1. Tûn laiah hmangaihna pianpui neih lohna chu eng kawngtein nge kan hmuh?

BIBLE chuan ni hnuhnûngahte chuan mite chu “hmangaihna pianpui nei lo te” an ni ang tih a sawi lâwk a. (2 Tim. 3:1, 3) Tûn laiah, chu hrilh lâwkna thleng famkim mêk chu kan hmu a ni. Entîr nân, chhûngkaw tam tak chu an inṭhen a, chuvângin nupate chu an inhaw tawn a, an fate chuan hmangaihna dawng lo niin an inhria a ni. In khata chêng chhûngkuate pawhin inlaichînna ṭha an nei lo. Chhûngkuate hnêna thurâwn petu pakhat chuan: “Nu ber, pa ber, leh fate inkârah inbiak pawhna a awm lo va, an hun tam zâwk chu computer te, tablet te, phone te hman nân leh video game-te khelh nân an hmang a. Chutiang chhûngkua chu in khatah chêngho mah se, an inhre chiang lo hle,” tiin a sawi a ni.

2-3. (a) Rom 12:10-a sawi angin, tute chungah nge hmangaihna kan lantîr ang? (b) He thuziakah hian eng nge kan sawiho vang?

² Hmangaihna nei lo khawvêl rilru put hmang thununna awm chu kan duh lo va. (Rom 12:2) Chu aiin, tisa lama kan chhûngte chungah mai ni lovin, rinna chhûngte chungah pawh hmangaihna reh ngai lo lantîr chu kan duh a ni. (Rom 12:10 chhiar rawh.) Chu chu eng ang hmangaihna nge ni? Chhûngkaw zînga mite inkâra awm inlaichînna leh inṭhianna duhawm tak hi a ni. Chutiang hmangaihna chu a ni, thlarau lama kan chhûngkua, kan  Kristian unaute chunga kan lantîr tûr chu. Hmangaihna kan lantîr hian, biakna dik atâna pêng pawimawh tak pakhat inpumkhatna awm tûrin kan ṭanpui tihna a ni.—Mik. 2:12.

³ Chutiang hmangaihna nei tûr leh lantîr tûra min ṭanpui tûrin Jehova leh a chhiahhlawh ṭhenkhatte hnên aṭanga kan zir theihte chu i lo en ang u.

4. Engtin nge Jakoba 5:11 chuan Jehova hmangaihna thûkzia hre thiam tûra min ṭanpui?

⁴ Bible chuan Jehova mize duhawm tak takte a târ lang a. Entîr nân, “Pathian chu hmangaihna a ni,” tiin a sawi. (1 Joh. 4:8) Chu mizia ringawt pawh chuan a lamah min hîp a ni. Chu bâkah, Bible chuan Jehova chu ‘khawngaihnain a khat’ tih a sawi bawk. (Jakoba 5:11 chhiar rawh.) Min hmangaihzia târ lanna duhawm tak a va ni êm!

5. Engtin nge Jehova’n zahngaihna a lantîr a, engtin nge ani chu kan entawn theih?

⁵ Jakoba 5:11 chuan Jehova khawngaihna chu a lama min hîptu a mize dang, zahngaihna nên a thlunzawm tih hi chhinchhiah ang che. (Ex. 34:6) Jehova’n kan chunga zahngaihna a lantîr dân kawng khat chu kan thil sual tihte ngaihdamna hmangin a ni. (Sâm 51:1) Bible-a zahngaihna tih ṭawngkamah hian ngaihdamna aia tam a tel a. Zahngaihna tih chu miin mangang taka awm tuemaw a hmuh huna a khawngaih êm avânga ṭanpui tûra amah chêttîrtu sawina a ni. Jehova chuan nuin a fa ṭanpui duhna a neih aia nasa zâwkin a mite ṭanpui a duh a. (Is. 49:15) Kan mangan hunah, a zahngaihna chuan min ṭanpui tûrin a chêttîr a ni. (Sâm 37:39; 1 Kor. 10:13) Kan unaute’n min tihlungnih loh hunah, chu chu rilrua vei reng lova ngaidamin an chungah zahngaihna kan lantîr thei a. (Eph. 4:32) Mahse, zahngaihna kan lantîr theih dân kawng pawimawh ber chu kan unaute’n harsatna an hmachhawn huna ṭanpui hi a ni. Mi dangte chunga zahngaihna lantîr tûra hmangaihnain min chêttîr hian, hmangaihna lantîrna kawnga entawn tûr ṭha ber Jehova chu kan entawn tihna a ni.—Eph. 5:1.

