1-2. (a) Eng hunah nge kan hmangaih tak thi tawhte chu a bîk taka kan hriat chhuah lehzual ṭhin? (b) Isua’n a thih hma zân khân eng nge a hmêlhriattîr?

KAN hmangaih takte thihna chu engtiang khawpa rei pawh ni tawh mah se, anni chu kan la hre reng a. An thih champhaahte chuan a bîk takin kan hre chhuak lehzual ṭhîn.

² Kan hmangaih tak Isua Krista thih champha a thlen apiang hian chumi atâna khawvêl pum huapa inhmukhâwm mi maktaduai tam tak zîngah kan tel ve a. (1 Pet. 1:8) Sual leh thihna ata min chhan chhuak tûra tlanna atâna a nun petu hre reng tûrin kan kal khâwm a ni. (Mt. 20:28) Dik tak chuan, Isua chuan a hnungzuitute chu a thihna hre reng tûrin a duh a. A thih hma zân khân, zanriah pawimawh tak hmêlhriattîrin, “Mi hriat reng nân hei hi ti ṭhîn rawh u,” tiin thu a pe a ni.—Lk. 22:19.

3. He thuziakah hian eng nge kan sawiho vang?

³ Krista thih Hriatrengnaa telte zînga mi tlêm tête chuan vân lam beiseina an nei a. Mahse, lei lam beiseina nei mi maktaduai tam takte pawh chu Hriatrengna inkhâwmah chuan an tel ve a ni. He thuziakah hian, chûng pâwl pahnihte’n kum tina neih Hriatrengna inkhâwma tel an châk chhante kan sawiho vang a. Chu inkhâwma telna kan hlâwkpui dânte pawh kan enho bawk ang. Chu inkhâwma hriak thihte an tel chhan ṭhenkhat chu i lo sawiho hmasa ang u.

4. Engvângin nge hriak thihte chuan Hriatrengna inkhâwmah chhang leh uain an kîl?

⁴ Kum tin hian, hriak thihte chuan Hriatrengna inkhâwma chhang leh uain kîltute anga tel chu an nghâkhlel hle ṭhîn a ni. Engvângin nge chhang leh uain an kîl chu inâwm tak a nih? Chu zawhna chhân nân, Isua lei lam nun tâwp zâna thilthleng kha han ngaihtuah teh. Kalhlên Kût chaw an ei zawh hnu chuan, Isua’n Lalpa Zanriah tia kan hriat chu a hmêlhriattîr a. Chhang leh uain chu a tirhkoh rinawm 11 hnênah pein, ei a, in tûrin a hrilh a. Tichuan, an hnênah thuthlung pahnih—thuthlung thar leh Lalram thuthlung chu a hrilh a ni. * (Lk. 22:19, 20, 28-30) Chûng thuthlungte chuan tirhkohte leh mi tlêm tête chu vâna lalte leh puithiamte nih theihna kawng a hawnsak a ni. (Thup. 5:10; 14:1) Chûng thuthlung pahniha tel hriak thih a la bângte * chauhvin Hriatrengna inkhâwmah chhang leh uain an kîl thei a ni.

5. Hriak thihte chuan an beiseina chungchângah eng nge an hriat?

⁵ Hriatrengna inkhâwma hriak thihte an tel châk chhan dang pawh a awm a: Chu inkhâwm chuan an beiseina ngaihtuahna hun remchâng a neihtîr vâng a ni. Jehova chuan anni chu chawimawi tawh Isua Krista leh mi 1,44,000 zînga mi dangte ruala rawngbâwl tûr leh A hma ngeia rawngbâwl tûrin, vâna thih theih lohna leh ṭawih theih lohna nun beiseina ropui tak a pe a ni. (1 Kor. 15:51-53; 1 Joh. 3:2) Hriak thihte chuan vâna chutiang chanvo hlu chelh tûra sâwm an ni tih an inhria a. Mahse, vâna lâwn tûr chuan, thih thlenga an rinawm a ngai a ni. (2 Tim. 4:7, 8) Chu Hriatrengna inkhâwm chuan hriak thihte chu an vân lam beiseina ngaihtuahna hun remchâng hlimawm tak a neihtîr a ni. (Tit. 2:13) A nih chuan, “berâm dang” chungchâng hi eng nge ni ve? (Joh. 10:16) Hriatrengna inkhâwma an tel chhan ṭhenkhat chu engte nge ni?

