1. Pathian hmangaihna chuan engtin nge a awmtîr che?

TIRHKOH Johana chuan “Pathian chu hmanngaihna a ni,” tiin a ziak a. (1 Joh. 4:8) Chu thusawi tluangtlam tak chuan nunna Hnâr, Pathian chu hmangaihna Hnâr pawh a ni tih thu dik chu min hriat chhuahtîr a ni. Jehova chuan min hmangaih a! A hmangaihna chuan himna, hlimna, leh lungawina min neihtîr a ni.

2. Matthaia 22:37-40-a sawi angin, thupêk ropui ber chu eng nge ni a, engvângin nge thupêk pahnihna zawm chu harsa kan tih mai theih?

² Kristiante tân hmanngaihna lantîr chu duhthlan theih thil a ni lo. Chu chu thupêk a ni. (Matthaia 22:37-40 chhiar rawh.) Jehova kan hriat chian hian thupêk hmasa zâwk zawm chu kan tân a awlsam thei a. Dik tak chuan, Pathian Jehova chu a ṭha famkim a; ani chuan hriatthiamna nei tak leh ngilnei takin min cheibâwl ṭhîn a ni. Mahse, thupêk pahnihna zawm chu harsa kan ti mai thei. Engvângin nge? Kan vêng hnai berte zînga mi tia sawi theih kan unaute chu an ṭhat famkim loh vâng a ni. A châng chuan an thusawi leh thiltihte chu ngaihsakna nei lo leh ngilnei lo tak angin kan ngai thei a. Pathian Jehova chuan chûng harsatnate chu kan hmachhawn dâwn tih a hriat avângin, Bible ziaktu ṭhenkhat chu kan inhmangaih tawn a ngaih chhan leh hmangaihna lantîr dân tûr chungchângah fuihna ṭhenkhat ziak tûrin thlarauvin a thâwk khûm a. Chûng Bible ziaktute zînga pakhat chu Johana a ni.—1 Joh. 3:11, 12.

3. Johana’n eng nge a sawi uar?

³ Johana chuan a lehkhathawnah Kristiante chuan hmangaihna an lantîr tûr a ni tih a sawi uar a. Dik tak chuan, Isua  nun kawng chanchin a ziahnaah Chanchin Ṭha ziaktu pathum dangte hman zât belhkhâwm aia tamin “hmangaihna,” tih ṭawngkam chu a hmang a ni. Johana chuan kum za dâwn lai a nihin, a hming chawi Chanchin Ṭha leh lehkhathawn pathum a ziak a. Chûng thlarauva thâwk khum thuziakte chuan Kristiante thiltih zawng zawng chu hmangaihnaa tih a ni tûr a ni tih a târ lang. (1 Joh. 4:10, 11) Mahse, chumi chungchâng hre chiang tûrin Johana chuan hun tam tak a mamawh a ni.

4. Johana chuan mi dangte chungah hmangaihna a lantîr reng em?

⁴ Johana chuan a vânglaiin hmangaihna a lantîr reng bîk lo. Entîr nân, ṭum khat chu Isua leh a zirtîrte chu Samari ram paltlangin Jerusalemah an kal a. Samari khuaa mi ṭhenkhat chuan anni chu khualchhâwn thiamna an lantîr duh lo va. Johana’n chu chu engtin nge a chhân lêt? Ani chuan vân aṭanga mei ko thla a, khuaa mi zawng zawngte kan raltîr vek tûrin Isua hnênah a ngên a ni. (Lk. 9:52-56) Ṭum dang lehah chuan tirhkoh dangte chungah hmangaihna a lantîr lo. A unaupa Jakoba nên Lalrama Isua bula nihna pawimawh tak chelh tûrin a nu an dîltîr niin a lang. Tirhkoh dangte chu Jakoba leh Johana thiltih an hriat chuan an lungni lo hle! (Mt. 20:20, 21, 24) Mahse, Johana’n chûng tlin lohna zawng zawng a nei chung pawhin, Isua’n ani chu a hmangaih a ni.—Joh. 21:7.

5. He thuziakah hian eng nge kan sawiho vang?

⁵ He thuziakah hian Johana entawn tûr siam leh hmangaihna chungchânga a thuziak ṭhenkhat kan sawiho vang a. Chutianga kan sawiho laiin, unaute chunga hmangaihna kan lantîr theih dân kan hria ang. Chu bâkah, chhûngkaw lû berin a chhûngte a hmangaih tih a târ lan theih dân kawng pawimawh tak pawh kan hre bawk ang.

