1. Kum 1935-a inkhâwmpui thusawi chuan ṭhalai pakhat chungah eng nghawng nge a neih?

KUM 1926-ah kum 18 mi ṭhalai pakhat chuan baptisma a chang a. A nu leh pa chu chutih hun laia Bible Zirlaite tia hriat Jehova Thuhretute zînga mi an ni. Anni chuan fapa pathum leh fanu pahnih an nei a, an fate chu Pathian Jehova rawngbâwl tûr leh Isua Krista entawn tûrin an ṭanpui a ni. Chutih hun laia Bible Zirlai zawng zawngte tih angin, chu ṭhalai fel tak chuan kum tina neih Lalpa Zânriaha chhang leh uain chu a kîl ṭhîn a. Mahse, “mipui nasa tak,” tih thupui hmanga thusawi pawimawh tak chuan nakin hun atâna a beiseina chu a thlâk danglam ta a ni. Chu thusawi chu kum 1935-a U.S.A., Washington, D.C. khawpuia neih inkhâwmpuia J. F. Rutherford-a sawi a ni a. Chu inkhâwmpuiah chuan eng thute nge hriat a nih?

2. Unau Rutherford-a thusawiah eng thutak phûrawm tak nge hrilhfiah a nih?

² A thusawiah Unau Rutherford-a’n Thu Puan 7:9-a târ lan “mi pui nasa tak,” (C.L. Re-edited) a nih loh leh “mipui tam tak” chu tute nge an nih tih a hrilhfiah a. Chutih hun lai chuan chu pâwl chu hriak thihte aia rinawm lo zâwk vân lâwn tûr pâwl pahnihna nia ngaih a ni a. Unau Rutherford-a chuan “mipui tam tak” chu vâna awm tûra thlante ni lovin, “hrehawm nasat tak” ata dam khawchhuaka leia chatuana nung tûr Krista berâm dangte * an ni tih Bible chângte hmangin a hrilhfiah  a ni. (Thup. 7:14) Isua chuan: “He berâm huanga mi lo hi berâm dang ka nei; anni pawh ka la rawn hruai tûr a ni, ka aw pawh an hria ang; chutichuan, pâwl khatin an awm ang a, a vêngtu pakhat nên,” tiin a sawi a. (Joh. 10:16) Chûng berâm ang mi ṭhate chu lei Paradis-a chatuana nung tûra beiseina nei Jehova Thuhretu rinawmte an ni. (Mt. 25:31-33, 46) He thlarau lam hriatthiamna thar hian kan sawi tâk kum 18 mi ṭhalai unaupa pawh tiamin, Pathian Jehova chhiahhlawh tam takte nun a thlâk danglam dân chu i lo en ang u.—Sâm 97:11; Thuf. 4:18.

3-4. Kum 1935-a inkhâwmpuiah mipui sâng tam tak chuan an beiseina chungchângah eng nge an hriatthiam a, engvângin nge?

³ Chu inkhâwmpuia thusawituin ngaithlatute hnêna: “Kan zînga leia chatuana nun beiseina nei zawng zawngte, khawngaihin ilo ding ang u!” a tih lai chu hun phûrawm lai tak a ni. Chu inkhâwmpuia tel unaupa pakhat sawi dân chuan ngaithlatu mipui 20,000 zînga a chanve aia tamte chu an ding a. Tichuan, Rutherford-a chuan: “En teh u! Mipui nasa takte hi!” tiin a sawi a. Chutia a sawi zawh chuan mipui chu an au dur dur a. Ding zînga telte chu vân nunna chang tûra thlan an ni lo tih an inhria a. Pathian thlarau thianghlim hmanga hriak thih an ni lo tih pawh an inhre bawk. Inkhâwmpui a ni hnih nîah chuan mi 840-te chuan baptisma an chang a, an zînga a tam zâwk chu berâm dang zînga mi an ni.