6. Engvângin nge berâm dangte chu Hriatrengna inkhâwmah kum tina an tel?

⁶ Berâm dangte chu Hriatrengna inkhâwmah chuan kîltute ang ni lovin, lo thlîrtute angin an tel a ni. Kum 1938 khân, chûng lei lam beiseina neite chu Hriatrengna inkhâwma tel tûra a hmasa ber atâna sâwm a ni a. Vênnainsâng, March 1, 1938 chhuak chuan: “Chu inkhâwma [berâm dangte] an tel a, an lo thlîr chu a dikin a inâwm hle a. . . . Chu hun chu an tân pawh hlimna hun a ni tûr a ni,” tiin a sawi. Inneihnaa lo thlîrtute anga tel tûra sâwmte chu an hlim ang bâwkin, berâm dangte pawh Hriatrengna inkhâwma lo thlîrtute anga an telh theih avângin an hlim hle a ni.

7. Engvângin nge berâm dangte chuan Hriatrengna inkhâwma thusawi chu ngaihthlâk an châk?

⁷ Berâm dangte pawhin an beiseina ngaihtuahna hun remchâng an nei a. Anni chuan Hriatrengna inkhâwma thusawiin Krista leh a rorêlpui tûr mi 1,44,000 te’n Kum Sâng Rorêl chhûnga mi rinawmte tâna an tihsak tûr chungchâng tam tak a târ lan ṭhin avângin, chu thusawi chu ngaihthlâk an châk thei hle a ni. Lal Isua Krista rorêlna hnuaiah, chûng vân lam rorêltute chuan lei chu paradis-a chantîr tûr leh thuâwih mihringte chu ṭhat famkimnaa hlângkai tûrin an ṭanpui ang. Hriatrengna inkhâwma lo thlîrtute  anga tel mi maktaduai tam takte tân Isaia 35:5, 6; 65:21-23; leh Thu Puan 21:3, 4 ang chi Bible hrilh lâwknate thlen famkim hun tûr lo mitthla chu phûrawm tak a ni. Chu khawvêl thara an hmangaih takte nêna awm anga an inmitthlana chuan nakin hun atâna an beiseina leh Jehova rawngbâwl bânsan ngai lo tûra an tum ruhna chu an tinghet lehzual a ni.—Mt. 24:13; Gal. 6:9.

8. Hriatrengna inkhâwma berâm dangte an tel chhan dang leh chu eng nge ni?

⁸ Hriatrengna inkhâwma berâm dangte an tel chhan dang leh hi han ngaihtuah teh. Anni chuan hriak thihte an hmangaihzia leh an thlâwpzia lantîr an duh a. Bible chuan hriak thihte leh lei lam beiseina neite chuan inlaichînna ṭha tak an neih tûr thu a sawi lâwk a ni. Engtin nge? Entîrna tlêm azâwng i lo sawiho vang u.

9. Zakaria 8:23-a chhinchhiah hrilh lâwkna chuan hriak thihte chunga berâm dangte rilru put hmang eng nge a târ lan?

⁹ Zakaria 8:23 chhiar rawh. He hrilh lâwkna hian hriak thih an unaute chunga berâm dangte rilru put hmang chu mawi takin a târ lang a. “Juda” tih leh “i hnênah” tih ṭawngkam hian pâwl khat—hriak thih a la bângte a kâwk a. (Rom 2:28, 29) “Mi sâwm, hnam ze tinrêng aṭanga lo chhuakte” chuan berâm dangte a kâwk a ni. Anni chuan hriak thihte chu “an vuanin an chelh” tlat a, chu chu biakna thianghlimah anni chu an thlâwp tlat tihna a ni. A tak takah pawh, Hriatrengna zânah, berâm dangte chuan hriak thihte ruala telin, anmahni an thlâwp tlatzia an lantîr a ni.   

