ZIR TUR THUZIAK 4
Jehova’n Hriatrengna Hmang Tûra Theih Tâwp Kan Chhuahna Mal A Sâwm
“Mi hriat reng nân hei hi ti ṭhîn rawh u.”—LK. 22:19.
HLA 19 Lalpa Zanriah
THLIR LAWKNA a
1-2. Engvângin nge kum tin Hriatrengnaa kan tel?
KUM 2,000 vêl kaltaah khân, Isua chuan kan tân a nun hlânin chatuana nunna kawng a hawng a. A thih hma zân khân, a hnungzuitute chu chhang leh uain hmanga hun serh pângngai tak neiin, a hmangaihna thiltih chu hre reng tûrin thu a pe a ni.—1 Kor. 11:23-26.
2 Isua kan hmangaih êm avângin a thupêk chu kan zâwm a. (Joh. 14:15) Kum tin Hriatrengna hun chhûngin, a thihna awmzia ṭawngṭaina nêna ngun taka ngaihtuahin kan tâna a thiltihte kan ngaihhlutzia kan lantîr a ni. He hun pawimawh taka mi a tam thei ang ber tel tûra sâwmin, tam leh zualin rawngbâwlnaah hlim takin kan tel a. Chu bâkah, Hriatrengnaa tel tûrin eng thil mah indâltîr loh kan tum tlat bawk.
3. He thuziakah hian eng nge kan sawiho vang?
3 He thuziakah hian Isua thih Hriatrengna hmang tûra Jehova mite’n theih tâwp an chhuahna kawng thum kan sawiho vang: (1) Isua’n ti tûra a zirtîr anga Hriatrengna hman, (2) Hriatrengnaa tel tûra mi dangte sâwm, leh (3) dinhmun harsa takte hmachhawn chung pawha Hriatrengna hman.
ISUA’N TI TURA A ZIRTIR ANGA HRIATRENGNA HMAN
4. Kum tinin Hriatrengna inkhâwmah eng thutakte nge târ lan a nih a, engvângin nge chûng thutakte chu kan ngaihhlut ang? (Luka 22:19, 20)
4 Kum tinin Hriatrengna inkhâwmah, zawhna ṭhenkhat chiang taka chhângtu Bible ṭanchhan thusawi kan ngaithla ṭhîn a. Mihringte’n tlanna kan mamawh chhan leh mi pakhat thihnain mi tam tak a chhandam theih dânte kan zir a. Chhang leh uainin a entîr leh tute’n nge eiin in ang tihte hriatnawntîr kan ni. (Luka 22:19, 20 chhiar rawh.) Chu bâkah, lei lam beiseina neite’n an dawn tûr malsâwmnate chu kan chhût ngun bawk. (Is. 35:5, 6; 65:17, 21-23) Hêng thu takte hi kan ngaihlu hle tûr a ni. Mi tlûklehdingâwn tam takte chuan hêng thilte hi an hre lo va, Isua inthawina hlutzia pawh an hre thiam lo bawk. Anni chuan a thih Hriatrengna chu a hnungzuitute hnêna ti tûra a zirtîr angin an hmang lo a ni. Engvângin nge?
5. Tirhkoh tam zâwkte thih hnuah, engtin nge mi tam takin Isua thih hriatrengna chu an hman ṭan?
5 Isua tirhkoh a tam zâwkte an thih hnu lawkah, kohhranah Kristian derte an rawn awm ṭan a. (Mt. 13:24-27, 37-39) Anni chuan ‘zirtîrhote an hnêna pakaitîr tûrin thu hran’ an sawi a ni. (Tirh. 20:29, 30) Kristian derte’n ‘thu hran an sawite’ zînga pakhat, a hnua an zirtîr ṭan tâk chu, Bible sawi angin Isua chuan a taksa chu ‘mi tam tak sualte kalpui tûrin vawi khatah’ a hlân lo va, chuvângin a inthawina chu tih nawn fo tûr a ni tih hi a ni. (Heb. 9:27, 28) Tûn laia mi tam tak pawhin chu zirtîrna dik lo chu an ring a. “Mass” tia an koh tûk tin deuhthawa an neih ṭhin chu hmang tûrin biak inah an kal khâwm ṭhîn a ni. b Sakhaw pâwl danga mite chuan, chu aia khât zâwkin Isua thih hriatrengna chu an hmang a; mahse, an pâwla mi a tam zâwkte chuan Isua inthawina awmzia an hre chiang lo. Mi ṭhenkhatin heti hian an ngaihtuah mai thei, ‘Isua thihna avângin ka sualte ngaihdam a ni thei tak tak ang em?’ tiin. Engvângin nge chu zawhna chu an zawh? Dinhmun ṭhenkhatah chuan, Isua inthawinain sual ngaihdamna a thlen thei tih ringhleltute thununa an awm vâng a ni. Engtin nge Isua hnungzuitu dik takte’n Isua inthawina awmzia leh a thih Hriatrengna hman dân dik hre tûra mite an ṭanpui?