⁴ Chu inkhâwmpui zawh aṭang chuan kan sawi tâk ṭhalai leh mi dang sâng tam takte chuan Lalpa Zanriaha chhang leh uain chu an kîl tawh lo va. Unaupa pakhat chuan mi dang tam takte ang bawkin a rilru awm dân chu heti hian inngaitlâwm takin a sawi a ni: “Kum 1935-a Hriatrengna chu chhang leh uain ka kîl hnuhnûn berna a ni. Jehova’n a thlarau thianghlim hmangin vân beiseina ka nei tih min hriattîr lo va; chu aiin, leia nun beiseina leh lei pumpui paradis-a chantîrnaa tel ve theihna ka nei tih ka inhria a ni,” tiin. (Rom 8:16, 17; 2 Kor. 1:21, 22) Chumi kum aṭang chuan mipui tam tak zînga telte chu an pung chho tial tial a, anni chuan hriak thih la bângte rualin rawng an bâwl a ni. *

5. Jehova chuan Hriatrengna chhang leh uain kîl tawh lote chu engtin nge a thlîr?

⁵ Kum 1935 hnu lama Hriatrengna chhang leh uain kîl tawh lote chu Jehova’n engtin nge a thlîr? Tûn laia baptisma chang tawh Thuhretu pakhatin chhang leh uain chu kilin, a hnuah hriak thih a ni lo tih inhre ta se, engtin nge ni ang? (1 Kor. 11:28) Mi ṭhenkhat chuan an beiseina an hriat sual avângin chhang leh uain chu an kîl a. Mahse, an thil tihsual chu inngaitlâwm taka an pawm a, chhang leh uain chu an kîl chhunzawm tawh loh va, rinawm taka Jehova rawng an bâwl zawm zêl chuan, anni chu berâm dangte zîngah chhiar tel an ni ang. Chhang leh uain chu kîl tawh lo mah se, an tâna Jehova leh Isua thiltihte chunga an lâwm êm avângin Hriatrengnaah an tel chhunzawm zêl a ni.

6. Isua’n vântirhkohte chu eng ti tûrin nge thu a pêk?

⁶ Nakin lawkah hrehawm nasa tak a lo thlen dâwn avângin, Thu Puan bung 7-a târ lan hriak thih Kristiante leh berâm dangte zînga mi, mipui tam takte chungchâng ennawnna chuan min tichak ngei ang. Isua chuan vântirhkohte chu boralna thli pali la chelh  rih tûrin thu a pe a. Anni chuan hriak thih Kristian zawng zawngte’n Jehova pawmna entîrtu chhinchhiahna hnuhnûng ber an dawn hma loh zawng chûng thlite chu an chelh reng tûr a ni. (Thup. 7:1-4) Hriak thih Krista unaute chuan vânah amah nêna lal leh puithiam niin an rinawmna lâwmman chu an dawng ang. (Thup. 20:6) Pathian vân lam chhûngkuaa tel zawng zawngte chuan hriak thih mi 1,44,000-te’n an vân lam lâwmman an dawn hun chuan an lâwm hle ngei ang.

7. Thu Puan 7:9, 10-a târ lan angin, Johana’n inlârnaah tute nge a hmuh a, chûng mite chuan eng nge an tih? (A kâwma milem en rawh.)

⁷ Johana’n lal leh puithiam mi 1,44,000-te chungchâng a sawi hnu chuan thil phûrawm tak dang, Armageddon-a dam khawchhuak “mipui tam tak” chu a hmu leh a. Lal leh puithiamte ang lo takin, chu pâwl pahnihna chu an tam zâwkin, a zât bithliah pawh a awm lo. (Thu Puan 7:9, 10 chhiar rawh.) Anni chuan ‘puan vâr an sin a,’ chu chu Setana khawvêl “bawlhhlawh” an kai lo va, Pathian leh Krista chungah an rinawm tlat tihna a ni. (Jak. 1:27) Anni chuan Jehova leh Isua, Pathian berâm no thiltihte avânga chhandam an ni tiin an au va. Chu bâkah, Isua chu Jehova ruat Lal a ni tih lâwm taka an pawmzia târ langtu tûm kau an keng bawk a ni.—Johana 12:12, 13 nên khaikhin rawh.

