1. Lal Davida angin, kan zînga ṭhenkhatin eng zawhna nge an zawh mai theih?

KAN za hian thlamuang taka awm leh nun nuam tak neih chu kan duh ṭheuh va. Tu man lungkhamna neih kan duh lo. Mahse, a châng chuan lungkhamna kan nei thei a. Dik tak chuan, Jehova chhiahhlawhte ngei pawhin, Lal Davida angin: “Nilêngin ka thinlunga lungngaihna neiin, eng chen nge ka rilruah rem ka ruat ka ruat dâwn?” tiin Pathian Jehova hnênah an zâwt mai thei a ni.—Sâm 13:2.

2. He thuziakah hian eng nge kan sawiho vang?

² Lungkhamna neih loh hulhual chu thil theih ni lo mah se, engemaw chenin kan thunun thei a. He thuziakah hian lungkhamna min neihtîr theitu thil ṭhenkhat kan sawiho hmasa ang a. Chumi zawhah, harsatnate kan chinfel huna thlamuang taka min awmtîr theitu kawng rukte chu sawiho a ni bawk ang.

3. Eng lungkhamnate nge kan hmachhawn a, chûngte chu kan thunun thei em?

³ Lungkhamna min thlentu thil ṭhenkhat chu kan thunun thei meuh lo emaw, kan thunun thei lo hulhual emaw pawh a ni thei a. Entîr nân, ei leh in man te, silhfên man te, leh in luah mante kum tina a pun chhoh dân tûrte chu kan thunun thei lo va; kan hnathawhpuite leh kan school kalpuite’n thil dik lo ti tûr leh nungchang bawlhhlawhnaa inhnamhnawih tûra min thlêm zin dân tûr pawh kan thunun thei hek lo.  Chu bâkah, kan chheh vêla dân bawhchhiatnate chu kan ti tâwp thei lo bawk. Chutiang harsatnate kan hmachhawn chhan chu Bible thu bul ṭanchhana thu tlûkna siam lo mite hual vêla kan awm vâng a ni a. He khawvêl Pathian Setana chuan mi ṭhenkhatin “khawvêl lungkhamna” avângin Jehova rawngbâwl an bânsan dâwn tih a hria a ni. (Mt. 13:22; 1 Joh. 5:19) Chuvângin, buainaa he khawvêl a khat pawh hi a mak lo ve!

4. Kan buainate avânga a lutuka lungkhamna kan neih chuan eng thil nge thleng thei?

⁴ Thil dang eng mah ngaihtuah thei lo khawpin lungkhamna kan nei thei a. Entîr nân, kan mamawhte phuhhrûkna khawp thawh chhuah loh emaw, dam lohna avânga hnaa kal theih loh emaw, hna chân emaw chu kan hlau pawh a ni thei. Pathian dân bawhchhe tûra thlêm kan nih huna kan rinawm loh kan hlau pawh a ni thei bawk. Nakin lawkah, Setana chuan a thununna hnuaia awmte chu Pathian mite beih nâna a hman dâwn avângin, chu beihna lo chhân lêt dân tûr chungchâng kan lungkham pawh a ni thei bawk. ‘Chûng thilte lungkham chu a sual em?’ tiin kan ngaihtuah mai thei a ni.

5. Isua’n: “Lungkham suh u,” tia a sawi khân eng a tihna nge?

⁵ Isua’n a hnungzuitute hnêna: “Lungkham suh u,” tia a hrilh chu kan hria a. (Mt. 6:25) Chu chu eng thil pawh lo thleng se, lungkhamna nei lo tûrin min beisei tihna a ni em? Ni lo! Tihah chuan, hun kal tawha Jehova chhiahhlawh rinawmte pawhin lungkhamna an lo nei tawh ṭhîn a; mahse, Jehova chu an chungah a lâwm tho a ni. * (1 Lal. 19:4; Sâm 6:3) Dik tak chuan, lungkhamnain Pathian rawng kan bâwlnaa a ṭha lo zâwnga nghawng a neih loh nân, Isua chuan kan nun atâna a lutuka lungkhamna nei lo tûrin min duh a ni. A nih leh, lungkhamna thunun theih dân kawngte chu eng nge ni?—“ Chumi Atân Chuan,” tih bâwm chu en rawh.

