1-2. Baptisma kan chan hnua kan tih chhunzawm zêl tûr chu eng nge ni? Hrilhfiah rawh.

 ENG anga zingin nge i in i tihfai ṭhin? I luah luh hmain uluk takin i tifai hmasa ngei ang a. Mahse, i tifai chhunzawm tawh lo a nih chuan, engtin nge ni ang? Kan hriat ṭheuh angin, a bâl leh thuai ang. I in chu felfai taka dah reng tûr chuan i tihthianghlim ziah a ngai a ni.

² Chutiang chiah chuan kan ngaihtuahna leh kan mizia pawh kan siam ṭha reng tûr a ni. Ni e, baptisma kan chan hma chuan ‘tisa leh thlarau bawlhhlawhna zawng zawnga intifai’ tûra a ṭûl anga kan nun thlâk danglam tûrin theih tâwp kan chhuah a. (2 Kor. 7:1) Tûnah erawh chuan tirhkoh Paula fuihna “a tharin lo awm [“zawm zêl,” NWT] ula,” tih hi kan zawm a ngai a ni. (Eph. 4:23) Engvângin nge kan insiam ṭhat chhunzawm zêl ang? A chhan chu he khawvêl thununna hian Jehova hmaah awlsam taka min tihbawlhhlawh theih vâng a ni. Khawvêl thununna pumpelh tûr leh Jehova tilâwm reng tûr chuan, kan ngaihtuahna te, kan mizia te, leh kan duh zâwngte kan bih chiang ziah tûr a ni.

3. ‘In rilru a thara awm’ tih awmzia chu eng nge ni? (Rom 12:2)

³ Kan rilru a thara awm—kan ngaihtuahnate thlâk—tûra kan tih ngai chu eng nge ni? (Rom 12:2 chhiar rawh.) Grik ṭawngkam  “in rilru a thara awmin” tia lehlin hi “in rilru chei thar” tia sawi theih a ni a. Chuvângin, thil ṭha tlêm azâwng chauhvin kan nun hi kan chei thar thei lo. Chu aiin, chhûngrilah eng ang mi nge kan nih tih inbih chiangin, Jehova tehnate mila a ṭha thei ang bera kan nun theih nân a ṭûl angin kan insiamrem tûr a ni. Chu chu vawi khat chauh ni lovin, kan tichhunzawm zêl tûr a ni bawk.

4. Engtin nge he khawvêlin kan ngaihtuahna a thunun tûr chu kan pumpelh theih ang?

⁴ Kan ṭhat famkim hunah chuan kawng engkimah Jehova kan tilâwm thei tawh ang. Chumi hun a lo thlen hma chuan, Jehova tilâwm tûrin theih tâwp kan chhuah zawm zêl a ngai a ni. Tirhkoh Paula’n Rom 12:2-a kan rilru a thara awmtîr leh Pathian duh zâwng hriat a thlunzawm dân hi lo chhinchhiah ang che. He khawvêl thununa awm aiin, kan thiltum leh thu tlûknate chu—khawvêl ni lovin—Pathian ngaihtuah dân engtiang khawpin nge kan thununtîr tih hre tûrin kan inbih chiang hmasa zâwk tûr a ni.

5. Jehova nî a hnaih tawhzia chungchânga kan ngaihtuahna chu engtin nge kan bih chian theih? (Milem en rawh.)

⁵ Entîrna pakhat lo ngaihtuah ta ila. Jehova chuan, “Pathian nî lo thlen hun tûr chu” ngaihtuah tlat tûrin min duh a. (2 Pet. 3:11, 12) Heti hian inzâwt rawh: ‘Ka nun dânin he kalhmang tâwpna a hnaih tawhzia ka hre thiam tih a târ lang em? Zirna leh hna chungchânga ka thu tlûkna siamte’n ka nunah Jehova rawngbâwl ka dah pawimawh ber tih a târ lang em? Jehova’n kei leh ka chhûngte mamawh min pe ang tih ka ring em, nge ni a tisa lam thilte ka ngaihtuah reng zâwk?’ tiin. A duh zâwng angin kan nung tih a hmuh huna Jehova lâwm dân tûr chu han ngaihtuah teh.—Mt. 6:25-27, 33; Phil. 4:12, 13.