8. Thu Puan 7:11, 12-na chuan Jehova vân lam chhûngkua chungchâng eng eng min hrilh?

⁸ Thu Puan 7:11, 12 chhiar rawh. Vâna mite’n mi pui tam tak an hmuh chuan eng nge an tih? Johana chuan mipui tam tak an lo lan a, Pathian an fak avângin Jehova vân lam chhûngkua zawng zawng chu lâwmnain an khat lai a hmu a. Jehova vân lam chhûngkuate chu he inlârna thlen famkimna, hrehawm nasa tak ata mipui tam takte an dam khawchhuak an hmuh hun chuan an hlim hle ngei ang.

9. Thu Puan 7:13-15-a sawi angin, mipui tam tak chuan tûnah eng nge an tih?

⁹ Thu Puan 7:13-15 chhiar rawh. Johana’n mipui tam tak chuan “an puante Berâm No thisena suin an tivâr ta a,” tiin a sawi a. Chu chu chhia leh ṭha hriatna thiang tak neiin Pathian hmaah mi fel angin an ding tihna a ni. (Is. 1:18) Anni chu Isua tlanna inthawinaa rinna nghet tak neitu inpumpêk a, baptisma chang tawh Kristiante leh Pathian nêna inlaichînna ṭha tak neite an ni. (Joh 3:36; 1 Pet. 3:21) Chuvângin, anni chu Pathian lalṭhutphah hma, thlarau lam biak in lei lam hung chhûng kawtlaia “a chhûn a zâna” Pathian rawng bâwl tûrin an tling a ni. Tûnah ngei pawh, Lalram thu hrilhnaah leh zirtîr siamnaah ṭhahnemngai taka telin, Pathian Lalram chu an nunah an dah pawimawh ber a ni.—Mt. 6:33; 24:14; 28:19, 20.

10. Mipui tam tak chuan eng nge an hriat chian a, eng thutiam thlen famkimna nge an hmuh ang?

¹⁰ “Lalṭhuhphaha ṭhua chuan an chungah a puan in chu a zâr” dâwn avângin, hrehawm nasa tak ata dam khawchhuak mipui tam tak chuan Pathian ngaihsakna an dawng chhun zawm ang tih an chiang a ni. Berâm dangte chuan: “[Pathianin] an mit ata mittui zawng zawng a hrufai ang a; thihna a awm leh thei tawh lo vang a, lungngaih te, ṭah te, nat te pawh a awm leh tawh hek lo vang,” tih thutiam thlen famkim hun tûr hmuh chu an nghâkhlel tawh hle a ni.—Thup. 21:3, 4.

11-12. (a) Thu Puan 7:16, 17-a târ lan angin, mipui tam tak chuan eng malsâwmnate nge an dawn ang? (b) Berâm dangte chuan Hriatrengnaah eng nge an tih theih a, engvângin nge?

¹¹ Thu Puan 7:16, 17 chhiar rawh. Tûnah ngei pawh Jehova mite zînga ṭhenkhat chuan sum leh pai lama harsatnate leh tualchhûng  buainate avângin tisa lamah hrehawm an tuar a. Mi dangte chu an rinna avânga tân ina khung an ni. Mahse, mipui tam tak chu he khawvêl suaksual tak tihchhiat a nih hunah an dam khawchhuak ang a, tisa lam leh thlarau lam chaw an hnianghnâr reng tawh dâwn tih an hriat avângin an phûr hle a. Setana khawvêl chunga chhiatna râpthlâk tak a thlen hunah, mipui tam tak chuan Jehova’n hnamte chunga a leih buak tûr a thinrimna “lum rêng rêng” chu an tuar ve lo vang. Hrehawm nasa tak zawhah, leia dam khawchhuakte chu Isua’n “nunna tuikhurahte” a hruai ang. Han ngaihtuah teh: Mipui tam tak chuan beiseina ropui tak a nei a. Nung dama awm mi maktaduai tam tak chu an thi ngai tawh lo vang!—Joh. 11:26.