6. Jehova’n min hmangaihzia engtin nge a lantîr?

⁶ Hmangaihna chu ṭawngkam ngilnei tak hmanga târ lan rilru vei zâwng niin kan ngai tlângpui a. Mahse, hmangaihna dik tak lantîr tûr chuan, thiltih a tel tûr a ni. (Jakoba 2:17, 26 nên khaikhin rawh.) Entîr nân, Jehova chuan min hmangaih a. (1 Joh. 4:19) Ani chuan Bible-a thu ṭha tak takte hmangin min hmangaihzia a lantîr a ni. (Sâm 25:10; Rom 8:38, 39) Mahse, Pathian min hmangaihna chu a thusawi aṭang chauh ni lovin, a thiltih aṭangin kan hria. Johana chuan: “Hemiah hian Pathian hmangaihna kan chungah a lo lang ta, amah avânga kan nun theihna tûrin Pathianin a Fapa neih chhun khawvêla a rawn tirhah hian,” tiin a ziak a. (1 Joh. 4:9) Jehova chuan a Fapa duh tak chu kan tân hrehawm  tuar a, a thih a phal a ni. (Joh. 3:16) Min hmangaihzia a va lang chiang tak êm!

7. Isua’n min hmangaihzia lantîr nân eng nge a tih?

⁷ Isua chuan a zirtîrte chu a hmangaih tih a hrilh a. (Joh. 13:1; 15:15) Ani chuan a zirtîrte mai bâkah keini pawh min hmangaih tak zet tih a thusawi chauh ni lovin, thiltihin a lantîr a ni. “Mihringin a ṭhian aia a nun a paih aliama hmangaihna nasa zâwk tu mân an nei lo,” tiin a sawi. (Joh. 15:13) Pathian Jehova leh Isua’n kan tâna an thiltihte kan ngaihtuah chuan eng nge tih kan duh ang?

8. Johana thawn khat 3:18 chuan eng ti tûrin nge min hrilh?

⁸ Jehova leh Isua kan hmangaihzia chu an thu kan âwihna hmangin kan lantîr a. (Joh. 14:15; 1 Joh. 5:3) Isua chuan a bîk takin inhmangaih tawn tûrin thu min pe a ni. (Joh. 13:34, 35) Kan unaute chungah ṭawngkam chauh ni lovin, thiltihin kan hmangaihzia kan lantîr tûr a ni. (1 Johana 3:18 chhiar rawh.) Anmahni kan hmangaihzia lantîr tûra a bîk taka kan tih theihte chu eng nge ni?

9. Hmangaihnain Johana chu eng ti tûrin nge a chêttîr?

⁹ Johana chuan a pa nên sangha mana an chhûngkaw sumdâwnnaah a thawk thei reng a. Mahse, chu aiin, Jehova leh Isua chungchâng thutak hre tûra mi dangte ṭanpuinaah a inpumpêk zâwk a ni. A nun kawng thlan chu thil awlsam a ni lo. Tihduhdahnate a tuar a, C.E. kum zabi khatna tâwp dâwn lam, kum upa tak a nih hunah pawh ram pâwna hnawhchhuah a ni. (Tirh. 3:1; 4:1-3; 5:18; Thup. 1:9) Isua chanchin a sawi avânga tân ina khung a ni chung pawhin, Johana chuan mi dangte a hmangaihzia a târ lang a. Entîr nân, Patmos thliarkâra a tân laiin, inlârna a dawn chu chhinchhiahin, kohhrana mite’n “thil lo awm lawk tûr thu” an hriat theih nân a thu hriatte chu ziakin an hnênah a thawn a ni. (Thup. 1:1) Chumi hnua Patmos thliarkâr aṭanga a chhuah chuan Isua nun leh rawngbâwlna chungchânga a hming chawi Chanchin Ṭha chu a ziak a. A unaute fuih nân leh tihchak nân lehkhathawn pathum pawh a ziak bawk. Engtin nge mahni hmasial lo Johana nun kawng chu kan entawn theih?

10. Mite i hmangaih tih engtin nge i lantîr theih?

¹⁰ I nun kawng thlan hmangin mite i hmangaihzia i lantîr thei a. Setana khawvêl chuan i hun leh tha zawng zawng chu mahni tân chauhva hmang tûr leh sum zawng tûr emaw, hmingthan tum tûr emawin a duh che a. Mahse, mahni hmasialna nei lo Lalram chanchin puangchhuaktute chuan an hun neih zawng zawng chu ram chanchin ṭha hrilh nân an hmang a, mite chu Pathian Jehova hnaih tûrin an ṭanpui a ni. Ṭhenkhat phei chu hunbi kima thu hriltu leh zirtîrtu an ni thei hial a ni.