6. Kum 1872-ah, Bible zirlai ho khatin eng thu tâwp nge an siam?
6 Kum zabi 19-na tâwp lamah chuan, Charles Taze Russell-a kaihhruai Bible zirlai ho khat chuan Pathian Lehkha Thu chu ngun takin an zir ṭan a. Isua inthawina hlutna leh a thih hriatrengna hman dân tûr chungchânga thutak hriat an duh a ni. Tichuan, kum 1872-ah Isua’n mihring zawng zawngte tân tlanna a pe ngei a ni tih Bible ṭanchhanin thu tâwp an siam thei ta a. Anni chuan an thu hriatte chu an ngawih bopui mai lo. Chu aiin, lehkhabu te, chanchinbu te, leh magazine-te hmangin mite hnênah an theh darh zâwk a. A hnu lawkah, kum zabi khatnaa Kristiante entawnin, Hriatrengna hmang tûrin kum khatah vawi khat an inhmukhâwm ṭan nghâl a ni.
7. Engtin nge Bible zirlai hmasate zir bingna chu kan hlâwkpui?
7 Kum tam tak kaltaa chûng Kristiante’n zir bingna an lo neih chu tûn laiah kan hlâwkpui a ni. Engtin nge? Pathian Jehova chuan Isua inthawina awmzia leh chumiin mihring zawng zawngte tâna a tihsak tûr hre thiam tûrin min ṭanpui a. (1 Joh. 2:1, 2) Bible-in Pathian tilâwmtu mihringte tân beiseina pahnih—mi ṭhenkhat tân vâna thih theih lohna nun leh mi maktaduai tam takte tân leia chatuana nun beiseina—a pe tih kan hre tawh bawk. Min hmangaihna a nasatzia leh a mi mal taka Isua inthawina kan hlâwkpui dân kan ngaihtuah hian Jehova kan hnaih lehzual a. (1 Pet. 3:18; 1 Joh. 4:9) Tûn hmaa kan unau rinawmte angin, keini pawhin Isua’n a hnungzuitute hnêna hman dân tûr a zirtîr anga, Hriatrengna kan hmannaa lo tel ve tûrin mi dangte kan sâwm a ni.
HRIATRENGNAA TEL TURA MI DANGTE SAWM
Hriatrengna sâwmna campaign-a a kima tel tûrin eng nge i tih theih? (Paragraph 8-10-na en rawh) e
8. Hriatrengna inkhâwma lo tel tûra mi dangte sâwmnaah Jehova mite’n eng thilte nge an lo tih tawh? (Milem en rawh.)
8 Jehova mite chuan hmân aṭang tawhin, Hriatrengnaa lo tel tûrin mi dangte an sâwm ṭhîn a. Kum 1881 aṭang daih tawh khân, United States-a unaute chu Allegheny, Pennsylvania-a mi mal inah, he hun pawimawh tak hmang tûr hian sâwm an lo ni tawh a ni. A hnuah, kohhran tinte chuan anmahni kohhran ṭheuhvah Hriatrengna chu an hmang a. Kum 1940, March thlaah thuchhuahtute chu an rawngbâwlna biala tuina lantîrtute an sâwm theih thu hriattîr an ni. Kum 1960-ah a vawi khatna atân, kohhrante hnênah sâwmna lehkha sem chhuah tûr Bethel-in a pe a. Chumi hnu aṭang chuan, Hriatrengna sâwmna chu tlûklehdingâwn têl sem chhuah a ni tawh. Engvângin nge mi dangte sâwm tûra hun leh tha tam tak kan sên?
9-10. Hriatrengna inkhâwma lo tel tûra theih tâwp chhuaha mite kan sâwmna chu tuin nge hlâwkpui? (Johana 3:16)
9 Hriatrengna inkhâwm kan hmannaa lo tel ve tûra mi dangte kan sâwm chhan pakhat chu; a vawi khatna atâna lo inkhâwmte’n Jehova leh Isua’n kan tâna an thiltihte chungchânga thutak zir se tih kan duh vâng a ni. (Johana 3:16 chhiar rawh.) Hriatrengna inkhâwma an thil hmuh leh hriatte chuan anni chu zir belh tûrin leh Jehova chhiahhlawh rawn ni tûra a chêttîr kan beisei a. Chu bâkah, Hriatrengna inkhâwm chu mi dangte pawhin an hlâwkpui bawk.