¹² Berâm dangte chu beiseina ropui tak an neih avângin Jehova leh Isua chungah an lâwm hle! Anni chu vân nunna chang tûra thlan ni lo mah se, Pathian Jehova tân an hlutna a nêp deuh tihna a ni rêng rêng lo. Hriak thihte leh berâm dangte chuan Pathian leh Krista chu an fak thei ve ve a. Chutianga an tih theih dân kawng khat chu Lalpa Zanriah inkhâwma tel hi a ni.

13-14. Engvângin nge hriak thihte leh berâm dangte chu Krista thih Hriatrengnaah an tel ang?

¹³ Tûn hnai kumahte hian, Hriatrengna inkhâwma tel mi 1,000 zêla 1 vêlin chhang leh uain an kîl ṭhîn a. Khawvêl pum huapa kohhran a tam zâwkah chuan Hriatrengna chhang leh uain kîltu an awm lo. Hriatrengna inkhâwma tel a tam zâwkte chu lei lam beiseina nei an ni. A nih leh, anni chu engvângin nge Lalpa Zanriah inkhâwma an tel? A ṭhianpa inneihnaa mi an tel chhan nên a thuhmun reng a. Nupa tuak thar an hmangaihna leh an thlâwpzia lantîr duhvânga tel an ni. Chutiang bawkin, berâm dang zînga telte chuan Krista leh hriak thihte an hmangaih a, thlâwp an duh avângin Hriatrengna inkhâwmah an tel a. Chu bâkah, chu inkhâwma an tel chhan dang leh chu leia chatuana nun theihna kawng hawngtu Krista inthawina chunga lâwmna lantîr an duh vâng a ni.

¹⁴ Hriatrengna inkhâwma berâm dangte an tel chhan dang leh chu Isua thupêk zawm an duh vâng a ni. Isua’n a tirhkoh rinawmte Lalpa Zanriah a hmêlhriattîr khân: “Mi hriat  reng nân hei hi ti ṭhîn rawh u,” tiin a hrilh a. (1 Kor. 11:23-26) Chuvângin, berâm dangte chu he leia hriak thih ṭhenkhat an la awm chhûng zawng Lalpa Zanriah hmannaah an tel zawm zêl a. Chu bâkah, anni chuan Hriatrengna inkhâwma lo tel tûrin mi zawng zawng an sâwm a ni.

15. Hriatrengna inkhâwmah Pathian leh Krista chu engtin nge mi mal taka kan fak theih?

¹⁵ Chu Hriatrengna inkhâwmah chuan Pathian leh Krista chu hla sa leh ṭawngṭaia fak theihna hun remchâng kan nei a. Kumin atâna thusawi tûr thupui chu, “I Tâna Pathian leh Krista Thiltih Avânga I Lâwmzia Lantîr Rawh!” tih a ni. Chu chuan Pathian Jehova leh Krista chunga kan lâwmna chu a tizual ngei ang. Chhang leh uain sem a nih laiin, chûngte chuan Isua taksa leh thisen a entîr tih hriat nawntîr kan ni ang a. Nunna kan neih theih nân Jehova’n a Fapa chu kan aia a thih a phal tih hriat nawntîr kan ni bawk ang. (Mt. 20:28) Kan Pa vâna mi leh a Fapa hmangaihtu zawng zawngte chuan Hriatrengna inkhawma tel chu an duh ngei ang.