6. Eng thil nge kan tih chhunzawm zêl ang?

 ⁶ Kan ngaihtuahna kan bih chian reng leh chumi mila a ṭûl anga kan inthlâkthleng a ngai a. Tirhkoh Paula’n Korinth khuaa mite chu: “Rinnaah chuan in awm emaw, nangmahni ngei inchhin ṭhîn ula,” tiin a hrilh a ni. (2 Kor. 13:5) ‘Rinnaa’ awmnaah chuan Kristian inkhâwmnaa tel leh eng emaw chânga rawngbâwlnaa chhuah mai aia tam a tel a. Chutah chuan kan ngaihtuahna te, kan châk zâwng te, leh min chêttîrtute pawh a tel bawk. Chuvângin, Pathian Thu chhiar te, Pathian ngaihtuah dân anga ngaihtuah te, leh Jehova tilâwm tûra kan tih ngai apiangte tiin kan rilru kan tihthar reng a ngai a ni.—1 Kor. 2:14-16.

7. Ephesi 4:31, 32-in a sawi angin, eng thil dangte nge kan tih ngai a, chu chu engvângin nge a harsat mai theih?

⁷ Ephesi 4:31, 32 chhiar rawh. Kan ngaihtuahna kan thlâk danglam mai bâkah, ‘mihring thara kan inthuam’ a ngai a. (Eph. 4:24) Chutianga ti tûr chuan kan thawkrim tûr a ni. Entîr nân, khâkna te, tauhna te, thinurnate ang chi mize ṭha lote paih bo tûra theih tâwp kan chhuah a ngai a. Engvângin nge chu chu a harsat mai theih? A chhan chu, mize ṭha lo ṭhenkhatte chu thlâk danglam a harsat hle theih vâng a ni. Entîr nân, Bible chuan “mihring rilru ngaihtuahnate chu an naupan têt ata a sual” tih a sawi. (Gen. 8:21) A hnuaia thiltawnin a târ lan angin, baptisma chan hnuah pawh mize ṭha lote thunun tûr chuan theih tâwp chhuah zawm zêl a ngai ngei ang.

8-9. Engtin nge Stephen-a thiltawnin mihring hlui kan hlihthlâk zêl a ngai tih a târ lan?

⁸ Unau Stephen-a chuan a thinrimna thunun harsa a ti ṭhîn hle a. Ani chuan heti hian a sawi: “Baptisma ka chan hnuah pawh mi thinchhe tak ka nihna chu thunun tûrin ka beih zawm zêl a ngai a. Entîr nân, ṭum khat chu in tin kal rawngbâwlnaa ka chhuah laiin, ka motor-a radio rutu rûkru pakhat ka ûm a, ka ûm phâk ṭêp tihah chuan ka radio chu paihin a tlân bo ta a ni. Unaute hnêna ka radio ka hmuh lêt dân ka han hrilh chuan, kohhran upa pakhat chuan, ‘Stephen, rûkru chu ûm phain man ta la engtin nge i tih ang?’ tiin min zâwt a. Chu zawhna chuan remna siamtu ni tûra theih tâwp chhuah chhunzawm zêl tûrin min chêttîr a ni,” tiin. b

⁹ Stephen-a thiltawnin a târ lan angin, mize ṭha lo chu thunun theia kan inngaih hnuah pawh beisei loh takin a rawn lang chhuak leh thei a. Chutiang chu i chungah a thleng a nih chuan lunghnual mai lo la, Kristian nih tling lo angin inngai hek suh. Tirhkoh Paula pawhin: “Thil ṭha tih ka duh laiin sualna ka hnênah a lo awm ṭhîn,” tiin a sawi a ni. (Rom 7:21-23) Vaivut leh bawlhhlawhin kan in a tibâl leh ṭhîn angin, ṭha famkim lo Kristian zawng zawng hian mize ṭha lote kan do leh ṭhin a ngai a ni. Thianghlim taka awm reng tûr chuan ṭan kan lâk reng a ngai a. Chu chu engtin nge kan tih theih ang?

10. Engtin nge mize ṭha lote chu kan do theih ang? (1 Johana 5:14, 15)

¹⁰ Jehova’n a ngaithlain a ṭanpui ang che tih ring tlatin, a hnênah i mize ṭha lo thlâk harsa i tihte chu ṭawngṭaiin hrilh ang che. (1 Johana 5:14, 15 chhiar rawh.) Jehova’n i mize ṭha lote chu mak takin lâk bosak lo che mah se, chumi lama kîr leh lo tûr chuan a tichak thei che a ni. (1 Pet. 5:10) Chutih rualin, i mihring hlui zia tichhuak thei thilte ti lovin, i ṭawngṭaina milin thil ti ang che. Entîr nân,  mize ṭha lo paih bo i tum chawilârtu film en te, TV program en te, leh lehkhabu chhiarte chungchângah fîmkhur la. Chu bâkah, châkna ṭha lote chu ngaihtuah reng suh ang che.—Phil. 4:8; Kol. 3:2.