6. Engtin nge Jonathana leh Davida chuan inhmangaih tawnna an lantîr?

⁶ Bible chuan hmangaihna lantîrtu ṭha famkim lo mihringte chungchâng min hrilh a. Jonathana leh Davida entawn tûr siam hi han ngaihtuah teh. Bible chuan: “Jonathana leh Davida chu an inngaina ta hle a. Jonathana chuan amah tlukin ani chu a hmangaih a,” tiin a sawi. (1 Sam. 18:1, C.L. Re-edited) Davida chu Saula aiawha lal tûra hriak thih a ni a. Chumi hnuah chuan Saula’n Davida chu a huat êm avângin tihhlum a tum a. Mahse, Saula fapa Jonathana chuan a pain Davida tihhlum a tum khân a thlâwp lo. Jonathana leh Davida chuan ṭhian ṭha tak ni reng tûr leh inṭanpui tawn reng tûrin thu an intiam a ni.—1 Sam. 20:42.

7. Jonathana leh Davida te ṭhian ni lo tûra dâltu ni thei tûr thil pakhat chu eng nge ni?

⁷ Jonathana leh Davida inṭhianna tûr dâltu awm theite kan ngaihtuah hian an inhmangaihna chu a chhinchhiah tlâk lehzual a ni. Entîr nân, Jonathana chu Davida aiin kum 30 vêlin a upa a. Jonathana chu amah aia naupang zâwk leh thiltawn nei tlêm zâwk he tlangvâl nên hian inkûngkaihna eng mah nei lo niin a inngai mai thei. Mahse, ani chuan Davida chu amah aia hnuaihnung zâwk angin a thlîr lo va, a cheibâwl hek lo.

8. Engvângin nge Jonathana chu Davida tâna ṭhian ṭha tak nia i ngaih?

⁸ Jonathana chuan Davida chu thîk thei a ni a. Lal Saula fapa a nih angin, lalṭhutthleng luahtu tûr a ni a inti tlat thei a ni. (1 Sam. 20:31) Mahse, Jonathana chu mi inngaitlâwm tak leh Jehova chunga rinawm tak a ni a. Chuvângin, Jehova’n lal atâna Davida a thlan chu a thlâwp tlat a ni. Chu chuan Saula chu tithinrim hle mah se, Jonathana chu Davida chungah a rinawm tlat a ni.—1 Sam. 20:32-34.

9. Jonathana chuan Davida chu amah eltu angin a thlîr em? Hrilhfiah rawh.

⁹ Jonathana’n Davida a hmangaih tlat avângin ani chu amah eltu angin a thlîr lo. Jonathana chu thal kah thiam tak leh sipai huaisen tak a ni a. Amah leh a pa Saula chu ‘mupuite aia chak zâwk’ leh ‘sakeibakneite aia chak zâwk,’ tia sawi an ni a. (2 Sam. 1:22, 23) Chuvângin, Jonathana chuan huaisen taka a thiltihte chu a chapopui thei a ni. Mahse, Davida chu a el lo va, a thîk hek lo. Chu aiin, a huaisenna leh Jehova a rinchhanna avângin a ngaina hle zâwk a. Dik tak chuan, Davida’n Goliatha a thah hnuah chauh Jonathana’n ani chu a nunna tlukin a hmangaih ṭan a ni. A nih leh, chutiang hmangaihna chu kan unaute chungah engtin nge kan lantîr ve theih?

10. ‘Thinlunga ṭhahnemngai taka inhmangaih tawn,’ tih awmzia chu eng nge ni?