16. Eng kawngtein nge hriak thihte leh berâm dangte chu an inan?

¹⁶ Hriak thihte leh berâm dangte inah lohna chu Pathian tâna an hlutna hi a ni lo. Chûng pâwl pahnihte chu Jehova tân an hlu ve ve a. Dik tak chuan, ani chuan hriak thihte leh berâm dangte lei nân man inang, a Fapa duh tak nunna chu a pe a ni. Chûng pâwl pahnihte danglamna chu beiseina inang lo an nei hi a ni a. Chu pâwl hnih chuan Pathian leh Krista chungah rinawmna an lantîr tlat tûr a ni. (Sâm 31:23) Chu bâkah, Pathian thlarau chuan kan zavai chungah inang vekin hna a thawk thei tih pawh hre reng ang che. Chu chu Jehova chuan a thlarau thianghlim chu mi tinte chungah an mamawh ang zêlin a pe tihna a ni.

17. Hriak thih la bângte chuan eng nge an nghahhlelh?

¹⁷ Hriak Thih Kristiante chu vân beiseina neisaa piang an ni lo. An thinlunga chu beiseina neihtîrtu chu Pathian a ni a. An beiseina chungchâng an ngaihtuah a, chumi chungchângah an ṭawngṭai a, vân lam lâwmman dawn chu an châk hle a. Mahse, eng ang thlarau taksa nge an put dâwn tih pawh an hre lo. (Phil. 3:20, 21; 1 Joh. 3:2) Chuti chung pawhin, Jehova, Isua, vântirhkohte, leh hriak thih dangte nêna an inhmuhkhâwm hun tûr leh vân Lalrama an zînga tel hun tûr chu an nghâkhlel hle a ni.

18. Berâm dangte chuan eng nge an nghahhlelh?

¹⁸ Berâm dangte chuan leia chatuan nun beiseina an neih chu an ngaihlu hle a. (Thuf. 3:11) Anni chuan lei pum pui paradis-a an chantîr  theih hun tûr chu an nghâkhlel hle a ni. Chu bâkah, mahni inte sa a, huante siam a, hrisêlna ṭhafamkim neia fate neih hun tûr chu an nghâkhlel tawh hle bawk. (Is. 65:21-23) Anni chuan khawvêl hmun hrang hranga zin kual a, tlâng te, ramngaw te, leh tuifinriatte thlîr a, Pathian thil siam zawng zawngte chungchâng zir chian hun chu an nghâkhlel hle a. Thil dang zawng aiin, Jehova nêna an inlaichînna a nghet chho telh telh dâwn tih an hriatna chuan a tihlim hle bawk.

19. Hriatrengna chuan mi tin tân eng hun remchâng nge a pêk a, kumin hian engtik hunah nge hman a nih ang?

¹⁹ Jehova chuan a chhiahhlawh inpumpêkte chu nakin hun beiseina ropui tak a pe ṭheuh va. (Jer. 29:11) Krista thih Hriatrengna chuan mi tinte chu chatuan nunna an neih theih nâna Pathian leh Krista thiltihte avânga anmahni fak theihna hun remchâng a pe a ni. Hriatrengna inkhâwm chu Kristian zawng zawngte tân inkhâwm azawnga inkhâwm pawimawh ber a ni tih a chiang hle. Chu chu Inrinni, March 27, 2021 ni tlâk hnuah neih a ni ang. Kuminah chuan mi tam tak chuan he hun pawimawh tak hi zalên takin an hmang thei ang a. Mi dangte chuan dodâlna kârah an hmang pawh a ni thei bawk. Mi dang lehte chuan tân in chhûngah harsa takin an hmang ang. Pathian Jehova, Isua, leh Pathian vân lam chhûngkuate’n min thlîr reng laiin, kohhran tin, group tin, leh mi tinte chuan Hriatrengna hun serh chu hlim takin i hmang ṭheuh vang u!