11. Mihring thara inthuam chhunzawm zêl tûrin eng rahbite nge kan rah theih?

¹¹ Mihring hlui chu hlîp thla tawh mah la, mihring thara inthuam chu thil pawimawh tak a ni. Chu chu engtin nge i tih theih ang? Jehova miziate chungchâng i zir hunah amah entawn chu thiltumah nei ang che. (Eph. 5:1, 2) Entîr nân, Jehova ngaihdamna chungchâng târ langtu Bible-a thilthlengte i chhiar hunah heti hian inzâwt ang che, ‘Mi dangte ka ngaidam em?’ Hun harsa tak tâwktute chunga Jehova’n khawngaihna a lantîr dân chungchâng i chhiar hunah, heti hian inzâwt ang che, ‘Ṭanpui ngai ka Kristian unaute chu chutiang chuan ka ngaihsak ve em? Chu chu ka thiltihin ka lantîr em?’ tiin. Mihring thara inthuamin i rilru a tharin siam chhunzawm zêl la, chutianga i tih lai chuan dawhtheihna nei ang che.

12. Engtin nge Stephen-a chuan Bible-in nun a thlâk danglam theihzia a tawn?

¹² Kan sawi tâk Stephen-a chuan zawi zawiin mihring tharin a inthuam tih a hre ta a. Ani chuan heti hian a sawi: “Baptisma ka chan aṭangin thinrim theihna dinhmun tam tak ka hmachhawn a. Min tihthinrim tumtute pumpelh dân leh kawng danga chutiang dinhmunte chinfel dân ka zir a ni. Ka nupui pawh tiamin, mi tam takin chutiang dinhmunte ka hmachhawn dân avângin min fak ṭhîn a. Keimah ngei pawhin mak ka inti hial ṭhîn. Ka miziaa chûng inthlâk danglamnate chu keima theihna vâng a ni lo tih ka hria. Chu aiin, Bible-in mite nun a thlâk danglam theihzia finfiahna a ni tih ka ring tlat zâwk a ni,” tiin.

13. Châkna ṭha nei tûrin engin nge min ṭanpui ang? (Galatia 5:16)

¹³ Galatia 5:16 chhiar rawh. Thil ṭha ti tûra kan beihnaa hlawhtling tûra min ṭanpui tûrin Jehova chuan a thlarau thianghlim phal takin min pe a. Pathian Thu kan zir hian thlarau thianghlim inthununtîr kan inphal tihna a ni. Inkhâwmnaa kan tel hian thlarau thianghlim kan dawng bawk. Chûng Kristian inkhâwmahte chuan keimahni ang bawka thil ṭha tih tuma nasa taka bei, kan unaute nên hun kan hmangho bawk a, chu chuan min tichak tak zet a ni. (Heb. 10:24, 25; 13:7) Tih tak zeta ṭawngṭaia Jehova kan pan a, kan chak lohnate hneh tûra a ṭanpuina dîla kan ṭawngṭai hian, ani chuan bei chhunzawm zêl thei tûrin a thlarau thianghlim min pe ang. Hêng thiltihte hian châkna ṭha lo chu a tibo kher lo mai thei, chutih rualin chûng châkna ṭha lote tihchâkna do tûrin min ṭanpui ang. Galatia 5:16-in a sawi angin, thlarauva awmte chuan ‘tisa châkna an zâwm lo vang.’

14. Engvângin nge châkna ṭha neih zawm zêl chu thil pawimawh tak a nih?

¹⁴ Thlarau lam thiltihte atâna hun duan ṭha kan nei tawh a nih chuan, chu hun duan vawn chhunzawm zêl leh châkna ṭhate neih zawm zêl chu kan tân thil pawimawh tak a ni. Engvângin nge? A chhan chu kan hmêlma pakhatin min beih reng vâng a ni a. Chu hmêlma chu thil dik lo ti tûra thlêmna hi a ni. Baptisma chan hnuah pawh kan pumpelh ngei ngai thil; pawisa khelh te, zu hman sual te, leh saruak lem leh thuziakte chuan min la hîp hle tih kan inhre mai thei a. (Eph. 5:3, 4) Ṭhalai Kristian unaupa pakhat chuan: “Ka do ngai thil harsa ber chu ka mipat puite îtna ka nei hi a ni a. Chu chu reh leh mai tûrah ka ngai a; mahse, min la tibuai reng a ni,” tiin a sawi.  I châkna ṭha lo neih chu a nasa hle a nih chuan, engin nge ṭanpui thei che?