6. Philippi 4:6, 7-a sawi angin, engin nge thlamuanna nei tûra min ṭanpui thei?

⁶ (1) Ṭawngṭai fo rawh. Rilru hahna nei Kristiante chuan tih tak zeta Jehova hnêna an ṭawngṭai hian rilru hahdamna an nei a. (1 Pet. 5:7) I ṭawngṭaina chhânna atân ‘Pathian thlamuanna, [mihring] rilru rêng rênga hriat sên loh’ chu i dawng thei a ni. (Philippi 4:6, 7 chhiar rawh.) Jehova chuan a thlarau thianghlim thiltithei tak hmangin chutiang thlamuanna chu a pe ang che.—Gal. 5:22.

7. Pathian hnêna kan ṭawngṭai hunah eng nge kan hriat reng ang?

⁷ Ṭawngṭaia Jehova i pan hunah i thinlung leih bua la, dîl bîk nei ang che. I harsatna tawhte leh chumi chungchânga i ngaih dânte chu hrilh la. Chinfel dân kawng a awm a nih chuan, chingfel thei tûrin finna leh chakna dîl ang che. I harsatna chu i chinfel theih piah lam a nih chuan, chumi avânga a lutuka lungkham lo tûrin Jehova hnênah a ṭanpuina dîl rawh. Ṭawngṭainaa dîl bîkte kan neih hian Jehova’n chûng kan ṭawngṭainate a chhân dân chu chiang lehzualin kan hmu ang. I ṭawngṭainate chhânna chu i hmu nghâl lo a nih pawhin, beidawng mai suh. Jehova chuan dîl bîk nei tûr chauh ni lovin, ṭhahnemngai taka ṭawngṭai fan fan tûr pawhin a duh che a ni.—Lk. 11:8-10.

8. Kan ṭawngṭainaah engte nge kan telh ang?

⁸ Ṭawngṭaia Jehova hnêna i lungkhamnate  i hrilh hunah lâwmthu sawinate pawh telh ṭhîn ang che. Dinhmun khirh tak hnuaia kan awm hunah pawh malsâwmna kan dawnte chhût chu a ṭha a ni. Rilrua awmte dik taka sawi chhuak tûrin ṭawngkam ṭha hman tûr i hriat loh hunah pawh Jehova chuan, ‘Khawngaihin min ṭanpui rawh,’ tia ṭawngṭaina mâwlmang tak pawh a chhâng ṭhîn a ni.—2 Chron. 18:31; Rom 8:26.

9. Inhumhimna dik tak chu engtin nge kan hmuh theih?

⁹ (2) Mahni finna ni lovin, Jehova finna rinchhan rawh. B.C.E. kum zabi pariatnaah khân, Juda mite chu Assuria sipaite’n beih an tum a. Anni chuan Assuria thununna hnuaia awm pumpelh an tumna lamah, milem betu Aigupta mite ṭanpuina an zawng a ni. (Is. 30:1, 2) Jehova chuan an kawng sual zawhin a tâwpah chhiatna a thlen dâwn tih a vaukhân a. (Is. 30:7, 12, 13) Isaia hmangin, mite chu inhumhimna dik tak an hmuh theih dân a hrilh a. Ani chuan: ‘Muang taka awm leh Pathian rinchhana awm chu in chakna a ni ang,’ tiin a sawi a ni.—Is. 30:15b.

10. Jehova kan rinchhanzia kan lantîr theihna dinhmun ṭhenkhat chu eng nge ni?

¹⁰ Jehova kan rinchhanzia engtin nge kan lantîr theih? Entîrna ṭhenkhat hi han ngaihtuah teh. I hun tam tak ei ral theitu leh i thlarau lam hun duante tibuai theitu hna ṭha tak thawk tûra sâwmna i dawng angah han inchan teh. A nih loh leh, i hnathawhnaah baptisma chang Pathian chhiahhlawh ni lo tuemawin a ngaizâwng che angah han inmitthla teh. A nih loh leh, i hmangaih tak i chhûngkaw zînga miin: “Kei nge i thlân dâwn i Pathian,” tia a zâwt che angah han inmitthla teh. Chûng dinhmunahte chuan thu tlûkna khirh tak i siam a ngai a; mahse, Jehova chuan i mamawh kaihhruaina chu a pe ang che. (Mt. 6:33; 10:37; 1 Kor. 7:39) Zawhna lo awm ta chu: Jehova chu rinchhanin, a kaihhruaina chu i zâwm ang em? tih hi a ni.