11. Thuchhuahtu rinawm tam tak chuan an unaute an hmangaihzia engtin nge an lantîr?

¹¹ Kristian rinawm tam tak chuan mahni leh chhûngte an châwm theih nân khawvêlah hunbi kima hna an thawh a ngai a. Chutichung pawhin, chûng thuchhuahtu rinawmte chuan Pathian inawpna pâwl chu theih tâwp chhuahin an thlâwp a ni. Entîr nân, unau ṭhenkhat chuan leilung chhiatna tâwkte chhawmdâwlnaah an ṭanpui a, mi dangte chuan in sakna lamahte an thawk a, mi tinte chuan khawvêl pum huap rawngbâwlna atân thawhlâwmte an thawh bawk. Chûngte chu Pathian leh an mihringpuite an hmangaih vânga ti an ni. Chawlhkâr tinin kohhran inkhâwmahte tel a, chhânna pêkna hmangin kan unaute kan hmangaihzia kan lantîr a. Chau hle mah ila, chûng inkhâwmahte chuan kan tel hrâm hrâm a ni. Zâm hle mah ila,  chhânnate kan pe a. Harsatna nei ṭheuh mah ila, inkhâwm ṭan hma leh inkhâwm bânah unaute kan fuih ṭhîn a ni. (Heb. 10:24, 25) Kan unau duh takte thiltih avângin kan va lâwm tak êm!

12. Johana’n a unaute a hmangaihzia a lantîr dân kawng dang chu eng nge ni?

¹² Johana chuan a unaute chu a fak mai ni lovin, an hnênah fuihna ṭha tak pein a hmangaihzia a lantîr a. Entîr nân, a lehkhathawnah a unaute chu an rinna leh an hnathawh ṭhat avângin a fak a, thilsual tih chungchângah zilhna khauh tak a pe bawk. (1 Joh. 1:8–2:1, 13, 14) Chutiang bawkin, kan unaute chu an thiltih ṭhat avângin kan fak tûr a ni. Mahse, unau tuemawin rilru put hmang ṭha lo emaw, chîn dân ṭha lo emaw a nei a nih chuan a hriat ngaite chu fing thiam taka hrilhin hmangaihna kan lantîr thei a. Ṭhiante hnêna zilhna pe tûr chuan huaisen a ngai a; mahse, Bible chuan ṭhian dik takte chu an intihriam tawnin, an intichak tawn tih a sawi a ni.—Thuf. 27:17.

13. Eng tih nge kan pumpelh ang?

¹³ A châng chuan thil engemaw kan tih lohna hmangin kan unaute kan hmangaihzia kan lantîr a. Entîr nân, an thusawite avângin awlsam taka lungni lovin kan awm lo. Leia Isua nun tâwp dâwn lama thilthlengte kha han ngaihtuah teh. Ani chuan a zirtîrte hnênah nunna an neih theih nân a taksa an ei a, a thisen an in a ngai tih a hrilh a. (Joh. 6:53-57) Chu a thusawi chu zirtîr tam takte tân pawm a harsat êm avângin amah an kalsan a; mahse, Johana pawh tiamin, a ṭhian dik takte chuan an kalsan lo. Isua chungah an rinawm tlat a ni. Isua sawite an hre thiam lovin, mak an ti hle pawh a ni thei. Mahse, Isua ṭhian rinawmte chuan a thusawite chu dik lo nia ngaiin, lungnih loh nân an hmang lo. Chu aiin, thutak a sawi tih hriain an ring tlat zâwk a ni. (Joh. 6:60, 66-69) Kan ṭhiante thusawi avânga lungnih lohna neih nghâl mai loh chu a va pawimawh tak êm! Chu aiin, an sawi tumte min hrilhfiah theihna hun remchâng kan pe zâwk tûr a ni.—Thuf. 18:13; Thur. 7:9.

14. Engvângin nge kan unaute kan huat loh vang?

¹⁴ Johana chuan kan unaute haw lo tûrin min fuih bawk. Chu fuihna kan ngaihthah chuan Setana’n min thunun thei a ni. (1 Joh. 2:11; 3:15) Chutiang chu C.E. kum zabi khatna tâwp lamah mi ṭhenkhat chungah a thleng a. Setana chuan Pathian mite zîngah inhuatna leh inṭhen darhna a awm  theih nân a tih theih apiang a ti a. Johana’n a lehkhathawn a ziah lai chuan, Setana rilru put hmang ang nei mi ṭhenkhat chu kohhran chhûngah an lo lût tawh a ni. Entîr nân, Diotrepha chu kohhran pakhata inṭhen darhna awmtîrtu a ni a. (3 Joh. 9, 10) Ani chuan governing body aiawha kohhran tlawha zin kual upate chu a zah lo va. A mi ngainat lohte chunga khualchhâwn thiamna lantîrtute chu kohhran aṭangin a hnawt chhuak hial a ni. A va chapothlâk tak êm! Setana chuan tûn thlengin, Pathian mite ṭhen darh a, thunun chu a la tum reng a. Inhuatnain unaute nêna min ṭhen hran chu i phal ngai lo vang u.