15. Engvângin nge châkna ṭha lote chu “mihring tuar theih” a ni tih hriatnain min tihchak? (Milem en rawh.)

¹⁵ Châkna ṭha lo nasa tak i neih chu thunun tûra i bei a nih chuan, nangmah chauh i ni lo tih hre reng ang che. Bible chuan: “Mihring tuar theih ang chauh lo chu thlêmna rêng rêng in chungah a thleng ngai lo,” tiin a sawi. (1 Kor. 10:13a) Lehlin dang chuan he châng hi: “Mihringin thlêmna an tawh ṭhin tlângpui bâk in chungah a thleng ngai lo,” tiin a sawi ve bawk. He thu hi Korinth khuaa Kristian a hmei a pate tâna ziak a ni a. An zînga ṭhenkhat chu tûn hmain uirê te, mawngkawhur te, leh zu ruih hmangte an ni. (1 Kor. 6:9-11) Baptisma an chan hnuah, châkna ṭha lote chu an do a ngaih tawh loh i ring em? Chutiang chu a ni hauh lo vang. An zain hriak thih Kristian an ni tih chu a dik a; mahse, mihring ṭha famkim lo an la ni reng a ni. Eng emaw chângin, châkna ṭha lo an neihte chu an do a ngai ngei ang tih a chiang hle. Chu chuan min tichak tûr a ni. Engvângin nge? A chhan chu châkna ṭha lo eng pawh i do a nih chuan, chu chu tuemawin a lo do hneh tawh tih a târ lan avângin. Chuvângin, nang pawh ‘i unaute chungah chutiang tuarna chu a thleng ve a ni tih hriain, ring nghet takin’ i awm reng thei a ni.—1 Pet. 5:9.

16. Eng thil hlauhawm nge kan pumpelh ngai a, engvângin nge?

¹⁶ I harsatna tawh chu tu mahin an hre thiam thei ngai lo vang tih ngaihtuahna hlauhawm tak chu pumpelh rawh. Chutianga ngaihtuahna chuan i dinhmun chu beisei bo leh châkna ṭha lote do thei lo tûr anga inngaihna a neihtîr thei che a ni. Bible erawh chuan chutiangin a sawi lo. “Pathian zawng a rinawm a ni, ani chuan in tuar theih tâwk aliam chu thlêmna in tawh a phal lo vang; in tuar theihna tûrin thlêmna rualin tlân  chhuahna kawng a siam nghâl zâwk ang,” tiin a sawi zâwk a ni. (1 Kor. 10:13b) Chuvângin, kan châkna ṭha lo neih chu a nasa hle a nih pawhin, kan do hneh thei a. Jehova ṭanpuinain thil ṭha lote ti lo tûrin kan invêng thei a ni.

17. Châkna ṭha lote chu nei lo hulhual thei lo mah ila, eng nge kan thunun theih?

¹⁷ Hei hi hre reng rawh: Mihring ṭha famkim lo kan nih avângin, châkna ṭha lote neih tawh loh hulhual chu thil theih a ni lo tih hi. Mahse, châkna ṭha lote a lo chhuah hunah Josefa’n Potiphara nupui a tlân chhiatsan nghâl ang khân, keini pawhin kan do nghâl thei a ni. (Gen. 39:12) Châkna ṭha lote chu i tihpuitlin kher a ngai lo!

18-19. Kan rilru a thara siam tûra ṭan kan lâk rualin eng zawhnate nge kan inzawh theih?

¹⁸ Kan rilru a thara awmtîrnaah chuan Jehova duh zâwng nêna inmila kan ngaihtuahnate leh thiltihte siam zawm zêl a tel a. Chuvângin, mahni inbih chiang ziahin heti hian kan inzâwt tûr a ni: ‘Hun hmâwr tawh takah kan nung tih târ lang zâwngin thil ka ti em? Mihring thara inthuamnaah hma ka sâwn em? Tisa châkna anga thil ti tûra nawrna ka do hneh theih nân, Jehova thlarau ka inkaihhruaitîr em?’ tiin.

¹⁹ I inbih chian hunah ṭha famkim tûrin inbeisei lo la, hmasâwnna i neihteah lâwm zâwk ang che. Hmasâwn i ngaihna lai i hmu a nih pawhin, lunghnual mai lo la. Chu ai chuan, Philippi 3:16-a fuihna thu: “Engpawh ni sela, kan thlen chin aṭang khân hma i sâwn zêl ang u,” tih hi zâwm zâwk ang che. Chutianga i tih chuan, i rilru a thara siam zawm zêl tûra i ṭan lâkna chu Jehova’n mal a sâwm ang tih ring tlat ang che.