiar rawh.) A chunga kan sawi tâk Frances-i chuan: “Korinth thawn hnih 1:4-a  thu hi a dik tak zet a ni. Mite min thlamuanna ngeiin mi dangte pawh kan thlamuan ve thei a ni,” tiin a sawi.

18. (a) Engvângin nge mi ṭhenkhatin mite thlamuan chu an hreh mai theih? (b) Engtin nge mite chu ṭha taka kan thlamuan theih? Entîrna pe rawh.

¹⁸ Hlauhthâwnna nei mah ila, thil ti tûra hma kan lâk hmasak a ngai a. Entîr nân, thlamuanna mamawh tuemaw hnêna sawi tûrte leh thiltih tûrte i hriat loh avângin i hlauthâwng mai thei. Kohhran upa unau Paul-a chuan a pa a boral hnua unaute’n amah thlamuan tûra hma an lâkna chu a hre reng a. “Min rawn pan chu an tân thil awlsam a ni lo tih ka hria. Sawi tûr ber pawh an hre lo va. Mahse, min thlamuan a, min ṭanpui an duh tih ka hriat avângin ka lâwm tho a ni,” tiin a sawi. Chutiang bawkin, lîrnghîng na tak a tawrh hnuah, unau Tajon-a chuan: “Dik taka sawi chuan, lîrnghîn hnua mite lehkha min thawn zawng zawng chu ka chhinchhiah vek sêng lo; mahse, min ngaihsak tak zet tih erawh chiang takin ka hria,” tiin a sawi. Ngaihsakna kan lantîr chuan, mite thlamuantu ṭha tak kan ni thei a ni.

19. Engvângin nge mite ‘thlamuantu’ nih kan tum ang?

¹⁹ He khawvêl tâwpna kan hnaih zêl rual hian, khawvêl dinhmunte chu a chhe zual deuh deuhvin, nun pawh a harsa telh telh a. (2 Tim. 3:13) Chu bâkah, sual kan rochun avâng leh kan ṭhat famkim loh avânga harsatnate kan insiam ṭhin avângin, thlamuanna kan la mamawh zêl dâwn a ni. Tirhkoh Paula’n a nun tâwp thlenga rinawm taka a tawrh chhuah theih chhan pakhat chu a Kristian unaute hnên aṭanga thlamuanna a dawn vâng a ni. Aristarka anga rinawm, Tukika anga rinchhan tlâk, leh Marka anga mite ṭanpui duhtu nih i tum ṭheuh vang u. Chutianga kan tih chuan, kan unaute chu rinnaa nghet taka awm reng tûrin kan ṭanpui thei ang.—1 Thes. 3:2, 3.