Tûk tina nun kawng chanchin pakhat chhiar ziah ṭhîn nupa tuak khat chuan: “Chûng an chanchinte chuan min tihlimin min va tichak tak êm! Chûngte chuan keini pawh dinhmun hrang hrang hnuaiah kan rinawm ve thei tih min hriat chhuahtîr a ni,” tiin an sawi. Chutiang bawkin, unaunu pakhat pawhin: “Chûng nun kawng chanchinte chuan min thlamuanin, min chêttîr bâkah, min tichak thei hle a ni. Kan unaute nun chu thiltumin a khat a, awmzia a nei hle bawk. An chanchinte chuan rawngbâwlnaa tam lehzuala tel duhna min neihtîrin, ka fate chu hunbi kima Jehova rawngbâwlnaa tel tûra fuih tûrin min ṭanpui a ni,” tiin a sawi.

Nun kawng chanchinte chuan thiltum ṭha tak ûm tûr te, mize ṭha lo hneh tûr te, leh hlim tak leh inrintâwkna nêna fiahna khirh tak tak hmachhawn tûrtein a ṭanpui thei che a ni. Chûng nun kawng chanchinte chu khawiah nge i hmuh theih ang?

• Kan website jw.org, a nih loh leh JW Library® chhûnga awm “Jehova Thuhretute Nun Kawng Chanchin,” tih hnuaia thuziak hrang hrangte chu en ang che.

• Vênnainsâng ONLINE LIBRARY,^™ a nih loh leh Watchtower Library-ah “Jehova Thuhretute Nun Kawng Chanchin,” tih chu zawng rawh.