11. Dodâlna kan tawh hunah pawh muang taka awm thei tûrin Bible-a eng thute nge kan zir theih?

¹¹ (3) Entawn tûr ṭha leh ṭha lote aṭangin inzir rawh. Bible-ah hian muang taka awm leh Jehova rinchhan a hlutzia târ langtu thu tam tak a chuang a. Chûng thute i zir hian, dodâlna kârah pawh muang taka awm tûra Pathian chhiahhlawhte ṭanpuitu chu chhinchhiah ang che. Entîr nân, Juda supreme court-a rorêltute chuan tirhkohte chu thu hril tawh lo tûra an tih khân, anni chuan an hlau lo. Chu aiin, “Mihring thu aiin Pathian thu kan zâwm zâwk tûr a ni,” tiin huaisen takin an chhâng a ni. (Tirh. 5:29) Vuak an tawrh hnuah pawh, tirhkohte chu an mangang lo. Engvângin nge? Jehova’n a awmpui tih an hriat vâng a ni a. Ani chu an chungah a lâwm a. Chuvângin, chanchin ṭha chu an hril chhun zawm zêl a ni. (Tirh. 5:40-42) Chutiang bawkin, zirtîr Stephana’n thihna a hmachhawn khân, rilru thlamuang taka a awm avângin, “a hmêl chu vântirhkoh hmêl angin” an hmu a ni. (Tirh. 6:12-15) Engvângin nge? Jehova duhsakna a dawng tih a inhriat chian avângin.

12. Petera thawn khat 3:14-na leh 4:14-naa sawi angin, tihduhdah kan nih hunah pawh engvângin nge kan hlim theih?

¹² Tirhkohte chuan Jehova’n a awmpui tih finfiahna chiang tak an nei a. A pêk thilmak tihtheihna an nei a ni. (Tirh. 5:12-16; 6:8) Tûn laiah, chutiang thilmak tihtheihna chu kan dawng tawh lo. Chuti chung pawhin, a Thu hmangin Jehova chuan felna avânga harsatnate kan tawh hian kan chungah a lâwmin, a thlarau thianghlim hmangin min awmpui tih min hriat chiantîr a ni. (1 Petera 3:14; 4:14 chhiar rawh.) Chuvângin, nakin huna kan hmachhawn mai  theih tihduhdahnate kan chhân lêt dân tûr lo ngaihtuah aiin, Jehova min ṭanpui theihna leh min chhan chhuah theihna chunga rinna nei tûra kan tihtheihte chu kan ngaihven zâwk tûr a ni. Kristian hmasate ang bawkin, keini pawhin Isua thutiam hi kan ring tlat thei a ni: ‘In hmêlma zawng zawngin an dodâla an hnial theih lohna tûr kâ leh finna ka pe dâwn si che u a. In chhelin in nun in chhanhim ang,’ tih hi. (Lk. 21:12-19) Jehova chuan a tâna rinawm taka boral a chhiahhlawhte chanchin chu kimchang takin a chhinchhiah tih theihnghilh ngai suh u. Chumi hmang chuan anni chu a kaitho vang.

13. Muang taka awm lote leh Jehova rinchhan lote thiltawn ngaihtuahna chu engtin nge kan hlâwkpui theih?

¹³ Muang taka awm lote leh Pathian Jehova rinchhan lote thiltawn aṭang pawhin kan inzir thei a. An chanchin zirna chuan an thil sual tih ang ti ve lo tûrin min ṭanpui ang. Entîr nân, Juda Lal Asa chuan a lal ṭan tirh laia amah bei tûra sipai rual tam tak an lo kal khân Jehova a rinchhan a, Jehova chuan hnehna chantîrin mal a sâwm a ni. (2 Chro. 14:9-12) Mahse, a hnuah, sipai nei tlêm zâwk Israel Lal Baasa’n rawn beih an tum khân, Asa chuan tûn hmaa a tih ṭhin ang lo takin, tûn ṭumah chuan chhandamna atân Jehova a rinchhan lo va, Suria lal hnênah a sipaite ṭanpuina a hmuh theih nân thilpêkte a pe a. (2 Chro. 16:1-3) Chu bâkah, a nun tâwp dâwn lama thih ngama a dam loh pawh khân, Jehova ṭanpuina a rinchhan lo a ni.—2 Chro. 16:12.