¹⁰ Bible chuan ‘thinlunga ṭhahnemngai taka inhmangaih tawn’ tûrin min hrilh a. (1 Pet. 1:22) Jehova chuan kan tân entawn tûr ṭha a siam a ni. Ani chuan min hmangaih êm avângin a chunga kan rinawm tlat chuan chu hmangaihna chu engmahin a tichhe thei lo vang. (Rom 8:38, 39) “Ṭhahnemngai takin,” tia lehlin Grik thu mal hian hmangaihna lantîr tûra theih tâwp chhuahna a kâwk a. A châng chuan, kan Kristian unaute chunga hmangaihna lantîr tûrin “theih tâwp” kan chhuah, a nih loh leh “ṭhahnemngai” taka beih a ngai a ni. Mi dangin min tihlungnih loh hunah pawh ‘hmangaihnaa indawh tawn chunga dawhtheihna neia remna phuarnaah chuan thlarau inpumkhatna chu kan vawn’  chhunzawm zêl a ngai a ni. (Eph. 4:1-3) ‘Remna phuarnaa’ awm kan tum tlat chuan kan unaute thiltih dik loh chu kan en lo vang a. Jehova’n anmahni a thlîr anga thlîr ve tûrin theih tâwp kan chhuah zâwk ang.—1 Sam. 16:7; Sâm 130:3.

11. Engvângin nge unaute chunga hmangaihna lantîr chu harsa tih châng kan neih mai theih?

¹¹ A bîk takin, kan unaute tlin lohna kan hmuh hian, an chunga hmangaihna lantîr chu a awlsam ṭhîn lo. Kum zabi khatnaa Kristiante pawhin chutiang harsatna chu an hmachhawn a. Entîr nân, Euodii leh Suntuki chu ‘Paula tâna chanchin ṭha beihpuitute’ nia rawng an bâwl lai chuan harsatna an nei lo niin a lang. Mahse, chhan engemaw avângin an pahnih chuan an inrem thei lo. Chuvângin, Paula chuan anni chu “Lalpaah chuan rilru hmun khat pu tûrin” a fuih a ni.—Phil. 4:2, 3.

12. Engtin nge kan unaute chungah hmangaihna kan lantîr theih?

¹² Tun laia kan unaute chungah engtin nge hmangaihna kan lantîr theih? Kan unaute kan hriat chian lehzual chuan anmahni hriatthiam leh an chunga hmangaihna lantîr chu a awlsam lehzual ang. Kum upat dân leh ṭo bulte chuan kan inṭhianna a dâl tûr a ni lo. Jonathana chu Davida aiin kum 30 vêlin upa mah se, an inkârah inṭhianna nghet tak an siam thei tih hre reng ang che. Nangmah aia upa zâwk emaw, naupang zâwk emaw chu ṭhianah i siam thei ang em? Chutiang tihna hmangin ‘unaute kan hmangaihzia’ kan lantîr thei a ni.—1 Pet. 2:17.

13. Engvângin nge kohhrana mi ṭhenkhat chu mi dang aia kan nêl zâwk mai theih?

¹³ Unaute chunga hmangaihna lantîr tih chu kohhrana mi zawng zawngte nên inṭhian ṭha tak kan ni vek ang tihna a ni em? Ni lo, chutiang chu a ni vek thei lo. Tui zâwng a inan avânga ṭhenkhatte aia mi dangte nêna ṭhian hnaia kan insiam chu thil sual a ni lo. Isua pawhin a tirhkoh zawng zawngte chu a “ṭhiante” angin sawi mah se, Johana chu a hmangaih bîk a ni. (Joh. 13:23; 15:15; 20:2) Mahse, Johana chungah duhsak bîkna a lantîr lo. Entîr nân, Johana leh a unaupa Jakoba’n  Pathian Rama nihna pawimawh tak pe tûra an dîl khân, Isua’n an hnênah: “Ka ding lamah emaw, ka vei lamah emawa ṭhut tûr thu chu keia pêk tûr a ni lo,” tiin a hrilh a ni. (Mk. 10:35-40) Isua entawnin, mi dangte aiin kan ṭhian hnaite kan duhsak bîk lo vang. (Jak. 2:3, 4) Chutianga duhsak bîkna kan neih chuan inṭhen hranna kan awmtîr a ni ang a, chu chuan Kristian kohhranah hmun rêng a nei lo.—Jud. 17-19.