10 Jehova rawngbâwlnaa tel tawh lote pawh kan sâwm a. Chutianga kan tih chhan chu, Pathianin a la hmangaih reng tih hriatnawntîr kan duh vâng a ni. Mi tam takin kan sâwmna an pawm a, an rawn inkhâwm kan hmuh hian kan lâwm hle. Hriatrengna inkhâwma an telna chuan tûn hmaa Jehova rawng an bâwl laia an hlimzia a hriat chhuahtîr a. Monica-i chungchâng hi han ngaihtuah teh. c COVID-19 hripui lên chhûngin ani chu thuchhuahtu a rawn ni leh a. Kum 2021 Hriatrengna inkhâwma a tel zawhah, heti hian a sawi: “He Hriatrengna hi ka tân chuan a danglam bîk khawp mai. Kum 20 chhûnga a vawi khatna atân mi dangte hnênah thu ka hrilin, Hriatrengna inkhâwma lo tel tûrin ka sâwm thei a ni. Jehova leh Isua’n ka tâna an thiltihte avânga ka lâwm êm avângin mi dangte sâwmnaah theih tâwp ka chhuah a ni,” tiin. (Sâm 103:1-4) Mite’n kan sâwmna an pawm emaw, pawm lo emaw pawh ni se, Jehova’n kan thawhrimna a ngaihlu tih hriain, Hriatrengna inkhâwma lo tel tûrin mite chu taima takin kan sâwm a ni.
11. Engtin nge Jehova’n Hriatrengna inkhâwma lo tel tûra theih tâwp chhuaha mite kan sâwmna chu mal a sâwm? (Hagaia 2:7)
11 Hriatrengna inkhâwma lo tel tûra theih tâwp chhuaha mite kan sâwmna chu Jehova’n nasa takin mal a sâwm a. Kum 2021 khân, COVID-19 hripui avânga khuahkhirhnate a awm chung pawhin, Hriatrengna inkhâwma tel zât chu mi 21,367,603 kan ni. Chu chu khawvêl puma Jehova Thuhretute awm zât lêt hnih leh a chanve deuhthaw hial a ni! Mahse, Jehova chuan a tam lam ringawt a ngaihven lo. Mi mal tinte a ngaihven zâwk a ni. (Lk. 15:7; 1 Tim. 2:3, 4) Kan sâwmna hna chu mi rilru ṭhate zawn nâna min ṭanpuitu atân Jehova’n a hmang tih kan ring tlat a ni.—Hagaia 2:7 chhiar rawh.
DINMHUN HARSA TAKTE HMACHHAWN CHUNG PAWHA HRIATRENGNA HMAN
Jehova’n hriatrengna hmang tûra theih tâwp kan chhuahna mal a sâwm (Paragraph 12-na en rawh) f
12. Eng dinhmunte’n nge kan tân Hriatrengna hman tiharsa thei? (Milem en rawh.)
12 Isua chuan ni hnuhnûng chhûngin dinhmun harsa tak tak; chhûngte dodâlna te, tihduhdahna te, indona te, hri lêng te, leh thil dang tam tak kan hmachhawn dâwn tih a sawi lâwk a. (Mt. 10:36; Mk. 13:9; Lk. 21:10, 11) A châng chuan, hêng dinhmunte hian kan tân Isua thih Hriatrengna hman chu a tiharsa a ni. Chûng harsatnate hneh tûr chuan kan unaute’n eng nge an tih a, Jehova’n anni chu engtin nge a ṭanpui?
13. Artem-a lung ina a tân laia Hriatrengna hmang tûra a huaisenna leh a tumruhna chu engtin nge Jehova’n mal a sâwm?
13 Lung in tânna. An rinna avânga lung ina tâng kan unaute chuan Isua thih Hriatrengna hmang tûrin an tih theih apiang an ti a. Artem-a thiltawn hi han ngaihtuah teh. Kum 2020 Hriatrengna hun chhûng khân, ani chu mi tâng dang panga nên pindan pakhat, square-meter 17 (sq-ft-183)-a zauvah dah a ni a. Tân ina a tâng chung pawhin, Hriatrengna entîrna atâna hman tûr thilte chu a nei thei a, ama tâna Hriatrengna thusawi pawh neih a tum bawk a ni. Mahse, a tânpuite chuan mei an zu nasain, ṭawngkam bawlhhlawh an hmang nasa hle. Eng nge a tih tâk? Dârkâr khat lek ṭawngkam bawlhhlawh hmang lo tûr leh mei zu lo tûrin anni chu a ngên a. A beisei loh takin, a tânpuite chuan Hriatrengna hun chhûnga mei zûk loh leh ṭawngkam bawlhhlawh hman loh chu an remti a ni. Artem-a chuan, “Hriatrengna chungchâng hrilh ka tum a,” tiin a sawi a. An ngaihthlâk duh loh thu sawi mah se, Artem-a’n Hriatrengna a hman dân an hmuha an hriat hnuah chuan chumi chungchâng chu chipchiar takin an zâwt a ni.