10. Jehova’n Ezekiela 37:15-19, 24, 25-a kan hmuh hrilh lâwkna thleng famkim tûrin eng nge a tih?

¹⁰ Ezekiela 37:15-19, 24, 25 chhiar rawh. He hrilh lâwkna thlen famkimnaah, Jehova chuan hriak thihte leh berâm dangte chu tihchhiat rual loh inpumkhatna a neihtîr a ni. Hrilh lâwkna chuan tiang pahnih chungchâng a sawi a. Vân lam beiseina neite chu “Juda” (Israel lalte thlan chhuahna hnam) tiang ang an ni a, lei lam beiseina neite chu “Ephraim” tiang ang an ni. * Jehova chuan chu pâwl hnih chu ‘tiang pakhat’ ang an lo nih theih nân a inpumkhattîr ang. Chu chu Lal pakhat, Krista Isua hnuaiah inlungrual takin rawng an bâwl ang tihna a ni. Kum tin hian, hriak thihte leh berâm dangte chu a hranga awm pâwl hnih ang ni lovin, “vêngtu pakhat” hnuaia ‘pâwl khat angin’ Hriatrengna inkhâwmah an tel a ni.—Joh. 10:16.

11. Engtin nge Matthaia 25:31-36, 40-a târ lan “berâmte” chuan Krista unaute an thlâwpzia an lantîr?

¹¹ Matthaia 25:31-36, 40 chhiar rawh. He tehkhin thua “berâmte” hian tâwpna huna lei lam beiseina nei mi felte—berâm dangte a entîr a. Anni chuan hriak thih Krista unau a la bângte chu khawvêl pum huap thu hrilh leh zirtîr siam rawngbâwlna chanvo pawimawh tak hlen chhuahnaa ṭanpuiin, rinawm takin an thlâwp a ni.—Mt. 24:14; 28:19, 20.

12-13. Berâm dangte’n Krista unaute an thlâwpzia an lantîr dân kawng ṭhenkhat chu engte nge ni?

¹² Kum tin hian, Hriatrengna thlen hma chawlhkârahte chuan, berâm dangte chuan Hriatrengna inkhâwma tuina neite lo tel tûra khawvêl pum huap thu hrilh beihpui thlâknaah theih tâwp chhuaha telin Krista unaute an thlâwpzia an lantîr a. (“ Hriatrengna Hun Chhûng Atân Ruahmanna I Siam Lâwk Em?” tih bâwm chu en rawh.) Chu bâkah, kohhran a tam zâwkah kîltute an awm lo chung pawhin, anni chuan khawvêl pum huapa kohhran tinah Hriatrengna inkhâwm neih a nih theih  nân, ruahmanna siam ngai zawng zawngte thawkin an ṭanpui a ni. Berâm dangte chu chutiang kawnga Krista unaute an ṭanpui thei chu an lâwm hle a. Anni chuan hriak thih unaute tâna an tihsakte chu Isua’n ama tâna tihsak angin a thlîr tih an hria a ni.—Mt. 25:37-40.

¹³ Kan beiseina chu a eng zâwk pawh ni se, kan zaa Hriatrengna inkhâwma kan tel chhan dang leh chu engte nge ni?

14. Engtin nge Jehova leh Isua’n kan tân hmangaihna nasa tak an lantîr?

¹⁴ Jehova leh Isua’n kan chunga an lantîr hmangaihna avângin kan lâwm hle. Jehova chuan kawng tam takin kan chungah hmangaihna a lantîr a, chûng zînga pakhat chu a dang zawng aiin a langsâr bîk hle a ni. Kan Pathian chuan mahni hmasialna tel lo hmangaihna avânga a Fapa duh tak chu kan aia hrehawm tuara thi tûra rawn tîrin hmangaihna sâng ber a lantîr a. (Joh. 3:16) Isua pawhin kan tâna inhuam taka a nun pein, hmangaihna nasa tak a lantîr tih kan hre bawk. (Joh. 15:13) Jehova leh Isua’n kan chunga an lantîr hmangaihna chu kan rûl sêng ngai lo vang. Mahse, nî tina kan nun dânah kan lâwmzia kan lantîr thei a. (Kol. 3:15) Chu bâkah, min hmangaihzia kan hriat reng theih nân leh kan hmangaihzia kan lantîr theih nân Hriatrengna inkhâwmah kan tel a ni.

15. Engvângin nge hriak thihte leh berâm dangte chuan tlanna thilthlâwnpêk chu an ngaihhlut êm êm?

¹⁵ Tlanna thilthlâwnpêk chu kan ngaihlu tak zet. (Mt. 20:28) Hriak thihte chuan beiseina ropui tak neihtîrtu tlanna chu an ngaihlu hle a. Krista inthawinaa rinna an neih avângin, Jehova’n anni chu mi fel nia puangin, a fate angin a la a ni. (Rom 5:1; 8:15-17, 23) Berâm dangte pawh tlanna avângin an lâwm hle a. Krista thisena rinna an lantîr avângin, Pathian hmaah dinhmun thianghlim tak an nei a, Pathian tân rawngbâwlna thianghlim an hlân theiin, “hrehawm nasa tak ata” dam khawchhuah beiseina an nei a ni. (Thup. 7:13-15) Hriak thihte leh berâm dangte’n tlanna avânga an lâwmzia an lantîr dân kawng khat chu Hriatrengna inkhâwma kum tina tel hi a ni.