14. Philippi 2:3-a sawi angin, inelna rilru put hmang pumpelh tûrin engin nge min ṭanpui ang?

¹⁴ Inhmangaih tawnna kan lantîr hian, kohhran chu inelna rilru put hmang awm lo tûrin kan vênghim tihna a ni. Jonathana chuan Davida chu a lalṭhutthlêng chhuhsaktu angin a thlîr lo va, el pawh a el lo tih hre reng che. Kan za hian Jonathana entawn tûr siam chu kan zui thei a. I unaute chu an theihnate avângin nangmah eltute angin thlîr lo la; chu aiin, “inngaitlâwm takin mahni aiin mi dang ṭha zâwkah ruat” zâwk ang che. (Philippi 2:3 chhiar rawh.) Kohhrana mi tinte hian ṭangkaina an nei ṭheuh tih hre reng ang che. Inngaihtlâwmna kan neih reng chuan, kan unaute ṭhatna lai kan hmu ang a, rinawmna kawnga an entawn tûr siamte chu kan hlâwkpui thei ang.—1 Kor. 12:21-25.

15. Unaunu Tanya-i leh a chhûngkaw chunga thilthleng aṭangin eng nge kan hriat?

¹⁵ Beisei loh tak fiahnate kan hmachhawn hunah, Jehova chuan kan unaute hnên aṭanga kan dawn hmangaihna leh ṭanpuina hmangin min thlamuan a. Kum 2019-a United States-a “Hmangaihna A Reh Ngai Lo Vang!” tih International Inkhâwmpui, Inrinni program zawha chhûngkaw khat chunga thilthleng hi han ngaihtuah teh. Fa pathum  nei unaunu Tanya-i chuan, “Kan thlenna hotel pana kan haw laiin, kan motor chu motor dangin a rawn su a. Tu mah inhliam lo mah ila kan hlauthâwng hle a, motor aṭanga chhuakin kawng sîrah kan ding ta reng a. Râl leh lama awm tuemaw hian a motor-a chuang tûrin a kutin min rawn hui a. Ani pawh chu inkhâwmpui bâng hâwng kan unaute zînga mi a ni. Mahse, ani chauh chu min ngaihven tûra ding awmchhun a ni lo. Sweden ram aṭanga lo kal kan unau pangate pawh an awm a. Unaunute chuan kei leh ka fanu chu duat takin min pawm a, chu tak chu kan mamawh chu a ni! Kan ṭhat thu hrilh mah ila, anni chuan min kalsan mai lo. Damdawi lama ṭanpuitute an lo thlen hnuah pawh min la awmpui reng a, kan mamawh engkimah min ṭanpui a ni. Chutih hun chhûng zawng chuan Jehova hmangaihna dawng niin kan inhria. Chu kan thiltawn chuan unaute kan hmangaihna a tinghet a, Jehova kan hmangaihna leh a chunga kan lâwmna pawh a tipung lehzual a ni,” tiin a sawi. Ṭanpui i ngaih huna unau tuemawin i chunga hmangaihna a lantîr chu i hre chhuak thei em?

16. Hmangaihna inlantîr tawn tûrin eng chhan ṭhate nge kan neih?

¹⁶ Inhmangaih tawnna kan lantîr huna thilthleng hi han ngaihtuah teh. Kan unaute chu harsatna an tawh hunah kan thlamuan a. Pathian mite zînga inpumkhatna chu kan tinghet a. Isua zirtîrte kan nihzia kan finfiahin, thinlung ṭha pu mite chu biakna dika lo tel tûrin kan hîp a ni. A pawimawh ber chu, “khawngaihnate Pa leh thlamuanna zawng zawng Pathian,” Jehova kan chawimawi hi a ni. (2 Kor. 1:3) Chuvângin, kan za hian hmangaihna reh ngai lo i lantîr chhun zawm zêl ang u!