15. Chhûngkaw lû ber chuan eng nge a hriat reng ang?

¹⁵ Chhûngkaw lû berin a chhûngte a hmangaih tih a târ lan theih dân kawng pawimawh tak pakhat chu an tisa lam mamawhte phuhhrûksak hi a ni a. (1 Tim. 5:8) Mahse, a pawimawh zâwk chu an thlarau lam mamawh phuhhrûksak hi a ni tih a hre reng tûr a ni. (Mt. 5:3) Chhûngkaw lû berte tâna Isua entawn tûr siam hi chhinchhiah ang che. Johana ziak Chanchin Ṭha-a chhinchhiah angin, nghaisakna bana a thih dâwn pawh khân Isua chuan a chhûngte a la ngaihtuah reng a. Johana chu Isua an tihhlumna hmunah Isua nu Mari nên an ding a. Nasa taka na a tuar chung pawhin, Isua chuan Johana chu Mari enkawl tûrin a hrilh a ni. (Joh. 19:26, 27) Isua chuan Mari enkawltu tûr tisa lama unaute a nei ngei ang; mahse, chutih hun lai chuan anni chu a zirtîrte an la ni lo niin a lang. Chuvângin, a nu chuan tisa lam leh thlarau lama ngaihsaktu tûr a nei tih chian chu a duh a ni.

16. Johana’n eng mawhphurhnate nge a neih?

¹⁶ Johana chuan mawhphurhna tam tak a nei a. Tirhkohte zînga mi a nih angin, thu hrilh rawngbâwlnaah hma a hruai a. Nupui nei a nih a rinawm a, chutiang a nih chuan a chhûngte tisa lam leh thlarau lam mamawhte phuhru tûrin inbûk tâwk taka thil a tih a ngai ang. (1 Kor. 9:5) Tûn laia chhûngkaw lûte tâna zîr tûr chu eng nge ni?

17. Chhûngkaw lû ber tân a chhûngte thlarau lam mamawh phuhhrûksak chu engvângin nge thil pawimawh tak a nih?

¹⁷ Chhûngkaw lû unaupa chuan mawhphurhna tam tak a nei mai thei a. Entîr nân, a hnathawhna hmunah Jehova chawimawi a nih theih nân ṭhahnemngai taka hna a thawh a ngai a. (Eph. 6:5-8; Tit. 2:9, 10) Chu  bâkah, ani chuan kohhranah berâm tlawhnate leh thu hrilh rawngbâwlna kaihhruaina ang chi mawhphurhnate a nei thei a ni. Chutih rualin, a nupui fanaute nêna Bible zirna neih ziah chu thil pawimawh tak a ni bawk. Chutianga a tih chuan, a chhûngte chuan an tisa lam, rilru lam, leh thlarau lama hrisêl taka an awm theih nâna theih tâwp a chhuahna chu an ngaihlu tak zet ang.—Eph. 5:28, 29; 6:4.

18. Johana’n eng nge a rin tlat?

¹⁸ Johana chuan kum rei tak a dam avângin thiltawn a ngah hle a. Ani chuan a rinna tichau thei dinhmun khirh tak takte a hmachhawn bawk. Mahse, a unaute hmangaih tûra thupêk pawh tiamin, Isua thupêkte chu theih tâwp chhuahin a zâwm reng a ni. Chuvângin, Jehova leh Isua’n ani chu an hmangaihin, fiahna eng pawh tuar chhuak thei tûrin chakna an pe ang tih a ring tlat a ni. (Joh. 14:15-17; 15:10; 1 Joh. 4:16) Setana leh a khawvêl chuan Johana chu a thusawi leh thiltiha a unaute chunga hmangaihna lantîr lo tûrin an dang thei lo.

19. Johana thawn khat 4:7 chuan eng ti tûrin nge min fuih a, engvângin nge?

¹⁹ Johana ang bawkin, huatnaa khat he khawvêl pathian Setana thununna khawvêlah kan awm a. (1 Joh. 3:1, 10) Ani chuan kan unaute hmangaih lo tûrin min duh mah se, kan remtihna tel lo chuan chutiang thil chu a thleng thei lo. Chuvângin, unaute kan hmangaihzia chu kan thusawi leh thiltihte hmanga lantîr zêl i tum tlat ang u. Chutianga kan tih chuan Jehova chhûngkaw zînga kan tel ve avânga lungâwina kan nei ang a, hlimna nasa tak kan nei bawk ang.—1 Johana 4:7 chhiar rawh.