16. Hriatrengna inkhâwma kan tel chhan dang leh chu eng nge ni?

¹⁶ Hriatrengna inkhâwma kan tel chhan dang leh chu Isua thu kan âwih duh vâng a ni. Nakin hun atâna kan beisei chu a eng zâwk pawh ni se, Isua’n Hriatrengna inkhâwm a hmêlhriattîr zâna he a thupêk: “Mi hriat reng nân hei hi ti ṭhîn rawh u,” tih hi a mi mal takin kan ngai pawimawh a ni.—1 Kor. 11:23, 24.

17. Engtin nge Hriatrengna inkhâwm chuan Jehova hnaih lehzual tûra min ṭanpui?

¹⁷ Jehova kan hnaih lehzual. (Jak. 4:8) Kan hriat tawh angin, Hriatrengna inkhâwm chuan Jehova min pêk beiseina ngaihtuahna hun remchâng leh kan chunga a lantîr hmangaihna ropui tak chhût ngunna hun remchâng min neihtîr a. (Jer. 29:11; 1 Joh. 4:8-10) Nakin hun atâna kan beiseina chiang tak leh kan tâna Pathian hmangaihna chuai thei lo kan ngaihtuah hian Jehova kan hmangaihna a thûk lehzualin, amah nêna kan inlaichînna a nghet lehzual a ni.—Rom 8:38, 39.

18. Isua entawn tûr siamte chhût ngunna chuan eng ti tûrin nge min chêttîr?

¹⁸ Isua entawn tûr siam zui tûrin min chêttîr. (1 Pet. 2:21) Hriatrengna inkhâwm thlen hma nîahte chuan, Isua leia a awm laia a chawlhkâr hman hnuhnûng ber te, a thihna te, leh a  thawhlehna chungchânga Bible sawite chu kan ngaihven lehzual a. Tichuan, Hriatrengna zâna thusawi chuan Isua min hmangaihzia min hriat chhuahtîr a ni. (Eph. 5:2; 1 Joh. 3:16) Mahni hmasial lohna kawnga Isua entawn tûr siamte kan chhiar a, kan chhût ngun hian ‘ama awm ang bawka awm ve tûra’ chêttîrin kan awm a ni.—1 Joh. 2:6.

19. Engtin nge Pathian hmangaihnaa kan awm reng theih?

¹⁹ Pathian hmangaihnaa awm reng kan tumna chu a tinghet lehzual. (Jud. 20, 21) Pathian thuâwih tûr te, a hming tithianghlim tûr te, leh a thinlung tilâwm tûrtea theih tâwp chhuahna hmangin, Pathian hmangaihnaah kan awm reng a ni. (Thuf. 27:11; Mt. 6:9; 1 Joh. 5:3) Hriatrengna inkhâwm chuan Jehova hnênah, ‘I hmangaihnaah chatuana awm reng ka duh,’ tia sawi ang maia kan nî tin nun hman tum tlat tûrin min chêttîr a ni.

20. Hriatrengna inkhâwma telna tûr chhan ṭha tak kan neihte chu eng nge ni?

²⁰ Kan beisei chu vâna chatuana nun emaw, leia chatuana nun emaw pawh ni se, Hriatrengna inkhâwma telna tûr chhan ṭha takte kan nei a. Kum tina chumi nîa kan inhmuhkhâwm hian, kan hmangaih tak Isua Krista thihna chu kan hre reng tih kan lantîr a ni. A pawimawh ber chu, Jehova’n tlanna atâna a Fapa min pein, kan chungah hmangaihna ropui ber a lantîr tih kan hre reng hi a ni. Kumin hian, Hriatrengna chu kum 2022, April 15, Zirtâwp tlaiah neih a ni ang. Jehova leh a Fapa chu kan hmangaih a ni. Chuvângin, Isua thih champhaa Hriatrengna inkhâwma tel aia pawimawh zâwk thil dang a awm thei dâwn em ni?