14. COVID-19 hripui a lêng chung pawhin, Hriatrengna hman a nih theih nân eng ang hma lâknate nge neih a nih?
14 COVID-19 hripui lêng. He hripui lêng avâng hian Jehova mite chu Hriatrengna hmang tûrin hmaichhanah an inhmu thei lo va. Mahse, chu chuan Hriatrengna an hmanna tûr a dâl lo. d Internet hmang thei kohhrante chuan videoconference-in Hriatrengna an hmang a. Mahse, Internet hmang thei lo mi maktaduai tam takte chuan engtin nge an hman? Ram ṭhenkhatah chuan TV emaw, radio emaw aṭanga thusawi pe chhuak tûra ruahmanna siam a ni a. Chu bâkah, branch-te chuan hmun kilkhâwra awmte pawhin Hriatrengna an hman theih nân thusawi chu ṭawng 500 chuangin a lo record-sa a. Unaupate chuan aw thunsa chu chumi hmuna awm unaute hnênah an va pe a ni.
15. Bible zirlai Sue-i thiltawn aṭangin eng nge i zir?
15 Chhûngte dodâlna. Mi ṭhenkhat tân Hriatrengna hmang tûra harsatna lian ber chu chhûngte dodâlna a ni a. Bible zirlai Sue-i thiltawn hi lo ngaihtuah ta ila. Kum 2021 Hriatrengna thlen hma nîah, Sue-i chuan amah Bible zirpuitu hnênah a chhûngte’n an dodâl nasat êm avângin Hriatrengna inkhâwma a tel theih loh tûr thu a hrilh a. Bible zirpuitu chuan Luka 22:44 a chhiar a. Tichuan, a hnênah harsatnate kan hmachhawn hunah, ṭawngṭaia Jehova panin leh amaha rinna pumhlûm nghatin, Isua entawn tûr siam kan zui tûr a ni tih a hrilh a ni. A tûkah, Sue-i chuan Hriatrengna chhang leh uain a siam a, jw.org-a a bîk taka tihchhuah Morning Worship program a en bawk. Chumi tlai chuan, a room-ah amah chauhva awmin Hriatrengna thusawi chu phone aṭangin a ngaithla a. A hnuah Sue-i chuan amah Bible zirpuitu hnênah heti hian a ziak a ni: “Nimina min fuihna khân min tichak tak zet. Hriatrengna inkhâwma tel tûrin ka tih theih apiang ka ti a, Jehova’n min ṭanpui tak zet a ni. Ka hlimzia leh lâwmzia hi ka sawi chhuak thiam lo!” tiin. Chutiang dinhmuna i ding ve a nih chuan Jehova’n a ṭanpui theih che i ring em?
16. Hriatrengnaa tel tûra theih tâwp kan chhuahna chu Jehova’n mal a sâwm ang tih engvângin nge kan rin tlat theih? (Rom 8:31, 32)
16 Isua thih Hriatrengna hmang tûra kan ṭan lâknate chungah Jehova chu a lâwm hle a. A thil min tihsak tawhte chunga lâwmna kan lantîr hian mal min sâwm ang tih kan chiang thei a ni. (Rom 8:31, 32 chhiar rawh.) Chuvângin, kumin Hriatrengnaa tel tûr leh Hriatrengna hun chhûnga thlarau lam thiltihtea tam lehzuala tel tûrin kan tih theih apiang tih i tum tlat ang u.
HLA 18 Tlanna Avânga Lâwmna
a Kum 2023, Thawhlehni, April 4-ah khawvêl puma mi maktaduai tam takte chuan Krista thih Hriatrengna an hmang dâwn a. Mi tam tak tân chuan an vawi khat telna a ni ang. Jehova rawng bâwl tawh lote leh kum eng emaw zât Hriatrengnaa tel tawh lote pawh an rawn tel ang. Chumia tel tûrin mi ṭhenkhat chuan harsatna eng emaw tak an paltlang a ngai a. I dinhmun chu eng pawh ni se, Hriatrengnaa tel tûra theih tâwp i chhuahna chuan Jehova a tilâwm ang tih i chiang thei a ni.
b Chûng sakhaw vuantute chuan hetianga an hman chhûng hian, chhang leh uain chu Krista taksa leh thisenah a chang niin an ring a. He sakhaw thiltiha tuemaw a tel apiangin Isua taksa leh thisen chu hlan nawn ziah angin an ngai bawk a ni.
c Hming ṭhenkhat chu thlâk a ni.
d Kan website jw.org-a thuziak, a thupui “2021 Hriatrengna Hmanna,” tih chu en bawk rawh.