14. Asa thil tihsual aṭangin eng nge kan zir theih?

¹⁴ A tîr chuan, Asa’n buainate a hmachhawn khân Jehova a rinchhan a. Mahse, a hnuah chuan Pathian hnênah ṭanpuina dîl aiin, mahnia thil chinfel chu a duh ta zâwk a ni. Han ngaihtuah mai chuan, Lal Asa’n Israel mite do tûra Suria mite hnêna ṭanpuina a dîl chu thil ṭha tak niin a lang mai thei. Mahse, a hlawhtlinna chuan rei a daih lo. Jehova chuan zâwlnei hmangin heti hian a hrilh a ni: “LALPA i Pathian ring lovin Suria lal i ring a; chuvângin, Suria lal sipai rualte chu i chhuah ta a ni,” tiin. (2 Chro. 16:7) Thil chinfel kan tum hunah, a Thu hmanga Jehova kaihhruaina zawng lo va, a lutuka mahni inrinchhan chu kan pumpelh tûr a ni. Thu tlûkna hmanhmawhthlâk tak siam a ngaih hunah pawh, Jehova kan rinchhan tlat chuan hlawhtling tûrin min ṭanpui ang.

15. Bible kan chhiar hunah eng nge kan tih theih?

¹⁵ (4) Bible chângte chu by-heart rawh. Muang taka awm leh Jehova rinchhan a pawimawhzia târ langtu Bible chângte i hmuh chuan chûngte chu by-heart tum ang che. Chûng Bible chângte chu a ri chhuaka chhiar, a nih loh leh ziah chhuah a, ennawn fo chu a ṭha hle tih kan hria a ni. Josua chu fing taka thil a tih theih nân, Dân bu chhiar ziah tûra thu pêk a ni a. Chûng hriatnawntîrnate chuan a dinhmun avânga a neih mai theih hlauhnate hneh tûrin a ṭanpui ang. (Jos. 1:8, 9) Lungkhamna leh hlauhna min neihtîr theitu dinhmun kan hmachhawn hunah pawh, Bible-a kan hmuh thute chuan rilru leh thinlunga thlamuanna nei tûrin min ṭanpui thei a ni.—Sâm 27:1-3; Thuf. 3:25, 26.

16. Jehova’n thlamuang taka awm a, amah kan rinchhan theih nân engtin nge Kristian unaute a hman?

¹⁶ (5) Pathian mite kâwm rawh. Jehova chuan muang taka awm tûr leh amah rinchhan tûra min ṭanpuitu atân Kristian unaute a hmang a. Inkhâwmahte chuan platform aṭanga kan dawn kaihhruaina te, unaute chhânna pêk te, leh unaute nêna mi tichak thei tak inkawmhona chu kan hlâwkpui a ni. (Heb. 10:24, 25) Kohhrana ṭhian rinchhan  tlâk takte hnêna kan rilru kan phawrh chhuah hian muanna nasa tak kan nei bawk. Ṭhian ṭha hnên aṭanga kan dawn “thu ṭha” chuan lungkhamna phurrit ata min chhâwk zângkhai thei a ni.—Thuf. 12:25.

17. Hebrai 6:19-a sawi angin, Lalram beiseina chuan dinhmun khirh tak kârah pawh engtin nge nghet taka awm tûra min ṭanpui theih?

¹⁷ (6) I beiseina tinghet tlat rawh. Kan Lalram beiseina chu ‘nunna thîrchakai’ ang a ni a, dinhmun khirh tak leh lungkhamna kârah pawh nghet taka awm tûrin min ṭanpui thei a ni. (Hebrai 6:19 chhiar rawh.) A thim zâwnga thlîrna awm tawh lohna tûr nakin hun chungchânga Jehova thutiam chu chhût ngun la. (Is. 65:17) Dinhmun khirh tak awm tawh lohna tûr remna khawvêl thara awm angin inmitthla ang che. (Mik. 4:4) I beiseina chu mi dangte hnêna i hrilh chuan a nghet telh telh ang. Thu hrilh leh zirtîr siam rawngbâwlnaah theih tâwp chhuah bawk ang che. Chutianga i tih chuan, ‘a tâwp thlengin beiseina famkim’ i nei thei ang.—Heb. 6:11.

18. Nakin hunah eng harsatnate nge kan hmachhawn mai theih a, chûngte chu engtin nge hlawhtling taka kan hmachhawn theih ang?

¹⁸ He khawvêl tâwpna kan hnaih zêl rual hian lungkhamna tizualtu dinhmun khirh tak takte chu kan hmachhawn zêl dâwn a. Kum 2021 atâna kum châng thlan chuan mahni chakna ni lo va, Jehova rinchhanna hmanga chûng harsatnate hmachhawn tûr leh thlamuang taka awm tûrin min ṭanpui thei a ni. Kumin chhûng hian: ‘Muang taka awm leh Pathian rinchhana awm chu in chakna a ni ang,’ tih Pathian Jehova thutiam kan rinzia chu thiltihin i lantîr ang u.—Is. 30:15.